নিয়মীয়া বাৰ্তা, ১৮ মার্চঃ চীনত উদ্ভৱ হোৱা মাৰাত্মক ক’ৰোনা ভাইৰাছে সমগ্র বিশ্বৰ ক্রীড়াক্ষেত্রক স্তব্ধ কৰি তুলিলেও চলিত বর্ষৰ আই চি চি টি–২০ বিশ্বকাপ সময় মতে আয়োজন কৰিবলৈ প্রতিশ্রুতিবদ্ধ ক্রিকেট অষ্ট্রেলিয়া৷দেশখনৰ ক্রিকেট ব’ডৰ মুৰব্বী কেভিন ৰবার্টছে আজি কয় যে অনাগত কেইটামান সপ্তাহৰ ভিতৰত পৰিস্থিতি স্বাভাৱিক হৈ পৰিব আৰু সকলো ধৰণৰ ক্রীড়া ইভেণ্ট পুনৰ আৰম্ভ হ’ব বুলি তেওঁলোক আশাবাদী৷ ‘বিশ্বজুৰি সম্প্রতি সৃষ্টি হোৱা পৰিস্থিতি অতি উদ্বেগজনক৷ কিন্তু আমি আশা কৰিছোঁ যে অক্টোবৰ–নৱেম্বৰলৈ পৰিস্থিতি স্বাভাৱিক হ’ব আৰু আমি নির্ধাৰিত সূচী অনুসৰি অক্টোবৰত টি–২০ বিশ্বকাপ আয়োজন কৰিব পাৰিম৷’ ৰবার্টছে এইদৰে কয়৷
উল্লেখ্য যে চলিত বর্ষৰ আই চি চি টি–২০ বিশ্বকাপ অষ্ট্রেলিয়াত অহা ২৪ অক্টোবৰৰ পৰা আৰম্ভ হ’ব৷ ১৫ নৱেম্বৰত মেলব’ন ক্রিকেট গ্রাউণ্ডত অনুষ্ঠিত হ’বলগীয়া প্রতিযোগিতাৰ ফাইনেলত দর্শকেৰে ষ্টেডিয়াম ভৰি পৰিব বুলিও আশাবাদী ক্রিকেট অষ্ট্রেলিয়াৰ মুৰব্বীগৰাকী৷ তেওঁ কয় যে কিছুদিন পূর্বে মহিলা টি–২০ বিশ্বকাপৰ ফাইনেলত দর্শকেৰে ঠাহ খাই পৰিছিল এম চি জিৰ গেলেৰী৷ ঠিক একেদৰে পুৰুষৰ টি–২০ বিশ্বকাপতো অনুৰূপ পৰিৱেশ সৃষ্টি হ’ব৷ মন কৰিবলগীয়া যে মাৰাত্মক ক’ৰোনা ভাইৰাছে সমগ্র বিশ্বজুৰি প্রায় এক লাখ ৭৫ হাজাৰ লোকক আক্রমণ কৰিছে আৰু ৭ হাজাৰৰ প্রাণ কাঢ়ি নিছে৷ এই ভাইৰাছৰ আতংকত ইতিমধ্যে সমগ্র বিশ্বৰ ক্রীড়া ইভেণ্টসমূহ স্থবিৰ হৈ পৰিছে৷