নিউজডেস্ক, ১৫ নৱেম্বৰঃ ২০২০ চনত ভাৰতৰ গণৰাজ্য দিৱসৰ মুখ্য অতিথিৰূপে অংশগ্ৰহণ কৰিব ব্ৰাজিলৰ ৰাষ্ট্ৰপতি জেইৰ’ ব’লচোনাৰ’ৱে । ১১ সংখ্যক ব্ৰিকছ সন্মিলনত অংশ ল’বলৈ যোৱা প্ৰধানমন্ত্ৰী মোদীয়ে বৃহস্পতিবাৰে দেশখনৰ ৰাষ্ট্ৰপতিক সাক্ষাৎ কৰি গণৰাজ্য দিৱসলৈ আমন্ত্ৰণ জনাইছিল । ইপিনে ভাৰতৰ প্ৰধানমন্ত্ৰী নৰেন্দ্ৰ মোদীয়ে কৰা এই নিমন্ত্ৰণ গ্ৰহণ কৰিছে ব্ৰাজিলৰ ৰাষ্ট্ৰপতিগৰাকীয়ে । ইপিনে দুয়োজন নেতাই দেশদুখনৰ দ্বিপাক্ষিক সম্পৰ্ক শক্তিশালী কৰাৰ বাবে বিভিন্ন বিষয়ত আলোচনাত মিলিত হয় ।
উল্লেখ্য যে ভাৰতৰ প্ৰধানমন্ত্ৰী নৰেন্দ্ৰ মোদীয়ে ব্ৰিকছ সন্মিলনৰ লগত সংগতি ৰাখি ব্ৰিকছ বিজনেছ ফ’ৰামৰ বৈঠকত সম্বোধন কৰে । বিশেষকৈ ব্ৰাজিল, ৰাছিয়া চীন আৰু দক্ষিণ আফ্ৰিকাৰ নেতাসকলক সম্বোধি সন্ত্ৰাসবিৰোধী অভিযান, বাণিজ্য আৰু সাংস্কৃতিক দিশত সহযোগিতা আগবঢ়াবলৈ আহ্বান জনায় । ইয়াৰোপৰি প্ৰধানমন্ত্ৰী মোদীয়ে ব্ৰিকছ বাণিজ্য নেতাসকলক ভাৰতত বিনিয়োগৰ বাবে আহ্বান জনায় ।