নিয়মীয়া বাৰ্তা, ২১ নৱেম্বৰঃ ডিফু মেডিকেল কলেজত ফেকাল্টী হিচাপে যোগদান কৰা চিকিৎসকসকলৰ বাবে সুখবৰ । এতিয়াৰে পৰা তেওঁলোকক ২৫ শতাংশ বিশেষ উদগনিমূলক ভাট্টা অতিৰিক্তভাৱে প্ৰদানৰ লগতে তেওঁলোকৰ চাকৰিৰ কাৰ্যকাল পাঁচ বছৰ বৃদ্ধি হ’ব । বুধবাৰে জনতা ভৱনত আয়োজিত এখন সংবাদমেলত স্বাস্থ্যমন্ত্ৰী ড০ হিমন্ত বিশ্ব শৰ্মাই এই কথা প্ৰকাশ কৰে । ড০ শৰ্মাই জানিবলৈ দিয়া মতে , মঙলবাৰে অনুষ্ঠিত অসম মন্ত্ৰীসভাৰ কেবিনেট বৈঠকে ডিফু মেডিকেল কলেজত ফেকাল্টী হিচাপে যোগদান কৰাসকলক মূল দৰমহাৰ ২৫ শতাংশ বিশেষ ভাট্টা হিচাপে দৰমহাৰ সৈতে অতিৰিক্তভাৱে প্ৰদানৰ সিদ্ধান্ত গ্ৰহণ কৰে । তদুপৰি মেডিকেল কলেজখনৰ ফেকাল্টীসকলৰ চাকৰিৰ পৰা অৱসৰৰ বয়স ৬৫ বছৰৰ পৰা ৭০ বছৰলৈ বৃদ্ধিৰ প্ৰস্তাৱটো কেবিনেটে অনুমোদন জনায় । সেইদৰে চাকৰি জীৱনত তিনিবছৰ ডিফু মেডিকেল কলেজত সেৱা আগবঢ়োৱাসকলৰ অৱসৰৰ বয়স ৬৭ বছৰলৈ বৃদ্ধিৰো সিদ্ধান্ত গ্ৰহণ কৰে । এই বিশেষ সুবিধা ফেকাল্টীসকলৰ মাজতেই সীমাবদ্ধ ৰখাৰ উল্লেখ কৰি মন্ত্ৰী ড০ শৰ্মাই কয় যে মেডিকেল কলেজখনৰ বাকী পদসমূহৰ ভিতৰত ৭০ শতাংশত স্থানীয় যুৱক-যুৱতীক নিয়োগ কৰা হৈছে । এতিয়ালৈ মেডিকেল কলেজখনত ৫৮ গৰাকী ফেকাল্টী নিয়োগ কৰা হৈছে । ইয়াৰে ৫৭ গৰাকীয়ে ইতিমধ্যে চাকৰিত যোগদান কৰিছে । ডিফু মেডিকেল কলেজৰ ফেকাল্টীক বিশেষ সুবিধা দিয়াৰ প্ৰসংগত সাংবাদিকৰ প্ৰশ্নৰ উত্তৰত মন্ত্ৰী ড০ শৰ্মাই কয় যে ডিফুৰ দৰে ঠাইত মেডিকেল এখন স্থাপন কৰাটো ডাঙৰ প্ৰত্যাহ্বান । সেয়ে তেনে ব্যৱস্থা কৰা হৈছে ।