নিয়মীয়া বাৰ্তা ১৩ এপ্ৰিলঃ মুম্বাইৰ ব্রিচ কেণ্ডী হাস্পতালত আজি ৰাষ্ট্রীয়তাবাদী কংগ্রেছ দল (এনচিপি)ৰ মুৰব্বী শাৰদ পাৱাৰৰ অস্ত্রোপচাৰ সফলতাৰে সম্পন্ন হৈছে৷ ৮০ বছৰীয়া নেতাগৰাকীক দেওবাৰে হাস্পতালত ভর্তি কৰোৱা হৈছে৷ গলব্লাডাৰৰ পৰা অস্ত্রোপচাৰেৰে এটা ষ্ট’ন বাহিৰ কৰা হৈছে পাৱাৰৰ৷
উল্লেখনীয় যে কিছুদিন পূর্বে পেটৰ পীড়াত ভুগিছিল শাৰদ পাৱাৰে৷ তেতিয়াই নেতাগৰাকীক হাস্পতালত ভর্তি কৰোৱা হৈছিল যদিও দুদিন পিছতে তেওঁক ঘৰলৈ যাবলৈ দিয়া হৈছিল৷ হাস্পতাল সূত্রই সদৰী কৰা অনুসৰি আজি পুৱাৰ ভাগতে পাৱাৰৰ অস্ত্রোপচাৰ সম্পন্ন হৈছে৷
বর্তমান নেতাগৰাকীৰ স্বাস্থ্য সুস্থিৰ বুলি উল্লেখ কৰাৰ উপৰি আগন্তুক এদিন বা দুদিন পিছতেই তেওঁক ঘৰলৈ যোৱাৰ অনুমতি দিয়া হ’ব বুলি হাস্পতালৰ সূত্রই সদৰী কৰিছে৷