নিয়মীয়া বাৰ্তা ২১ জানুৱাৰীঃ ভাৰত আৰু ইংলেণ্ডৰ মাজত অহা মাহৰ পৰা আৰম্ভ হ’বলগীয়া টেষ্ট, এদিনীয়া আৰু টি–২০ শৃংখলাত ৫০ শতাংশ দর্শকক ষ্টেডিয়ামত প্রৱেশৰ অনুমতি দিয়াৰ সম্ভাৱনা আছে৷ ভাৰতীয় ক্রিকেট নিয়ন্ত্রণ ব’ডৰ এক সূত্রই আজি এই কথা জানিবলৈ দিছে৷ উল্লেখ্য যে মহামাৰী ক’ভিড–১৯ৰ প্রাদুর্ভাৱৰ ফলত বিগত বর্ষৰ মার্চ মাহৰ পৰা বন্ধ হৈ থকা ভাৰতীয় ক্রীড়া ক্ষেত্রখন আগন্তুক ক্রিকেট শৃংখলাৰ জৰিয়তে মুকলি হ’ব৷ বিগত বর্ষৰ জানুৱাৰী মাহতে ভাৰতৰ মাটিত অন্তিমখন আন্তঃৰাষ্ট্রীয় শৃংখলা অনুষ্ঠিত হৈছিল৷ মহামাৰীৰ প্রাদুর্ভাৱৰ বাবে বিগত প্রায় এবছৰ ধৰি দেশত ক্রিকেটৰ লগতে আন কোনোধৰণৰ ক্রীড়া ইভেণ্ট অনুষ্ঠিত হোৱা নাই৷ মন কৰিবলগীয়া যে ইংলেণ্ডৰ বিৰুদ্ধে ৫ ফেব্রুৱাৰীৰ পৰা আৰম্ভ হ’বলগীয়া টেষ্ট শৃংখলাৰ প্রথম দুখন মেচ চেন্নাইৰ এম এ চিদাম্বৰম ষ্টেডিয়ামত অনুষ্ঠিত হ’ব৷ একেদৰে তৃতীয় আৰু চতুর্থ টেষ্টৰ লগতে পাঁচখন মেচৰ টি–২০ শৃংখলা আহমেদাবাদৰ ম’টেৰা ক্রিকেট ষ্টেডিয়ামত খেলোৱা হ’ব৷ ইয়াৰ পিছতে পুনেত দল দুটাৰ মাজত তিনিখন এদিনীয়া মেচ অনুষ্ঠিত হ’ব৷