নিয়মীয়া বাৰ্তা, ২২ নৱেম্বৰঃ ভাৰতৰ প্ৰধানমন্ত্ৰী নৰেন্দ্ৰ মোদীয়ে শেহতীয়া আমেৰিকা ভ্ৰমণৰ সুফল হিচাপে প্ৰতিৰক্ষাৰ ক্ষেত্ৰত হোৱাইট হাউচৰ পৰা বিশেষ সহযোগীতা লাভ কৰিবলৈ সক্ষম হৈছে নতুন দিল্লী প্ৰশাসনে । মাৰ্কিন বিদেশ দপ্তৰে ভাৰতক ১০০ কোটি ডলাৰৰ অত্যাধুনিক এম কে-৪৫ বন্দুক প্ৰদান কৰা বিষয়টোত অনুমোদন জনাইছে । স্মৰ্তব্য যে দেশখনৰ প্ৰতিৰক্ষা মন্ত্ৰী নিৰাপত্তা সহযোগিতা সংস্থাৰ তৰফৰ পৰা এক বিবৃতিত এই কথা ঘোষণা কৰা হৈছে । ১৩ টাকৈ এম কে-৪৫ বন্দুক নৌসেনাৰ বাবে ক্ৰয় কৰিব ভাৰতে । ভাৰতীয় নৌ সেনাই এই অত্যাধুনিক অস্ত্ৰৰ বাবে দীৰ্ঘদিন ধৰি চৰকাৰক অনুৰোধ জনাই আহিছে । আৰব সাগৰত থকা নৌসেনাৰ ঘাটিলৈ এই অত্যাধুনিক সমৰাস্ত্ৰ প্ৰেৰণ কৰাৰ পিছতে দেশৰ নৌসেনাৰ শক্তি বৃদ্ধি পাব বুলি বিভিন্ন মহলে ধাৰণা কৰিছে । উল্লেখ্য যে ইতিমধ্যে এছিয়াত ভাৰতক আমেৰিকাই প্ৰতিৰক্ষাৰ ক্ষেত্ৰত অন্যতম সহযোগী হিচাপে আখ্যা দিয়াৰ উপৰি দুয়োখন দেশৰ মাজত বহুকেইখন চুক্তি স্বাক্ষৰ হৈছে ।