গুৱাহাটী, ২২ নৱেম্বৰঃ এটি সুন্দৰ প্রেম কাহিনীক আধাৰ হিচাপে লৈ বলীউদৰ জনপ্রিয় প্রযোজক–পৰিচালক অনুৰাগ কাশ্যপৰ দ্বাৰা নির্মিত ‘আমিষ’ ছবিখন শুকুৰবাৰে ৰাজ্যৰ কেইবাটাও ছবিগৃহত মুক্তি লাভ কৰিব ৷ অনুৰাগ কাশ্যপৰ দ্বাৰা নির্মিত ছবিখনৰ কাহিনী চিত্রনাট্য হ’ল ‘কথা নদী’ৰ যোগেদি ২০১৬ চনত ৰাষ্ট্রীয় পুৰস্কাৰ লাভ কৰিবলৈ সক্ষম হোৱা ভাস্কৰ হাজৰিকাৰ ৷ শুকুৰবাৰে ৰাজ্যৰ লগতে ভাৰতৰ কেইবাটাও ছবিগৃহত মুক্তি পাব লগা আমিষত অভিনয় কৰিছে নৱাগতা শিল্পী লীমা দাস, অর্ঘদ্বীপ বৰুৱা, মিতালী দাস, সাগৰ সৌৰভ, মানস কুমাৰ দাস আদিয়ে ৷ ৱিছবেৰী ফিল্মছৰ বেনাৰত ছবিখনৰ প্রযোজনা হ’ল পুনং দেউল আৰু শ্যাম বৰাৰ ৷ উল্লেখ্য যে চলিত বর্ষৰ আৰম্ভণিতে আমেৰিকা যুক্তৰাষ্ট্রৰ নিউয়র্ক চহৰত অনুষ্ঠিত ত্রিবেকা চলচ্চিত্র মহোৎসৱত ছবিখনৰ ৱর্ল্ড প্রিমিয়াৰ সম্পন্ন কৰা হৈছিল ৷ সেই মহোৎসৱত ছবিখনে শ্রেষ্ঠ ছবিকে ধৰি মুঠ পাঁচটা বিষয়ত মনোনয়ন লাভ কৰিবলৈ সক্ষম হৈছিল ৷
একেদৰেই অলপতে চিংগাপুৰত অনুষ্ঠিত দক্ষিণ এছিয়া আন্তঃৰাষ্ট্রীয় চলচ্চিত্র মহোৎসৱতো ‘আমিষ’ৰ হৈ শ্রেষ্ঠ নির্দেশক ভাস্কৰ হাজৰিকা, শ্রেষ্ঠা অভিনেত্রী হিচাপে লীমা দাসে দুটাকৈ পদক অর্জন কৰিবলৈ সক্ষম হৈছিল ৷ একেদৰেই মুম্বাই ছবি মহোৎসৱৰ লগতে মেলবর্ণ, চিকাগো আদিতো প্রদর্শিত ছবিখনে দর্শকৰ যথেষ্ট সমাদৰ বুটলিবলৈ সক্ষম হয় ৷ ইতিমধ্যে নতুন অসমীয়া ছবি ‘আমিষ’ সন্দর্ভত বলীউডৰ প্রখ্যাত প্রযোজক–পৰিচালক অনুৰাগ কাশ্যপে ঘোষণা কৰিছে যে ‘আপোনালোকে ‘আমিষ’ৰ জৰিয়তে এখন অনন্য ছবি উপভোগ কৰিবলৈ সক্ষম হ’ব ৷ ছবিখনৰ জৰিয়তে উত্তৰ–পূব ভাৰতৰ এক নিটোপল কাহিনী উপস্থাপন কৰা হৈছে ৷ সেয়ে এটা সুন্দৰ প্রেমৰ কাহিনীৰ ভিত্তিত নির্মিত ছবিখন অসমৰ সর্বস্তৰৰ দর্শকক উপভোগ কৰিবলৈয়ো বলীউড প্রযোজক–পৰিচালক অনুৰাগ কাশ্যপে আহ্বান জনাইছে ৷ আনহাতে এই সন্দর্ভত মন্তব্য কৰি ভাস্কৰ হাজৰিকাই কয় –‘অনুৰাগ কাশ্যপৰ দ্বাৰা ছবিখন উপস্থাপন কৰিবলৈ পোৱাতো আমাৰ ইউনিটৰ সকলোৰে বাবে এক সৌভাগ্যৰ কথা ৷