নিয়মীয়া বাৰ্তা, ১৭ মার্চঃ ১৯গৰাকী বিশেষভাৱে সক্ষম লোকক এক সেৱা কেন্দ্রত নৃশংসভাৱে হত্যা কৰা জাপানৰ এজন লোকক মৃত্যুদণ্ডৰ ৰায় শুনোৱা হৈছে ৷ ছাট’ছি উৱেমাট্ছু নামৰ ৩০ বছৰীয়া যুৱকজনে বিশেষভাৱে সক্ষম লোকসকলে মানুহৰ সৈতে ভালদৰে যোগাযোগ স্থাপন কৰিব নোৱাৰাৰ বাবেই তেওঁলোকৰ জীয়াই থকাৰ অধিকাৰ নাই বুলি ঘোষণা কৰিছিল ৷ জাপানৰ সম্প্রচাৰ সংস্থা কিয়ড’ৱে সদৰী কৰিছে এই তথ্য ৷ টকিঅ’ৰ সমীপৱর্তী বিশেষভাৱে সক্ষম লোকৰ এক সেৱা কেন্দ্রত ৩০ বছৰীয়া উৱেমাট্ছুৱে সংঘটিত কৰিছিল এই নৃশংস হত্যাকাণ্ড ৷ জাপানৰ ইতিহাসত এই হত্যাকাণ্ড অতি নৃশংস হিচাপে চিহ্ণিত হৈছিল ৷ উল্লেখনীয় যে এছিয়াৰ দেশখনত বিশ্বৰ অন্য প্রান্তৰ তুলনাত সংঘর্ষজনিত অপৰাধৰ ঘটনা যথেষ্ট কম ৷ দেশখনৰ সংবাদ পত্র মেইনিচি ছিম্বুনৰ সৈতে হোৱা এক সাক্ষাৎকাৰত উৱেমাট্ছুৱে উল্লেখ কৰিছিল যে মানসিক বিকাৰগ্রস্ত লোকসকলৰ সমাজত জীয়াই থকাৰ কোনোধৰণৰ অধিকাৰ নাই৷ গতিকে বিশেষভাৱে সক্ষম লোকসকলক তেওঁ হত্যা কৰিছিল৷ য়োক’হামা জিলা আদালতে আজি উৱেমাট্ছুৰ বিৰুদ্ধে ফাঁচিৰ ৰায় ঘোষণা কৰিছে৷ স্মর্তব্য যে আদালতত পূর্বেই উৱেমাট্ছুৱে যিকোনো শাস্তিৰ ৰায়ৰ বিৰুদ্ধে আবেদন নকৰে বুলি ঘোষণা কৰিছিল৷ চলিত বর্ষৰ আৰম্ভণিতে বিচাৰ প্রক্রিয়াত ১৯গৰাকী লোকক হত্যা কৰা বুলি স্বীকাৰ কৰিছিল যুৱকজনে৷ কিন্তু অধিবক্তাসকলে উৱেমাট্ছুৰ মাৰিজুৱানাৰ দ্বাৰা আসক্ত বুলি উল্লেখ কৰি শাস্তিৰ পৰা ৰেহাই দিবলৈ যুক্তি দর্শাইছিল ৷