নিয়মীয়া বাৰ্তা, ২৩ এপ্ৰিলঃ বৃহস্পতিবাৰে বোকাজান মহকুমা আৰক্ষী বিষয়া জন দাসে লাভ কৰা এক গোপন তথ্যৰ ভিত্তিত অসম-নাগালেণ্ড আন্তঃৰাজ্যিক সীমান্তত চলোৱা এক অভিযানত বুজন পৰিমাণৰ নিষিদ্ধ হেৰ’ইনসহ দুজন লোকক আৰক্ষীয়ে জালত পেলাবলৈ সক্ষম হৈছে। এই সন্দৰ্ভত আৰক্ষী সূত্ৰে লাভ কৰা তথ্য অনুসৰি, ড্ৰাগছ ব্যৱসায়ী চক্ৰটোক আটক কৰাৰ বাবে আৰক্ষীৰ এজন উপ-পৰিদৰ্শক আৰু দুগৰাকী জোৱানে ড্ৰাগছ ব্যৱসায়ীৰ বেশত ড্ৰাগছ সৰবৰাহকাৰীৰ চক্ৰৰ সৈতে যোগাযোগ কৰে।
ধৃত ড্ৰাগছ সৰবৰাহকাৰী দুটা ক্ৰমে ডিমাপুৰ ইষ্টৰ ঘোঁৰাপট্টিৰ নাগিন্দ্ৰ মাহাট্টো আৰু বাবুল কুমাৰ বুলি চিনাক্ত কৰা হৈছে। অভিযানকাৰী আৰক্ষীৰ দলটোৱে ধৃত ড্ৰাগছ সৰবৰাহকাৰী দুটাৰ জিম্মাৰ পৰা ২৫ টা চাবোনৰ বাকচত লুকুৱাই অনা অৱস্থাত ৩১৮ গ্ৰাম নিষিদ্ধ হেৰ’ইন জব্দ কৰিবলৈ সক্ষম হয় ।
জব্দ হোৱা ড্ৰাগছখিনিৰ বজাৰ মূল্য কমেও ১০ লক্ষাধিক বুলি আৰক্ষী সূত্ৰে প্ৰকাশ। উল্লেখ্য যে, বৰপথাৰৰ চক্ৰ বিষয়া ভূপেন কলিতা, খটখটী থানাৰ ভাৰপ্ৰাপ্ত বিষয়া মৌবলিক ব্ৰক্ষ্ম, উপ-পৰিদৰ্শক চৰণ মোহন চেতিয়া আৰু মৃদুল ৰুদ্ৰ পালে এই অভিযানত অংশগ্ৰহণ কৰে।