নিয়মীয়া বাৰ্তা, ২৬ ডিচেম্বৰঃ ‘‘মোক বিভিন্ন ফোন নম্বৰৰ পৰা ভাবুকি প্রদান কৰি ‘কা’ সন্দর্ভত উত্তেজিত ভাষণ প্রদান কৰিবলৈ বাধা প্রদান কৰিছে একাংশই ৷ মই কি গীত গাম, মই বিপ্লৱী শিল্পী, মোৰ তাত সেই দেশপ্রেমমূলক গীতবোৰেই আছে, মই সেয়াই গাম৷ মই ৰাইজৰ লগত আছো৷ ইয়াৰ বাবে জে’ল খাটিবলৈ মই কুণ্ঠবোধ নকৰোঁ৷ মোৰ কোনো ভয় নাই৷ জাতিটোৰ বিপদৰ সময়ত মই গীত গাই আহিছোঁ, মই কেতিয়াও ক্ষান্ত নহওঁ ৷” -ঢেকীয়াজুলিৰ কাৱৈমাৰীত বুধবাৰে নাগৰিকত্ব সংশোধনী আইন বাতিলৰ দাবীত অনুষ্ঠিত হয় এখন বিশাল গণসমাৱেশ উপস্থিত থাকি এই মন্তব্য বিশিষ্ট সংগীত শিল্পী বিপিন চাউদাঙৰ ।
আনহাতে চৰকাৰে শিল্পীসকলক ৫০ হাজাৰ টকা দি যি শিল্পী পেন্সন দিয়াৰ ব্যৱস্থা গ্রহণ কৰিছে মই চৰকাৰক কওঁ, ৰাজ্য চৰকাৰে ‘কা’বাতিল কৰক, মই চৰকাৰক এক লাখ টকা দিম৷’ বিশিষ্ট সংগীত শিল্পী বিপিন চাউদাঙে বিশাল গণসমাৱেশত এনেদৰে মন্তব্য কৰে৷
গণসমাৱেশত বিশিষ্ট সংগীত শিল্পী বিপিন চাউদাঙৰ কথা–সুৰ–কণ্ঠৰ এক নতুন গীত ‘জাতি মাটিৰ গান’ উন্মোচন কৰা হয়৷ গীতটি উন্মোচন কৰে বিশিষ্ট সংগীত শিল্পী মানস ৰবীন, সাংবাদিক দেৱজিৎ ভূঞা, সদৌ অসম সাংবাদিক সন্থাৰ সভাপতি পংকজ নাথে৷ গীতটিৰ সংগীত ব্যৱস্থাপনা কৰিছে অৰূপ দত্তই৷
দহ সহস্রাধিক ৰাইজ উপস্থিত থকা বিশাল গণসমাৱেশত বিশিষ্ট সংগীত শিল্পী মহেন্দ্র হাজৰিকা, মানস ৰবীন উপস্থিত হৈ বিপ্লৱী গীত পৰিৱেশন কৰি ৰাইজক উদ্বুদ্ধ কৰে৷