নিয়মীয়া বাৰ্তা, ৩০ জানুৱাৰীঃ ব্রহ্মপুত্রৰ দুয়োপাৰ জিলিকাই তোলাত অনবদ্য বৰঙণি আগবঢ়োৱা সেৱাৰ বাবে প্রাইড ইষ্ট এণ্টাৰটেইনমেণ্ট লিমিটেডৰ ‘নিয়মীয়া বার্তা’ আৰু ‘ৰামধেনু’ চেনেলক বুধবাৰে বিজু ফুকন স্বীকৃতি বঁটা, ২০১৯ প্রদান কৰে ৷ ৰয়েল এফাইৰছৰ উদ্যোগত গুৱাহাটীৰ নেডফি হাউছৰ গাম্ভীর্যপূর্ণ অনুষ্ঠানত ‘নিয়মীয়া বার্তা’ৰ হৈ বঁটা গ্রহণ কৰে প্রাইড ইষ্ট এণ্টাৰটেইনমেণ্ট লিমিটেডৰ বাণিজ্যিক মুৰব্বী পঞ্চম চন্দই ৷ ৯ বছৰীয়া সফল পৰিক্রমাৰে জনপ্রিয় হৈ উঠা মিউজিক চেনেল ‘ৰামধেনু’ৰ হৈ বঁটা গ্রহণ কৰে চেনেলটোৰ মুৰব্বী পৰীক্ষিত কলিতা আৰু অনুষ্ঠান মুৰব্বী অনুপম মহন্তই ৷ অনুষ্ঠানত শিক্ষা, সমাজ, উদ্যোগ, চলচ্চিত্র, সংবাদ মাধ্যমকে ধৰি ৩০টা শিতানত বঁটা প্রদান কৰা হয় ৷