নিউজডেস্ক, ১৮ ডিচেম্বৰঃ ভাৰতত নাগৰিকত্ব (সংশোধনী) আইনক কেন্দ্র কৰি উত্তাল পৰিস্থিতি অব্যাহত থকাৰ সময়তে আমেৰিকাই মোদী চৰকাৰক প্রতিবাদী জনসাধাৰণক সুৰক্ষা আৰু সন্মান প্রদান কৰিবলৈ আহ্বান জনাইছে ৷
নাগৰিকত্ব (সংশোধনী) আইন অথবা ‘কা’ৰ বিৰুদ্ধে প্রতিবাদ সাব্যস্ত কৰা লোকসকলে অধিকাৰক সন্মান জনাব লাগে বুলি মার্কিন বিদেশ দপ্তৰৰ এগৰাকী মুখপাত্রই এক বিবৃতিযোগে নতুন দিল্লী প্রশাসনক আহ্বান জনাইছে ৷
উল্লেখনীয় যে প্রতিবাদী জনতাৰ বিৰুদ্ধে প্রশাসনে দমনমূলক ব্যৱস্থা গ্রহণ কৰা বুলি বিষয়টোক লৈ তীব্র প্রতিক্রিয়াৰ সৃষ্টি হোৱাৰ সময়তে শান্তিপূর্ণভাৱে প্রতিবাদ কৰাটো জনসাধাৰণৰ অধিকাৰ বুলি এই বিবৃতিত উল্লেখ কৰা হৈছে ৷
ইয়াৰ পূর্বেও আমেৰিকাই ‘কা’ৰ বিৰুদ্ধে নিজৰ স্থিতি স্পষ্ট কৰিছিল ৷ বিবৃতিটোত প্রতিবাদী জনতাক সংঘর্ষৰ পৰা আঁতৰি থাকিবলৈও আহ্বান জনাইছে মার্কিন মুখপাত্রগৰাকীয়ে ৷