নিয়মীয়া বাৰ্তা ১৫ আগষ্টঃ ডিফেণ্ডিং চেম্পিয়ন স্পেইন আৰু ইউৰোপৰ দুই শক্তিশালী দল ইংলেণ্ড আৰু জার্মানীয়ে ভাৰতত অহাবর্ষত অনুষ্ঠিত হ’বলগীয়া ফিফা ১৭ বছৰ অনূর্ধ্ব মহিলা বিশ্বকাপত অংশ ল’ব৷ ইউৰোপিয়ান কোৱালিফায়িং প্রতিযোগিতা মহামাৰী ক’ৰোনা ভাইৰাছৰ প্রাদুর্ভাৱৰ বাবে বাতিল হোৱাত স্পেইন, ইংলেণ্ড আৰু জার্মানীয়ে ১৭ বছৰ অনূর্ধ্ব মহিলা বিশ্বকাপলৈ ৰেংকিঙৰ ভিত্তিত যোগ্যতা অর্জন কৰিছে৷ স্থানীয় উদ্যোক্তা কমিটী (এল’চি)য়ে আজি এই কথা ঘোষণা কৰে৷ ‘ওৱেফা ১৭ বছৰ অনূর্ধ্ব মহিলা চেম্পিয়নশ্বিপৰ ফাইনেল ৰাউণ্ডৰ মেচসমূহ ক’ভিড–১৯ মহামাৰীৰ বাবে বাতিল হৈছে৷
ইয়াৰ ফলত ইংলেণ্ড, জার্মানী আৰু স্পেইনে সর্বোচ্চ ৰেংকিঙৰ ভিত্তিত আগন্তুক ফিফা ১৭ বছৰ অনূর্ধ্ব মহিলা বিশ্বকাপত অংশগ্রহণ কৰাটো নিশ্চিত হৈছে৷’– এল’চিৰ প্রেছ বিজ্ঞপ্তিত এইদৰে কোৱা হৈছে৷ উল্লেখ্য যে ২০১৮ৰ ১৭ বছৰ অনূর্ধ্বমহিলা বিশ্বকাপত স্পেইনে মেক্সিকোক হৰুৱাই চেম্পিয়নৰ সন্মান অর্জন কৰিছিল৷ স্পেইন, ইংলেণ্ড আৰু জার্মানীৰ লগতে আয়োজক ভাৰত, উত্তৰ কোৰিয়া, জাপান আৰু নিউজিলেণ্ডে এইপর্যন্ত মেগা ইভেণ্টখনলৈ যোগ্যতা অর্জন কৰিবলৈ সক্ষম হৈছে৷ ভাৰতত অনুষ্ঠিত হ’বলগীয়া ১৭ বছৰ অনূর্ধ্ব ফিফা মহিলাৰ বিশ্বকাপ প্রকৃতার্থত চলিত বর্ষৰ অক্টোবৰ–নৱেম্বৰত অনুষ্ঠিত হোৱাৰ কথা আছিল যদিও ক’ভিড–১৯ মহামাৰীৰ বাবে প্রতিযোগিতাখন ২০২১ৰ ১৭ ফেব্রুৱাৰী–৭ মার্চলৈ পিছুৱাই দিয়া হৈছে৷ প্রতিযোগিতাখনৰ অন্যতম ভেন্যু হ’ল গুৱাহাটীৰ সৰুসজাই এথলেটিক ষ্টেডিয়াম৷