নিয়মীয়া বাৰ্তা ১২ ফেব্ৰুৱাৰীঃ মঙলবাৰে ঘোষিত ফলাফলত আম আদমী পার্টীৰ হাতত শোচনীয় পৰাজয় স্বীকাৰ কৰি জনাদেশ মানি ল’লে বিজেপিয়ে৷ আপৰ ঐতিহাসিক জয়ৰ পিছত বিজেপিৰ ৰাষ্ট্রীয় সভাপতি জে পি নাড্ডাই কয় যে দিল্লীবাসীৰ জনাদেশ মানি লৈছোঁ৷ আমি গঠনমূলক বিৰোধীৰ ভূমিকা পালন কৰিম৷ নির্বাচনত জয়ৰ বাবে আপ আৰু মুখ্যমন্ত্রী কেজৰিৱালক অভিনন্দন জ্ঞাপন কৰে বিজেপিৰ ৰাষ্ট্রীয় সভাপতিগৰাকীয়ে৷ টুইটযোগে কেজৰিৱালক অভিনন্দন জনাই বিজেপিৰ ৰাষ্ট্রীয় সভাপতিগৰাকীয়ে কয় যে দেশৰ ৰাজধানী দিল্লীৰ সকলো দিশত বিকাশৰ বাবে আপ চৰকাৰে কাম কৰিব তাৰেই আশা কৰিছে৷
ইপিনে এগ্জিট প’লক নস্যাৎ কৰি বিজেপিয়ে চৰকাৰ গঠন কৰিব বুলি দম্ভালি মাৰি থকা দিল্লী বিজেপিৰ সভাপতি তথা সাংসদ মনোজ তিৱাৰীয়েও জনতাৰ জনাদেশক মানি লোৱা বুলি অকপটে স্বীকাৰ কৰে৷ দিল্লীৰ ফলাফলক আন্তৰিকতাৰে গ্রহণ কৰি মুখ্যমন্ত্রী কেজৰিৱাল আৰু দিল্লীবাসীক অভিনন্দন জনাই দিল্লী বিজেপিৰ সভাপতি তিৱাৰীয়ে কয় যে আশা কৰোঁ দিল্লীবাসীৰ আকাংক্ষাক পূৰণ কৰিব আপ চৰকাৰে৷ তদুপৰি বিজেপিৰ দিল্লীৰ সভাপতি তিৱাৰীয়ে দলীয় কর্মকর্তাসকলক নির্বাচনত কৰা পৰিশ্রমৰ বাবে কৃতজ্ঞতা জ্ঞাপন কৰে৷
লক্ষণীয় যে বিজেপি নেতৃত্বাধীন এন ডি এৰ সহযোগী দল জেডিইউৰ মুৰব্বী তথা বিহাৰৰ মুখ্যমন্ত্রী নীতিশ কুমাৰে দিল্লীত আপৰ জয়ৰ পিছতে মাত্র তিনিটা শব্দ প্রকাশ কৰে৷ মুখ্যমন্ত্রীগৰাকীয়ে কয়– জনতাই মালিক৷ উল্লেখ্য যে বিহাৰৰ মুখ্যমন্ত্রী নীতিশ কুমাৰেও দিল্লীত আপৰ বিৰুদ্ধে প্রচাৰ অভিযান চলাইছিল৷ আনকি বিজেপিৰ সহযোগী দল হিচাপে এটা সমষ্টিত প্রতিদ্বন্দ্বিতাও আগবঢ়াইছিল৷ আনপিনে, ‘কা’ৰ বিৰোধিতা কৰি জেডিইউৰ পৰা বহিষৃকত নেতা তথা নির্বাচনী ৰণনীতি বিশেষজ্ঞ প্রশান্ত কিশোৰে মুখ্যমন্ত্রী কেজৰিৱালক জয়ৰ বাবে অভিনন্দন জ্ঞাপন কৰে৷ মুখ্যমন্ত্রী কেজৰিৱাল তথা আপৰ বিজয় ভাৰতীয় আত্মা সুৰক্ষাৰ প্রতিবাদৰ জয় বুলি কয় প্রশান্ত কিশোৰে৷ মুখ্যমন্ত্রী কেজৰিৱাল আৰু আপৰ বিজয় বিজেপিৰ ঘৃণাৰ ৰাজনীতিৰ পৰাজয় বুলি উল্লেখ কৰি কেজৰিৱালক অভিনন্দন জ্ঞাপন কৰে পশ্চিমবংগৰ মুখ্যমন্ত্রী মমতা বেনার্জীয়ে৷