নিয়মীয়া বার্তা,৭ ডিচেম্বৰঃ এগৰাকী পাষাণ মাতৃয়ে নিজ গর্ভত দহ মাহ দহ দিন লালন কৰাৰ পাছত কিমান পাষাণ হৃদয়ৰ হ’লে গর্ভজাত সদ্যোজাত দেৱশিশুক নিজ হাতে হত্যা কৰিব পাৰে ? এনে কার্য কৰোঁতে এবাৰো বাৰু দেৱশিশুটিৰ নিষ্পাপ মুখখনিয়ে সেই মাতৃগৰাকীক নিষ্ঠুৰ হোৱাৰ পূর্বে ভাবিবলৈ বাধ্য নকৰিবনে ? জন্মৰ পিছত নিজৰ বুকুৰ স্তন পান কৰোৱাই থকা এটি ২৭ দিনীয়া দেৱশিশুক মাতৃয়ে হত্যা কৰি শৌচাগাৰৰ গাঁতত পেলাই থৈ অহা এক অমানুষিক কাণ্ডই জোকাৰি যায় ডিব্রুগড জিলাৰ চাউলখোৱা ঘৰবন্দীচুক এলেকাক ৷ দেখিলেই বুকু কঁপি যোৱা এক ভয়াৱহ দৃশ্য ৷ নিজৰ বুকুৰ মাজৰ পৰা উলিয়াই আনি ২৭ দিনীয়া এটি দেৱশিশুক হত্যা কৰি শৌচাগাৰত পেলাই দিলে জন্মদাত্রী মাতৃয়ে ৷ এই পাষাণ মাতৃগৰাকীৰ নাম মজিদুন নেছা ৷ ডিব্রুগড জিলাৰ লাহোৱাল আৰক্ষী থানাৰ অন্তর্গত চাউলখোৱা ঘৰবন্দীচুকৰ চাজিদুল আলীৰ পত্নী মজিদুন নেছাই বৃহস্পতিবাৰে নিশা পৰিয়ালৰ আটাইবোৰ সদস্য শুই থকাৰ সময়ত এই নৃশংস কাণ্ড সংঘটিত কৰে ৷ শুকুৰবাৰে আৰক্ষীৰ জেৰাত এই কথা প্রকাশ কৰিছে পাষাণ মাতৃ মজিদুনে ৷ ঘটনাৰ বিৱৰণী অনুসৰি, নিশা মজিদুনে শুই থকা অৱস্থাত ক’লা কাপোৰ পৰিহিত কোনো লোকে তেওঁক ডিঙি চেপি ধৰা বুলি শোৱাপাটীতে ছটফটাই কাষতে শুই থকা স্বামী চাজিদুলক জানিবলৈ দিয়ে ৷ সেই অনুসৰি চাজিদুলেও বিছনাৰ পৰা উঠি আহি পত্নীক চোৱা–চিতা কৰোঁতেই চকুত পৰে যে পত্নীৰ কাষত একমাত্র জী ২৭ দিনীয়া মাহিৰা নাই ৷ তেতিয়াই ঘৰখনত একপ্রকাৰ লাগে হুৱাদুৱা ৷ আনহাতে, শুকুৰবাৰে পুৱা আৰক্ষীয়ে ঘটনা সন্দর্ভত পৰিয়ালৰ আটাইকেইজনক আটক কৰি সোধা–পোছা কৰাত প্রকৃত সত্য পোহৰলৈ আহে ৷ মানৱতাক জোকাৰি যোৱা এই নৃশংস কাণ্ডই সমগ্র ডিব্রুগড জিলাতে তীব্র চাঞ্চল্যৰ সৃষ্টি কৰিছে ৷ আৰক্ষীয়ে দেৱশিশুটিৰ পিতৃ চাজিদুল আলী, বৰদেউতাক ইদুল আলী, ককাক সুভান আলী আটক কৰে ৷