নিয়মীয়া বাৰ্তা, ২৫ নৱেম্বৰঃ আগন্তুক ৩০ নৱেম্বৰৰ পৰা ঝাৰখণ্ডত পাঁচটা পৰ্যায়ত অনুষ্ঠিত হ’বলগীয়া বিধানসভা নিৰ্বাচনৰ প্ৰথম পৰ্যায়ত প্ৰতিদ্বন্দ্বিতা আগবঢ়োৱা ১৮৯ গৰাকী প্ৰাৰ্থীৰ ৫৫ গৰাকীয়েই হৈছে কোটিপতি । এছ’চিয়েন ফ’ৰ ডেম’ক্ৰেটিক ৰিফ’ৰ্মছ (এডিআৰ) এ মনোনয়ন দাখিলৰ সময়ত প্ৰাৰ্থীসকলে আগবঢ়োৱা শপতনামাৰ বিশ্লেষণ কৰি এই তথ্য সদৰী কৰিছে । এই কোটিপতি প্ৰাৰ্থীসকলৰ ভিতৰত কংগ্ৰেছৰ কৃষ্ণনন্দ ত্ৰিপাঠী আৰু ৰামেশ্বৰ আৰাওন হৈছে শীৰ্ষত থকা দুগৰাকী প্ৰাৰ্থী । ত্ৰিপাঠীৰ সম্পদৰ পৰিমাণ ৫৩.৫ কোটি টকা । ইফালে, আৰাওনৰ সম্পদৰ মূল্য হৈছে ২৮.১ কোটি টকা । ত্ৰিপাঠীয়ে দালটনগঞ্জ সমষ্টিৰ পৰা প্ৰতিদ্বন্দিতা কৰা বিপৰীতে আৰাওনে লোহাৰদাগা সমষ্টিত আগবঢ়াইছে প্ৰতিদ্বন্দিতা । স্মৰ্তব্য যে, লোহাৰদাগা হৈছে অনুসূচিত জনজাতিৰ বাবে সংৰক্ষিত সমষ্টি । ইফালে, বিজেপিৰ কুছৱাহা শশীভূষণ মেহতা হৈছে তৃতীয় গৰাকী সমৃদ্ধিশালী প্ৰাৰ্থী । মেহতাৰ সম্পদৰ পৰিমাণ ২৭ কোটি টকা । লক্ষণীয়ভাৱে প্ৰথম পৰ্যায়ত নিৰ্বাচনত প্ৰতিদ্বন্দিতা কৰা ২৩ শতাংশ প্ৰাৰ্থীৰ বিৰুদ্ধে আছে অপৰাধ গোচৰ ।