নিয়মীয়া বাৰ্তা, ৮ জানুৱাৰীঃ নাগৰিকত্ব সংশোধনী আইন বিৰোধী আন্দোলনে ‘খেলো ইণ্ডিয়া’ ৰ উদ্বোধনী অনুষ্ঠানত এক অপ্ৰীতিকৰ পৰিস্থিতি সৃষ্টি কৰাৰ আশংকাত প্ৰধানমন্ত্ৰী নৰেন্দ্ৰ মোদীৰ গুৱাহাটী ভ্ৰমণ কাৰ্যসূচী বাতিল কৰাৰ সিদ্ধান্ত লোৱা হৈছে৷

প্রধানমন্ত্রী কার্যালয়ে সোমবাৰে দিছপুৰলৈ এই বার্তা প্রেৰণ কৰা বুলি জানিব পৰা গৈছে৷ সূত্র মতে, ‘কা’বিৰোধী আন্দোলনৰ পৰিপ্রেক্ষিতত ৰাজ্য চৰকাৰে প্রধানমন্ত্রীক গুৱাহাটী ভ্রমণ নকৰাৰ পৰামর্শ দিছিল৷

বিশেষকৈ দেওবাৰে ভাৰত–শ্রীলংকাৰ টি–২০ মেচ বাতিল হোৱাৰ পূর্বে দর্শকসকলৰ ‘কা’বিৰোধী শ্লোগানৰ পিছত ৰাজ্য চৰকাৰে বিশেষ সতর্কতা অৱলম্বন কৰিছে৷

১০ জানুৱাৰীত সৰুসজাই ষ্টেডিয়ামত ‘খেলো ইণ্ডিয়া’ উদ্বোধন কৰিবলৈ আহি প্রধানমন্ত্রী নৰেন্দ্র মোদী যাতে কোনোধৰণৰ অস্বস্তিকৰ পৰিস্থিতিৰ সন্মুখীন হ’বলগীয়া নহয়, তাৰ বাবেই ৰাজ্য চৰকাৰৰ তৰফৰ পৰা প্রধানমন্ত্রী কার্যালয়লৈ পৰামর্শ প্রেৰণ কৰা হৈছিল৷ ইয়াৰ পিছত কালি আনুষ্ঠানিকভাৱে প্রধানমন্ত্রী কার্যালয়ে মোদীৰ কার্যসূচী বাতিল কৰা হৈছে বুলি অসম চৰকাৰলৈ বার্তা প্রেৰণ কৰে৷

জানিব পৰা মতে, ১০ জানুৱাৰীত ‘খেলো ইণ্ডিয়া য়ুথ গেমছ’ উদ্বোধনৰ উপৰি প্রধানমন্ত্রীৰ এটা বেচৰকাৰী কার্যসূচীত অংশগ্রহণ কৰাৰ কথা আছিল৷ উক্ত অনুষ্ঠানৰ কার্যসূচীও বাতিল কৰা হৈছে৷

মন কৰিবলগীয়া যে প্রধানমন্ত্রী নৰেন্দ্র মোদীয়ে ‘খেলো ইণ্ডিয়া’ উদ্বোধন কৰিবলৈ গুৱাহাটীত উপস্থিত হ’লে সদৌ অসম ছাত্র সন্থাকে ধৰি ৰাজ্যৰ জাতীয় দল–সংগঠনসমূহে প্রতিবাদ সাব্যস্ত কৰিব বুলি ইতিমধ্যে হুংকাৰ দি থৈছে৷

ইপিনে মঙলবাৰে নতুন দিল্লীত এখন সংবাদ মেল সম্বোধন কৰি আছুৰ শীর্ষ নেতৃত্বই পুনৰ প্রধানমন্ত্রীৰ অসম ভ্রমণৰ কালছোৱাত ‘কা’বিৰোধী প্রতিবাদ সাব্যস্ত কৰিব বুলি স্পষ্ট কৰি দিছে৷ ছাত্র সন্থাৰ মুখ্য ডপদেষ্টা সমুজ্জ্বল ভট্টাচার্যৰ বক্তব্য– ‘খেলো ইণ্ডিয়া’ চলি থাকক৷ আমাৰ কোনো আপত্তি নাই৷ বিভিন্ন ৰাজ্যৰ খেলুৱৈসকল আহক৷ আমি আদৰ–আপ্যায়ন কৰিম৷ কিন্তু প্রধানমন্ত্রীয়ে প্রতিযোগিতাখন উদ্বোধন কৰিবলৈ গ’লে তেওঁ প্রতিবাদৰ সন্মুখীন হ’ব৷ সেই কথা নিশ্চিত৷

The post দিছপুৰৰ পৰামৰ্শত পিএমঅ’য়ে বাতিল কৰিলে মোদীৰ গুৱাহাটী ভ্ৰমণ first appeared on নিয়মীয়া বাৰ্তা.

নিয়মীয়া বাৰ্তা, ৩১ ডিচেম্বৰঃ নৱবৰ্ষলৈ আৰু মাত্ৰ কেইটামান ঘণ্টা বাকী । সকলোৱে ইতিমধ্যে ব্যস্ত হৈ পৰিছে পুৰণিক বিদায় দি নতুনক আদৰিবলৈ । ইয়াৰ থিক ব্যতিক্ৰম নহয় ৰাজনৈতিক নেতাসকলো ।

পিচে ২০১৯ বৰ্ষত প্ৰধানমন্ত্ৰী নৰেন্দ্ৰ মোদীয়ে তেওঁৰ মাহেকীয়া ৰেডিঅ’ অনুষ্ঠান ‘মন কি বাত’ত সৰ্বাধিক কি শব্দ ব্যৱহাৰ কৰিলে আপুনি জানেনে ?

এই বৰ্ষৰ ৯ টা খণ্ডৰ ‘মন কি বাত’ত প্ৰধানমন্ত্ৰীগৰাকীয়ে “ইণ্ডিয়া” শব্দটো মুঠ ২২০ বাৰ ব্যৱহাৰ কৰে । যাৰ পিছতে “নেচন” (ৰাষ্ট্ৰ) শব্দটো মুঠ ৯৪ বাৰ ব্যৱহাৰ কৰাৰ বিপৰীতে “ৱাটাৰ” (পানী) শব্দটো ৭৩ বাৰ ব্যৱহাৰ কৰে ।

The post ২০১৯ ত ‘মন কি বাত’ অনুষ্ঠানত মোদীয়ে সৰ্বাধিক ব্যৱহাৰ কৰা শব্দটো কি জানেনে ? first appeared on নিয়মীয়া বাৰ্তা.

নিয়মীয়া বাৰ্তা, ২৯ ডিচেম্বৰঃ প্রধানমন্ত্রী নৰেন্দ্র মোদীয়ে দেওবাৰে অংশ লয় এই বৰ্ষৰ অন্তিমটো ‘মন কি বাত’ আনুষ্ঠানত । এই অনুষ্ঠানত মোদীয়ে থলুৱা শিল্পীৰ সমর্থন কৰাৰ বাবে স্থানীয় পণ্য কিনাৰ ওপৰত জোৰ দিয়ে । লগতে দক্ষতা উন্নয়ন আৰু কর্মসংস্থানৰ লগত জড়িত হিমায়াত প্র’গ্রেমৰ বিষয়ে উদাহৰণ দিয়ে ।

ইপিনে মাহেকীয়া ৰেডিঅ অনুষ্ঠান ‘মন কি বাত’ৰ ভাষণ প্ৰসংগত তেওঁ কয় যে- প্ৰিয় দেশবাসী, ২০২২ ত আমি স্বাধীনতাৰ ৭৫ বছৰ অতিক্ৰম কৰাৰ শুভক্ষণত থলুৱা শিল্পীক সমর্থন কৰি স্থানীয় পণ্য কিনাৰ ওপৰত জোৰ দিয়াটো প্ৰয়োজন । যাতে দুই বা তিনি বছৰলৈ আমাৰ স্থানীয় উৎপাদন স্থিৰ হৈ থাকে । সেই উদ্দ্যেশ্য আগত লৈ সকলোকে স্থানীয় সামগ্ৰী ক্ৰয় কৰিবলৈ আহ্বান জনাই প্ৰধানমন্ত্ৰী মোদীয়ে। যিটো স্বতন্ত্ৰ ভাৰতৰ এটা সুন্দৰ ক্ষণ ৰূপে বিবেচিত হ’ব ।

তেওঁ লগতে কয় যে- “প্রিয় দেশবাসী, আপুনি জানি আনন্দিত হ’ব যে এই কর্মসূচিৰ আওতাত যোৱা দুবছৰে ১৮,০০০ যুৱকক ৭৭ টা বিভিন্ন ব্যৱসায়ৰ ওপৰত প্রশিক্ষণ দিয়া হৈছে। ইয়াৰ ভিতৰত ৫০০০ লোকে বহু ব্যৱসায়ৰ সৈতে জড়িত হৈ আছে । ‘হিমায়াত প্র’গ্রেম’-ৰ আওতাত এনে পৰিৱর্তিত জীৱনৰ সাফল্যই সঁচাকৈয়ে হৃদয় চুই যায় ।”

আনহাতে তেওঁ এই কর্মসূচীৰ দ্বাৰা জম্মু-কাশ্মীৰৰ যুৱকসকলক আত্মবিশ্বাস দিছে আৰু জীৱন পথত আগুৱাই যোৱাৰ পথ দেখুৱাইছে বুলিও মন্তব্য কৰে।

অনুষ্ঠানৰ শেষত প্ৰধানমন্ত্ৰী মোদীয়ে শ্রোতাসকলক নববর্ষৰ শুভেচ্ছা জ্ঞাপন কৰি ২০২০ ত পুনৰ লগ পোৱাৰ কথা দোহাৰে ।

The post এই বৰ্ষৰ অন্তিমটো ‘মন কি বাত’ত কি ক’লে প্ৰধানমন্ত্ৰী মোদীয়ে ? first appeared on নিয়মীয়া বাৰ্তা.

নিউজডেস্ক, ২৪ ডিচেম্বৰঃ প্রধানমন্ত্রী নৰেন্দ্র মোদীয়ে বুধবাৰে লক্ষ্ণৌৰ লোকভৱনত প্রাক্তন প্রধানমন্ত্রী অটল বিহাৰী বাজপেয়ীৰ এটা প্ৰতিমূর্তি উন্মোচন কৰিব।

এই অনুষ্ঠানটি ভাৰতীয় জনতা পার্টিৰ (বিজেপি) সহ-প্রতিষ্ঠাতা অটল বিহাৰী বাজপেয়ীৰ জন্মবার্ষিকী উপলক্ষে আয়োজন কৰা হৈছে ।

ইতিমধ্যে অনুষ্ঠানটোৰ সকলো প্রস্তুতি প্ৰায় সম্পূৰ্ণ হৈ উঠিছে । ইপিনে মঙলবাৰে উত্তৰ প্ৰদেশ চৰকাৰৰ এক প্ৰতিনিধি দলে অনুষ্ঠানথলীৰ পৰিদর্শন কৰিব।

উল্লেখ্য যে স্নিফাৰ ড’গ আৰু বোমা বিশেষজ্ঞ দলৰ দ্বাৰা এই স্থান পৰীক্ষণ কৰা হৈছে । এই অনুষ্ঠানটোত মুখ্যমন্ত্ৰী যোগী আদিত্যনাথ আৰু ৰাজ্যপাল আনন্দি ৱেন পেটেলৰ উপৰি ৰাজ্যখনৰ মন্ত্ৰী-নেতাসকল উপস্থিত থাকিব ।

The post অটল বিহাৰী বাজপেয়ীৰ প্ৰতিমূর্তি উন্মোচন কৰিব প্রধানমন্ত্রী মোদীয়ে first appeared on নিয়মীয়া বাৰ্তা.

নিউজ ডেস্ক, 12 নৱেম্বৰঃ প্ৰধান মন্ত্ৰী নৰেন্দ্ৰ মোডীয়ে দুদনীয়া কাৰ্যসূচীৰে ১১ সংখ্যক ব্ৰীকছ সন্মিলনত অংশ গ্ৰহণ কৰিবলৈ ব্ৰাজিলৈ ৰাওনা হৈছে।
ব্ৰীকছ শিখৰ সন্মিলন ১৩-১৪ নৱেম্বৰলৈকে ব্ৰাজিলত আয়োজন কৰা হৈছে । এইবাৰ ব্ৰীকছ সন্মিলনৰ মুখ্য বিষয় হৈছে উদ্ভাৱনী ভৱিষ্যৎৰ বাবে আৰ্থিক বৃদ্ধি। প্ৰধান মন্ত্ৰী কাৰ্যালয়ৰ এক বিবৃত্তিত প্ৰকাশ যে প্ৰধান মন্ত্ৰী মোডীয়ে ষষ্ঠ বাৰৰ বাবে ব্ৰীকছ সন্মিলনত অংশগ্ৰহণ কৰিব।

The post ব্ৰীকছ সন্মিলনত অংশগ্ৰহণ কৰিবলৈ ব্ৰাজিললৈ ৰাওনা প্ৰধানমন্ত্ৰী মোডী first appeared on নিয়মীয়া বাৰ্তা.