নিয়মীয়া বাৰ্তা, ২০ নৱেম্বৰঃ অহা ২০২০ চনত মুঠ ৩৫ দিন চৰকাৰী বন্ধ আৰু ৩১ দিন সীমিত বন্ধৰ দিন হিচাপে অনুমোদন জনাইছে অসম মন্ত্ৰীসভাৰ কেবিনেট বৈঠকে । মঙলবাৰে জনতা ভৱনত মুখ্যমন্ত্ৰী সৰ্বানন্দ সোণোৱালৰ অধ্যক্ষতাত অনুষ্ঠিত কেবিনেট বৈঠকে অহা ২০২০ চনৰ চৰকাৰী বন্ধ আৰু সীমিত বন্ধৰ সূচীৰ অনুমোদন জনায় । চলিত বৰ্ষৰ দৰে ২০২০ চনতো বিভিন্ন উৎসৱ, অনুষ্ঠান, দিৱস আদিৰ মুঠ ৩৫ দিনৰ চৰকাৰী বন্ধৰ দিন হিচাপে চিহ্নিত কৰা হৈছে । সেইদৰে নতুন বছঠৰটোত বিভিন্ন উৎসৱ-অনুষ্ঠান, দিৱস আদিত মুঠ ৩১ দিন সীমিত বন্ধৰ দিন হিচাপে অনুমোদন জনোৱা হৈছে ।
আনহাতে ৰাজ্য চৰকাৰে ছোৱালীৰ বিয়াৰ সময়ত এতোলাকৈ সোণ দিয়াৰক বাবে গ্ৰহণ কৰা ‘অৰুন্ধতী’ আঁচনিতো কেবিনেটে অনুমোদন জনায় । এই সম্পৰ্কত ডঃ হিমন্ত বিশ্ব শৰ্মাই কয় যে আঁচনিখনত কিছু কাৰিকৰী সংশোধনী আছে । বুধবাৰে তেওঁ এখন সংবাদমেল যোগে এই বিষয়ে সদৰী কৰিব ।