ডিজিটেল ডেস্ক, ২৩ জুলাই : বৰপেটা জিলাৰ মন্দিয়া আৰক্ষী চকীৰ অধীনস্থ বামুণ দংৰাত ব্ৰহ্মপুত্ৰৰ বুকুৰ মাজত এক ডকাইতি কাণ্ড ঘটনা পোহৰলৈ আহিছে ।

জানিব পৰা মতে, ব্ৰহ্মপুত্ৰ নদীৰ মাজৰ পৰা ৭/৮ জনীয়া এটি ডকাইতৰ দলে গৰুভৰ্তি এখন যন্ত্ৰচালিত ভূটভূটী নাও আন এখন নাৱেৰে ডকাইতৰ দলে আগচি ধৰে। নাওখন আগচি ধৰি গৰু বেপাৰী- নাৱৰীয়াক ভয় দেখুৱাই দাবী কৰে বৃহৎ পৰিমাণৰ ধন । নদীৰ বুকুত সংঘটিত এই চাঞ্চল্যকৰ ঘটনাৰ খবৰ পাই বামুণ দংৰাৰ পঞ্চায়ত প্ৰতিনিধি, গাঁওৰক্ষী বাহিনী আৰু স্থানীয় ৰাইজে ঘটনাস্থলীত উপস্থিত হোৱাত তেওঁলোককো মাৰধৰ কৰাৰ ভাবুকি দিয়ে ডকাইতৰ দলটোৱে।

অৱশ্যে পৰৱৰ্তী সময়ত আৰক্ষীয়ে বামুণ দংৰাত উপস্থিত হৈ ঘটনাৰ লগত জড়িত থকা আৰু ধন ল’বলৈ অহাৰ অভিযোগত মৌৰী গাঁৱৰ ছাইফুল ইছলাম (৩৭) নামৰ এজন লোকক আটক কৰি মন্দিয়া আৰক্ষী চকীলৈ লৈ যায়।

ইপিনে, দলটোৱে ফোনযোগে গৰু বেপাৰীৰ পৰা ২ লাখ টকা ধনদাবী কৰিছিল বুলি ৰাইজে জানিবলৈ দিয়ে। সেয়ে এতিয়া ৰাইজে এই সমগ্ৰ ঘটনাৰ লগত জড়িত ব্যক্তিসকলক কৰায়ত্ত কৰিবলৈ দাবী উত্থাপন কৰিছে । এই ঘটনাত বামুণ দংৰাত তীব্ৰ চাঞ্চল্য বিৰাজ কৰিছে ।

The post চেঙাৰ বামুণদংৰাত গৰুভৰ্তি নাও হাইজেকৰ চেষ্টা ডকাইতৰ দলৰ first appeared on নিয়মীয়া বাৰ্তা.

নিয়মীয়া বাৰ্তা, কাকজান, ২৩ জুলাই : যোৰহাট আৰক্ষীয়ে গোপন সূত্ৰৰ পম খেদি  বৃহতসংখ্যক  ড্ৰাগছৰ পেকেট  লাহদৈগড়ত জব্দ কৰে ।

উল্লেখ্য যে এখন ৰঙা ৰঙৰ AS-01DP-7060 বেলেনো বাহন আৰক্ষীৰ এটা দলে টীয়কৰ ফালৰ পৰা পিছা কৰি আহি লাহদৈগড়ৰ ৭১৫ নং  ৰাষ্ট্ৰীয় ঘাইপথত জব্দ কৰিবলৈ সক্ষম হয়।  বাহনখনৰ পৰা আচমিনা বেগম আৰু চহৰ আলী নামৰ দুগৰাকীক আটক কৰাৰ লগতে ২৯টা ড্ৰাগছৰ টেমা জব্দ কৰিবলৈ সক্ষম হয় আৰক্ষীয়ে ।

কোটি টকা মূল্যৰ জব্দকৃত সামগ্ৰীখিনি জাগুনৰ পৰা ডিমাপুৰলৈ নি আছিল বুলি ধৃত ড্ৰাগছ বেপাৰীয়ে আৰক্ষীৰ আগত স্বীকাৰ কৰে ।

The post লাহদৈগড়ত ৰাষ্ট্ৰীয় ঘাইপথত কোটি টকাৰ ড্ৰাগছ জব্দ, দুজনক আটক first appeared on নিয়মীয়া বাৰ্তা.

ডিজিটেল ডেস্ক, ২৩ জুলাই : নাগালেণ্ডৰ পাহাৰীয়া অঞ্চলত হোৱা ডাৱৰ বিস্ফোৰণৰ ফলত নামনিৰ অসম ভূমিৰ শিৱসাগৰ, চৰাইদেউ, যোৰহাট তথা নাজিৰা সম–জিলাত সৃষ্টি হোৱা প্রলয়ংকৰী বানত মৃতকৰ সংখ্যা অর্ধশতাধিক পাৰ হোৱাৰ সম্ভাৱনা স্পষ্ট হৈ পৰিছে৷ অসম ৰাজ্যিক দুর্যোগ ব্যৱস্থাপনা বিভাগে জিলাকেইখনত ৩০গৰাকীৰো অধিক লোকৰ বানত মৃত্যু হোৱাৰ খবৰ প্রকাশ কৰিলেও বাতৰি লিখা পৰলৈকে প্রলয়ংকৰী বানত অর্ধশতাধিক লোকৰ মৃত্যু হোৱাৰ তথ্য পোৱা গৈছে৷

খবৰ অনুসৰি, কেৱল শিৱসাগৰতে ১৮জন লোকৰ মৃত্যু হোৱাৰ লগতে ৭০গৰাকীৰো অধিক লোক সন্ধানহীন হৈ আছে৷ আনহাতে নাজিৰাৰ পৰা পোৱা খবৰ অনুসৰি, নাজিৰা সম–জিলাত ২০জনৰো অধিক লোকৰ মৃতদেহ উদ্ধাৰ হৈছে৷ নাজিৰাৰ বিস্তীর্ণ এলেকা গেলেকী, বিহুবৰ, চণ্টক, কমল চাপৰি, বৰমিচিং গাঁও, কেন্দুগুৰি বাইলুং গাঁও, লুথুৰি গাঁও, তেঁতেলীগুৰি, টিপমীয়া, বচা গাঁও, হুলাল কাটনি, ৰহদৈগাঁও আদিত বর্তমানো পানী ওলাই যোৱা নাই৷ তদুপৰি এই গাঁওসমূহত পলসে পুতি পেলোৱাৰ বাবে বানাক্রান্তই ব্যাপক অসুবিধাৰ সন্মুখীন হ’ব লগা হৈছে৷ মথুৰাপুৰ, সাপেখাতী, চফ্রাই, টেঙাপুখুৰী আদিত বান পৰিস্থিতি কিছু উন্নত হৈছে যদিও মাহমৰাত বান পৰিস্থিতি অপৰিৱর্তিত হৈ আছে৷

চৰাইদেউ জিলাৰ কিছু অঞ্চলত বান পৰিস্থিতি উন্নত হৈছে যদিও অঞ্চলসমূহত এতিয়া বসবাসৰ পৰিস্থিতি একেবাৰে বেয়া হৈ আছে৷ নাজিৰাৰ কমল চাপৰিত এইপর্যন্ত ৫০গৰাকীৰো অধিক লোক সন্ধানহীনৰ খবৰ পোৱা গৈছে৷ সেইদৰে বিহুবৰ নেপালীখুঁটিৰ বহু লোকৰ সন্ধান নাই৷ বিশেষতঃ ম’বাইল নেটৱর্কৰ অভাৱ তথা দুর্গম অঞ্চললৈ উদ্ধাৰৰ বাবে উদ্ধাৰকাৰী দল যাব নোৱাৰাৰ বাবেই এই অঞ্চলসমূহত কিমান লোকৰ বানৰ কবলত পৰি মৃত্যু হৈছে তাৰ তথ্য নাই প্রশাসনৰ হাতত৷

আনহাতে, চৰাইদেউৰ টেঙাপুখুৰী অঞ্চলৰ একেটা পৰিয়ালৰে নিৰুদ্দেশ হৈ থকা বিদিশা দুৱৰা, বিদ্যুৎ দুৱৰা আৰু বিপ্লৱ দুৱৰাৰো মৃতদেহ উদ্ধাৰ হৈছে৷ আনহাতে, পৰিয়ালটোৰ সন্ধানহীন মাতৃ টুটুমণি দুৱৰাৰ মৃতদেহ এইপর্যন্ত উদ্ধাৰ কৰিব পৰা নাই৷ ইফালে, চৰাইদেউৰ মথুৰাপুৰ থানা এলেকাত ৫গৰাকীকৈ লোকৰ মৃতদেহ উদ্ধাৰ হয়৷ থানাখনৰ অন্তর্গত হলৌফুকন গাঁও পঞ্চায়তৰ ধামধূলি গাঁও আৰু চোমনি গাঁৱত এছডিআৰএফ বাহিনীয়ে উদ্ধাৰ কৰে দুটা উৱলি যোৱা মৃতদেহ৷ মৃতদেহ দুটাৰ এটা অচিনাক্ত পুৰুষৰ, আনটো চোমনি গাঁৱৰ সন্ধানহীন হৈ থকা নৰেন ফুকনৰ বুলি চিনাক্ত কৰা হৈছে৷

উদ্ধাৰ কৰা মৃতদেহকেইটা হ’ল মাইবেলা ১০১নং গ্রাণ্ট গেলগেলি অঞ্চলৰ ৭ বছৰীয়া শিশু মনোজ মাল, শিলাসাঁকো চোমনি গাঁৱৰ অকণ চিত্রকৰ (৮৫) আৰু প্রদীপ চিত্রকৰ (৬৫) ধামধূলি চোমনি গাঁৱৰ নৰেন ফুকন (৪৭) আৰু এটা মৃতদেহ বর্তমানেও চিনাক্ত কৰিব পৰা নাই৷

The post শিৱসাগৰতে বানত মৃত্যু ১৮জনৰ, নিখোজ ৭০ৰো অধিক first appeared on নিয়মীয়া বাৰ্তা.

আজি ২৩ জুলাই, শাওণ মাহৰ ৬ তাৰিখ
বৃহস্পতিবাৰ : তিথি–সপ্তমী, নক্ষত্র : চিত্রা, যাত্রা : নাই

মেষ : আজি দিনটো বৰ ভাল দেখা নাযায়৷ দূৰ যাত্রা নকৰিব৷ দেহভাব উত্তম বুলি যিকোনো নতুন কাম–কাজ কৰোঁতে উৎসাহ আহিব৷ বিদ্যাত অধিক মনোযোগৰ দৰকাৰ৷ শুভ ৰং – বেঙুনীয়া৷ শুভ সংখ্যা – ২।

বৃষ : আজি হাত-ভৰিৰ বেদনা অনুভৱ কৰিব পাৰে৷ সন্তানৰ শুভ৷ ব্যৱসায়ত লাভৱানৰ যোগ৷ সামাজিক দিশত ব্যস্ততা বৃদ্ধি পাব৷ প্রেমত সাৱধান৷ শুভ ৰং – ৰঙা৷ শুভ সংখ্যা – ৮।

মিথুন : আজি মানসিক অৱস্থা ঠিকেই থাকিব৷ চলা-ফুৰাত সাৱধান থাকিব৷ ব্যৱসায়-বাণিজ্যত ভাল যদিও অর্থ আয় কৰিব নোৱাৰিব৷ প্রেমত বাধা৷ শুভ ৰং – হালধীয়া৷ শুভ সংখ্যা – ৬।

কর্কট : আজি সন্তানৰ বিবাহৰ যোগ৷ যাত্রা শুভ৷ ঘৰুৱা পৰিৱেশ ভাল৷ বিদ্যার্থীসকলে নতুন সুযোগ লাভ কৰিব৷ ব্যৱসায়ত বাধা৷ শুভ ৰং – মেৰুণ৷ শুভ সংখ্যা – ২।

সিংহ : আজি চাকৰিয়ালসকলৰ বাবে ভাল৷ সন্তানৰ সু-স্বাস্থ্যৰ বাবে চিন্তা৷ ভ্রমণত শুভ৷ নিজ হাতেৰে টকা-পইচাৰ লেনদেন কৰিব৷ প্রেমত কষ্ট৷ শুভ ৰং – সোণালী৷ শুভ সংখ্যা – ৮।

কন্যা : আজি পুৰণি ৰোগ উপশম হোৱাৰ সম্ভাৱনা৷ মানসিক দিশত ভাল যদিও সৰুসুৰা চিন্তা থাকিব৷ দূৰ ভ্রমণত আঘাত প্রাপ্তিৰ সম্ভাৱনা৷ বিদ্যাত বাধা৷ শুভ ৰং – চিলভাৰ৷ শুভ সংখ্যা – ৩।

তুলা : আজি দেহত অলপ এলাহ ভাব থাকিব পাৰে৷ দেহ-মনত কষ্ট অনুভৱ হ’ব৷ নতুন কর্মত হাত নিদিয়াই ভাল৷ যান–বাহন ক্রয় কৰিব পাৰে৷ শুভ ৰং – বগা৷ শুভ সংখ্যা – ৫।

বৃশ্চিক : আজি দুর্ঘটনা, ৰক্তপাত আদি হোৱাৰ সম্ভাৱনা৷ ব্যৱসায়ৰ ক্ষেত্রত শুভ৷ স্বাস্থ্য ভালে থাকিব৷ বিদ্যাত শুভ৷ প্রেমত সন্দেহ৷ শুভ ৰং – গুলপীয়া৷ শুভ সংখ্যা – ৪।

ধনু : আজি কর্মক্ষেত্রত স্থান পৰিৱর্তনৰ যোগ৷ যান-বাহন চলোৱা লোকসকল সাৱধানে থাকক৷ বিদ্যাত শুভ৷ প্রেমত উৎসাহ৷ শুভ ৰং – কমলা৷ শুভ সংখ্যা – ৭।

মকৰ : আজি মূৰৰ বিষ, পেটৰ বিষ আদিত ভুগিব পাৰে৷ ব্যৱসায়-বাণিজ্যত মধ্যম ফল৷ আনৰ পৰা সহায় লাভ কৰিব৷ প্রেমত ভুল বুজাবুজি হ’ব পাৰে৷ শুভ ৰং – নীলা৷ শুভ সংখ্যা – ৯।

কুম্ভ : আজি ওচৰ চুবুৰীয়াৰ লগত কাজিয়া-পেচালত মন বেয়া হ’ব পাৰে৷ সৰুসুৰা অসুখ হ’ব পাৰে৷ বিদ্যার্থীসকলে ভবা মতে ফল নাপাব৷ শুভ ৰং – ক্রীম৷ শুভ সংখ্যা – ৮।

মীন : আজি পিতৃ-মাতৃৰ শৰীৰ বিশেষ ভালেৰে নাযাব৷ ঘৰুৱা পৰিৱেশ ভাল বুলি ক’ব নোৱাৰি৷ সন্তানৰ লগত কিবা বিষয়ক লৈ বিৰোধ হ’ব পাৰে৷ শুভ ৰং – কলা৷ শুভ সংখ্যা – ১।

The post ২৩ জুলাই : আজিৰ দিনটোৰ ৰাশিফল first appeared on নিয়মীয়া বাৰ্তা.

চামগুৰি আৰু ৰূপহীহাট সমষ্টিৰ মহিলাসকলে লাভ কৰিলে মুখ্যমন্ত্ৰী মহিলা উদ্যমিতা আঁচনিৰ চেক। নগাঁও জিলা প্ৰশাসনৰ উদ্যোগত অনুষ্ঠিত হোৱা চামগুৰি সমষ্টিৰ বাজিয়াগাঁও আৰু ৰূপহীহাট সমষ্টিৰ জুৰীয়াত অনুষ্ঠিত সভাত উপস্থিত হৈ মন্ত্ৰী পীয়ূষ হাজৰিকাই মহিলাসকলক প্ৰদান কৰে চেক।

ৰূপহীহাট সমষ্টিৰ ১৯,৪৮০ আৰু চামগুৰি সমষ্টিৰ ২৬,৬৫৮গৰাকী মহিলাক মুখ্যমন্ত্ৰী মহিলা উদ্যমিতা আঁচনিৰ ১০,০০০ টকাৰ চেক প্ৰদান কৰে মন্ত্ৰী পীয়ূষ হাজৰিকাই। তেওঁ উল্লেখ কৰে যে মুখ‍্যমন্ত্ৰী মহিলা উদ‍্যমিতা অভিযান, নিযুত মইনা আৰু অৰুণোদয়ৰ দৰে আঁচনিয়ে মহিলাসকলৰ বাবে সমাজত এক মৰ্যাদাপূৰ্ণ জীৱন নিশ্চিত কৰিছে।

আনহাতে, সভাত সকলো মহিলা হিতাধিকাৰীক এই আৰ্থিক সাহায্য নিজৰ ব্যৱসায় গঢ়ি তোলাৰ বাবে সঠিকভাৱে ব্যৱহাৰ কৰিবলৈ আহ্বান জনায় মন্ত্ৰী হাজৰিকাই।

নিয়মীয়া বাৰ্তা, ৰূপহীহাট, ২১ জুলাই :

The post চামগুৰি-ৰূপহীহাটত মুখ্যমন্ত্ৰী মহিলা উদ্যমিতাৰ চেক বিতৰণ মন্ত্ৰী পীয়ূষ হাজৰিকাৰ first appeared on নিয়মীয়া বাৰ্তা.

ডিজিটেল ডেস্ক, ২১ জুলাই : গোসাঁইগাঁৱত সংঘটিত হৈছে এক শোকাৱহ পথ দুৰ্ঘটনা। ট্ৰেক্টৰৰ চেপাত পৰি এটি ৮ বছৰীয়া শিশুৰ শোকাৱহ মৃত্যুক কেন্দ্ৰ কৰি সমগ্ৰ অঞ্চলটোতে গভীৰ শোকৰ ছাঁ পৰিছে। এই হৃদয়বিদাৰক ঘটনাটো গোসাঁইগাঁৱৰ বুঢ়িচাটাম গাঁৱত সংঘটিত হৈছে।

প্ৰাপ্ত খবৰ অনুসৰি, বুঢ়িচাটাম গাঁৱৰ বাসিন্দা ছাহানুৰ ফকিৰৰ ৮ বছৰীয়া পুত্ৰ ৰেজাওন ফকিৰে ৰাস্তাৰ কাষত খেলি থকা সময়তে এখন দ্ৰুতবেগী ট্ৰেক্টৰে শিশুটিক মহটিয়াই লৈ যায়। ট্ৰেক্টৰখনৰ চেপাত পৰি ৰেজাওন গুৰুতৰভাৱে আহত হয়।

দুৰ্ঘটনাৰ পিছতেই স্থানীয় ৰাইজে প্ৰত্যক্ষ কৰি শিশুটিক সংকটজনক অৱস্থাত উদ্ধাৰ কৰে আৰু তৎক্ষণাত দাৱাগুৰি প্ৰাথমিক স্বাস্থ্যকেন্দ্ৰলৈ লৈ যায়। কিন্তু দুৰ্ভাগ্যবশতঃ চিকিৎসালয়ত চিকিৎসকে শিশুটিক মৃত বুলি ঘোষণা কৰে।

ঘটনাৰ খবৰ পোৱাৰ লগে লগে সাপকাটা আৰক্ষীৰ এটা দল ঘটনাস্থলীত উপস্থিত হৈ দুৰ্ঘটনাগ্ৰস্ত ট্ৰেক্টৰখন জব্দ কৰে। আৰক্ষীয়ে ইতিমধ্যে ঘটনা সংক্ৰান্তত তদন্ত আৰম্ভ কৰিছে। কিশোৰটিৰ এনে আকস্মিক মৃত্যুত সমগ্ৰ বুঢ়িচাটাম গাঁৱত এক শোকাকুল পৰিৱেশ বিৰাজ কৰিছে।

The post গোসাঁইগাঁৱত শোকাৱহ ঘটনা, ৮ বছৰীয়া শিশুৰ প্ৰাণ কাঢ়িলে দ্ৰুতবেগী ট্ৰেক্টৰে first appeared on নিয়মীয়া বাৰ্তা.

নগৰবেৰা আৰক্ষী থানাৰ অন্তৰ্গত ৰংগেশ্বৰীত ন-বোৱাৰীৰ ৰহস্যজনক মৃত্যুক লৈ চাঞ্চল্যৰ সৃষ্টি হৈছে । ওলমি থকা অৱস্থাত উদ্ধাৰ হয় ন-বোৱাৰী ছালেমা খাতুনৰ মৃতদেহ | ঘটনাক লৈ গ্ৰেপ্তাৰ কৰা হয় ড্ৰাগছ আসক্ত স্বামী ওমৰ ফাৰুকক।

উল্লেখ্য যে ভখুৰাদিয়া মহিশখুঁটি গাঁৱৰ আবু বক্কৰ ছিদ্দিক নামৰ লোকজনৰ জীয়ৰী ছালেমা খাতুন ৰংগেশ্বৰী গাঁৱৰ ৰহিম বাদশ্বাৰ পুত্ৰ ওমৰ ফাৰুকৰ সৈতে বিবাহপাশত আবদ্ধ হয়। অভিযোগ অনুসৰি বিয়াৰ পাছৰে পৰা নানাধৰণৰ নিৰ্যাতন চলায় ড্ৰাগছ আসক্ত স্বামী ওমৰ ফাৰুক আৰু পৰিয়ালৰ লোকে |

আজি পুৱতি নিশা হঠাৎ ন-বোৱাৰীগৰাকীৰ মৃতদেহ ওলমি থকা অৱস্থাত ঘৰৰ কাষতে প্ৰত্যক্ষ কৰে একাংশই | ইফালে, এই ঘটনাক সহজভাৱে ল’ব পৰা নাই বোৱাৰীগৰাকীৰ মাতৃ পৰিয়ালে।তেওঁলোকৰ মতে এয়া পৰিকল্পিত হত্যাকাণ্ড | হত্যা কৰি আত্মহননৰ ৰূপ দিব বিচাৰিছে বুলি মাতৃ পৰিয়ালৰ লোকে অভিযোগ উত্থাপন কৰিছে।

ইতিমধ্যে ঘটনাস্থলীত টুপামাৰী আৰক্ষী উপস্থিত হৈ মৃতদেহ মৰণোত্তৰ পৰীক্ষাৰ বাবে প্ৰেৰণ কৰাৰ লগতে তদন্ত আৰম্ভ কৰিছে | উল্লেখ্য যে মূল অভিযুক্ত ওমৰ ফাৰুকক গ্ৰেপ্তাৰ কৰিছে টুপামাৰী আৰক্ষীয়ে। দোষীক কঠোৰ শাস্তিৰ দাবী তুলিছে মৃত মহিলাগৰাকীৰ পৰিয়ালৰ লোকে।

নিয়মীয়া বাৰ্তা, নগৰবেৰা, ২১ জুলাই :

The post ৰংগেশ্বৰীত ন-বোৱাৰীৰ ৰহস্যজনক মৃত্যু, স্বামীক আটক first appeared on নিয়মীয়া বাৰ্তা.

চাইবাৰ অপৰাধৰ অন্যতম কেন্দ্ৰভূমি হিচাপে পৰিচিত হৈ পৰা বৰপেটাত এইবাৰ পোহৰলৈ আহিছে আন্তঃৰাষ্ট্ৰীয় চাইবাৰ অপৰাধী চক্ৰৰ সৈতে বিদেশী সংযোগৰ চাঞ্চল্যকৰ তথ্য। বৰপেটাৰ চাইবাৰ অপৰাধীৰ সৈতে চীন আৰু ওমানৰ সংযোগ থকাৰ তথ্য পোহৰলৈ অহাৰ পাছতে সমগ্ৰ ঘটনাই নতুন ৰূপ লৈছে।

উল্লেখ্য যে, অসমৰ বিভিন্ন প্ৰান্তৰ লোকৰ বেংক একাউণ্ট ব্যৱহাৰ কৰি অনলাইন পদ্ধতিৰে কোটি কোটি টকা সৰবৰাহ কৰা এটা বৃহৎ চাইবাৰ অপৰাধী চক্ৰৰ বিৰুদ্ধে অভিযান চলাই বৰপেটা আৰক্ষীয়ে গুৱাহাটীৰ পৰা চাৰি অভিযুক্তক গ্ৰেপ্তাৰ কৰিবলৈ সক্ষম হৈছে।

বৰ্তমান বৰপেটা জিলাৰ ভাৰপ্ৰাপ্ত আৰক্ষী অধীক্ষকৰ দায়িত্বত থকা অপৰাধ শাখাৰ অতিৰিক্ত আৰক্ষী অধীক্ষক সমীৰণ বৈশ্যৰ নেতৃত্বত চলা এই অভিযানত আন্তঃৰাষ্ট্ৰীয় চাইবাৰ অপৰাধৰ এক গুৰুত্বপূৰ্ণ নেটৱৰ্ক পোহৰলৈ অহাৰ সম্ভাৱনা প্ৰকট হৈছে।

উল্লেখ্য যে, বিগত কেইবামাহ ধৰি বৰপেটা জিলাত চাইবাৰ অপৰাধীৰ বিৰুদ্ধে আৰক্ষীয়ে ধাৰাবাহিক অভিযান চলাই আহিছে। এই অভিযানত জিলাখনৰ বিভিন্ন প্ৰান্তৰ পৰা বহুসংখ্যক চাইবাৰ অপৰাধী গ্ৰেপ্তাৰ হোৱাৰ লগতে উদ্ধাৰ হৈছে শতাধিক ভুৱা পেন কাৰ্ড, আধাৰ কাৰ্ড, বেংক একাউণ্ট, ডেবিট কাৰ্ড আৰু নগদ ধন।

এই ধাৰাবাহিক অভিযানৰ অংশ হিচাপে যোৱা ১৮ জুলাইত তাৰাবাৰী আৰক্ষীয়ে ৰৌমাৰী গাঁৱৰ পৰা তাহেৰ আলী নামৰ এজন চাইবাৰ অপৰাধীক গ্ৰেপ্তাৰ কৰে। অভিযুক্তজনৰ ঘৰৰ পৰা আৰক্ষীয়ে ৮টা মোবাইল ফোন, ৯খন ডেবিট কাৰ্ড, ৩খন বেংকৰ পাছবুক আৰু নগদ ৮২ হাজাৰ টকা উদ্ধাৰ কৰে।

তাহেৰ আলীৰ জেৰাত লাভ কৰা তথ্যৰ ভিত্তিত তাৰাবাৰী থানাৰ ভাৰপ্ৰাপ্ত আৰক্ষী বিষয়া সঞ্জয় ৰয়ৰ নেতৃত্বত আৰক্ষীৰ এটা দলে গুৱাহাটীত অভিযান চলায়। অভিযানত ক্ষেত্ৰীৰ এখন হোটেল আৰু ফটাশিল-আমবাৰীৰ এটা ফ্লেটৰ পৰা আন্তঃৰাষ্ট্ৰীয় চাইবাৰ অপৰাধৰ সৈতে জড়িত বুলি সন্দেহ কৰা চাৰি অভিযুক্তক গ্ৰেপ্তাৰ কৰা হয়।

গ্ৰেপ্তাৰ হোৱা অভিযুক্তকেইজন হৈছে—দুলীয়াজানৰ আৰিফুল কবিৰ, কামৰূপ জিলাৰ বকোৰ ২নং দক্ষিণ ৰঙাপানী গাঁৱৰ পৰান আলী, গুৱাহাটীৰ সিজুবাৰীৰ আমিৰুল ইছলাম আৰু তাৰাবাৰী থানাৰ অন্তৰ্গত বালিধাৰী চৰৰ মইনুদ্দিন আলী।

অভিযুক্তসকলৰ জিম্মাৰ পৰা ১৬খন এটিএম কাৰ্ড আৰু ১৮টা মোবাইল ফোন জব্দ কৰে আৰক্ষীয়ে। ইয়াৰ উপৰি ডব্লিউ বি ০২ এ কিউ ১০৫১ নম্বৰৰ এখন অ’ডি গাড়ী আৰু এ এছ ০১ জি কে নম্বৰৰ এখন হুণ্ডাই ভেনু গাড়ীও জব্দ কৰা হৈছে।

আৰক্ষীৰ তদন্তত পোহৰলৈ অহা মতে, এই চক্ৰৰ অন্যতম অভিযুক্ত আৰিফুল কবিৰে প্ৰায় দহ বছৰ ধৰি মধ্যপ্ৰাচ্যৰ ওমানত ‘টি কেফে’ নামৰ এখন ব্যৱসায় চলাই অহা বুলি দাবী কৰিছে। অসমত উৎপাদিত নেমু আৰু চাহপাত ওমানলৈ ৰপ্তানি কৰাৰ কথাও আৰক্ষীক জনাইছে অভিযুক্ত আৰিফুল।

অৱশ্যে এই ব্যৱসায়ৰ আঁৰত চাইবাৰ অপৰাধৰ সৈতে কোনো সম্পৰ্ক আছিল নেকি, সেই বিষয়েও আৰক্ষীয়ে তদন্ত অব্যাহত ৰাখিছে। আৰক্ষীৰ জেৰাত আৰিফুলে প্ৰকাশ কৰা মতে, ওমানত থকা সময়ছোৱাতেই চীনৰ চাইবাৰ অপৰাধীৰ সৈতে তেওঁৰ সংযোগ স্থাপন হৈছিল।

চীনা চাইবাৰ অপৰাধীৰ সহযোগত চাইনিজ এপ ব্যৱহাৰ কৰি চীনৰ বিভিন্ন লোকৰ বেংক একাউণ্টৰ ধন অনলাইন লেনদেনৰ জৰিয়তে ভাৰতীয় টকালৈ ৰূপান্তৰ কৰি অসমৰ বিভিন্ন লোকৰ বেংক একাউণ্টলৈ সৰবৰাহ কৰা হৈছিল বুলি আৰক্ষীৰ তদন্তত সন্দেহ কৰা হৈছে।

আৰক্ষীৰ মতে, প্ৰায় দুবছৰ পূৰ্বে চাইবাৰ অপৰাধৰ সৈতে জড়িত হোৱা আৰিফুলক এই কামত সহযোগ কৰিছিল ধৃত পৰান আলী, আমিৰুল ইছলাম, মইনুদ্দিন আলী আৰু তাহেৰ আলীয়ে। গ্ৰেপ্তাৰ কৰা অভিযুক্তসকলৰ মোবাইল ফোনত বহুকেইটা চাইনিজ এপ ব্যৱহাৰৰ তথ্য লাভ কৰিছে আৰক্ষীয়ে।

ইতিমধ্যে অভিযুক্তসকলৰ স্বীকাৰোক্তি, জব্দ কৰা মোবাইল ফোন আৰু অন্যান্য তথ্যৰ ভিত্তিত তদন্ত আগবঢ়াই নিছে বৰপেটা আৰক্ষীয়ে। এই আন্তঃৰাষ্ট্ৰীয় চাইবাৰ অপৰাধী চক্ৰৰ সৈতে আৰু কোন কোন ব্যক্তি জড়িত, অসমৰ কিমানটা বেংক একাউণ্ট ব্যৱহাৰ কৰা হৈছিল আৰু বিদেশৰ পৰা কিমান পৰিমাণৰ ধন এই চক্ৰটোৱে সৰবৰাহ কৰিছিল—সেই সকলো দিশ তদন্তৰ আওতালৈ আনিছে আৰক্ষীয়ে।

এই সন্দৰ্ভত তাৰাবাৰী আৰক্ষীয়ে ভাৰতীয় ন্যায় সংহিতাৰ ৩১৮(৪)/৩৩৬(৩)/৬১(২) ধাৰা আৰু তথ্য প্ৰযুক্তি আইনৰ ৬৬চি আৰু ৬৬ডি ধাৰাৰ অধীনত ৪৭/২৬ নম্বৰত গোচৰ ৰুজু কৰি তদন্ত অব্যাহত ৰাখিছে। গ্ৰেপ্তাৰ কৰা অভিযুক্তসকলক বৰপেটা আদালতত হাজিৰ কৰোৱাৰ পাছত আৰক্ষীৰ আবেদনৰ ভিত্তিত আদালতে আটাইকেইজনকে পাঁচদিনৰ বাবে আৰক্ষীৰ জিম্মালৈ প্ৰেৰণ কৰে।

বৰপেটাৰ পৰা আৰম্ভ হোৱা চাইবাৰ অপৰাধৰ জাল যে কেৱল অসমৰ ভিতৰতে সীমাবদ্ধ নহয়, এই গ্ৰেপ্তাৰৰ ঘটনাই সেই কথাই পুনৰ স্পষ্ট কৰি তুলিছে।

বাৰ্তা ব্যুৰো, বৰপেটা ২১ জুলাই

The post গুৱাহাটীৰ পৰা ৪ আন্তঃৰাষ্ট্ৰীয় চাইবাৰ অপৰাধীক গ্ৰেপ্তাৰ first appeared on নিয়মীয়া বাৰ্তা.

ডিজিটেল ডেস্ক, ২১ জুলাই: ধূপধৰাত পুনৰ সংঘটিত হৈছে বন্যহস্তীৰ মৰ্মান্তিক আক্ৰমণৰ ঘটনা। এটা সপ্তাহৰ ভিতৰতে বনৰীয়া হাতীৰ আক্ৰমণত দ্বিতীয়গৰাকী লোকৰ কৰুণ মৃত্যুৰ ঘটনাই সমগ্ৰ অঞ্চলটোতে তীব্ৰ চাঞ্চল্য আৰু আতংকৰ সৃষ্টি কৰিছে। এইবাৰ ঘটনাৰ স্থান ৰংজুলি বনাঞ্চলিক কাৰ্যালয়ৰ অন্তৰ্গত কোঠাকুঠিৰ মাৰিয়ামপুৰ গাঁও।

প্ৰাপ্ত খবৰ অনুসৰি, আজি পুৱতি নিশা প্ৰায় ৪ বজাত কোঠাকুঠিৰ মাৰিয়ামপুৰ গাঁৱত বন্যহস্তীৰ আক্ৰমণত অৰ্জুন চাংমা (৩৮) নামৰ এজন ব্যক্তিৰ থিতাতে কৰুণ মৃত্যু ঘটে। পুৱা ওচৰৰে এজন চুবুৰীয়াৰ ঘৰ হাতীয়ে ভাঙি ধ্বংস কৰাৰ শব্দ শুনি অৰ্জুন চাংমা ঘৰৰ পৰা বাহিৰলৈ ওলাই আহিছিল। ঠিক সেই সময়তে অতৰ্কিতে অহা হাতীটোৱে লোকজনক আক্ৰমণ কৰে, যাৰ ফলত থিতাতে তেওঁৰ প্ৰাণহানি ঘটে।

ঘটনাৰ খবৰ পোৱাৰ লগে লগে ধূপধৰা বন বিভাগ আৰু স্থানীয় আৰক্ষীৰ দল ঘটনাস্থলীত উপস্থিত হৈ মৃতদেহটো উদ্ধাৰ কৰে। বৰ্তমান মৃতদেহটো ধূপধৰা থানালৈ নি মৰণোত্তৰ পৰীক্ষাৰ বাবে প্ৰেৰণৰ ব্যৱস্থা গ্ৰহণ কৰা হৈছে।

উল্লেখ্য যে মাত্ৰ তিনি দিন পূৰ্বে ধনুভাঙাৰ দেওশিলাৰ ৰাষ্ট্ৰীয় ঘাইপথৰ পৰা এজন বাইক আৰোহীক টানি নি বন্যহস্তীয়ে নিৰ্দয়ভাৱে হত্যা কৰিছিল। সেই লোমহৰ্ষক ঘটনাৰ প্ৰভাৱ মাৰ নৌযাওঁতেই পুনৰ আন এজন লোকৰ হাতীৰ আক্ৰমণত মৃত্যু হোৱা ঘটনাই সমগ্ৰ অঞ্চলটোৰ ৰাইজক শংকিত কৰি তুলিছে।

The post ধূপধৰাত পুনৰ বন্যহস্তীৰ আক্ৰমণত এজনৰ কৰুণ মৃত্যু first appeared on নিয়মীয়া বাৰ্তা.

আজি ২১ জুলাই, শাওণ মাহৰ ৪ তাৰিখ
মঙলবাৰ : তিথি–সপ্তমী, নক্ষত্র : চিত্রা, যাত্রা : নাই

মেষ : আজি কর্মক্ষেত্রত সফলতা লাভৰ সম্ভাৱনা আছে৷ কোনো নতুন কাম আৰম্ভ কৰিব পাৰে৷ প্রেমত মধ্যম৷ ভ্রমণত বাধা৷ খৰচত সংযম ৰাখক৷ শুভ ৰং বগা, শুভ সংখ্যা–২৷

বৃষ : আজি স্বাস্থ্যৰ প্রতি অলপ সাৱধান হওক৷ পৰিয়ালৰ সৈতে সময় কটাবলৈ সুযোগ পাব৷ আর্থিক অৱস্থা স্থিত থাকিব৷ ভ্রমণৰ যোগ আছে৷ শুভ ৰং ৰঙা, শুভ সংখ্যা– ৯৷

মিথুন : আজি গুৰুত্বপূর্ণ সিদ্ধান্ত লোৱাৰ আগতে ভালদৰে চিন্তা কৰক৷ ব্যৱসায়ত লাভৰ সম্ভাৱনা৷ দিনটোত অনাৱশ্যক খৰচৰ মাত্রা বৃদ্ধি পাব৷ স্বাস্থ্য মধ্যম৷ শুভ ৰং নীলা, শুভ সংখ্যা– ৮৷

কর্কট : আজি ঘৰুৱা বিষয়ত ধৈর্য ধৰি আগবাঢ়ক৷ স্বাস্থ্যৰ যত্ন লোৱা প্রয়োজন৷ চাকৰিয়ালসকলৰ দিনটো শুভ৷ পিতৃ–মাতৃৰ শাৰীৰিক যত্ন লওক৷ বিবাহৰ যোগ দেখা যায়৷ প্রেমত মধ্যম৷ শুভ ৰং বেঙুনীয়া, শুভ সংখ্যা–১৷

সিংহ : আজি আত্মবিশ্বাসে সফলতা আনিব৷ নেতৃত্ব দিয়াৰ যোগ দেখা যায়৷ শিক্ষার্থীয়ে শুভ ফল লাভ কৰিব৷ ছুটীৰ ভ্রমণৰ সম্ভাৱনা আছে৷ দাম্পত্য জীৱন শুভ৷ শুভ ৰং গুলপীয়া, শুভ সংখ্যা–৪৷

কন্যা : আজি আর্থিক দিশত শুভ৷ কন্যা সন্তানৰ বিবাহৰ যোগ দেখা যায়৷ কর্মত কিছু বাধা আহিব পাৰে৷ বিদ্যাত সাফল্য লাভ কৰিব৷ ভ্রমণত বাধা৷ প্রেমত শুভ৷ শুভ ৰং মেৰুণ, শুভ সংখ্যা–৬৷

তুলা : আজি বন্ধুৰ পৰা কোনো কথাত সহায় লাভ কৰিব৷ দাম্পত্য পূর্বৰ তুলনাত ভাল দেখা যায়৷ ব্যৱসায় ভাল চলিব৷ দাম্পত্য সম্পর্ক মজবুত হ’ব৷ শুভ ৰং সেউজীয়া, শুভ সংখ্যা–৯৷

বৃশ্চিক : আজি কর্মক্ষেত্রত পৰিশ্রমৰ ফল পাব৷ সন্তানৰ স্বাস্থ্যৰ বিষয়ে সচেতন থাকক৷ খং নিয়ন্ত্রণত ৰাখিব৷ পূব দিশে ভ্রমণ নকৰিব৷ শিক্ষার্থীসকলৰ বাবে দিনটো শুভ৷ শুভ ৰং ৰূপালী, শুভ সংখ্যা–৫৷

ধনু : আজি সামাজিক ব্যস্ততা বৃদ্ধি হ’ব৷ ভ্রমণৰ সম্ভাৱনা আছে৷ শিক্ষার্থীসকলৰ বাবে দিনটো মধ্যম৷ চাকৰি হোৱাৰ যোগ দেখা যায়৷ প্রেম আৰু দাম্পত্যত শুভ৷ শুভ ৰং কমলা, শুভ সংখ্যা–৭৷

মকৰ : আজি বন্ধুবর্গৰ পৰা সহায় লাভ কৰিব৷ মাংগলিক কর্মত টকা–পইচা খৰচ হ’ব৷ ধৈর্য আৰু ব্যৱসায়ে সফলতা আনিব৷ শুভ ৰং ক্রীম, শুভ সংখ্যা– ৩৷

কুম্ভ : আজি পাৰিবাৰিক শান্তি অব্যাহত থাকিব৷ সন্তানৰ স্বাস্থ্যৰ বিষয়ে সচেতন থাকক৷ বন্ধু–বান্ধৱৰ সহায় লাভ কৰিব৷ দাম্পত্যত মধ্যম৷ শুভ ৰং ধূসৰ, শুভ সংখ্যা–৬৷

মীন : আজি সন্তানৰ সাফল্যই মানসিক আনন্দ বৃদ্ধি কৰিব৷ পাৰিবাৰিক শান্তি অব্যাহত থাকিব৷ সৃজনশীল কামত সফলতা পাব৷ শুভ ৰং– সোণালী, শুভ সংখ্যা–৪৷

The post ২১ জুলাই : আজিৰ দিনটোৰ ৰাশিফল first appeared on নিয়মীয়া বাৰ্তা.