নিয়মীয়া বাৰ্তা, ১৭ ডিচেম্বৰঃ ব্রিটেইনত যোৱা বৃহস্পতিবাৰে অনুষ্ঠিত হৈ যোৱা সংসদীয় নির্বাচনত লেবাৰ পার্টীৰ শোচনীয় পৰাজয়ৰ পাছত দলটোৰ নেতা জেৰেমী কর্বিনৰ বিদায় নিশ্চিত হৈ পৰিছে ৷ দলটোত কর্বিনৰ স্থলাভিষিক্ত হোৱাৰ সম্ভাৱনা আছে ভাৰতীয় মূলৰ ৰাজনীতিক লিছা নন্দী ৷
পশ্চিমবংগত জন্মগ্রহণ কৰা মার্ক্সবাদী নেতা দীপক নন্দী আৰু লুইছে নন্দীৰ দুহিতা লিছা নন্দী লেবাৰ পার্টীত অন্যতম প্রভাৱশালী নেত্রী হিচাপে চিহ্ণিত হৈ আহিছে ৷ চল্লিশ বছৰীয়া নন্দী হৈছে বৃহত্তৰ মানচেষ্টাৰৰ উইগান সমষ্টিৰ সাংসদ ৷
লক্ষণীয়ভাৱে লেবাৰ পার্টীৰ শীর্ষ পদৰ বাবে প্রতিদ্বন্দ্বিতাত অৱতীর্ণ হোৱাৰ সিদ্ধান্ত লৈছে লিছাই ৷ লিছা নন্দীৰ উপৰি ছালফ’ডৰ সাংসদ চল্লিশ বছৰীয়া ৰেবেকা লং–বেইলীও কর্বিনৰ স্থলাভিষিক্ত হ’বলৈ প্রতিদ্বন্দ্বিতাত অৱতীর্ণ হ’ব ৷ ব্রিটেইনৰ ৰাজনীতিত জেৰেমী কর্বিনে দীর্ঘদিন ধৰি লেবাৰ পার্টীক নেতৃত্ব প্রদান কৰি আহিছিল যদিও শেহতীয়া নির্বাচনত দলটোৰ ব্যর্থতাৰ বাবে বিভিন্ন মহলৰ সমালোচনাৰ সন্মুখীন হৈছে নেতাগৰাকী ৷ গতিকে কর্বিনৰ বিদায় নিশ্চিত হৈ পৰিছে লেবাৰ পার্টীৰ নেতৃত্বৰ পৰা ৷