নিয়মীয়া বাৰ্তা, ২৮ ডিচেম্বৰঃ বিভিন্ন উৎসৱ–পার্বণৰ লগতে ইংৰাজী নৱবর্ষৰ প্রাক্ক্ষণত এচাম অসাধু ব্যৱসায়ীয়ে বজাৰত কৃত্রিম নাটনি দেখুৱাই মাছ–মাংসকে ধৰি অন্যান্য খাদ্য–সামগ্রীৰ দাম বৃদ্ধি কৰি গ্রাহকক মাধমাৰ শোধাই আহিছে ৷ প্রতিবছৰৰ দৰে এইবেলিও একাংশ ব্যৱসায়ীয়ে সমাগত ৩১ ডিচেম্বৰৰ সুযোগ গ্রহণ কৰি মহানগৰীত মাছ–মাংসৰ দাম বৃদ্ধি কৰাৰ বাবে সাজু হৈছে ৷ বিশেষকৈ ৩১ ডিচেম্বৰৰ প্রতি লক্ষ্য ৰাখি এইবাৰ মহানগৰীৰ বজাৰত গ্রেটাৰ গুৱাহাটী কুৰেছী মীট এছ’চিয়েচনে প্রতি কিলোগ্রাম ছাগলীৰ মাংস ৬০০ৰ পৰা ৬৫০ টকাত বিক্রী কৰাৰ সিদ্ধান্ত গ্রহণ কৰিছে ৷ এছ’চিয়েচনৰ সম্পাদক মকবুল আহমেদে কয় যে উৎসৱ–পার্বণৰ সময়ছোৱাত বজাৰত ছাগলীৰ নাটনি হয় ৷ বিশেষকৈ ৩১ ডিচেম্বৰৰ পূর্বে ছাগলী মাংসৰ চাহিদা স্বাভাৱিকতে বৃদ্ধি পায় ৷ চাহিদাৰ তুলনাত ছাগলী যোগান কমি যোৱা বাবে মাংসৰ দাম প্রতিবছৰে বৃদ্ধি হয় ৷ গুৱাহাটী পৌৰ নিগমে ভূতনাথৰ ছাগলী বজাৰ সাময়িকভাৱে ব্রহ্মপুত্রৰ পাৰলৈ স্থানান্তৰ কৰা বাবে পূর্বৰ তুলনাত বজাৰত ছাগলীৰ আমদানি হোৱা নাই ৷ সেয়ে মহানগৰীৰ বজাৰত অহা ৩১ ডিচেম্বৰত ছাগলী মাংসৰ দাম প্রতি কিলোগ্রামত ৫০ টকা বৃদ্ধি কৰাৰ সিদ্ধান্ত গ্রহণ কৰিছে ৷ অৱশ্যে গ্রাহকসকলে ৬০০ টকাৰ পৰিৱর্তে ৬৫০ টকাত স্পেচিয়েল মাংস পাব বুলি তেওঁ জানিবলৈ দিয়ে ৷ গতিকে সমাগত ৩১ ডিচেম্বৰত গ্রাহকসকলে এইক্ষেত্রত কি স্থিতি গ্রহণ কৰে, সেয়া লক্ষণীয় হ’ব ৷ উল্লেখ্য যে ছাগলীৰ সমান্তৰালকৈ অসাধু ব্যৱসায়ীসকলে কুকুৰা আৰু হাঁহৰ মাংসৰ দামো বৃদ্ধি কৰাৰ সম্ভাৱনা আছে ৷