নিয়মীয়া বাৰ্তা, ২৯ ফেব্ৰুৱাৰীঃ চীনৰ পৰা বিশ্বৰ বিভিন্ন প্রান্তলৈ সম্প্রসাৰিত হোৱা মাৰাত্মক ক’ৰোনা ভাইৰাছৰ আতংকত ভাৰতে অহা মাহত চাইপ্রাছত অনুষ্ঠিত হ’বলগীয়া শ্বুটিং বিশ্বকাপৰ পৰা নাম প্রত্যাহাৰ কৰিছে৷ কেন্দ্রীয় চৰকাৰৰ পৰামর্শ অনুসৰি ৰাষ্ট্রীয় ৰাইফল সন্থাই আজি এই গুৰুত্বপূর্ণ সিদ্ধান্ত গ্রহণ কৰে৷ সন্থাৰ এক সূত্রই কয় যে প্রতিযোগিতাখনৰ পৰা ভাৰতে নাম প্রত্যাহাৰ কৰাৰ একমাত্র কাৰণ হ’ল ক’ৰোনা ভাইৰাছৰ আতংকৰ পৰা ভাৰতীয় খেলুৱৈসকলক আঁতৰাই ৰখা৷ মন কৰিবলগীয়া যে চীনৰ য়ুহান চহৰত সৃষ্টি হোৱা এই মাৰাত্মক ভাইৰাছৰ ফলত এইপর্যন্ত বিশ্বৰ বিভিন্ন প্রান্তত তিনি হাজাৰ লোকৰ প্রাণহানি হৈছে আৰু ৮০ হাজাৰ লোক এই ভাইৰাছত আক্রান্ত হৈছে৷ চাইপ্রাছত এইপর্যন্ত ক’ৰোনা ভাইৰাছৰ প্রাদুর্ভাৱ দেখিবলৈ পোৱা নাই যদিও সতর্কতামূলক ব্যৱস্থাৰ অংশ হিচাপে ভাৰত চৰকাৰে দেশখনলৈ শ্বুটিং দলক প্রেৰণ নকৰে৷