নিয়মীয়া বার্তা, ২১ ডিচেম্বৰঃ দক্ষিণ শালমাৰা–মানকাচৰ জিলাৰ সুখচৰ থানা এলেকাৰ চৰ আৰাটগ্রাম গাঁৱত বুধবাৰে নিশা কোনো নথকা অৱস্থাত দুজনীয়া দলে অগ্নিসংযোগ কৰাত এটা পৰিয়ালৰ এখন মটৰচাইকেল, ৯টা গৰু আৰু ছাগলীসহ ৫ লক্ষাধিক টকাৰ সম্পত্তি ভস্মীভূত হয় ৷ উল্লেখ্য যে জিলাৰ সদৰ হাটশিঙিমাৰীৰ পৰা প্রায় পাঁচ কিলোমিটৰ নিলগত থকা গাঁওখনৰ বাসিন্দা লাল বাহাদুৰ যোৱা বুধবাৰে নিশা প্রায় ৮ বজাত সপৰিয়ালে ঘৰৰ পৰা প্রায় ডেৰকিলোমিটাৰ নিলগত অনুষ্ঠিত এখন ধর্মীয় সভালৈ যায় ৷ ধর্মীয় সভা সম্পন্ন হোৱাৰ পাছত লোকজন নিশা প্রায় ১ বজাত পৰিয়ালৰ সৈতে পুনৰ ঘৰত আহি উপস্থিত হোৱাৰ লগে লগে ঘৰত দাও দাওকৈ জুই জ্বলি উঠা প্রত্যক্ষ কৰে ৷ ফলত চিঞৰ–বাখৰ কৰিবলৈ ধৰাত ঘটনাস্থলীৰ পৰা পার্শ্বৱর্তী আৰাটগ্রাম গাঁৱৰ নালু শ্বেখ আৰু কালু শ্বেখ নামৰ দুই ভাতৃয়ে বাইক এখনৰ দ্বাৰা পলায়ন কৰা বুলি লাল বাহাদুৰে জানিবলৈ দিয়ে ৷
ইফালে ভাতৃদ্বয়ে পেট্ৰ’ল ঢালি জুই লগাই দিয়া বুলি লোকজন একপ্রকাৰ নিশ্চিত হৈ ঘটনা সংক্রান্তত সুখচৰ থানাত দুয়োৰে বিৰুদ্ধে এজাহাৰ দাখিল কৰাত আৰক্ষীয়ে ঘটনাৰ তদন্ত আৰম্ভ কৰিছে ৷ ইপিনে, ঘটনাটোত লোকজনৰ এটা টিনৰ ঘৰ ভস্মীভূত হোৱাৰ লগতে ঘৰৰ ভিতৰত থকা এখন মটৰচাইকেল ভস্মীভূত হয় ৷ একেদৰে ৫টা ছাগলী, ৪টা গৰু মৃত্যুমুখত পৰাৰ লগতে ঘৰৰ ভিতৰত থকা যাৱতীয় নথি–পত্রসহ ৫ লক্ষাধিক টকাৰ ক্ষতি হৈছে ৷ ইফালে, দুর্গম এলেকাত জুই নির্বাপণৰ ব্যৱস্থা নথকাত স্থানীয় ৰাইজে নিজস্ব প্রচেষ্টাৰে জুই নির্বাপণ কৰে বুলি ভুক্তভোগী লাল বাহাদুৰে সাংবাদিকক জানিবলৈ দিয়ে ৷
লক্ষণীয় বিষয় এয়ে যে লোকজনৰ লগত দীর্ঘদিনৰ পৰা নালু শ্বেখ আৰু কালু শ্বেখৰ লগত গুৱাহাটীত ঠিকাক লৈ সংঘাত চলি আছিল ৷ ইয়াক লৈ পূর্বেও দুই ফৈদৰ মাজত মাৰপিটৰ ঘটনাও সংঘটিত হৈছিল বুলি স্থানীয় সূত্রে জানিব পৰা গৈছে ৷ ঘটনাৰ প্রকৃত সত্য কি, সেয়া সুখচৰ আৰক্ষীয়ে সঠিকভাৱে তদন্ত কৰিলেহে পোহৰলৈ আহিব ৷