নিয়মীয়া বার্তা, ২৯ ডিচেম্বৰঃ গুৱাহাটী মহানগৰীৰ পার্শ্বৱর্তী বোন্দাত উন্মুক্ত লেভেল ক্রছিঙৰ মাজেৰে অতি বিপজ্জনকভাৱে বছৰ বছৰ ধৰি অহা–যোৱা কৰি আছে অঞ্চলটোৰ দহ সহস্রাধিক লোক৷ আশ্চর্যজনকভাৱে উক্ত স্থানত এটা লেভেল ক্রছিং স্থাপনৰ বাবে বাৰম্বাৰ দাবী জনোৱাৰ পাছতো ব্যৱস্থা গ্রহণ কৰা নাই সংশ্লিষ্ট বিভাগে৷ ফলত অতি বিপদসংকুলভাৱে মৰণত শৰণ দি যাতায়াত কৰি আহিছে অঞ্চলবাসীয়ে৷ উল্লেখ্য যে নাৰেংগী–চন্দ্রপুৰ মূল গড়কাপ্ঢানী পথৰ পৰা চপাইদাং সংযোগ কৰি প্রায় ৭ কিলোমিটাৰ দৈর্ঘৰ বোন্দা–চপাইদাং পথ নামেৰে এটা পথ আছে৷ যিটো পথেৰে ধূপগুৰি, ঘুলিগাঁও, ৰামচিং চাপৰি, চপাইদাং, ৰাজাবাৰী, বোন্দা আদি কেইবাটাও অঞ্চলৰ সহস্রাধিক লোকে অহা–যোৱা কৰে৷ এই ব্যস্ত পথটোৰ মাজেৰে পাৰ হৈ গৈছে দ্বৈত ৰে’ললাইন৷ সদাব্যস্ত পথটোৰ মাজেৰে দ্বৈত ৰে’ললাইন পাৰ হৈ গৈছে যদিও তাত কোনো ধৰণৰ লেভেল ক্রছিঙৰ ব্যৱস্থা কৰা নাই ৰে’ল বিভাগে৷ ইয়াৰ বিপৰীতে পকী খুঁটা পুতি পথটো একপ্রকাৰ বন্ধ কৰি থৈছে৷ অৱশ্যে তাৰ মাজতে দুচকীয়া আৰু সৰু চাৰিচকীয়া বাহন চলাচল কৰিব পৰাকৈ নিজাববীয়াকৈ ব্যৱস্থা কৰি লৈছে স্থানীয় ৰাইজে৷ সেয়া অতি বিপজ্জনক৷ স্থানীয় ৰাইজে জানিবলৈ দিয়া মতে বিগত সময়ছোৱাত এই উন্মুক্ত লেভেল ক্রছিঙৰ মাজেৰে পাৰ হ’বলৈ লওঁতে কেইবাজনো লোক ৰে’লৰ খুন্দাত হতাহত হৈছে৷ বিশেষকৈ শীতকালত ঘন কুঁৱলীৰ সময়ত এই ক্রছিংটো পাৰ হোৱাটো অধিক বিপজ্জনক বুলি প্রকাশ কৰিছে স্থানীয় ৰাইজে৷ ৰে’ল বিভাগক এই বিপজ্জনক উন্মুক্ত ৰে’ল ক্রছিংটোত ফ্লাই অভাৰ নহ’লেও লেভেল ক্রছিং এটা দিবৰ বাবে অঞ্চলবাসীয়ে বহুবাৰ স্মাৰক–পত্র দিছে৷ শেহতীয়াকৈ উক্ত স্থানত লেভেল ক্রছিং স্থাপনৰ বাবে পুনৰ সজোৰ দাবী উত্থাপন কৰিছে স্থানীয় ৰাইজে৷

The post মহানগৰীৰ সমীপৰ বোন্দাত ৰে’ল ক্ৰছিঙৰে বিপদসংকুল যাত্ৰা first appeared on নিয়মীয়া বাৰ্তা.