নিউজ ডেস্ক, ২২ ফেব্রুৱাৰী : আফগানিস্তানত সংগীত নিষিদ্ধ কৰিলে তালিবান চৰকাৰে৷ পৰবন প্রদেশৰ প্রশাসনে আয়োজন কৰা এক ভব্য অনুষ্ঠানৰ সময়তে পাঁচ শতাধিক বাদ্যযন্ত্র জব্দ কৰি জ্বলাই দিলে চৰকাৰী কর্তৃপক্ষই৷

কান্ধত বন্দুক লৈ অহা মাক্স পৰিহিত তালিবানী কেডাৰে অনুষ্ঠানত উপস্থিত হৈ এফালৰ পৰা কাঢ়ি লয় সকলো বাদ্যযন্ত্র৷ এইসমূহৰ ভিতৰত দেশখনৰ জাতীয় বাদ্যযন্ত্র ৰুবাবো আছে৷ তালিবান চৰকাৰে শেহতীয়াভাৱে এক সুকীয়া মন্ত্রালয় মুকলি কৰি ধর্মীয় অনুশাসনৰ কঠোৰতাৰ বৃত্তিত কেতবোৰ আজব নীতি গ্রহণ কৰিছে৷ ইয়াৰ ভিতৰত সংগীতকো কু–অভ্যাসৰ শ্রেণীত অন্তর্ভুক্ত কৰিছে৷

তালিবানী শাসকৰ মতে, সংগীতে নৈতিক অৱনতি ঘটায়৷ সেইবাবে ২০২১ চনত আফগানিস্তানত পুনৰ ক্ষমতা দখল কৰাৰ পিছত সংগীতক ‘হাৰাম’ বুলি ঘোষণা কৰিছিল৷ কোনো ৰাজহুৱা অনুষ্ঠানত সংগীত বজোৱাৰ অনুমতি দিয়া নাই তালিবানক৷ তদুপৰি বিদ্যালয়সমূহতো বন্ধ কৰি দিয়া হৈছে সংগীত৷ মহিলাসকলে ৰাজহুৱা স্থানত গান গোৱাটো সম্পূর্ণ নিষিদ্ধ৷ বিগত চাৰি বছৰত সংগীত পৰিৱেশনৰ অভিযোগতে বহু লোকক গ্রেপ্তাৰ কৰিছে তালিবানে, যাৰ ফলত বহু শিল্পীয়ে দেশ এৰি পলায়ন কৰিবলৈ বাধ্য হৈছে৷

The post তবলা–হাৰমণিয়ামসহ ৫ শতাধিক বাদ্যযন্ত্র জ্বলালে তালিবান চৰকাৰে first appeared on নিয়মীয়া বাৰ্তা.

চৰকাৰী চাকৰিমুখী নহৈ একাংশ যুৱকে কৃষি কৰ্মৰে নিজৰ লগতে আন দহজনক উপাৰ্জনৰ দেখুৱাই স্বাৱলম্বিতাৰ নিদৰ্শন দেখুৱাই ৰাইজৰ প্ৰশংসা বুটলিবলৈ সক্ষম হৈছে। দক্ষিণ কামৰূপৰ বৰটাৰীৰ এচাম শিক্ষিত যুৱকে কৃষি বিপ্লৱৰ সূচনা কৰিছে। ব্ৰহ্মপুত্ৰৰ বালি চাপৰিত সদৃশ ভূমিত বিভিন্ন প্ৰকাৰৰ ফল-মূল আদিকে ধৰি বিভিন্ন শস্য ৰূপায়ণ কৰিছে। য’ত থোকে থোকে ওলমি আছে কল, লমালমে লাগিছে দেশী-বিদেশী বগৰী, মাকৈ, সৰিয়হ কিম্বা অন্যান্য শাক-পাচলিৰে উভৈনদী হৈ পৰিছে দক্ষিণ কামৰূপৰ বৰটাৰী অঞ্চল ৷

কোনে কয় অসমীয়া যুৱকে খেতি কৰিব নোৱাৰে, অসমীয়া লোকে কষ্ট কৰিব নোৱাৰে কিম্বা অসমীয়াই ব্যৱসায় কৰিব নোৱাৰে ৷ “পথাৰ আমাৰ – বজাৰ আমাৰ” বাক্যশাৰী কেৱল শ্লোগানতেই নাৰাখি হাতে কামে কৰি দেখুৱাইছে দক্ষিণ কামৰূপৰ এচাম উদ্যমী শিক্ষিত যুৱকে ৷

১৯৭৫ চনৰ পিছত মহাবাহু ব্ৰহ্মপুত্ৰৰ প্ৰবল গৰাখহনীয়াৰ কবলত নিঃশেষ হৈ যোৱা বৃহৎ গাঁওখন পুনৰ লুইতৰ বালি পৰি চাপৰি সদৃশ হোৱাত গাঁওখনৰ কেইগৰাকীমান উদীয়মান শিক্ষিত যুৱকে ২০০৭ চনৰ পৰা উক্ত চাপৰিত আৰম্ভ কৰে এক কৃষি বিপ্লৱ ৷ প্ৰথমাৱস্থাত কল খেতিৰে জড়িয়তে স্বাবলম্বী হোৱাৰ সপোন দেখিছিল কেইগৰাকীমান প্ৰতিভাৱান যুৱকে৷

সময়ৰ সোঁতত এই কৃষি বিপ্লৱৰ ধনাত্মক প্ৰভাৱ সমগ্ৰ গাঁৱখনতেই বিস্তাৰিত হোৱাত সম্প্ৰতি বৰটাৰী কণ্ডলপাৰাকে আদি কৰি অঞ্চলতোৰ প্ৰায় ৯৫ শতাংশ লোক জড়িত হৈ পৰিছে কৃষিকৰ্মৰ লগত ৷ বৰ্তমান সময়ত অঞ্চলতোত প্ৰায় ২০০০ বিঘা ভূমিত কল খেতি, প্ৰায় ১০০০ বিঘা ভুমিত বগৰী খেতি, ৫০০ বিঘা ভুমিত মাকৈ, ৩ ৰ পৰা ৪ হাজাৰ বিঘা ভুমিত সৰিয়হৰ উপৰিও বহু হেজাৰ বিঘা ভুমি আবৰি আছে শাক পাচলিৰ খেতিৰে। যি ফলমূল কিম্বা শাক পাচলি সমুহ সাম্প্ৰতিক সময়ত দখল কৰিছে বহিঃৰাজ্যৰ বজাৰ।

অলপতে অঞ্চলটোৰ কৃষক সকলে লুইতৰ পাৰত অনুষ্ঠিত কৰিলে তৃতীয় বাৰ্ষিক “বৰলুইত কৃষক মহোৎসৱ” ৷ ৰাতিপুৱাৰে পৰা বিভিন্ন মাঙ্গলিক অনুষ্ঠানৰ লগতে লুইত পুজন, ভুমি পুজন তথা নাম প্ৰসংগৰে অনুষ্ঠিত কৰা হয় এই মহোৎসৱ ৷ মূলতঃ বৰটাৰী অঞ্চলৰ লুইতপাৰত সম্প্ৰতি প্ৰাকৃতিক ভাবে গঢ় লৈ উঠিছে এক মনোমোহা প্ৰাকৃতিক পৰিবেশ ৷ যি নান্দনিক পৰিবেশে বিভিন্ন সময়ত দৃষ্টি আকৰ্ষণ কৰিবলৈ সক্ষম হৈছে বহু পৰ্যটকৰ৷

লুইতৰ চাপৰিত প্ৰতি বছৰে বাৰিষাৰ পিছতেই পৰি ৰোৱা পলসৰ বাবে দক্ষিণ কামৰূপৰ অন্য এক আকৰ্ষণৰ কেন্দ্ৰবিন্দু হৈ পৰিছে বৰটাৰীৰ লুইতৰ পাৰ৷ পৰ্যটন ক্ষেত্ৰ হিচাপে অঞ্চলটিক আৰু অধিক আগুৱাই নিয়াৰ প্ৰয়াস স্থানীয় কৃষক সকলৰ৷

আনহাতে কোনো বালি-মাটি মাফিয়াই যাতে অঞ্চলটোত কোনো হানি কৰিব নোৱাৰে তাৰ বাবেও সজাগ হৈছে কৃষক সকল ৷ সম্প্ৰতি বিভিন্ন অঞ্চলৰ পৰা বনভোজৰ বাবেও লোক অহা পৰিলক্ষিত হয় উক্ত অঞ্চলটোলৈ৷ অঞ্চলটোৰ কৃষক সকলে অনুষ্ঠিত কৰা তৃতীয় বাৰ্ষিক “বৰলুইত কৃষক মহোৎসৱ” শীৰ্ষক অনুষ্ঠানটিৰ শেষত মুকলি সভাত মুখ্য অতিথি হিচাপে উপস্থিত থাকে ভাৰতীয় কিষান সংঘৰ অসম ৰাজ্যিকৰ মহামন্ত্ৰী কৃষ্ণ কান্ত বৰা। বৰাই উপস্থিত থাকি সমগ্ৰ অঞ্চলৰ পৰিবেশ দেখি আপ্লুত হোৱাৰ লগতে অঞ্চলটোৰ ৰাইজ আৰু যুৱকসকলক ভূয়সী প্ৰশংসা কৰে।

নিয়মীয়া বাৰ্তা, মিৰ্জা, ১০ ফেব্ৰুৱাৰী

The post পলাশবাৰীৰ বৰটাৰীত বৰলুইতৰ পাৰত বৃহৎ কৃষি বিপ্লৱ first appeared on নিয়মীয়া বাৰ্তা.

বিশেষ বাৰ্তা, ১৭ জুনঃ বড়ো ধানৰ খেতি উৎপাদনেৰে উজনিত কৃষি বিপ্লৱৰ সূচনা জীৱন গগৈৰ।ডিব্ৰুগড়ৰ খোৱাং বেতনি গাঁৱৰ জীৱন গগৈয়ে এতিয়া সোণগুটি চপোৱাত ব্যস্ত।চনপৰা খেতি পথাৰত  নতুন আশাৰ সঞ্চাৰে বড়োধানৰ খেতিৰে সেউজ বিপ্লৱৰ ধাৰা বহন কৰিবলৈ সক্ষম হৈছে ডিব্ৰুগড় জিলাৰ খোৱাং বেতনি গাঁৱৰ আদৰ্শ কৃষক জীৱন গগৈ।

উল্লেখ্য যে, ডিব্ৰুগড়ৰ খোৱাং কলৌলোৱা দেউৰী গাঁৱত খোৱাং বেতনি গাৱঁৰ নিৰ্বাসী জীৱন গগৈ নামৰ কৃষক গৰাকীয়ে ডিব্ৰুগড় কৃষি বিভাগ আৰু যোৰহাট কৃষি বিজ্ঞান বিভাগৰপৰা বড়ো ধানৰ বীজ সংগ্রহ কৰি প্ৰথমবাৰৰ বাবে এই বড়ো খেতি কৰি উজনীৰ কৃষকলৈ আশাৰ বতৰা কঢ়িয়াই আনিছে আৰু কৃষকৰ বাবে অনুপ্ৰেৰণাৰ উৎস ৰূপে পৰিগণিত হৈছে।

এতিয়াৰ পৰা পথাৰবোৰত বছৰত মাত্ৰ এবাৰ খেতি কৰি এনেই উদং কৰি ছমাহ পেলাই থ’ব নালাগে, তাৰেই উৎকৃষ্ট দৃষ্টান্ত ডাঙি আদৰ্শ কৃষক হিচাপে আত্ম পৰিচয়ৰে প্ৰতিফলিত কৰিছে খোৱাং বেতনি গাঁৱৰ জীৱন গগৈয়ে।

বছৰত দুবাৰ অৰ্থাৎ জেঠ মাহত বড়ো ধান আৰু আঘোনত শালি-লাহি, বৰা, জহা আদি ধানেৰে দুবাৰকৈ ধান খেতি চপাই আমাৰ কৃষকসকল উপকৃত হ’ব পৰাৰ এক সুন্দৰ চানেকিৰে, কৌশল তথা পদ্ধতি দেখুৱালে কলৌলোৱা দেউৰী গাঁৱত বড়ো ধানৰ খেতি কৰি  কৃষক জীৱন গগৈয়ে।

এনেধৰণৰ ৰ্কমই কৃষিক্ষেত্ৰলৈ আশাৰ প্ৰতিফলন ঘটাইছে।খোৱাং কলৌলোৱা দেউৰী গাঁৱত ষাঠি বিঘা মাটিত কৰা বড়ো ধানৰ খেতিয়ে চমকপ্ৰদ  ভাৱে উৎপাদন পাবলৈ সক্ষম হৈছে । উক্ত খেতি পথাৰত  জেঠমহীয়া প্ৰচণ্ড ৰ’দ পিঠিত লৈয়ো প্ৰতিদিনে ২০গৰাকী দাৱনীয়ে ৬০ বিঘা মাটিত ধান দোৱাত ব্যস্ত হৈ পৰিছে।

ইফালে বৰ্তমান জেঠ মাহত আপোন পথাৰখন সেউজীয়া কৰিবলৈ কঠীয়া সিঁচা , মাটি চহোৱা আদি কামত  অসমৰ প্ৰতিজন কৃষকে ইতিমধ্যে খেতি পথাৰত নামি পৰিছে।কোনোৱেই যদি পুৱা গৰু হালখন লৈ পথাৰলৈ গৈছে, আন একাংশ কৃষকে ট্ৰেক্টৰ নতুবা পাৱাৰ টিলাৰ লৈ পথাৰত মাটি চহোৱাত ব্যস্তহৈ থকা পৰিলক্ষিত হৈছে।

গতিকে  তেনে সময়ত ডিব্ৰুগড়ৰ খোৱাং  কলৌলোৱা পথাৰত প্ৰথমবাৰলৈ জেঠৰ পথাৰত সোণগুটি চপোৱাত ব্যস্ত খোৱাং বেতনি গাঁৱৰ আদৰ্শ খেতিয়ক জীৱন গগৈয়ে বড়ো ধানৰ খেতি দাবলৈ লগোৱা দাৱনীয়ে খেতি পথাৰ সৌন্দৰ্য বৰ্ধনেৰে নতুন আশাৰ সঞ্চাৰ কৰিছে। সোণালী হৈ জিলিকিছে জেঠমহীয়া বড়ো ধানৰ পথাৰ।

খোৱাং বেতনি গাঁৱৰ জীৱন গগৈৰ খেতিয়কৰ দৰে সকলোৱে বড়ো ধানৰ খেতি কৰা পথ গ্ৰহণ কৰি সেই আদৰ্শৰে নিজকে অনুপ্ৰাণিত কৰি কৃষি ক্ষেত্ৰত মনোনিবেশ কৰে তেন্তে নিশ্চয় বিনামূলীয়া চাউলৰ বাবে আশাপালি কোনো আৰু থাকিব নালাগিব। এইক্ষেত্ৰত সচেতন তথা বিজ্ঞসকলে জনাইছে যে, যোৱা আশীৰ দশকলৈকে আহু গুণী ধানৰ খেতি অৰ্থাৎ জেঠমাহত চপোৱা কাৰ্য অসমৰ প্ৰায়বোৰ ঠাইতে কৰা হৈছিল।কালক্ৰমত  আধুনিকতাই গ্ৰাসকৰা সমাজত এই খেতি বাদ পৰিল।

পুনৰাই এই খেতি শুভ লক্ষণ। উৎপাদন বৃদ্ধি পালে মানুহৰ আৰ্থিক স্বচ্ছলতা আহিব বুলি মন্তব্য কৰিছে। উল্লেখ্য যে, ডিব্ৰুগড়ৰ কলৌলোৱা দেউৰী গাওঁখন এখন আদৰ্শ গাওঁ। সহজ-সৰল আৰু শিক্ষিত লোকসকল আগৰেপৰাই খুব কৰ্মী বুলি পৰিচিত। খোৱাং বেতনি গাঁৱৰ জীৱন গগৈয়ে বড়ো ধানৰ খেতি উৎপাদনেৰে অসমৰ কৃষি খণ্ডলৈ এক অনন্য ৰূপত অৰিহণা যোগাইছে বুলি ভবাৰ থল আছে।

খোৱাং বেতনি  কলৌলোৱা গাঁৱৰ আদৰ্শ খেতিয়ক গৰাকীয়ে কৰা মুঠ ষাঠি বিঘা মাটিৰ বড়ো ধানৰ খেতিৰ তদাৰক আৰু তত্বাবধানৰ ক্ষেত্ৰত ডিব্ৰুগড় জিলাৰ কৃষি বিষয়া অনুপ কুমাৰ পেগু,  খোৱাং কৃষি চক্ৰ ৰ জ্যেষ্ঠ কৃষি উন্নয়ন বিষয়া ভাস্কৰ বৰা, তথা কৃষি পৰিদৰ্শক দিলিপ দাসে উল্লেখযোগ্য পদক্ষেপ গ্ৰহণ কৰিছে।

ডিব্ৰুগড় জিলাৰ টিংখাং সমষ্টিৰ অন্তৰ্গত খোৱাং বেতনি কলৌলোৱা  গাঁৱৰ আদৰ্শ কৃষক জীৱন গগৈয়ে মুঠ ৬০বিঘা মাটিত খোৱাং কলৌলোৱা দেউৰী গাঁৱত কৰা বড়ো ধানৰ খেতিৰ উৎপাদন আৰু কৃষি কাৰ্যত হোৱা আত্মপ্ৰকাশে প্ৰতি গৰাকী কৃষকৰ বাবে এতিয়া অনুপ্ৰেৰণা আৰু আদৰ্শ হিচাপে পৰিগণিত হৈছে।

প্ৰেৰক বিভাস দুৱৰা

The post বড়ো ধানৰ খেতি উৎপাদনেৰে উজনিত কৃষি বিপ্লৱৰ সূচনা জীৱন গগৈৰ  first appeared on নিয়মীয়া বাৰ্তা.

বিশেষ বাৰ্তা, ১৯ এপ্ৰিলঃ অসম কৃষি বিশ্ববিদ্যালয়ৰ উদ্ভিদ ৰোগ বিজ্ঞান বিভাগৰ স্নাতকোত্তৰ ছাত্ৰী  প্রজ্ঞা পাৰমিতা আচাৰ্যই বিদেশত ডক্টৰেট ডিগ্রীৰ গৱেষণাৰ বাবে জলপানি লাভ কৰি  বিশ্ববিদ্যালয়লৈ সুনাম কঢ়িয়াই আনিছে। বিশ্বৰ বিভিন্ন দেশৰ ছাত্ৰ-ছাত্ৰীৰ মাজত হোৱা প্ৰতিযোগিতামূলক BBSRC Doctoral Landscape Awardৰ অৰ্থকৰী সহযোগিতাত তেওঁ Midlands Integrative Bioscience Training  Partnership (MIBTP)ৰ উচ্চস্তৰীয় তথা সন্মানীয় জলপানি লাভ কৰিছে। এই জলপানিৰ যোগেদি  বিশ্বৰ ৬৯নং স্থানত থকা  ইংলেণ্ডৰ Warwick বিশ্ববিদ্যালয়ত ডক্টৰেট ডিগ্রীৰ গৱেষণা কৰাৰ সুযোগ পাইছে। ছাত্ৰীগৰাকীয়ে বিশ্ববিদ্যালয়ৰ জীৱবিজ্ঞান বিভাগৰ বিজ্ঞানী Dr. Mojgan Rabieyৰ অধীনত Microbial Bioprospecting and  Functional Genomics for Sustainable Crop Health Management বিষয়ত গৱেষণা কৰিব। উল্লেখযোগ্য যে তেওঁ অসম কৃষি বিশ্ববিদ্যালয়ৰ উদ্ভিদ ৰোগ  বিজ্ঞান বিভাগৰ  সহকাৰী অধ্যাপক ডঃ অনুৰাগ কাশ্যপৰ অধীনত স্নাতকোত্তৰ পৰ্যায়ত কৰা Bacterial Nanocellulose and its application in food packaging বিষয়ক গৱেষণাক MIBTPৰ সংশ্লিষ্ট বাচনি কমিটিয়ে ভূয়সী প্ৰশংসা কৰে। ইতিমধ্যেই এই গৱেষণাৰ বিষয়ে উচ্চস্তৰীয় আন্তৰাষ্ট্ৰীয় গবেষণা পত্ৰিকাত প্ৰকাশ হৈছে।

প্ৰেৰক ৰঞ্জিত ভূঞা

The post অসম কৃষি বিশ্ববিদ্যালয়ৰ ছাত্ৰী প্রজ্ঞা পাৰমিতালৈ ইংলেণ্ডৰ Warwick বিশ্ববিদ্যালয়ত গৱেষণাৰ বাবে জলপানি first appeared on নিয়মীয়া বাৰ্তা.

📌 ৰমুলাছ–ৰেমুছ নামৰ দুই ডায়াৰ উল্ফকলৈ বিশ্বজুৰি বিজ্ঞানী মহলত চাঞ্চল্য

📌 টেক্সাছস্থিত কলোছেল বায়’ছায়েঞ্চৰ এই সাফল্য

📌 প্রাচীন ডিএনএ ব্যৱহাৰ কৰি জন্ম দিছে এই দুই প্রাণীক

নিউজ ডেস্ক, ৯ এপ্রিলঃ বিজ্ঞান আৰু বিজ্ঞানীৰ চমৎকাৰ৷ ১২,৫০০ বছৰ পূর্বে পৃথিৱীৰ পৰা বিলুপ্ত হৈ যোৱা প্রাণীৰ পুনৰ জীৱন৷ জেনেটিক ইঞ্জিনীয়াৰিঙেৰে ১২,৫০০ বছৰ পূর্বে পৃথিৱীৰ পৰা হেৰাই যোৱা ডায়াৰ উল্ফ জন্ম দিলে বিজ্ঞানীয়ে৷ ৰমুলাছ আৰু ৰেমুছ নামৰ দুই ডায়াৰ উল্ফক লৈ বিশ্বজুৰি বিজ্ঞানীৰ মাজত চাঞ্চল্যৰ সৃষ্টি হৈছে৷ প্রায় ছমহীয়া এই দুই প্রাণীৰ উচ্চতা ৪ ফুট আৰু ওজন ৩৬ কিলোগ্রামতকৈ অধিক৷ টেক্সাছস্থিত কলোছেল বায়’ছায়েঞ্চ নামৰ কোম্পানী এটাই প্রাচীন ডিএনএ ব্যৱহাৰ কৰি ডায়াৰ উল্ফৰ পোৱালি জন্ম দি সফলতা লাভ কৰিছে৷ বিজ্ঞানীয়ে প্রকাশ কৰা মতে, ডায়াৰ উলফ্ৰ নিকট সম্পর্কীয় প্রাণীৰ ডিএনএ ব্যৱহাৰ কৰি এই পোৱালি দুটাৰ জন্ম দিয়া হৈছে৷ এসময়ত দক্ষিণ আমেৰিকাত বিচৰণ কৰি থকা এই প্রাণীবিধ ১২,৫০০ বছৰ পূর্বে বিলুপ্তি ঘটিছিল৷ কলোছেলৰ সহঃ প্রতিষ্ঠাতা জর্জ ছার্চে প্রকাশ কৰা মতে, বিজ্ঞানীসকলৰ এই সফলতাই বিশ্বত প্রাণীৰ পুনৰ জীৱনৰ ধাৰণাটিক নতুনকৈ গতি দিব৷ হার্ভার্ড বিশ্ববিদ্যালয় আৰু মাছাছুছেট ইনষ্টিটিউট অৱ টেকনল’জী জেনেটিকছৰ অধ্যাপক তথা কলোছেলৰ অন্যতম প্রতিষ্ঠাতা জর্জ ছার্চে টাইম মেগাজিনত এই সন্দর্ভত বিতং ব্যাখ্যা আৰম্ভ কৰে৷ জন্মৰ কিছুদিনলৈ পোৱালি দুটাক আন নিকট সম্পর্কীয় প্রাণীৰ দ্বাৰা খাদ্য সেৱন কৰোৱা হৈছিল যদিও পাছলৈ কলোছেলৰ গৱেষকৰ দলে বটলেৰে খাদ্য সেৱন কৰোৱায়৷ বর্তমান দুয়োটা পোৱালিয়েই সুস্থাস্থ্যৱান হৈ আছে৷ তাৎপর্যপূর্ণ যে বর্তমান পৃথিৱীত বর্তি থকা উল্ফ প্রজাতিতকৈ পোৱালি দুটাৰ আচৰণ পৃথক৷ সম্প্রতি এই পোৱালি দুটাক ৰাজহুৱাভাৱে প্রদর্শন কৰা হোৱা নাই৷ ৰমুলাছ আৰু ৰেমুছক মানৱৰ পৰা আঁতৰাই ৰখা হৈছে৷ আনকি জন্মৰ পৰা যিজন লোকে এই পোৱালি পালন কৰিছে, সেই ব্যক্তিজনকো এটা দূৰত্বত ৰখা হৈছে৷ কলোছেলৰ আন এক প্রতিষ্ঠাতা বেন লেমে প্রকাশ কৰা মতে, পোৱালি দুটা জন্ম দিবলৈ বিজ্ঞানীৰ দলটোৱে ১৩ হাজাৰ বছৰ পুৰণি দাঁত আৰু ৭২ হাজাৰ পুৰণি লাওখোলাৰ ডিএনএ ব্যৱহাৰ কৰিছে৷ পোৱালি দুটাক দুই হাজাৰ একৰ ভূমিৰ এক অজ্ঞাত স্থানত লালন–পালন কৰি থকা হৈছে৷ ১০ ফুট উচ্চতাৰ কাঁইটীয়া তাঁৰৰ বেৰৰ মাজত নিৰাপদে ৰখা পোৱালি দুটাক নিৰীক্ষণ কৰিবলৈ নিৰাপত্তা বাহিনীৰ লগতে ড্রোন আৰু কেমেৰা সংলগ্ণ কৰা হৈছে৷ সংবাদ মাধ্যমত দুটা পোৱালি বুলি প্রচাৰ হৈছে যদিও মুঠ তিনিটা পোৱালি জন্ম দিয়া হৈছে৷ এই পোৱালিকেইটাৰ প্রথম দুটা মতা ২০২৪ চনৰ ১ অক্টোবৰত আৰু আনটো মাইকী ২০২৫ চনৰ ৩০ জানুৱাৰীত জন্মলাভ কৰিছে৷ স্মর্তব্য যে টেছলাৰ মুৰব্বী ধনকুবেৰ এলন মাস্কে সামজিক মাধ্যমযোগে এই পোৱালিৰ প্রচাৰ কৰি উৎসাহিত হৈছে৷

The post বিজ্ঞানৰ চমৎকাৰ, ১২,৫০০ বছৰ পূর্বে বিলুপ্ত প্রাণীৰ পুনৰ জীৱন, জেনেটিক ইঞ্জিনীয়াৰিঙেৰে জন্ম দিলে ডায়াৰ উল্ফ first appeared on নিয়মীয়া বাৰ্তা.

The post নলবাৰীত চৰকাৰী বিদ্যালয়ত নামভৰ্তিত হেতা-ওপৰা, বনভাগ খাতা দিহজাৰী হাইস্কুলে কঢ়িয়াইছে আশাৰ বতৰা first appeared on নিয়মীয়া বাৰ্তা.

🔹 হাড়গিলা সংৰক্ষণৰ স্বীকৃতি

নিউজ ডেস্ক, ২১ ফেব্রুৱাৰী : বিৰল হাড়গিলা সংৰক্ষণৰ বাবে গ্রীন অস্কাৰ বঁটা, নাৰীশক্তি পুৰস্কাৰেৰে বিভূষিত পূর্ণিমা দেৱী বর্মনলৈ আন এক আন্তঃৰাষ্ট্রীয় স্বীকৃতি৷ বিশ্ব প্রসিদ্ধ টাইম আলোচনীৰ ২০২৫ বর্ষৰ বর্ষশ্রেষ্ঠ নাৰীৰ তালিকাত অন্তর্ভুক্ত পৰিৱেশ সংৰক্ষণ কর্মী পূর্ণিমা দেৱী বর্মন৷ টাইম আলোচনীয়ে ২০২৫ বর্ষৰ শ্রেষ্ঠ নাৰীৰ তালিকাত ১৩ বিশিষ্ট নাৰীক স্থান দিছে৷ প্রসিদ্ধ অভিনেত্রী–প্রযোজক নিক’ল কিডমেন, অলিম্পিক জিমনাষ্ট জর্ডান চিলিছ, শিল্পী ল’ফে, অভিনেত্রী আন্না ছাৱাই, মানৱ অধিকাৰ কর্মী আমান্দা জুৰাৱস্কী, ফিডিং আমেৰিকাৰ চিইঅ’ ক্লেইৰ বেবীনক্স–ফণ্টেনত, জাম্বিয়াৰ নাৰী অধিকাৰ কর্মী ফাটৌ বাল্লে, সামাজিক কর্মী–লেখিকা ৰেকুৱেল উইলিছ, অভিনেত্রী–স্তন কর্কট ৰোগৰ সজাগ অভিযান কর্মী অলিভিয়া মুনৰ সৈতে তালিকাত স্থান লাভ পৰিৱেশ সংৰক্ষণ কর্মী পূর্ণিমা দেৱী বর্মনৰ৷ অসমৰ বন্যপ্রাণী জৈৱবিদ পূর্ণিমা দেৱী বর্মনে বিৰল হাড়গিলা সংৰক্ষণ কৰাৰ বাবে সমূহ মহিলাৰ হাড়গিলা আর্মী গঠন কৰিছিল৷ কামৰূপৰ দদৰাত বিৰল হাড়গিলা সংৰক্ষণেৰে দেশৰ লগতে বিশ্বজুৰি স্বীকৃতি লাভ কৰা পূর্ণিমা দেৱী বর্মনক ২০১৭ চনত গ্রীন অস্কাৰ হিচাপে বিবেচিত হুইটলী এৱার্ডেৰে সন্মানিত কৰা হয়৷ ইয়াৰ লগতে দেশৰ মহিলাকেন্দ্রিক সর্বোচ্চ অসামৰিক সন্মান নাৰীশক্তি পুৰস্কাৰেৰেও সন্মানিত কৰা হয়৷ গুৱাহাটী বিশ্ববিদ্যালয়ৰ পৰা জীৱবিদ্যাত স্নাতকোত্তৰ ডিগ্রীধাৰী পূর্ণিমা দেৱী বর্মনে জৈৱ–বৈচিত্র্য সংৰক্ষণৰ অন্যতম বেচৰকাৰী সংস্থা আৰণ্যকত জ্যেষ্ঠ বন্যপ্রাণী জৈৱবিদ হিচাপে কার্যনির্বাহ কৰি কামৰূপৰ গ্রামাঞ্চলত হাড়গিলা সংৰক্ষণৰ বাবে অভিযানত নামে৷ হাড়গিলা সংৰক্ষণেৰে দেশৰ লগতে আন্তর্জাতিক পর্যায়ত স্বীকৃতি লাভ কৰা পৰিৱেশ সংৰক্ষণবিদ পূর্ণিমা দেৱী বর্মনে টাইমৰ বর্ষশ্রেষ্ঠ নাৰীৰ তালিকাত অন্তর্ভুক্ত হৈ অসমবাসীলৈ গৌৰৱ কঢ়িয়াই আনিছে৷

The post টাইমৰ বর্ষশ্রেষ্ঠ নাৰীৰ তালিকাত পূর্ণিমা দেৱী বর্মন first appeared on নিয়মীয়া বাৰ্তা.

নিয়মীয়া বাৰ্তা, ৭ নৱেম্বৰঃ “বাৰীৰ ঢাপত ৰোৱা এজোপা ৰঙা বা বগা চন্দন গছে বাৰ বছৰৰ পাছত দিব পাৰে তিনি-চাৰি লাখ পৰ্যন্ত” ! কামৰূপৰ নগৰবেৰাৰ অৱসৰী শিক্ষক বিপুল কুমাৰ মেধিয়ে কৰিছে এনে তাৎপৰ্যপূৰ্ণ মন্তৱ্য। নিজৰ দীৰ্ঘদিনীয়া অভিজ্ঞতাৰে পৰিপূৰ্ণ জীৱন পৰিক্ৰমাত বহু গছ ৰুলে তেওঁ, বহুতকে দিছে গছপুলি ৰুই স্বাৱলম্বী হোৱাৰ পৰামৰ্শ। বিঘাই বিঘাই জহা নেমু খেতি কৰাৰ উপৰি ঘৰৰ চৌহদত আছে ৰঙা চন্দন, বগা চন্দন, মেহগনি আদিবোৰ বিধে-বিধে কেবাসহস্ৰাধিক গছৰপুলি, এখন সুন্দৰ গছপুলিৰ নাৰ্চাৰী গঢ়ি তুলিছে তেওঁ। অৱসৰী শিক্ষকগৰাকীয়ে নিজৰ ঘৰৰ চৌপাশে গঢি তুলিছে এখন কোটিটকীয়া গছপুলিৰ নাৰ্চাৰী, একেদৰে অৱসৰী শিক্ষকগৰাকীৰ আছে প্ৰায় দুবিঘা মাটিৰ এখন সুন্দৰ নেমু খেতি, বছৰদিনেই গুটি নোহোৱা নেমুবোৰ বিক্ৰী কৰি হাতলৈ আহে লাখে- লাখে টকা।আনহাতে ৰঙা-বগা চন্দন, মেহগনি, কেবাসহস্ৰাধিক তামোলৰ পুলি আদিবোৰ বিক্ৰী কৰিও উপাৰ্জন কৰে মোটা অংকৰ ধন। তেওঁৰ মতে বাৰীৰ ঢাপত ৰোৱা এডাল ৰঙা-বগা চন্দন গছৰ পৰাই বাৰ বছৰৰ পাছত বিক্ৰী কৰি অনায়াসে পাব পাৰি তিনি-চাৰি লাখ টকা পৰ্যন্ত!মুঠতে অৱসৰী শিক্ষক বিপুল কুমাৰ মেধিৰ গছপুলি ৰুই এক সেউজী পৰিৱেশ গঢ়ি তোলাৰ আহ্বান সকলোলৈকে! একেদৰে এই ব্যৱসায় সকলোৰে বাবে হ’ব পাৰে এক সুন্দৰ আৰু স্বাধীন ব্যৱসায়!

প্ৰেৰক সঞ্জীৱ কুমাৰ দাস

The post বাৰীৰ ঢাপত তপোবনসদৃশ গছপুলিৰ নাৰ্ছাৰী অৱসৰী শিক্ষকৰ first appeared on নিয়মীয়া বাৰ্তা.

🔹  ৰাজ্যবাসীৰ মাজত অধীৰ উৎকণ্ঠা-আনন্দৰ ধল

বিশেষ বাৰ্তা, ২৫ জুলাই : ঐতিহাসিক চৰাহদেউ মৈদাম ক্ষেত্রই বিশ্বৰ পর্যটন মানচিত্রত জিলিকি উঠাটো নিশ্চিত হৈ পৰিছে৷ কাইলৈ অর্থাৎ ২৬ জুলাইত ইউনেস্ক’ৰ দ্বাৰা আনুষ্ঠানিকভাৱে অসমৰ চৰাহদেউ মৈদাম ক্ষেত্রই বিশ্ব ঐতিহ্য ক্ষেত্রৰ স্বীকৃতি লাভ কৰিব৷ ইয়াকে কেন্দ্র কৰি চৰাহদেউবাসীৰ মাজত অধীৰ উৎকণ্ঠা আৰু আনন্দৰ ধল বৈছে৷ উল্লেখযোগ্য যে এসময়ত চৰাহদেউ পর্বত চাহ বাগিচাৰ দখলত থকা চৰাহদেউ মৈদামক্ষেত্রৰ বৃহৎ অংশ পর্যায়ক্রমে বাগিচা কর্তৃপক্ষৰ পৰা মুকলি কৰি লোৱাৰ পাছত হাবি-জংঘলৰ মাজত সোমাই থকা মৈদাম এলেকাই লাহে লাহে এক সন্মানজনক ৰূপ লাভ কৰে৷ মন কৰিবলগীয়া এয়ে যে ১২২৮ খ্ৰীষ্টাব্দত সুদূৰ মাওল্যুং প্রদেশৰ পৰা আহি চাওল্যুং চ্যুকাফাই ১২৫৩ খ্ৰীষ্টাব্দত সৌমাৰপীঠৰ চৰাহদেউৰ বুকুত সমন্বয় আৰু ভাতৃত্বৰে সাতৰাজ সামৰি একৰাজ কৰি বৰ অসমৰ ভেটি নির্মাণ কৰিছিল৷ পৰৱর্তী সময়ত ৰাজকীয় সমাধিক্ষেত্র হৈ পৰা চৰাইদেউত আহোম শাসন কালৰ বীৰগাথা বুকুত সামৰি–সুতৰি নীৰৱে–নিতালে ৰ’দে–বৰষুণে অনাদৰ-অৱহেলাত উপেক্ষিত হৈ পৰিছিল ইয়াৰ বুকুত সিঁচৰতি হৈ থকা শতাধিক সৰু–বৰ মৈদাম ৷ সুদীর্ঘ সময় জাতীয় দল-সংগঠন, ব্যক্তিবিশেষৰ লগতে স্বর্গদেউসকলৰ স্মৃতি তর্পণ সমিতিৰ লগতে স্থানীয় ৰাইজে ঐতিহাসিক চৰাইদেউ মৈদামক্ষেত্রৰ সংৰক্ষণ আৰু ইয়াৰ শোভাবর্ধন কৰাৰ লগতে চৰাইদেউক বিশ্বৰ দৰবাৰত জিলিকাবলৈ পদক্ষেপ গ্রহণ কৰিবলৈ দাবী জনাই নানা চেষ্টা চলাই আহিছিল৷ অৱশেষত মুখ্যমন্ত্রী ড০ হিমন্ত বিশ্ব শর্মাৰ উদ্যোগ আৰু তৎপৰতাৰ বাবে সম্প্রতি আহোম শাসন কালৰ ছশ বছৰীয়া ঐতিহ্যৰ গৰিমা আকৌ প্রাণ পাই উজলি উঠাৰ পৰিৱেশ সৃষ্টি হৈছে৷ নতুন দিল্লীত ২১ জুলাইৰ পৰা অনুষ্ঠিত হোৱা ইউনেস্ক’ৰ বিশ্ব ঐতিহ্য সমিতিৰ ৪৬সংখ্যক অধিৱেশনৰ মাজতে মুখ্যমন্ত্রী ড০ হিমন্ত বিশ্ব শর্মাই সামাজিক মাধ্যমত ২৬ জুলাইৰ দিনা চৰাহদেউ মৈদামক্ষেত্রই বিশ্ব ঐতিহ্য ক্ষেত্র হিচাপে আনুষ্ঠানিক স্বীকৃতি লাভ কৰিব বুলি মন্তব্য আগবঢ়োৱাৰ পাছতেই চৰাইদেউ জিলাৰ বিভিন্ন মহলত আনন্দৰ ধল বৈছে৷ দীর্ঘদিনীয়া দাবী আৰু অপেক্ষাৰ অন্তত অসমেই নহয়, সমগ্র উত্তৰ-পূর্বাঞ্চলৰ ভিতৰত প্রথমবাৰৰ বাবে ঐতিহাসিক চৰাইদেউ মৈদামক্ষেত্রই বিশ্বৰ বুকুত এক বিৰল স্বীকৃতি লাভ কৰাৰ পৰিৱেশ সৃষ্টি হোৱাৰ পৰিপ্রেক্ষিতত ঐতিহাসিক মৈদামক্ষেত্রত বিগত কেইবাদিন ধৰি বিভিন্ন দল-সংগঠনে ইয়াৰ স্থায়ী চাও চি ৰেন গৃহত বন্তি প্রজ্বলন কৰি ফুৰা–তাৰাৰ চৰণত সেৱা জনাই মৈদামক্ষেত্রই যাতে ইউনেস্ক’ৰ দ্বাৰা আনুষ্ঠানিক স্বীকৃতি লাভ কৰে, তাৰ বাবে প্রার্থনা জনাই আহিছে৷ আজি টাই আহোম যুৱ পৰিষদ, অসম চমুকৈ টাহপাৰ উপৰিও আহোম সেনাই বন্তি প্রজ্বলন কৰে বুলি জানিব পৰা গৈছে৷ ইফালে, এক ঐতিহাসিক ক্ষণৰ সাক্ষী হ’বলৈ সমগ্র চৰাইদেউ জিলাবাসীয়ে অধিক আগ্রহ-উৎকণ্ঠাৰে বাট চাই থকাৰ লগতে মৈদাম অঞ্চলৰ ৰাইজে নিজা বাসগৃহৰ পদূলিত কাইলৈ এগছিকৈ বন্তি প্রজ্বলন কৰাৰ কার্যসূচী হাতত লৈছে৷ সমান্তৰালকৈ আনুষ্ঠানিক ঘোষণা হোৱাৰ লগে লগে এক উৎসৱসম পৰিৱেশ সৃষ্টি কৰিবলৈ আটাছুৰ চুকাফা আঞ্চলিক সমিতি আৰু চুকাফা চকিয়াল যুৱ সমাজে ব্যাপক প্রস্তুতি চলোৱা বুলি জানিব পৰা গৈছে৷ প্রসংগক্রমে উল্লেখ্য যে ১৯৫২ চনত স্বর্গদেউসকলৰ স্মৃতি তর্পণ সমিতিয়ে আৰম্ভণি অৱস্থাত ‘শৱ ধোৱা পুখুৰী’ৰ পাৰত এগছি বন্তি প্রজ্বলন কৰি আৰু পাছলৈ মৈদাম এলেকাত নিয়মীয়াকৈ তর্পণ অনুষ্ঠান অনুষ্ঠিত কৰি অহা আৰু সমান্তৰালভাৱে মৈদাম সংৰক্ষণ সমিতি, পাছলৈ প্রাচীন কীর্তিচিহ্ণ সংৰক্ষণ সমিতি হিচাপে পৰিচিত হোৱা অনুষ্ঠানকেহটাৰ বাবে ঐতিহাসিক চৰাইদেউ মৈদামক্ষেত্রই বিশেষ সামাজিক পৰিচিতি লাভ কৰিছিল৷

The post কাইলৈ চৰাইদেউ মৈদাম ক্ষেত্রলৈ ইউনেস্ক’ৰ স্বীকৃতি first appeared on নিয়মীয়া বাৰ্তা.

🔹 ভাৰতীয় ৰিজার্ভ বেংকৰ আশাৰ বতৰা

বিশেষ বাৰ্তা, ১০ জুলাই : ভাৰতীয় ৰিজার্ভ বেংকৰ প্রতিবেদনত ২০২৩–২৪ বর্ষত দেশত ৪ কোটি ৭০ লাখ নতুন কর্মসংস্থাপন হৈছে বুলি প্রকাশ পাইছে৷ প্রতিবেদনখনত ২০২২–২৩ চনৰ তুলনাত কর্মসংস্থাপন ৩.২ শতাংশৰ বিপৰীতে ২০২৩–২৪ বর্ষত ৬ শতাংশলৈ বৃদ্ধি হৈছে বুলিও উল্লেখ কৰা হৈছে৷ ক্লেমছৰ তথ্যৰ আধাৰত আৰবিআয়ে প্রকাশ কৰা এই প্রতিবেদনত দেশৰ ২৭টা কর্মক্ষেত্রৰ ওপৰত বিশ্লেষণ কৰি এই তথ্য প্রকাশ কৰিছে৷ কৃষি, মৎস্য, খনি, শিল্প আদিত কর্মসংস্থাপন বৃদ্ধি হৈছে৷ আৰবিআইৰ এই প্রতিবেদন বেচৰকাৰী সংস্থা চিটি গ্রুপ ইণ্ডিয়াই খাৰিজ কৰিছে৷ কিয়নো দেশত উক্ত বর্ষত ৮০–৯০ লাখহে নতুন কর্মসংস্থাপন হৈছে৷

The post ২০২৩–২৪ বর্ষত দেশত ৪ কোটি ৭০ লাখ নতুন কর্মসংস্থাপন first appeared on নিয়মীয়া বাৰ্তা.