নিয়মীয়া বাৰ্তা ৩০ ডিচেম্বৰঃ কেন্দ্রীয় শক্তিমন্ত্রী আৰ কে সিঙে দেওবাৰে মন্তব্য কৰিছে যে ২০১৮–১৯ বিত্তীয় বর্ষত দেশৰ শক্তি বিতৰণ কোম্পানীসমূহে ২৭ হাজাৰ কোটি টকাৰ লোকচান ভৰিবলগীয়া হৈছে৷ শক্তিমন্ত্রীজনে লগতে কয় যে অহা দুটা বছৰত বিদ্যুতৰ সৰবৰাহ আৰু বিতৰণৰ লোকচান ১৫ শতাংশলৈ হ্রাস কৰিবলৈ কেন্দ্রই লক্ষ্য স্থিৰ কৰি লৈছে৷ দেওবাৰে শক্তিমন্ত্রীজনে গোৱাৰ শক্তিমন্ত্রী মিলেছ কাব্রালক কলভালেৰ পাৱাৰ গ্রিড কর্প’ৰেচনৰ কাৰখানাত সাক্ষাৎ কৰে৷ বৈঠকৰ পাছত শক্তিমন্ত্রীজনে মন্তব্য কৰে– ‘২০১৮–১৯ বর্ষত শক্তি বিতৰণ কোম্পানীসমূহৰ মুঠ লোকচানৰ পৰিমাণ হ’ল ২৭ হাজাৰ কোটি৷ এয়া অতি বেছি৷ এই লোকচানৰ বাবে শক্তি বিতৰণ কোম্পানীসমূহ অত্যন্ত চাপত আছে৷’ তেওঁ আৰু কয় যে শক্তি বিতৰণ কোম্পানীসমূহ বিদ্যুৎ ক্রয়, মেৰামতি আদি বহু বিষয়ত সমস্যাৰ সন্মুখীন হ’বলগীয়া হৈছে৷ শক্তিমন্ত্রী আৰ কে সিঙে আৰু কয় যে সকলো ৰাজ্যৰ শক্তি বিতৰণ কোম্পানীসমূহৰ লোকচান হ্রাস কৰাৰ বাবে সহায় কৰিব৷ সিঙে আৰু কয় যে কিছু ৰাজ্যত বিদ্যুতৰ সৰবৰাহ আৰু বিতৰণৰ ক্ষেত্রত হোৱা লোকচান অত্যন্ত বেছি৷ বাণিজ্যিক লোকচান বিশেষকৈ মিটাৰিং, বিলিং আৰু বিল সংগ্রহৰ কথাও উল্লেখ কৰে৷ ‘যোৱা বর্ষত সৰবৰাহ আৰু বিতৰণৰ ক্ষেত্রত দেশৰ মুঠ লোকচানৰ পৰিমাণ হ’ল ১৮.৫ শতাংশ৷ অহা দুটা বছৰত আমি ইয়াক ১৫ শতাংশলৈ হ্রাস কৰিবলৈ বিচাৰোঁ৷’ –শক্তিমন্ত্রী আৰ কে সিঙে এইদৰে কয়৷