নিয়মীয়া বাৰ্তা ১৪ অক্টোবৰঃ ক’ভিডৰ আতংকৰ মাজেৰে আগন্তুক মেড্রিক পৰীক্ষা সুচাৰুৰূপে সম্পূর্ণ কৰিবলৈ সাজু হৈছে অসম মাধ্যমিক শিক্ষা পৰিষদ, চমুকৈ ছেবা৷ ইতিমধ্যে ছেবাই ঘোষণা কৰিছে ২০২১ বর্ষৰ হাইস্কুল আৰু হাইমাদ্রাছা পৰীক্ষাৰ প্র–পত্র পূৰণৰ দিন৷ মহামাৰী ক’ভিডৰ আতংকৰ বাবে এইবাৰ এমাহ পলমকৈ আৰম্ভ হ’ব প্র–পত্র পূৰণৰ প্রক্রিয়া৷ ছেবাই জাৰি কৰা জাননী অনুসৰি অহা ২ নৱেম্বৰৰ পৰা ২৩ নৱেম্বৰৰ ভিতৰত পৰীক্ষার্থীসকলে অনলাইনৰ জৰিয়তে কৰিব লাগিব প্র–পত্র পূৰণৰ কাম৷ ছেবাৰ ৱেবছাইটwww.sebaonline.org ত লগন কৰি আগন্তুক বর্ষৰ পৰীক্ষার্থীসকলে কৰিব পাৰিব প্র–পত্র পূৰণৰ লগতে লাভ কৰিব পাৰিব যাৱতীয় সকলো তথ্য৷ আনহাতে, ক’ভিডৰ বাবে এইবাৰ পূর্বৰ তুলনাত কিছু পলমকৈ অনুষ্ঠিত হ’ব পৰীক্ষা৷ ক’ভিডৰ বাবে ছাত্র–ছাত্রীসকলৰ মূল্যৱান সময় নষ্ট হোৱাৰ বাবেই এইবাৰ কিছু পলমকৈ পৰীক্ষা অনুষ্ঠিত হ’ব বুলি জানিবলৈ দিয়ে ছেবাৰ অধ্যক্ষ ৰমেশ চন্দ্র জৈনে৷ ক’ভিড প্রট’কলৰ সকলো নীতি–নিয়ম মানি মার্চৰ প্রথম সপ্তাহৰ পৰা হাইস্কুল আৰু হাইমাদ্রাছা পৰীক্ষা অনুষ্ঠিত হ’ব বুলি সদৰী কৰিছে ছেবাৰ অধ্যক্ষ ৰমেশ চন্দ্র জৈনে৷