নিয়মীয়া বাৰ্তা ২৩ ডিচেম্বৰঃ নাগৰিকত্ব সংশোধনী আইনৰ বিৰুদ্ধে দেশত প্রতিবাদৰ জোৱাৰ অব্যাহত থকাৰ সময়তে এই বিতর্কিত আইনৰ বিৰোধিতা কৰিছে বলীউডৰ জনপ্রিয় অভিনেত্রী সোণাক্ষি সিন্হাই৷ শুকুৰবাৰে ছবিগৃহলৈ অহা ‘দাবাং–৩’ক নাগৰিকত্ব সংশোধনী আইনবিৰোধী প্রতিবাদে প্রভাৱিত কৰা সন্দর্ভত প্রতিক্রিয়া প্রকাশ কৰি অভিনেত্রীগৰাকীয়ে কয় যে এই মুহূর্তত সমগ্র দেশ প্রতিবাদমুখৰ হৈ আছে৷ দেশৰ নাগৰিকৰ এই গণজাগৰণ প্রত্যক্ষ কৰি মই অত্যন্ত সুখী৷ এনে পৰিস্থিতিত ছবি এখনৰ উপার্জনতকৈ নাগৰিকত্ব সংশোধনী আইনৰ বিৰুদ্ধে ঐক্যবদ্ধভাৱে প্রতিবাদ সাব্যস্ত কৰাটোহে অধিক গুৰুত্বপূর্ণ বিষয়৷ মন কৰিবলগীয়া যে ছলমান খান আৰু সোণাক্ষি অভিনীত ছবিখনে মুক্তিৰ দিনা মাত্র ২৪ কোটিহে উপার্জন কৰে৷