নিয়মীয়া বাৰ্তা, ১১ জানুৱাৰীঃ খেলো ইণ্ডিয়া য়ুথ গেমছৰ উদ্বোধনী অনুষ্ঠানত ভাগ ল’বলৈ অসমলৈ অহা বলীউডৰ প্রখ্যাত কণ্ঠশিল্পী তথা সংগীতকাৰ শংকৰ মহাদেৱনে অসমৰ এজন অখ্যাত বাঁহীবাদকৰ প্রতিভাত মুগ্ধ হয় ৷ গুৱাহাটীৰ এখন ৰেষ্টুৰেণ্টত পুৱাৰ আহাৰ গ্রহণ কৰিবলৈ যোৱাৰ সময়তে ৰেষ্টুৰেণ্টৰ বাহিৰত বাঁহী বজাই থকা প্রতিভাৱান যুৱকজনক তেওঁ প্রত্যক্ষ কৰে ৷ অখ্যাত যুৱকজনৰ বাঁহীবাদনত গভীৰভাৱে আপ্লুত হৈ শংকৰ মহাদেৱনে তেওঁৰ সৈতে কথা পাতিবলৈ আৰম্ভ কৰে আৰু ছ’চিয়েল মিডিয়াত প্রতিভাৱান যুৱকজনৰ মন পৰশা বাঁহীবাদন আপলোড কৰে ৷ ইয়াৰ পাছতে খন্তেকৰ ভিতৰতে ছ’চিয়েল মিডিয়াত ভাইৰেল হৈ পৰে অসমৰ এইগৰাকী অখ্যাত বাঁহীবাদকৰ বিৰল প্রতিভা ৷ শংকৰ মহাদেৱনৰ সান্নিধ্য লাভ কৰি দেশজুৰি খ্যাতি অর্জন কৰা এই বাঁহীবাদকগৰাকী হ’ল দিলীপ হীৰা ৷ বলীউডৰ প্রতিষ্ঠিত কণ্ঠশিল্পীগৰাকীয়ে ছ’চিয়েল মিডিয়াত অসম সন্তান দিলীপ হীৰাক অত্যন্ত প্রতিভাশালী আখ্যা দিছে ৷