নিউজডেস্ক, ২৫ ডিচেম্বৰঃ হাৰিয়ানাত এগৰাকী মহিলাই ৰাজ্যখনৰ গৃহমন্ত্ৰী অনিল বিজক এখন পত্ৰ প্ৰদান কৰি দুবছৰ পূৰ্বে নিজৰ স্বামীক হত্যা কৰাৰ কথা স্বীকাৰ কৰে । লগতে তেওঁ এই হত্যাৰ অপৰাধত ফাঁচিৰ শাস্তি পাবলৈ আশা কৰাৰ কথাও পত্ৰখনত উল্লেখ কৰে ।
ইপিনে আৰক্ষীয়ে জনোৱা মতে সেইসময়ত মহিলাগৰাকীৰ স্বামীৰ মৰণোত্তৰ পৰীক্ষাত একো সন্দেহ পোৱা নাছিল যদিও বৰ্তমান মহিলাগৰাকীৰ পত্ৰখনৰ ভিত্তিতে এক গোচৰ ৰুজু কৰিছে ।
আম্বালাৰ আৰক্ষী অধিক্ষক অভিষেক জোৰৱালে জনাইছে যে- প্রয়াত অতিৰিক্ত আৰক্ষী অধিক্ষক ৰোহতাছ সিঙৰ পত্নী সুনীল কুমাৰীয়ে সোমবাৰে হাৰিয়ানাৰ গৃহমন্ত্ৰী অনিল বিজক তেওঁৰ বাসভৱনত সাক্ষাত কৰি এই পত্ৰখন প্ৰদান কৰিছিল ।
উল্লেখ্য যে চিঠিখনত উল্লেখ থকা অনুসৰি ২০১৭ চনৰ ১৫ জুলাইৰ দিনা প্রয়াত অতিৰিক্ত আৰক্ষী অধিক্ষক ৰোহতাছ সিঙে নিচাসক্ত হৈ ঘৰ সোমাইছিল আৰু পত্নী সুনীল কুমাৰীক গালি-গালাজ কৰিবলৈ লয় । সেই সময়তে সিং তলত পৰি গৈছিল । সেই সুযোগতে পত্নী সুনীল কুমাৰীয়ে স্বামীক এখন কাপোৰেৰে ডিঙিত মেৰিয়াই হত্যা কৰিছিল বুলি আৰক্ষী অধিক্ষক অভিষেক জোৰৱালে প্ৰকাশ কৰে ।