নিয়মীয়া বাৰ্তা, ২৭ নৱেম্বৰঃ ধুবুৰীৰ এম কো ৰোড আৰক্ষীৰ অভিযানত বৃহৎ পৰিমাণৰ গৰু জব্দ কৰা হয় । বাইলাৰ চৰৰ পৰা ৰাইজৰ সহযোগত আৰক্ষীয়ে জব্দ কৰে ৬৭ টা গৰু । গৰুকেইটা বাংলাদেশলৈ চোৰাংভাৱে সৰবৰাহ কৰাৰ বাবে ৰখা হৈছিল । সোমবাৰে নিশা গো সৰবৰাহকাৰীসকলে বাইলাৰ চৰ নামৰ চৰাঞ্চল এটাৰ নিৰ্জন অঞ্চলত কঁহুৱা বনৰ মাজত বাংলাদেশলৈ সৰবৰাহ কৰাৰ বাবে গৰু গোপনে আনি জমা কৰা তথ্য লাভ কৰে আৰক্ষীয়ে । এই তথ্যৰ ভিত্তিত ধুবুৰীৰ এম কো ৰোড আৰক্ষী চকীৰ ভাৰপ্ৰাপ্ত বিষয়া এইচ আহমেদ আৰু উপ-পৰিদৰ্শক চাণক্য দাসৰ নেতৃত্বত আৰক্ষীয়ে ৬৭ টাকৈ গৰু জব্দ কৰিবলৈ সক্ষম হয় । অৱশ্যে অন্ধকাৰৰ সুযোগ লৈ সৰবৰাহকাৰীসকলে আৰক্ষীৰ বেহু ফালি পলাই যাবলৈ সক্ষম হয় । মঙলবাৰে পুৱা নাওৰে ধুবুৰীলৈ আনি চহৰখনৰ পাৰ্শ্বৱৰ্তী কেইবাটাও খোৱাৰত গৰুবোৰ ৰখাৰ ব্যৱস্থা কৰিছে আৰক্ষীয়ে ।