নিয়মীয়া বাৰ্তা ২০ মাৰ্চঃ ক’ৰোনা ভাইৰাছৰ প্রতিৰোধৰ ক্ষেত্রত বিশেষ ব্যৱস্থা গ্রহণ কৰা নাই বুলি ব্রাজিলৰ ৰাষ্ট্রপতি জাইৰ ব’লছ’নাৰোৰ বিৰুদ্ধে ৰাজধানী ছাও পাওলো আৰু ৰি’ ডি জেনেইৰ’ত নজিৰবিহীন বিক্ষোভ সাব্যস্ত হৈছে৷ ব্রাজিলৰ এই মহানগৰ দুখনত কালি সন্ধিয়া কেইবা নিযুত লোকে নিজ বাসগৃহৰ খিৰিকীমুখত থিয় হৈ সমস্বৰে পদত্যাগ দাবী কৰে ৰাষ্ট্রপতি ব’লছ’নাৰোৰ৷ উল্লেখনীয় যে ৰাষ্ট্রপতিগৰাকীৰ বিৰুদ্ধে প্রথমবাৰলৈ লেটিন আমেৰিকাৰ দেশখনত এনে বৃহৎ বিক্ষোভ সংগঠিত হৈছে৷ ব্রাজিলত এতিয়ালৈকে ৫ শতাধিক লোক ক’ৰোনা ভাইৰাছৰ দ্বাৰা সংক্রমিত হৈছে৷ এই লোকসকলৰ ভিতৰত দুগৰাকী মন্ত্রীও আছে৷ ইফালে, ক’ৰোনাত সংক্রমিত হৈ দেশখনত প্রাণ হেৰুৱাইছে চাৰিগৰাকী লোকে৷ ক’ৰোনা ভাইৰাছ প্রতিৰোধৰ বাবে পূর্ব ব্যৱস্থা গ্রহণ কৰা কার্যক ‘হিষ্টেৰিয়া’ আখ্যা দিছিল ব’লছ’নাৰোৱে৷