নিয়মীয়া বাৰ্তা, ১৯ মেঃ ক’ভিড–১৯ দ্বিতীয় জোৱাৰসৃষ্ট পৰিস্থিতি সন্দর্ভত অসমকে ধৰি ১০ ৰাজ্যৰ জিলা বিষয়াৰ সৈতে ভার্চুৱেল বৈঠকত মিলিত হয় প্রধানমন্ত্রী নৰেন্দ্র মোদী৷ ইতিপূর্বে দেশৰ ৰাজ্য আৰু কেন্দ্রীয়শাসিত অঞ্চলসমূহৰ মুখ্যমন্ত্রীৰ সৈতে ক’ভিড পৰিস্থিতিক লৈ বার্তালাপ কৰাৰ পিছত প্রধানমন্ত্রী মোদীয়ে জিলা বিষয়াসকলৰ সৈতে এই বিষয়টোক লৈ গুৰুত্বপূর্ণ বৈঠকত মিলিত হয়৷ ভার্চুৱেলযোগে অনুষ্ঠিত এই বৈঠকত প্রধানমন্ত্রী মোদীয়ে ক’ভিড–১৯ৰ বিৰুদ্ধে যুঁজত জিলা বিষয়াসকলে গ্রহণ কৰা গুৰুত্বপূর্ণ ভূমিকাক ভূয়সী প্রশংসা কৰে৷
প্রধানমন্ত্রীগৰাকীয়ে কয়– ‘ক’ৰোনাৰ বিৰুদ্ধে যুঁজখনত আপোনালোক আটায়ে এক গুৰুত্বপূর্ণ ভূমিকা লৈ আছে৷ এক কথাত আপোনালোকে এই যুঁজখনৰ ফিল্ড কমাণ্ডাৰ৷’ এই বৈঠকত প্রধানমন্ত্রী মোদীয়ে ক’ভিড–১৯ প্রথম জোৱাৰত কৃষিখণ্ডক বন্ধ নকৰাৰ প্রসংগ উল্লেখেৰে কয় যে প্রথম জোৱাৰৰ সময়ত কৃষিখণ্ডত গাঁওবাসীয়ে খেতিপথাৰত সামাজিক দূৰত্ব বর্তাই ৰাখিছিল৷ গাঁওবাসীয়ে তেওঁলোকৰ আৱশ্যক অনুযায়ী তথ্য সংগ্রহ কৰি এনে ভূমিকা লৈছিল আৰু এয়াই গাঁওসমূহৰ শক্তি৷
অসম, কর্ণাটক, বিহাৰ, চণ্ডীগড়, তামিলনাডু, উত্তৰাখণ্ড, মধ্যপ্রদেশ, গোৱা, হিমাচল প্রদেশ আৰু দিল্লীৰ জিলা বিষয়াসকলৰ সৈতে বৈঠকত মিলিত হোৱা প্রধানমন্ত্রী মোদীয়ে এই কথাও স্পষ্ট কৰি দিয়ে যে ভেকচিন যোগান বৃদ্ধি কৰিবলৈ নিৰন্তৰভাৱে প্রয়াস চলাই থকা হৈছে৷ ভাইৰাছটোৰ বিৰুদ্ধে যুঁজখনত দেশৰ বাবে অস্ত্র হৈছে স্থানীয় কণ্টেইনমেণ্ট জ’ন, আগ্রাসী পৰীক্ষণ আৰু শুদ্ধ আৰু সম্পূর্ণ তথ্য জনতাৰ মাজলৈ প্রচাৰ কৰাটো৷ এই সময়ত কিছুমান ৰাজ্যত ক’ভিড–১৯ত আক্রান্তৰ সংখ্যা হ্রাস পাইছে আৰু আন কিছুমানত বৃদ্ধি পাইছে৷ আক্রান্তৰ সংখ্যা হ্রাস পালেও দেশৰ নাগৰিকসকল অধিক সজাগ হৈ থাকিব লাগিব৷