নিয়মীয়া বাৰ্তা ২৪ ছেপ্টেম্বৰঃ প্রতিভাৱান অভিনেতা সুশান্ত সিং ৰাজপুতৰ ৰহস্যজনক মৃত্যুৰ সৈতে সম্পর্কিত ড্রাগ্ছ গোচৰত অভিনেত্রী দীপিকা পাডুকনসহ চাৰি অভিনেত্রীলৈ চমন জাৰি কৰিছে নার্ক’টিকছ কণ্ড্র’ল ব্যুৰ’ৱে (এন চি বি)৷ অভিনেত্রী দীপিকা পাডুকনৰ মেনেজাৰ কৰীশ্মা প্রকাশ, টেলেণ্ট মেনেজাৰ জয়া সাহা আৰু চলচ্চিত্র নির্মাতা মধু মণ্টেনাক চমন জাৰি কৰি সোধা–পোছা কৰাৰ পাছতে এন চি বিয়ে বলীউডৰ চাৰি অভিনেত্রীলৈ চমন জাৰি কৰে৷ ইতিমধ্যে হোৱটছএপ বার্তাত ড্রাগ্ছৰ সৈতে দীপিকা পাডুকন জড়িত থকাটো নিশ্চিত হোৱাৰ পাছত এন চি বিয়ে আজি অভিনেত্রী পাডুকনক চমন জাৰি কৰে৷ তদুপৰি ইতিপূর্বে ড্রাগ্ছ গোচৰত সাঙোৰ খাই পৰা অভিনেত্রী ছাৰা আলী খান, শ্রদ্ধা কাপুৰ আৰু ৰাকুল প্রীত সিঙকো এন চি বিয়ে চমন জাৰি কৰে৷ এন চি বিৰ সূত্রত প্রকাশ পোৱা মতে, চমন অনুসৰি দীপিকা পাডুকনে ২৫ ছেপ্টেম্বৰত এন চি বিৰ কার্যালয়ত হাজিৰ হ’ব লাগিব৷ তেনেদৰে ২৬ ছেপ্টেম্বৰত হাজিৰ হ’ব লাগিব ছাৰা, শ্রদ্ধা আৰু ৰাকুল৷ চাৰিওগৰাকী অভিনেত্রীকে এন চি বিয়ে ড্রাগ্ছ সম্পর্কীয় গোচৰত সোধা–পোছা কৰিব৷
উল্লেখ্য যে দীপিকা পাডুকনৰ মেনেজাৰ তথা কৱান টেলেণ্ট মেনেজমেণ্ট কোম্পানীৰ কর্মচাৰী কৰীশ্মা প্রকাশে ড্রাগ্ছ মাফিয়াৰ সৈতে বার্তালাপ কৰাৰ তথ্য এন চি বিয়ে সংগ্রহ কৰিছে৷ হোৱাটছএপ বার্তাত ‘ডি’ক এন চি বিয়ে দীপিকা পাডুকন বুলি নিশ্চিত কৰিছে৷ আনপিনে ড্রাগ্ছ সম্পর্কীয় হোৱাটছএপ বার্তালাপত দীপিকা পাডুকনৰ নাম সাঙোৰ খাই থকাটো এন চি বিয়ে লাভ কৰিছে৷ অভিনেতা সুশান্তৰ মৃত্যুৰ গোচৰৰ তদন্ত চি বি আয়ে আগবঢ়াই নিয়াৰ সময়তে এই মৃত্যুৰ লগত ড্রাগ্ছ জড়িত হৈ পৰে৷ এন চি বিয়ে ড্রাগ্ছ আৰু বলীউডৰ শিল্পীৰ মাজত সম্পর্কৰ তথ্য সূক্ষ্মভাৱে নিৰীক্ষণ কৰাৰ অন্তত প্রতিদিনে ড্রাগ্ছৰ লগত জড়িত বলীউড শিল্পীৰ নাম তালিকাভুক্ত কৰিছে৷ অভিনেতা সুশান্তৰ প্রেমিকা ৰিয়া চক্রৱর্তী আৰু ৰিয়াৰ ভাতৃ সৌৱিক চক্রৱর্তীৰ লগতে গ্রেপ্তাৰ কৰা আঠ ড্রাগ্ছ মাফিয়াৰ স্বীকাৰোক্তিৰ ভিত্তিত এন চি বিয়ে বলীউডৰ ২৫গৰাকী তাৰকা শিল্পীক ৰাডাৰত ৰাখে৷ এন চি বিয়ে ড্রাগ্ছ গোচৰটোৰ তদন্ত অব্যাহত ৰাখি ৰিয়া, সৌৱিকসহ ১৬জনক গ্রেপ্তাৰ কৰিছে৷ এই ১২জনৰ স্বীকাৰোক্তিৰ ভিত্তিত বলীউড জগত ড্রাগ্ছ মাফিয়াৰ সৈতে জড়িত থকাটো নিশ্চিত হৈছে৷
বুধবাৰে এন চি বিয়ে ‘উড়তা পঞ্জাব’ৰ সহঃ প্রযোজক মধু মণ্টেনাক সোধা–পোছা কৰে৷ দক্ষিণ মুম্বাইৰ এন চি বি গেষ্ট হাউছত পুৱা ১১.৩০ বজাৰ পৰা মধু মণ্টেনাক সোধা–পোছা কৰে৷ উল্লেখ্য যে সুশান্ত সিং ৰাজপুতৰ মৃত্যুৰ লগত সংপৃক্ত ড্রাগ্ছ গোচৰত ১৬জনক এন চি বিয়ে গ্রেপ্তাৰ কৰিছে৷ ৰিয়া, সৌৱিকৰ লগতে সুশান্তৰ হাউছ মেনেজাৰ ছেমুৱেল মিৰাণ্ডা, ঘৰুৱা সহায়ক দীপেশ সাৱন্ত, ড্রাগ্ছ মাফিয়া জাইড বিলাট্রা, আবডেল বছিত পৰিহাৰ, আইজান ইব্রাহিম, কর্ণ অৰৰা, আব্বাচ লাখানী আৰু অনুজ কেজৱানি৷ অভিনেতা সুশান্ত সিং ৰাজপুতৰ মৃত্যুৰ সৈতে সম্পর্কিত ড্রাগ্ছ গোচৰত দীপিকা পাডুকন জড়িত হৈ পৰাৰ পূর্বে অভিনেত্রীগৰাকীয়ে ‘কা’বিৰোধী আন্দোলনত শ্বাহিনবাগত সমর্থনকাৰীৰ ৰূপত উপস্থিত হৈ ৫ কোটি টকা পাকিস্তানস্থিত সংগঠনৰ পৰা লাভ কৰিছিল বুলি ব্যাপক বিতর্ক সৃষ্টি হৈছিল৷
ইপিনে, ৰিয়া চক্রৱর্তী আৰু ৰিয়াৰ ভাতৃ সৌৱিকৰ জামিন আবেদন বোম্বে উচ্চ ন্যায়ালয়ে বুধবাৰে শুনানি স্থগিত ৰাখে৷ বৰষুণৰ বাবে উচ্চ ন্যায়ালয় বন্ধ ৰাখিব লগা হোৱাত ৰিয়াৰ জামিন আবেদনৰ শুনানি কাইলৈ গ্রহণ কৰাৰ সম্ভাৱনা আছে৷ মুম্বাইৰ সত্র আদালতে ৰিয়া আৰু সৌৱিকক ১৪ দিনৰ ন্যায়িক জিম্মা সমাপ্ত হোৱাত পুনৰ ১৪ দিনলৈ ন্যায়িক জিম্মা বৃদ্ধি কৰে৷ অহা ৬ অক্টোবৰলৈ বাইকুল্লা কাৰাগাৰত থাকিব লাগিব ৰিয়া চক্রৱর্তী৷ অৱশ্যে কাইলৈ উচ্চ ন্যায়ালয়ৰ জামিন আবেদনৰ শুনানিৰ ওপৰত নির্ভৰ কৰিব ৰিয়া চক্রৱর্তীৰ কাৰাগাৰৰ ভৱিষ্যৎ৷