প্ৰকৃতি ধ্বংসৰ বিৰুদ্ধে মুকলি বিৰোধিতা যাদৱ পায়েঙৰ

নিয়মীয়া বাৰ্তা,২০ নৱেম্বৰঃ গুৱাহাটী উত্তৰ গুৱাহাটী সংযোগী প্ৰস্তাৱিত দলং নিৰ্মাণৰ ফলত সম্ভাব্য প্ৰকৃতি ধ্বংসৰ বিৰোধিতাৰে প্ৰকৃতিপ্ৰেমীয়ে প্ৰতিবাদ সাব্যস্ত কৰি আহিছে । প্ৰস্তাৱিত দলংখন নিৰ্মাণৰ ফলত ব্ৰহ্মপুত্ৰ পাৰৰ দুই শতাধিক গছ কটা যাব । প্ৰকৃতি ধ্বংসৰ বিৰোধিতা আৰু গছৰ সুৰক্ষাৰ দাবীত মঙলবাৰে ভৰলুমুখৰ শংকৰদেৱ উদ্যানত উপস্থিত হৈ অৰণ্য মানৱ পদ্মশ্ৰী যাদৱ পায়েঙে প্ৰকৃতিপ্ৰেমীৰ সহযোগত প্ৰতিবাদ সাব্যস্ত কৰে । উন্নয়নৰ নামত প্ৰকৃতি ধ্বংসৰ বিৰোধিতা কৰি অৰণ্যমানৱ যাদৱ পায়েঙে চৰকাৰক কঠোৰ ভাষাৰে সমালোচনা কৰে । তেওঁ লগতে উন্নয়নৰ বিৰোধিতা নকৰোঁ, কিন্তু উন্নয়নৰ নামত প্ৰকৃতি ধ্বংস কৰি গছ কটা বিষয়টো কোনো কাৰণতে গ্ৰহণযোগ্য নহয় বুলি মন্তব্য কৰে । তদুপৰি গুৱাহাটীৰ জ্যেষ্ঠ নাগৰিক, ছাত্ৰসমাজ, দল-সংগঠন, প্ৰতিষ্ঠানক সামৰি এখন বিশেষজ্ঞ সমিতি গঠন কৰি ব্ৰহ্মপুত্ৰৰ পাৰৰ সুৰক্ষা সুনিশ্চিত কৰিবলৈ তেওঁ চৰকাৰক দাবী জনায় । চীন, টাইৱান আদি ৰাষ্ট্ৰৰ দৰে প্ৰকৃতি সুৰক্ষাৰ পৰিকল্পনা গ্ৰহণ কৰি উন্নত কাৰিকৰী প্ৰযুক্তি ব্যৱহাৰ কৰি প্ৰস্তাৱিত দলংখন নিৰ্মাণৰ বাবে চৰকাৰক আহ্বান জনায় । তেওঁ ছাত্ৰ-ছাত্ৰীসকলক যিমান পাৰি গছপুলি ৰোপণ কৰি প্ৰতিপালন কৰিবলৈও আহ্বান জনায় । উল্লেখ্য যে, সোণাৰাম মাধ্যমিক বিদ্যালয়ৰ সমীপৰ ভৰলুমুখৰ সৈতে উত্তৰ গুৱাহাটীক সংযোগ কৰি ব্ৰহ্মপুত্ৰৰ ওপৰত প্ৰস্তাৱিত দলংখনৰ নিৰ্মাণৰ ফলত ব্ৰহ্মপুত্ৰৰ পাৰৰ প্ৰায় ৩০০ জোপা গছ কটাৰ আশংকা আছে । প্ৰস্তাৱিত দলংখনৰ বিতং প্ৰকল্প প্ৰতিবেদন অনুসৰি এই দলংখনৰ নিৰ্মাণৰ ফলত ভৰলুমুখৰ শংকৰদেৱ উদ্যান, আজানপীৰ উদ্যান আৰু মাছখোৱাৰ পৰা কালিপুৰলৈ বিস্তৃত সমগ্ৰ নৈপৰীয়া অঞ্চলটোৰ বৃহৎ ক্ষতি হ’ব । এই অঞ্চলটোত থকা গছসমূহ নানা ধৰণৰ চৰাইৰ প্ৰজাতিৰ বাসস্থান । ইয়াৰ উপৰি এই গছবোৰৰ বেছিভাগেই পঞ্চাশ বছৰতকৈও অধিক পুৰণি । অঞ্চলটোৰ বহু লোকে তেওঁলোকৰ বাল্যকালৰ বেছিভাগ সময় এই বৃহৎ গছবোৰৰ তলত খেলা-ধূলা কৰিয়ে অতিবাহিত কৰিছিল । কিন্তু দুৰ্ভাগ্যৰ বিষয় এইটোৱে যে ৰাজ্যখনে দলং নিৰ্মাণৰ বাবে ডি পি আৰ প্ৰস্তুত কৰোঁতে স্থানীয় ৰাইজৰ লগত কোনো আলোচনা নকৰি নিজৰ মইমতালিৰে উক্ত ডি পি আৰ প্ৰস্তুত কৰে ।