নিয়মীয়া বাৰ্তা,৯ ডিচেম্বৰঃ প্রতিবাদ, সংঘর্ষত উত্তাল ইৰাকৰ ৰাজধানী বাগদাদত এজন বন্দুকধাৰীৰ গুলীত কমপক্ষেও ২৫জন লোক নিহত হোৱাৰ উপৰি অন্য ১৩০জন গুৰুতৰভাৱে আহত হৈছে ৷ শনিবাৰে সংঘটিত হৈছে এই শিহৰণকাৰী ঘটনা ৷ ৰাজধানী বাগদাদৰ প্রাণকেন্দ্র হিচাপে চিহ্নিত আল–খালানি স্কোৱাৰৰ সন্মুখত প্রতিবাদী জনতাৰ ওপৰত আক্রমণ চলাই এই বন্দুকধাৰীটোৱে ৷
উল্লেখনীয় যে শুকুৰবাৰে নিশাৰ পৰা শনিবাৰে পুৱালৈকে বন্দুকধাৰী লোকজনে প্রতিবাদীৰ ওপৰত কেইবাঘণ্টা ধৰি চলায় আক্রমণ ৷ গৃহ মন্ত্রালয়ৰ সূত্রই সদৰী কৰা অনুসৰি, এই আক্রমণৰ সময়ত বহু লোকে আত্মৰক্ষাৰ বাবে সমীপৱর্তী প্রাসাদ তথা মছজিদত আশ্রয় লয় ৷
স্মর্তব্য যে বিগত অক্টোবৰ মাহৰ পৰা চৰকাৰবিৰোধী বিক্ষোভত উত্তাল হৈ আছে সংঘর্ষজর্জৰ ইৰাক ৷ দুর্নীতিৰ অৱসান, নতুন নিয়োগ সৃষ্টি আৰু ৰাজহুৱা সেৱাসমূহ উন্নত কৰাৰ দাবীত দেশৰ লাখ লাখ জনতাই ধাৰাবাহিক প্রতিবাদ সংগঠিত কৰি থকাৰ সময়তে সেনাই প্রতিদিনে বিক্ষোভকাৰীক ছত্রভংগ দিয়াবলৈ দমন অভিযান তীব্রতৰ কৰিছে ৷
লক্ষণীয়ভাৱে কালিৰ এই আক্রমণৰ ঘটনাত জড়িত থকা বন্দুকধাৰীৰ পৰিচয় সদৰী কৰা নাই দেশখনৰ প্রশাসন তথা সংবাদ মাধ্যমে ৷