নিয়মীয়া বাৰ্তা, ২৫ ডিচেম্বৰঃ জাপানৰ ফুকুছিমা পৰমাণু ক্ষেত্রত আবদ্ধ হৈ থকা তেজস্ক্রিয় বিকিৰণ প্রভাৱিত বৃহৎ পৰিমাণৰ পানী মুকলি কৰি দিয়া বিষয়টোক লৈ চলি আছে বিতর্ক ৷ বিগত কেইবা বছৰ ধৰি চৰকাৰে এই বিষাক্ত পানী ফুকুছিমা ডাইচি পৰমাণু ক্ষেত্রৰ পৰা মুকলি কৰি দিয়াৰ বাবে বিশেষজ্ঞসকলৰ সৈতে আলোচনা কৰি আছে যদিও এইক্ষেত্রত কোনোধৰণৰ সিদ্ধান্তত উপনীত হ’ব পৰা নাই ৷ চৰকাৰৰ সংস্থা এটাই শেহতীয়াকৈ প্রস্তাৱ আগবঢ়াইছে যে এই তেজস্ক্রিয় বিকিৰণযুক্ত পানী পৰমাণু ক্ষেত্রটোত দীঘদিনলৈ আবদ্ধ কৰি ৰখা সম্ভৱ নহয় ৷ গতিকে ইয়াক সাগৰত পেলাই দিয়াৰ চিন্তা–চর্চা কৰিছে সংস্থাটোৱে ৷ লগে লগে পৰিৱেশ সংস্থাসমূহে চৰকাৰৰ এনে প্রস্তাৱৰ বিৰুদ্ধে প্রতিক্রিয়া প্রকাশ কৰিছে ৷ স্মর্তব্য যে প্রায় এক নিযুত টন পৰমাণু বিকিৰণযুক্ত পানী আবদ্ধ হৈ আছে ফুকুছিমাত ৷