নিয়মীয়া বাৰ্তা
অসমৰ সৰ্বাধিক প্ৰচলিত দৈনিক বাতৰিকাকত

চীনা সেনাক যুঁজলৈ সাজু হোৱাৰ নির্দেশ জিনপিঙৰ

সীমান্তত যুদ্ধংদেহি ভাৰত

নিয়মীয়া বাৰ্তা ১৫ অক্টোবৰঃ  সীমান্তত ভাৰতৰ সৈতে সংঘাত চলি থকাৰ সময়তে সেনাক যুদ্ধৰ বাবে সাজু হ’বলৈ নির্দেশ দিছে চীনৰ ৰাষ্ট্রপতি ঝি জিনপিঙে৷ লাডাখত ভাৰতীয় সেনাই যুদ্ধংদেহি মনোভাৱেৰে অৱস্থান কৰি থকাৰ সময়তে চীনৰ ৰাষ্ট্রপতিয়ে পিএলএক সাজু হ’বলৈ নির্দেশ দিয়াৰ পিছতেই দুই দেশৰ মাজত এখন প্রত্যক্ষ যুদ্ধৰ সম্ভাৱনা প্রকট হৈছে৷লাডাখৰ এলএচিত শান্তি আৰু সুস্থিৰতা বর্তাই ৰখাৰ বাবে চীন–ভাৰতে সামৰিক আৰু কূটনৈতিক প্রয়াস চলাই থকাৰ সময়তে চীনৰ ৰাষ্ট্রপতি জিনপিঙৰ মন্তব্যই যুদ্ধৰ অশনি সংকেত দিছে৷ ভাৰত–চীনৰ সেনাৰ মাজত সংঘাতত লাডাখৰ এলএচিত সৃষ্ট অস্থিৰ বাতাৱৰণ ওভতাই অনাৰ লক্ষ্যৰে কালি দুয়ো দেশৰ সেনাৰ জ্যেষ্ঠ বিষয়াৰ বৈঠকত সীমান্তত উত্তেজনা হ্রাসৰ সহমতত উপনীত হোৱাৰ ২৪ ঘণ্টাৰ পিছতেই চীনৰ ৰাষ্ট্রপতি জিনপিঙে যুদ্ধৰ হুংকাৰ দিছে৷ উল্লেখ্য যে চীনৰ ৰাষ্ট্রপতি জিনপিঙে সেনাক যুদ্ধৰ বাবে সাজু হ’বলৈ নির্দেশ বাতৰিটো চীনৰ নিউজ এজেন্সী ঝিনহুৱাৰ আধাৰত আন্তঃৰাষ্ট্রীয় সংবাদ মাধ্যমত প্রকাশ পাইছে৷

প্রকাশিত বাতৰি অনুসৰি কালি চীনৰ ৰাষ্ট্রপতি জিনপিঙে গুৱাংদং প্রদেশত থকা পিপল্ছ লিবাৰেচন আর্মী (পিএলএ)ৰ শিবিৰ পৰিদর্শন কৰে৷ গুৱাংদং প্রদেশৰ ছাউঝো চহৰৰ পিএলএৰ মেৰিন ক’ৰৰ শিবিৰ পৰিদর্শনৰ সময়ত ৰাষ্ট্রপতিগৰাকীয়ে সেনাক হাইএলার্ট হৈ থাকিবলৈ নির্দেশ দিয়াৰ সমান্তৰালকৈ যুদ্ধৰ বাবে দেহ–মন প্রস্তুত কৰিবলৈ নির্দেশ দিয়ে৷ দুই দেশৰ সেনাৰ জ্যেষ্ঠ বিষয়াৰ মাজত সাতবাৰকৈ বৈঠক অনুষ্ঠিত হ’লেও সীমান্তত এতিয়ালৈকে শান্তি ঘূৰি অহা নাই৷ ইয়াৰ বিপৰীতে ভাৰতৰ প্রতিৰক্ষা মন্ত্রী ৰাজনাথ সিঙে দুদিন পূর্বে লাডাখকে ধৰি সীমান্তৰ সাত ৰাজ্যত ৪৪খন নতুন দলং উদ্বোধন কৰে৷ লাডাখ আৰু অৰুণাচল প্রদেশৰ সীমান্ত অঞ্চলত নতুন দলং উদ্বোধন কৰাক লৈ চীনৰ বৈদেশিক মন্ত্রালয়ে কালি তীব্র অসন্তুষ্টি ব্যক্ত কৰিছিল৷ দেশখনৰ বৈদেশিক মন্ত্রালয়ে মুকলিকৈ ভাৰতৰ বিৰুদ্ধে ক্ষোভ প্রকাশ কৰাৰ পিছত স্বয়ং চীনৰ ৰাষ্ট্রপতি জিনপিঙে সেনাৰ শিবিৰ পৰিদর্শন কৰি যুদ্ধৰ হুংকাৰ দিয়াটো তাৎপর্যপূর্ণ বিবেচিত হৈছিল৷

গুৰুত্বপূর্ণ যে চীনে ভাৰতৰ সীমান্তত বিশেষকৈ লাডাখৰ সীমান্তত ৬০ হাজাৰতকৈও অধিক সেনা মোতায়েন কৰি যুদ্ধাস্ত্রৰে সমৰসজ্জা গঢ়ি তুলিছে৷ ইয়াৰ বিপৰীতে ভাৰতেও চীনক যিকোনো মুহূর্তত প্রত্যাহ্বান জনোৱাৰ লক্ষ্যৰে অত্যাধুনিক যুদ্ধ বিমানসহ সমৰসজ্জা গঢ়ি তুলিছে৷ দুয়ো দেশৰ সেনাই যুদ্ধৰ বাবে সীমান্তত সাজু হৈ থকাৰ মাজতে কালি চীনৰ ৰাষ্ট্রপতিগৰাকীয়ে যুদ্ধৰ ইংগিত দিয়াত যুদ্ধ হোৱাৰ সম্ভাৱনাক নুই কৰিব নোৱাৰি৷ তাৎপর্যপূর্ণ যে যোৱা ১৫ জুনত লাডাখৰ গালৱান উপত্যকাত চীনা সৈন্যৰ হাতত ২০ ভাৰতীয় জোৱান শ্বহীদ হোৱাৰ পিছতেই সীমান্ত অঞ্চলত উত্তেজনা বৃদ্ধি পায়৷ সীমান্তলৈ শান্তি আৰু সুস্থিৰতা ওভতাই অনাৰ বাবে দুয়ো দেশৰ মাজত কূটনৈতিক আৰু সামৰিক পর্যায়ত আলোচনা হৈছে যদিও এতিয়ালৈকে সঠিকভাৱে কার্যকৰী হোৱা নাই৷ ভাৰতৰ অবিচ্ছেদ্য অংশ লাডাখ আৰু অৰুণাচল প্রদেশক চীনে নিজৰ বুলি দাবী কৰি অহাৰ পৰিপ্রেক্ষিততে সীমান্তত বিগত দশক দশক ধৰি দুই দেশৰ মাজত সংঘাত চলি আছে৷

You might also like