নিয়মীয়া বার্তা, ২ফেব্রুৱাৰীঃ ৰাজ্যত হস্তী–মানুহৰ সংঘাত বৃদ্ধি পাই অহাৰ সময়তে মানাহ ৰাষ্ট্রীয় উদ্যোনত বন্য জীৱ–জন্তু আৰু মানুহৰ মাজত বন্ধুত্বসুলভ পৰিৱেশ বিৰাজ কৰিছে ৷ চিৰাঙৰ পাণবাৰী ৰেঞ্জত বনৰীয়া হাতীয়ে বিচাৰি আহে বনকর্মীৰ মৰম ৷ বনাঞ্চলৰ পৰা জন অৰণ্যত প্রৱেশ কৰি হাতীয়ে বনকর্মীৰ মৰম বিচাৰি উপস্থিত হয় বন কার্যালয়ত ৷ ৰাষ্ট্রীয় উদ্যোনখনৰ মাজত থকা পর্যটকৰ বাংলোৰ তলত এজন বনকর্মীয়ে বনৰীয়া এটা প্রকাণ্ড হাতীৰ গা খুজুৱাই আদৰ কৰা দেখা গৈছে ৷ আনহাতে বন্যহস্তীৰ বৃহৎ বৃহৎ জাক আহিবনাঞ্চলখনৰ সুৰক্ষাৰ বাবে থকা বনকর্মীসকলৰ কাষ চাপে৷ বন্যহস্তী আৰু বনকর্মীসকলৰ মাজত বন্ধুত্বপূর্ণ পৰিৱেশ গঢ় লৈ উঠাৰ বাবে নিচেই ওচৰত আহি উপস্থিত হোৱা পৰিলক্ষিত হয় ৷ বনকর্মীৰ পৰা আহাৰ খোৱাৰ পিছতহে বন্যহস্তীৰ জাক উভতি যায় ৷ কেৱল বন্যহস্তীয়েই নহয়, বনাঞ্চলখনৰ হৰিণাকে আদি কৰি বিভিন্ন জীৱ–জন্তুৰ সৈতে স্থানীয় প্রকৃতিপ্রেমী লোকৰ সৈতে আছে মধুৰ সম্পর্ক ৷ এইসকল লোকৰ কাষত আহি বন্য জীৱ–জন্তুৱে একেলগে বিচৰণ কৰি ফুৰা পৰিলক্ষিত হয় ৷ মানাহ ৰাষ্ট্রীয় উদ্যোনৰ পাণবাৰী ৰেঞ্জৰ ঔডুবি, খেৰণী, লাফাচাৰী বীটত বন্য জীৱ–জন্তু আৰু মানুহৰ মাজত গঢ় লৈ উঠা বন্ধুত্বপূর্ণ পৰিৱেশে পর্যটকসকলক আকর্ষিত কৰি আহিছে ৷ ৰাজ্যত বন্য জীৱ–জন্তু আৰু মানুহৰ মাজত সংঘাত বৃদ্ধি হৈ অহাৰ সময়তে চিৰাঙত বন্য জীৱ–জন্তু আৰু মানুহৰ মাজত গঢ় লৈ উঠা বন্ধুত্বপূর্ণ সম্পর্কই এক বিৰল নিদর্শন আগবঢ়াইছে ৷ এই বিৰল দৃশ্য প্রত্যক্ষ কৰাৰ বাবে মানাহ ৰাষ্ট্রীয় উদ্যানৰ পাণবাৰী ৰেঞ্জলৈ অহাৰ বাবে স্থানীয় লোকসকলে আহ্বান জনাইছে ৷