নিয়মীয়া বাৰ্তা, ১৪ ছেপ্টেম্বৰঃ বর্ণ বৈষম্যৰ বিৰুদ্ধে মাত মাতি অদম্য সাহস আৰু দৃঢ়তাৰ পৰিচয় দাঙি ধৰা জাপানৰ উদীয়মান তাৰকা নাওমি অ’ছাকাই ইউ এছ অ’পেনত শেষ হাঁহি মাৰিবলৈ সক্ষম হৈছে৷ যোৱানিশা নিউয়র্কত অনুষ্ঠিত গ্রেণ্ডশ্লেম ইভেণ্টখনৰ ৰোমাঞ্চকৰ ফাইনেলত চতুর্থ বাছনিপ্রাপ্ত অ’ছাকাই বেলাৰুছৰ অভিজ্ঞ তাৰকা ভিক্ট’ৰিয়া আজাৰেংকাক পৰাস্ত কৰি দ্বিতীয়বাৰৰ বাবে ইউ এছ অ’পেনত খিতাপ জয় কৰে৷ ২০১৮ৰ চেম্পিয়ন ২২ বছৰীয়া জাপানিজ তাৰকাগৰাকীয়ে মেচখনত ১–৬, ৬–৩, ৬–৩ ছেটৰ ব্যৱধানত বিজয় সাব্যস্ত কৰিবলৈ সক্ষম হয়৷
আজাৰেংকাৰ দীর্ঘদিনীয়া অভিজ্ঞতাৰ সন্মুখত অ’ছাকা প্রথমটো ছেটত কিছু চাপৰ সন্মুখীন হয় যদিও পৰৱর্তী দুটা ছেটত দুর্দান্ত প্রদর্শনেৰে প্রত্যাৱর্তন ঘটায়৷ উল্লেখ্য যে এই জয়েৰে অ’ছাকাই গ্রেণ্ডশ্লেমৰ ফাইনেলত এশ শতাংশ জয়ৰ ধাৰা অক্ষুণ্ণ ৰাখিবলৈ সক্ষম হয়৷ ইয়াৰ পূর্বেও তেওঁ দুবাৰকৈ গ্রেণ্ডশ্লেম প্রতিযোগিতাৰ ফাইনেলত প্রৱেশ কৰি জয় সাব্যস্ত কৰিছিল৷ ২০১৮ৰ ইউ এছ অ’পেন আৰু ২০১৯ৰ অষ্ট্রেলিয়ান অ’পেনত অ’ছাকাই খিতাপত চুম্বন দিছিল৷ ইফালে ইউ এছ অ’পেনৰ ফাইনেলত ব্যর্থতাৰ ধাৰা অব্যাহত আছে বেলাৰুছৰ পঞ্চম বাছনিপ্রাপ্ত তাৰকা ভিক্ট’ৰিয়া আজাৰেংকাৰ৷ যোৱানিশাৰ ফাইনেলত তেওঁ অ’ছাকাৰ বিৰুদ্ধে সুন্দৰ আৰম্ভণিৰে প্রথমটো ছেট দখল কৰাৰ পিছতো পৰৱর্তী দুটা ছেটত হাৰ মানে৷
মন কৰিবলগীয়া যে ২০১২ আৰু ২০১৩ৰ ইউ এছ অ’পেনৰ ফাইনেলতো আজাৰেংকা পৰাজয়ৰ সন্মুখীন হৈছিল৷ ৩১ বছৰীয়া তাৰকাগৰাকীয়ে ৭ বছৰৰ মূৰত প্রথমবাৰৰ বাবে গ্রেণ্ডশ্লেম ইভেণ্টৰ ফাইনেল খেলিছিল৷ আনহাতে, এছিয়া মহাদেশৰ প্রথমগৰাকী খেলুৱৈ হিচাপে অভিলেখসংখ্যক তিনিটা গ্রেণ্ডশ্লেম ছিংগলছ খিতাপ জয় কৰা জাপানৰ উদীয়মান তাৰকা অ’ছাকাৰ চমকপ্রদ সাফল্যই উৎফুল্লিত কৰি তুলিছে জাপানৰ ক্রীড়া মহলক৷ দেশখনৰ পুৰুষ টেনিছ তাৰকা কেই নিশ্বিক’ৰীকে ধৰি কেইবাগৰাকীও আগশাৰীৰ ক্রীড়াবিদে ২২ বছৰীয়া যুৱ তাৰকাগৰাকীক শুভেচ্ছা জনাইছে৷