নিয়মীয়া বাৰ্তা, ৩০ জুলাইঃ অসম–মিজোৰাম সীমান্তত সংঘটিত শেহতীয়া ঘটনাৱলীৰ পৰিপ্রেক্ষিতত অসমৰ লোকসকলক মিজোৰাম ভ্রমণ নকৰিবলৈ পৰামর্শ প্রদান কৰিছে ৰাজ্যৰ গৃহ আৰু ৰাজনৈতিক পৰিক্রমা বিভাগে৷
বৃহস্পতিবাৰে বিভাগটোৰ আয়ুক্ত সচিব এম এছ মণিৱন্ননে জাৰি কৰা এক নির্দেশনা অনুসৰি ৰাজ্যৰ জনসাধাৰণৰ সুৰক্ষাৰ বাবে এই ভ্রমণ সন্দর্ভত পৰামর্শ প্রদান কৰা হৈছে৷ একে সময়তে মিজোৰামত বাস কৰা অসমৰ লোকসকলকো সম্পূর্ণৰূপে সতর্কতা অৱলম্বন কৰিবলৈ ৰাজ্যৰ গৃহ বিভাগে আহ্বান জনাইছে৷
তৎকালীনভাৱে ৰাজ্য চৰকাৰৰ এই নির্দেশনা বাহাল কৰা হৈছে৷ এই সন্দর্ভত প্রদান কৰা নির্দেশনাত উল্লেখ কৰা অনুসৰি লাইলাপুৰত সংঘটিত ঘটনাৰ পাছত একাংশ মিজো নাগৰিক সমিতি, ছাত্র আৰু যুৱ সংগঠনে ধাৰাবাহিকভাৱে অসম আৰু অসমবাসীৰ বিৰুদ্ধে কেতবোৰ উচটনিমূলক মন্তব্য প্রদান কৰি আহিছে৷
তদুপৰি মিজোৰামৰ বহুসংখ্যক নাগৰিকৰ হাতত স্বয়ংক্রিয় অস্ত্র–শস্ত্র থকা ভিডিঅ’ লাভ কৰিছে অসম আৰক্ষীয়ে৷ এনে পৰিস্থিতিত অসমবাসীৰ সুৰক্ষা নিশ্চিত কৰাৰ বাবে ৰাজ্যৰ গৃহ আৰু ৰাজনৈতিক পৰিক্রমা বিভাগে ভ্রমণ সতর্কতা জাৰি কৰিছে৷
