আয়াৰলেণ্ড আৰু ইংলেণ্ডৰ বিৰুদ্ধে একেৰাহে টি-২০ শৃংখলাত পৰাজয়ৰ পিছত ভাৰতীয় দল এতিয়া এদিনীয়া ফৰ্মেটলৈ উভতি আহিছে। আজি বাৰ্মিংহামত ইংলেণ্ড-ভাৰতৰ মাজত প্ৰথমখন এদিনীয়া মেচ অনুষ্ঠিত হব। এই মেচৰ জৰিয়তে তাৰকা যুটি বিৰাট কোহলি আৰু ৰোহিত শৰ্মাই পুনৰ টীম ইণ্ডিয়াৰ জাৰ্চীত খেলপথাৰত নামিব। ২০২৭ চনৰ এদিনীয়া বিশ্বকাপক লক্ষ্য কৰি ভাৰত আৰু ইংলেণ্ডে তিনিখন মেচৰ এদিনীয়া শৃংখলাত মুখামুখি হ’ব।

বিৰাট কোহলিয়ে যোৱা মাহত আফগানিস্তানৰ বিৰুদ্ধে শৃংখলা মিছ কৰাৰ পিছত পুনৰ দললৈ উভতি আহিছে। আনহাতে, তাৰকা দ্ৰুত ব’লাৰ যশপ্ৰীত বুমৰাহ ২০২৩ চনৰ এদিনীয়া বিশ্বকাপৰ ফাইনেলত অষ্ট্ৰেলিয়াৰ বিৰুদ্ধে খেলাৰ পিছত প্ৰথমবাৰৰ বাবে ৫০ অভাৰৰ ক্ৰিকেট খেলিব।

প্ৰশিক্ষক গৌতম গম্ভীৰৰ ওপৰত শেহতীয়া টেষ্ট আৰু টি-২০ ফলাফলৰ বাবে বৃদ্ধি পোৱা চাপ কমাবলৈ এই এদিনীয়া শৃংখলাত জয় লাভ কৰাটো ভাৰতৰ বাবে যথেষ্ট গুৰুত্বপূৰ্ণ।

ভাৰত বনাম ইংলেণ্ড ১ম এদিনীয়া : লাইভ ষ্ট্ৰীমিঙৰ তথ্য

মেচ : ভাৰত বনাম ইংলেণ্ড, ১ম এদিনীয়া
তাৰিখ : ১৪ জুলাই (মঙলবাৰ)
স্থান : এডবাষ্টন ষ্টেডিয়াম, বাৰ্মিংহাম, ইংলেণ্ড
টছৰ সময় : ভাৰতীয় সময় অনুসৰি দুপৰীয়া ৩:০০ বজাত
মেচ আৰম্ভ : ভাৰতীয় সময় অনুসৰি ৩:৩০ বজাত

প্ৰায় দুসপ্তাহ ধৰি ইংলেণ্ডে প্ৰতিটো বিভাগতে ভাৰতক পিছ পেলাই খেলখনৰ নিয়ন্ত্ৰণ নিজৰ হাতত ৰাখিছিল। যি টি-২০ ফৰ্মেটত যোৱা দুবছৰ ধৰি ভাৰতৰ আধিপত্য আছিল, সেই ফৰ্মেটতেই প্ৰথমে আয়াৰলেণ্ড আৰু তাৰ পিছত ইংলেণ্ডৰ বিৰুদ্ধে শৃংখলা পৰাজয়ে বিদেশৰ পৰিৱেশত ভাৰতৰ খাপ খুৱাব পৰা ক্ষমতাক লৈ পুনৰ প্ৰশ্ন উত্থাপন কৰিছে।

এতিয়া দৃষ্টি নিবদ্ধ হৈছে এদিনীয়া ক্ৰিকেটলৈ। শেহতীয়া সময়ত এই ফৰ্মেটত ভাৰতৰ প্ৰদৰ্শন মিশ্ৰধৰণৰ। ২০২৪ চনৰ জুলাইৰ পৰা ভাৰতে খেলা ছয়খন দ্বিপাক্ষিক এদিনীয়া শৃংখলাৰ ভিতৰত তিনিখনত পৰাজয় স্বীকাৰ কৰিছে— শ্ৰীলংকা আৰু অষ্ট্ৰেলিয়াত বিদেশত, আৰু নিউজিলেণ্ডৰ বিৰুদ্ধে ঘৰুৱা মাটিত। কিন্তু এই শৃংখলাৰ গুৰুত্ব অধিক, কিয়নো দক্ষিণ আফ্ৰিকাত অনুষ্ঠিত হ’বলগীয়া এদিনীয়া বিশ্বকাপলৈ মাত্ৰ ১৫ মাহ বাকী আছে। বিদেশত পুনঃপুনঃ ব্যৰ্থ হোৱাৰ সমস্যাৰ সমাধান বিচাৰিবলৈ ভাৰতৰ হাতত সময় অতি কম।

টি-২০ দলৰ তুলনাত এদিনীয়া দলত ভাৰতৰ বহু অভিজ্ঞ আৰু তাৰকা খেলুৱৈ আছে। বিৰাট কোহলি পুনৰ দললৈ উভতি আহিছে। যশপ্ৰীত বুমৰাহে আক্ৰমণৰ নেতৃত্ব দিব, আনহাতে ৰোহিত শৰ্মা, কে এল ৰাহুল আৰু অধিনায়ক শুভমন গিল মিলি শক্তিশালী একাদশ গঠন কৰিছে। তথাপিও কেইবাটাও প্ৰশ্ন ৰৈ গৈছে। দীৰ্ঘদিনৰ পিছত উভতি অহা খেলুৱৈসকলে কিমান সোনকালে নিজৰ পূৰ্বৰ ছন্দ ঘূৰাই আনিব? মহম্মদ ছিৰাজ নাথাকোঁতে বলিং আক্ৰমণ কেনেকৈ সাজু হ’ব? অৰ্শদীপ সিঙে এতিয়াও নিজৰ ছন্দ বিচাৰি আছে। আনহাতে হাৰ্দিক পাণ্ডিয়া আৰু নীতিশ কুমাৰ ৰেড্ডীৰ অনুপস্থিতিত দলৰ ভাৰসাম্য কেনেদৰে ৰক্ষা কৰা হ’ব?

অন্যহাতে, টেষ্ট ক্ৰিকেটৰ কঠিন সময় পাৰ কৰি ইংলেণ্ডে টি-২০ শৃংখলাত নতুন আত্মবিশ্বাস লাভ কৰিছে। হেৰী ব্ৰুকৰ নেতৃত্বত দলে পুনৰ আক্ৰমণাত্মক হোৱাইট-বল ক্ৰিকেটৰ পৰিচয় দিছে। বেটছমেনসকলে আক্ৰমণাত্মক আৰম্ভণি কৰিছে আৰু জফ্ৰা আৰ্চাৰ নেতৃত্বাধীন পেচ আক্ৰমণে ভাৰতীয় বেটিঙক যথেষ্ট বিপদত পেলাইছিল। তথাপিও ইংলেণ্ডে জানে যে ২০২৪ চনৰ পৰা তেওঁলোকেও সাতখন দ্বিপাক্ষিক এদিনীয়া শৃংখলাৰ ভিতৰত পাঁচখনত পৰাজিত হৈছে। লগতে যোৱা বছৰৰ চেম্পিয়নছ ট্ৰফীতো তেওঁলোকে এখনো মেচ জয় কৰিব পৰা নাছিল।

এতিয়া ইংলেণ্ডৰ লক্ষ্য হ’ল টি-২০ৰ জয়ৰ ধাৰাবাহিকতা এদিনীয়াতো বজাই ৰখা আৰু বিশ্বকাপৰ পূৰ্বে সঠিক দলীয় সংমিশ্ৰণ স্থিৰ কৰা। বেটিঙত জ’ ৰুট এতিয়াও দলৰ ভৰসাৰ স্তম্ভ, আনহাতে স্পিন বিভাগত আদিল ৰশ্বিদ অন্যতম মুখ্য অস্ত্ৰ।

এডবাষ্টন এদিনীয়া ক্ৰিকেটত ইংলেণ্ডৰ বাবে এক শক্তিশালী দুৰ্গ হিচাপে পৰিগণিত। ২০১৫ চনৰ পৰা ইয়াত তেওঁলোকে একেৰাহে সাতখন এদিনীয়া মেচত জয়লাভ কৰিছে। যদি আৰ্চাৰ আৰু তেওঁৰ সংগীসকলে টি-২০ৰ দৰে আৰম্ভণিতে উইকেট দখল কৰিব পাৰে, তেন্তে এই আধিপত্য অব্যাহত ৰখাৰ আশা কৰিব। আনহাতে পূৰ্ণশক্তিৰ দল লৈ নামিবলগীয়া ভাৰতেও আশা কৰিব যে উভতি অহা তাৰকা খেলুৱৈসকলে কেৱল প্ৰথমখন মেচতেই নহয়, সমগ্ৰ শৃংখলাতেই শক্তিশালী প্ৰত্যাহ্বান আগবঢ়াব।

এদিনীয়া ক্ৰিকেটত জ’ ৰুট এতিয়াও ইংলেণ্ডৰ বেটিঙৰ মূল ভৰসা। ২০২৪ চনৰ আৰম্ভণিৰ পৰা তেওঁ ১,০৫৫ ৰান সংগ্ৰহ কৰি দলৰ সৰ্বাধিক ৰান সংগ্ৰাহক। তেওঁৰ গড় ৬৫.৯৩। শ্ৰীলংকাৰ বিৰুদ্ধে শেহতীয়া এদিনীয়া শৃংখলাত তেওঁ তিনিখন মেচত ২৪৭ ৰান সংগ্ৰহ কৰিছিল, যাৰ ভিতৰত নিৰ্ণায়ক মেচত এটা শতকো আছিল। পেচ আৰু স্পিন— দুয়োটা আক্ৰমণৰ বিৰুদ্ধে সফলভাৱে খেলাৰ ক্ষমতা ইংলেণ্ডৰ বাবে অতি গুৰুত্বপূৰ্ণ হ’ব পাৰে।

অন্যহাতে, ৰোহিত শৰ্মা আৰু বিৰাট কোহলিক একেলগে খেলপথাৰত দেখাটো এই শৃংখলাৰ অন্যতম আকৰ্ষণ। সম্ভৱতঃ ইংলেণ্ডত এয়া তেওঁলোকৰ অন্তিম এদিনীয়া শৃংখলাও হ’ব পাৰে। বিশেষকৈ ৰোহিতৰ ইংলেণ্ডত অভিলেখ অসাধাৰণ। তেওঁ ইয়াত ৭টা এদিনীয়া শতক অৰ্জন কৰাৰ লগতে গড় ৬৪.৯। এডবাষ্টনত তেওঁৰ গড় আৰু অধিক চমকপ্ৰদ ৮৯.৪।

আফগানিস্তানৰ বিৰুদ্ধে এদিনীয়া শৃংখলাত ৰোহিতে আৰম্ভণিতে নিজৰ স্বাভাৱিক ছন্দ দেখা নাপালেও অন্তিম দুখন মেচত ৪৮ আৰু ৭৯ ৰান কৰি ভাল সমাপ্তি ঘটাইছিল।

আনহাতে, আফগানিস্তানৰ বিৰুদ্ধে শৃংখলা নেখেলিলেও বিৰাট কোহলি আত্মবিশ্বাসেৰে এই শৃংখলাত নামিব। তেওঁৰ শেহতীয়া সাতটা এদিনীয়া ইনিংছৰ ভিতৰত ছয়টাতে ৫০ বা তাতকৈ অধিক ৰান আছে। ইয়াৰ উপৰি শেহতীয়া আইপিএলতো তেওঁ ১৬খন মেচত ৬৭৫ ৰান সংগ্ৰহ কৰি উৎকৃষ্ট ফৰ্মৰ প্ৰমাণ দিছিল।

ডিজিটেল ডেস্ক, ১৪ জুলাই

The post বাৰ্মিংহামত আজি ভাৰত-ইংলেণ্ডৰ প্ৰথম এদিনীয়া first appeared on নিয়মীয়া বাৰ্তা.

আজি নিশা ডালাছত অনুষ্ঠিত হ’ব ফ্ৰান্স–স্পেইনৰ হাইভল্টেজ ছেমিফাইনেল মেচ। এই মেচখনে বিশেষ আকৰ্ষণ কঢ়িয়াই আনিছে। কিয়নো বিশ্ব ফুটবলৰ দুজন শ্ৰেষ্ঠ প্ৰতিভা কিলিয়ান এমবাপে আৰু লামিনে য়ামাল এই মেচখনত মুখামুখি হ’ব।

এমবাপে আৰু য়ামালে লা লিগাৰ বিখ্যাত এল ক্লাছিকোত ৰিয়েল মাদ্ৰিদ আৰু বাৰ্চিলোনাৰ হৈ কেইবাবাৰো মুখামুখি হৈছে। কিন্তু এইবাৰৰ মঞ্চ অধিক ডাঙৰ। কাৰণ এই মেচৰ বিজয়ী দলে বিশ্বকাপৰ ফাইনেলত খেলাৰ সপোন পূৰণ কৰাৰ সুযোগ লাভ কৰিব। নিয়মীয়া সময়ত ফ্ৰান্সৰ জয়ৰ সম্ভাৱনা ৪২.১%, স্পেইনৰ জয়ৰ সম্ভাৱনা ৩১.৮% আৰু অতিৰিক্ত সময়লৈ যোৱাৰ সম্ভাৱনা ২৬.১%

ফ্ৰান্স–স্পেইনৰ প্ৰথম ছেমিফাইনেলখন আমেৰিকাৰ টেক্সাছৰ আৰ্লিংটনত অৱস্থিত ডালাছ ষ্টেডিয়ামত অনুষ্ঠিত হ’ব। এই ষ্টেডিয়ামত এই প্ৰতিযোগিতাৰ বাবে ৭০,৬৪৯জন দৰ্শকৰ আসনৰ ব্যৱস্থা আছে। এইবা বিশ্বকাপ ১৬খন চহৰত খেল অনুষ্ঠিত হৈছে আৰু ডালাছ ষ্টেডিয়ামত সৰ্বাধিক ৯ দিনীয়া মেচ অনুষ্ঠিত হৈছে।

দুয়োটা দলে এতিয়ালৈকে ৩৮খন মেচত মুখামুখি হৈছে। যত স্পেইনৰ জয় ১৮খন, ফ্ৰান্সৰ জয় ১৩খন আৰু ড্ৰ ৭খন। শেহতীয়া পাঁচখন মুখামুখিৰ ফলাফল এনেধৰণৰ-

• স্পেইন ৫-৪ ফ্ৰান্স (UEFA Nations League 2025 ছেমিফাইনেল)
• স্পেইন ২-১ ফ্ৰান্স (UEFA Euro 2024 ছেমিফাইনেল)
• স্পেইন ১-২ ফ্ৰান্স (UEFA Nations League 2021 ফাইনেল)
• ফ্ৰান্স ০-২ স্পেইন (আন্তঃৰাষ্ট্ৰীয় প্ৰীতি মেচ, ২০১৭)
• ফ্ৰান্স ১-০ স্পেইন (আন্তঃৰাষ্ট্ৰীয় প্ৰীতি মেচ, ২০১৪)

ফিফা বিশ্বকাপত দুয়োটা দলে মাত্ৰ এবাৰ মুখামুখি হৈছে। ২০০৬ চনৰ বিশ্বকাপৰ ৰাউণ্ড অৱ-১৬ পৰ্যায়ত ফ্ৰান্সে স্পেইনক ৩-১ গ’লত পৰাস্ত কৰিছিল। ফ্ৰান্সৰ হৈ গোল কৰিছিল ফ্ৰাংক ৰিবেৰি, পেট্ৰিক ভিয়েৰা আৰু জিনেদিন জিদানে।

ইউৰোপীয় চেম্পিয়নশ্বিপত দুয়োটা দলে ৫বাৰ মুখামুখি হৈছে। তাৰ ফলাফল ফ্ৰান্সৰ জয় – ২খন, স্পেইনৰ জয় – ২খন আৰু ড্ৰ – ১খন

শেষবাৰৰ বাবে মুখামুখি হৈছিল ইউৰো ২০২৪ৰ ছেমিফাইনেলত, য’ত স্পেইনে ২-১ গ’লত জয়লাভ কৰিছিল। সেই মেচত স্পেইনৰ হৈ গোল কৰিছিল লামিনে য়ামাল আৰু ডানি অলমোই।

বিশ্বকাপত দুয়োটা দলৰ সাফল্য এনেধৰণৰ- ফ্ৰান্স – ১৯৯৮, ২০১৮ আৰু স্পেইন – ২০১০। বিপৰীকে ইউৰো কাপত ফ্ৰান্স – ১৯৮৪, ২০০০, স্পেইন – ১৯৬৪, ২০০৮, ২০১২, ২০২৪। আনহাতে অলিম্পিক সোণৰ পদকত ফ্ৰান্স – ১৯৮৪ আৰু স্পেইন – ১৯৯২, ২০২৪।

বৰ্তমান ফ্ৰান্সৰ আটাইতকৈ ডাঙৰ অস্ত্ৰ হৈছে কিলিয়ান এমবাপে। এই বিশ্বকাপত তেওঁ ৮টা গোল আৰু ৩টা এছিষ্ট কৰি গোল্ডেন বুট দৌৰত শীৰ্ষত আছে। ইয়াৰ উপৰি উছমান ডেম্বেলে ৫টা গোল আৰু মাইকেল অলিছে  ৫টা এছিষ্ট। ইফালে স্পেইনৰ সৰ্বাধিক গোলদাতা হৈছে মিকেল অ’য়াৰজাবাল, যিয়ে ৪টা গোল কৰিছে। ইয়াৰ লগতে মিকেল মেৰিনো ২টা গোল, মাৰ্ক কুকুৰেয়া ২টা এছিষ্ট আৰু লামিনে য়ামাল – ১টা গোল।

ফ্ৰান্সৰ আটাইতকৈ ডাঙৰ শক্তি হৈছে তেওঁলোকৰ বিধ্বংসী আক্ৰমণভাগ। এমবাপে, ব্ৰেডলি বাৰ্কোলা, ডেম্বেলে আৰু অলিছে যিকোনো সময়তে মেচৰ গতি সলনি কৰিব পাৰে। গ্ৰুপ পৰ্যায়ত ফ্ৰান্সে ছেনেগাল আৰু নৰৱেৰ বিৰুদ্ধে গোল হজম কৰিছিল যদিও নকআউট পৰ্যায়ৰ তিনিওখন মেচত ক্লিন শ্বীট ৰাখিবলৈ সক্ষম হৈছে।

স্পেইনৰ আটাইতকৈ ডাঙৰ শক্তি হৈছে তেওঁলোকৰ শক্তিশালী ৰক্ষণভাগ। এই বিশ্বকাপত ৫খন মেচত মাত্ৰ ১টা গোলহে হজম কৰিছে, আৰু সেইটো বেলজিয়ামৰ বিৰুদ্ধে কোৱাৰ্টাৰ ফাইনেলত। অৱশ্যে আক্ৰমণভাগত দলটোৱে এতিয়াও নিজৰ সৰ্বোচ্চ ছন্দ বিচাৰি পোৱা নাই। শেষৰ দুয়োখন নকআউট মেচতে বিকল্প খেলুৱৈ মেৰিনোৰ অন্তিম মুহূৰ্তৰ গোলৰ সহায়ত জয়লাভ কৰিছে। ইনজুৰীৰ পৰা উভতি অহা য়ামালেও এতিয়াও নিজৰ সম্পূৰ্ণ সামৰ্থ্য প্ৰদৰ্শন কৰিব পৰা নাই।

ডিজিটেল ডেস্ক, ১৪ জুলাই

The post কাৰ গতি হ’ব ৰুদ্ধ… অপৰাজেয় দুই শক্তিৰ আজি ছেমিৰ মহাৰণ first appeared on নিয়মীয়া বাৰ্তা.

ডিজিটেল ডেস্ক, ১৪ জুলাই : ঐতিহাসিক লর্ডছত ইতিহাস ৰচনা কৰিলে ভাৰতীয় মহিলা ক্রিকেট দলে৷ ১৪২ বছৰীয়া টেষ্ট ইতিহাসত লর্ডছ খেলপথাৰত আয়োজিত মহিলাৰ প্রথমখন টেষ্ট মেচতে ইংলেণ্ডৰ গৃহভূমিত গৈ অবিস্মৰণীয় জয়লাভ কৰিলে হৰমনপ্রীত কৌৰৰ ভাৰতীয় দলে৷

একমাত্র চাৰিদিনীয়া টেষ্টখনত ইংলেণ্ডৰ মহিলা দলটোক ২৭০ ৰানত পৰাস্ত কৰি ইতিহাস ৰচনা কৰে ভাৰতীয় দলটোৱে৷ এই মহাকাব্যিক বিজয়েৰে বিশ্ব ক্রিকেটত ভাৰতৰ কন্যাসকলে আৰু এক নতুন ইতিহাস ৰচনা কৰিলে৷ প্রথমে বেটিং কৰি ভাৰতীয় দলটোৱে প্রথম ইনিংছত ২৮৫ ৰান সংগ্রহ কৰে৷ দলৰ হৈ স্মৃতি মান্ধানাই ৮৫, হৰমনপ্রীত কৌৰে ৫৮ আৰু দীপ্তি শর্মাই ৫৭ ৰানৰ অৰিহণা আগবঢ়ায়৷ প্রত্যুত্তৰত ভাৰতৰ ক্রান্তি গৌড়ৰ বিধ্বংসী বলিঙত ইংলেণ্ডে মাত্র ১৭০ ৰানতে প্রথম ইনিংছ সামৰে৷ দলটোৰ হৈ সর্বাধিক ৫২ ৰান কৰে এমী জ’নছে৷ ক্রান্তিয়ে মাত্র ৩৭ ৰান খৰচ কৰি ৫টা উইকেট দখল কৰে৷

ইপিনে, দ্বিতীয় ইনিংছ মুকলি কৰিবলৈ আহি উইকেটকীপাৰ–বেটাৰ য়াস্তিকা ভাটিয়াৰ অভিলেখ সৃষ্টিকাৰী অনবদ্য ১১৩, মান্ধানাৰ ৭০ আৰু ৰিচা ঘোষৰ ৫০ ৰানৰ সহায়ত ভাৰতে ৭ উইকেটৰ বিনিময়ত ৩৪১ ৰান সংগ্রহ কৰি ইনিংছ ঘোষণা কৰে৷ লর্ডছৰ ইতিহাসত প্রথমগৰাকী মহিলা ক্রিকেটাৰ হিচাপে টেষ্ট শতৰান অর্জন কৰাৰ গৌৰৱ অর্জন কৰে য়াস্তিকাই৷ ফলত, প্রথম ইনিংছৰ অগ্রগতিৰ সৈতে ইংলেণ্ডৰ সন্মুখত জয়ৰ বাবে ৪৫৭ ৰানৰ এক লক্ষ্য বান্ধি দিয়ে ভাৰতে৷

দ্বিতীয় ইনিংছৰ আৰম্ভণিতে ভাৰতীয় স্পীন আৰু পেচৰ যুটীয়া আক্রমণৰ সন্মুখত আৰম্ভণিতেই দিশহাৰা হৈ পৰে ইংলেণ্ড দল৷ ছায়ালি সতঘৰে, স্নেহ ৰাণা আৰু ক্রান্তি গৌড়ৰ বলিঙৰ সন্মুখত দ্বিতীয় ইনিংছতো ছন্দহীন হৈ পৰে ইংলেণ্ডৰ শীর্ষক্রমৰ বেটিং লাইন৷ তৃতীয় দিনাৰ খেলৰ শেষত ইংলেণ্ডৰ স্ক’ৰ আছিল ৬ উইকেটত ১৩০ ৰান৷ চতুর্থ তথা অন্তিম দিনটোত ভাৰতক জয়ৰ বাবে প্রয়োজন আছিল ৪টা উইকেট৷ মেচৰ অন্তিম দিনা মাত্র ১৮৬ ৰানত অন্ত পৰে ইংলেণ্ডৰ দ্বিতীয় ইনিংছ৷ লর্ডছৰ ঐতিহাসিক খেলপথাৰত ভাৰতীয় কন্যাৰ এই অবিস্মৰণীয় টেষ্ট জয় ভাৰতীয় ক্রিকেটৰ ইতিহাসত স্বর্ণ আখৰেৰে লিখা থাকিব৷

ইফালে, ইংলেণ্ডৰ বিৰুদ্ধে ভাৰতৰ টেষ্ট মেচৰ তৃতীয় দিনা ভাৰতীয় উইকেটকীপাৰ বেটাৰ য়াস্তিকা ভাটিয়াই নিজৰ কেৰিয়াৰৰ প্রথমটো টেষ্ট শতক অর্জন কৰি ঐতিহাসিক লর্ডছ ক্রিকেট গ্রাউণ্ডত শতক অর্জন কৰা প্রথমগৰাকী মহিলা ক্রিকেটাৰ হিচাপে পৰিগণিত হয়৷ মেচৰ তৃতীয় দিনা ৩৯ ৰানত অপৰাজিত হৈ থকা য়াস্তিকাই ১৪৫টা বলত নিজৰ শতক অর্জন কৰে৷ খেলপথাৰৰ এক্সট্ৰা ক’ভাৰেৰে সুন্দৰ ড্রাইভ মাৰি নিজৰ শতক অর্জন কৰাৰ লগে লর্ডছৰ দর্শকে তেওঁক উষ্ম আদৰণি জনায়৷ ১৫৮টা বলত ১১৩ ৰান কৰি ছ’ফি এক্লেষ্টনৰ বলত আডট হয়৷ ইপিনে, টেষ্টখনত অনবদ্য প্রদর্শন দাঙি ধৰা ভাৰতৰ দুগৰাকী ক্রিকেটাৰে লর্ডছ অনার্ছ ব’ৰ্ডত স্থান লাভ কৰিছে৷ দ্বিতীয় ইনিংছত শতক অর্জন কৰি লর্ডছত প্রথমগৰাকী মহিলা খেলুৱৈ হিচাপে শতক অর্জন কৰি য়াস্তিকাই লর্ডছ অনার্ছ ব’ৰ্ডত স্থান লাভ কৰে৷

ইফালে, টেষ্টখনৰ প্রথম ইনিংছত ৫টা উইকেট দখল কৰা ক্রান্তি গৌড়েও এই সন্মান লাভ কৰে৷ আনহাতে, ইংলেণ্ডৰ ছ’ফি এক্লেষ্টনেও ৫টা উইকেট দখল কৰা দ্বিতীয়গৰাকী মহিলা ক্রিকেটাৰ হিচাপে অনার্ছ ব’ৰ্ডত স্থান লাভ কৰে৷

The post লর্ডছৰ প্রথমখন মহিলা টেষ্টত ইংলেণ্ডক হৰুৱালে হৰমনপ্রীত বাহিনীয়ে first appeared on নিয়মীয়া বাৰ্তা.

ডিজিটেল ডেস্ক, ১২ জুলাই : ১৯ জুলাইত নিউ জার্ছিৰ মেট লাইফ ষ্টেডিয়ামত অনুষ্ঠিত হ’ব চলিত ফিফা বিশ্বকাপৰ বহু প্রতীক্ষিত ফাইনেল মেচ৷ ফুটবল অনুৰাগীয়ে এতিয়া সেই ঐতিহাসিক খেলখনৰ স্মৃতি ঘৰতে ৰখাৰ সুযোগ লাভ কৰিছে৷ ফুটবল অনুৰাগীয়ে বিশ্বকাপৰ ফাইনেল পিটছৰ এটা অংশ সংগ্রহৰ বাবে ৰাখিব পাৰিব৷ ফিফাই খেলপথাৰখন টুকুৰা টুকুৰকৈ বিক্রী কৰাৰ সিদ্ধান্ত গ্রহণ কৰিছে৷

বিশ্বকাপৰ ফাইনেল পিটছৰ এটা টুকুৰাৰ দাম হ’ব ৪৫০ ডলাৰ বা প্রায় ৪৩ হাজাৰ টকা৷ ফিফাৰ অনলাইন ষ্ট’ৰৰ মতে প্রতিটো ঘাঁহৰ টুকুৰাৰ আকাৰ ১৭.×১৭.×১৭.৫৷ কিন্তু এই জোখ ইঞ্চি, চেণ্টিমিটাৰ নে মিলিমিটাৰ দিয়া হৈছে সেয়া স্পষ্ট হোৱা নাই৷ এই বিষয়ত সবিশেষ এতিয়াও জানিব পৰা হোৱা নাই৷

ফিফাৰ ৱেবছাইট অনুসৰি ফুটবল অনুৰাগীসকলে ২০২৬ চনৰ ফিফা বিশ্বকাপৰ ফাইনেল খেলপথাৰৰ প্রকৃত অংশৰ মালিক হোৱাৰ সুযোগ লাভ কৰিছে৷ প্রতিটো ঘাঁহৰ টুকুৰা স্থায়ীভাৱে প্রিমিয়াম এক্রিলিকত আবদ্ধ কৰা হ’ব আৰু ইউএছবি মেম’ৰি ষ্টিকৰ সৈতে ডেলিভাৰী কৰা হ’ব৷ বিশ্বৰ অন্যতম শ্রেষ্ঠ ক্রীড়া অনুষ্ঠানৰ এই সংগ্রহযোগ্য স্মৃতিশক্তি ফুটবল অনুৰাগীৰ বাবে এক বিশেষ উপহাৰ৷

ফিফাই লগতে কয় যে এক্রিলিক ইউএছবিত প্রমাণীকৰণৰ বাবে বিশেষ ফিল্ম থাকিব৷ ইয়াত প্রিমিয়াম হিংগড বক্সত উপস্থাপন কৰা হ’ব৷ এতিয়াৰ বাবে এই সংগ্রহযোগ্য বস্তুটো কেৱল আমেৰিকা আৰু ইউৰোপৰ ঠিকনালৈহে প্রেৰণ কৰা হ’ব৷ ফিফাই লগতে কয় যে বিশ্বকাপৰ ফাইনেল শেষ হোৱাৰ পাছত অর্ডাৰ কৰা ঘাঁহৰ টুকুৰাবোৰ জাহাজেৰে প্রেৰণ কৰা হ’ব৷

The post বিশ্বকাপ ফাইনেলৰ পিটছ বিক্রী কৰিব ফিফাই first appeared on নিয়মীয়া বাৰ্তা.

ডিজিটেল ডেস্ক, ১২ জুলাই : বিশ্বকাপৰ ছেমি ফাইনেলত প্ৰৱেশ কৰিলে লিঅ’নেল মেছিৰ আৰ্জেণ্টিনাই। অৱশ্যে কোৱাৰ্টাৰ ফাইনেলৰ মেচখনত মেছিৰ সৈতে যুক্ত হ’ল আন দুজন খেলুৱৈৰ চমক— এজন জুলিয়ান আলভাৰেছ আৰু আনজন গ’লৰক্ষক এমি মাৰ্টিনেজ। কোৱাৰ্টাৰ ফাইনেলত ছুইজাৰলেণ্ডৰ যোদ্ধাসকলে অনবদ্য যুঁজ দিলে যদিও খেলখনত শেষ হাঁহি আৰ্জেণ্টিনাই মাৰিলে। আলভাৰেছৰ মেজিক গ’লৰ সহায়ত অতিৰিক্ত সময়ত ছুইজাৰলেণ্ডক ৩-১ ব্যৱধানত পৰাস্ত কৰি ছেমি ফাইনেলত প্ৰৱেশ কৰে মেছিহঁতে।

নকআউটৰ প্ৰথম দুটা ৰাউণ্ডতে উজুটি খাই খাই জিকিবলগীয়া হৈছিল আৰ্জেণ্টিনাই। প্ৰথম ৰাউণ্ডত কেপ ভাৰ্ডেই মেছি বাহিনীক চাপত পেলাইছিল। দ্বিতীয়খন মেচতো মহম্মদ ছালাহৰ ইজিপ্তে আৰ্জেণ্টিনাৰ সমৰ্থকসকলৰ হৃদস্পন্দন বঢ়াই তুলিছিল। কোৱাৰ্টাৰ ফাইনেলতো ইয়াৰ ব্যতিক্ৰম নহ’ল। দীৰ্ঘসময় ১০ জন খেলুৱৈৰে খেলিও ছুইজাৰলেণ্ডে লিঅ’নেল মেছিহঁতক অতিৰিক্ত সময়লৈ টানি লৈ গ’ল।

দেওবাৰৰ এই মেচখনৰ আৰম্ভণি আৰ্জেণ্টিনাই ধুনীয়াকৈয়ে কৰিছিল। প্ৰথমটো গ’ল কৰিছিল আৰ্জেণ্টিনাৰ মেক এলিকাষ্টাৰে। তাতো সহায় কৰিছিল সেই মেছি মেজিকে। কৰ্নাৰৰ পৰা লিঅ’ৰ নিখুঁত ক্ৰছত কেৱল মূৰটো চুই বল নেটত সুমুৱাই দিয়ে মেক এলিকাষ্টাৰে। বিশ্বকাপৰ সামগ্ৰিক ইতিহাসত এয়া মেছিৰ ১০ নম্বৰ এছিষ্ট। কিংবদন্তি ডিয়েগো মাৰাডোনাক এছিষ্টৰ সংখ্যাত তেওঁ চেৰ পেলালে। কিন্তু সেই গ’লটোৰ পিছত আৰ্জেণ্টিনা যেন কিছু ম্লান পৰি গ’ল। অৱশেষত ৬৭ মিনিটত এটা অনবদ্য টিম গ’লেৰে মেচত সমতা ঘূৰাই আনিলে ছুইজাৰলেণ্ডৰ এনডয়ে। সেই সময়ত অনুভৱ হৈছিল যেন ছুইছসকল কিছু সুবিধাজনক স্থিতিত আছে। কিন্তু যিহেতু ভাগ্যই সদায় আৰ্জেণ্টিনাক সহায় কৰি আহিছে, আজিও কৰিলে। ৭২ মিনিটত দ্বিতীয়খন হালধীয়া কাৰ্ডৰ পিছত ৰঙা কাৰ্ড পায় ছুইজাৰলেণ্ডৰ ব্ৰিল এমবলোৱে। ১০জনলৈ সংকুচিত হৈ পৰিল ছুইজাৰলেণ্ডৰ দলটো। শেষৰফালে ১০ জনেৰে যুঁজি তেওঁলোকে মেচখন অতিৰিক্ত সময়লৈ টানি নিয়ে।

অতিৰিক্ত সময়তো ১০জনীয়া ছুইছ ডিফেন্সক বিশেষ চাপত ৰাখিব পৰা নাছিল আৰ্জেণ্টিনাই। এটা সময়ত ধাৰণা হৈছিল যে এই মেচৰ ভাগ্য হয়তো পেনাল্টীতহে নিৰ্ধাৰণ হ’ব। ঠিক তেনেতে আহিল আলভাৰেছৰ সেই মেজিক মোমেণ্ট। বক্সৰ বাহিৰৰ পৰা এক অবিশ্বাস্য গ’ল কৰি মেছিহঁতক জয়ৰ পথলৈ আনিলে এটলেটিকো মাদ্ৰিদৰ ফৰৱাৰ্ডজনে। অৱশ্যে পিছত আৰ্জেণ্টিনাৰ বাবে আৰু এটা গ’ল আহে, এইবাৰ লাউতাৰো মাৰ্টিনেজৰ ভৰিৰ পৰা। কিন্তু তেতিয়ালৈকে মেচৰ ভাগ্য নিৰ্ধাৰণ হৈ গৈছিল। শেষত ৩-১ গ’লত জিকি শেষ চাৰিত (ছেমি ফাইনেল) প্ৰৱেশ কৰে মেছি বাহিনী।

The post ছুইজাৰলেণ্ডৰ বিৰুদ্ধে কঠিন সংগ্ৰামৰ অন্তত ছেমিত আৰ্জেণ্টিনা first appeared on নিয়মীয়া বাৰ্তা.

ইংলেণ্ড ভ্রমণত পৰাজয়ৰ ধাৰা অব্যাহত আছে টীম ইণ্ডিয়াৰ৷ ঘৰুৱা দল ইংলেণ্ডৰ বিপক্ষে খেলি থকা পাঁচখনীয়া টি–২০ মেচৰ শৃংখলাটোৰ প্ৰথমখন পৰিত্যক্ত হোৱাৰ পিছত বাকী তিনিখন মেচত পৰাজয়ৰ ধাৰা অব্যাহত আছে শ্ৰেয়াছ আয়াৰ বাহিনীৰ।

শৃংখলাটোৰ পঞ্চম তথা অন্তিমখন মেচ আজি ছাউদাম্পটনত অনুষ্ঠিত হ’ব৷ আজিৰ মেচখনত জয়লাভ কৰি ইংলেণ্ডে শৃংখলাটোত টীম ইণ্ডিয়াক হোৱাইট ৱাছ কৰাৰ লক্ষ্য লৈছে৷

ইপিনে হোৱাইট ৱাছৰ গ্লানিৰ পৰা বাচিবলৈ চেষ্টা চলাব টীম ইণ্ডিয়াই। আজি ছাউদাম্পটনত সন্মান ৰক্ষাৰ যুঁজত নামিব দলটো।

খেলৰ সময়ঃ নিশা ৭ বজা৷

The post ছাউদাম্পটনত আজি ইংলেণ্ডৰে অন্তিম টি-২০ টীম ইণ্ডিয়াৰ first appeared on নিয়মীয়া বাৰ্তা.

ফিফা বিশ্বকাপ ২০২৬ৰ ৰোমাঞ্চকৰ কোৱাৰ্টাৰ ফাইনেলত স্পেইনে বেলজিয়ামক ২-১ গ’লত পৰাস্ত কৰি ছেমিফাইনেলত প্ৰৱেশ কৰিছে। লছ এঞ্জেলছত অনুষ্ঠিত এই উত্তেজনাপূৰ্ণ খেলখনত পুনৰ স্পেইনৰ নায়ক হিচাপে উজলি উঠিল মিকেল মেৰিনো। ৮৮ মিনিটত তেওঁ কৰা গ’লটোৱেই স্পেইনক বিজয় উপহাৰ দিয়ে।

পৰ্তুগালৰ বিৰুদ্ধে ৰাউণ্ড অৱ ১৬ৰ খেলতো ইনজুৰি টাইমত বিজয়সূচক গ’ল কৰা মেৰিনোৱে এইবাৰো বদলি খেলুৱৈ হিচাপে নামি মাত্ৰ ১১৭ ছেকেণ্ডৰ ভিতৰতে গ’ল কৰে। বেলজিয়ামৰ বদলি গ’লৰক্ষক ছেনে লেমেন্সে পাও কুবাৰ্ছিৰ শ্বট ধৰি ৰাখিব নোৱাৰাত ৰিবাউণ্ডত মেৰিনোৱে সহজেই বল জালত প্ৰেৰণ কৰে।

স্পেইনে ৩০ মিনিটত মিডফিল্ডাৰ ফাবিয়ান ৰুইজৰ গ’লত আগবাঢ়ে। লামিনে য়ামাল আৰু পেদ্ৰো পোৰোৰ সুন্দৰ আক্ৰমণৰ পাছত থিব’ কুৰ্তোৱাই প্ৰথম শ্বট ৰখাবলৈ সক্ষম হৈছিল যদিও ৰিবাউণ্ডত ৰুইজে গ’ল কৰি দলক আগবঢ়ায়।

অৱশ্যে বেলজিয়ামে ৪০ মিনিটত চাৰ্লছ ডে কেটেলায়াৰৰ হেডাৰৰ জৰিয়তে সমতা ঘূৰাই আনে। এই গ’লটোৱে বিশ্বকাপত স্পেইনৰ একেৰাহে ৬৪৯ মিনিট গ’ল নখোৱাৰ বিশ্ব অভিলেখৰ সমাপ্তি ঘটায়।

দ্বিতীয়াৰ্ধত দুয়োটা দলে আক্ৰমণাত্মক ফুটবল খেলিলেও ৭১ মিনিটত বেলজিয়ামে ডাঙৰ আঘাত পায়। কিংবদন্তি গ’লৰক্ষক থিব’ কুৰ্তোৱা পেশীৰ আঘাতত কান্দি কান্দি খেলপথাৰ এৰিবলগীয়া হয়। তেওঁৰ ঠাইত অহা মানচেষ্টাৰ ইউনাইটেডৰ গ’লৰক্ষক ছেনে লেমেন্সৰ ভুলেই শেষত বেলজিয়ামৰ পৰাজয়ৰ মূল কাৰণ হৈ পৰে।

স্পেইনৰ কিশোৰ তাৰকা লামিনে য়ামালে এই খেলৰ জৰিয়তে ১৮ বছৰৰ আগতেই সৰ্বাধিক বিশ্বকাপ খেলৰ অভিলেখো গঢ়ে। যদিও তেওঁ নিজৰ স্বাভাৱিক ছন্দত নাছিল, তথাপিও কেইবাটাও সুন্দৰ আক্ৰমণ সৃষ্টি কৰি দৃষ্টিগোচৰ হয়।

এই জয়ে ইউৰো ২০২৪ৰ চেম্পিয়ন স্পেইনক ছেমিফাইনেলত ফ্ৰান্সৰ মুখামুখি কৰিলে। ১৪ জুলাই ডালাছত অনুষ্ঠিত হ’বলগীয়া এই ছেমিফাইনেলত স্পেইনে দ্বিতীয়বাৰৰ বাবে বিশ্বকাপ ফাইনেলত প্ৰৱেশৰ লক্ষ্য লৈ খেলিব।

২০১০ চনত প্ৰথমবাৰৰ বাবে বিশ্বকাপ জয় কৰাৰ পাছত স্পেইনে বিশেষ সফলতা লাভ কৰিব পৰা নাছিল। ২০১৪ত গ্ৰুপ পৰ্যায়ৰ পৰা বিদায় লোৱাৰ পিছত ২০১৮ আৰু ২০২২ত ৰাউণ্ড অৱ ১৬তে অভিযান শেষ হৈছিল। কিন্তু প্ৰশিক্ষক লুইছ ডে লা ফুৱেন্তেৰ নেতৃত্বত দলটোৱে পুনৰ বিশ্ব ফুটবলত নিজৰ শক্তি প্ৰদৰ্শন কৰিছে।

আনহাতে, বেলজিয়ামৰ বাবে এই পৰাজয়টো অত্যন্ত হতাশাজনক। কুৰ্তোৱা, কেৱিন ডি ব্ৰুইনে, থমাছ মেনিয়েৰ, লিয়াণ্ড্ৰো ট্ৰছাৰ্ড আৰু ৰোমেলু লুকাকুৰ দৰে “গ’ল্ডেন জেনেৰেচন”ৰ তাৰকাসকলৰ বাবে এয়া সম্ভৱতঃ অন্তিম বিশ্বকাপ আছিল। বহুচৰ্চিত এই প্ৰজন্মটোৱে পুনৰবাৰ কোনো ডাঙৰ আন্তঃৰাষ্ট্ৰীয় মুকুট জয় নকৰাকৈ বিশ্বকাপৰ পৰা বিদায় ল’ব লগা হ’ল।

ডিজিটেল ডেস্ক, ১১ জুলাই

The post বেলজিয়ামক হৰুৱাই ফুটবল বিশ্বকাপৰ ছেমিফাইনেলত স্পেইন first appeared on নিয়মীয়া বাৰ্তা.

ডিজিটেল ডেস্ক, ১০ জুলাই : বিশ্বকাপৰ মঞ্চত ফ্ৰান্স-মৰক্কোৰ মুখামুখি খেল সদায়ে আকৰ্ষণীয় হৈ আহিছে । এইবাৰ চাৰি বছৰ আগৰ অপূৰ্ণ হিচাপ মিলাই নতুন ইতিহাস লিখাৰ সুযোগ আছিল মৰক্কোৰ সন্মুখত। কিন্তু ফুটবল বহু সময়ত নিৰ্মম। এমবাপে নেতৃত্বাধীন ফ্ৰান্সক পৰাস্ত কৰি ইয়াছিন বোনো, আশৰাফ হাকিমীহঁতে চাৰি বছৰীয়া বেদনাৰ উপশম ঘটাব নোৱাৰিলে। এইবাৰৰ বিশ্বকাপৰ কোৱাৰ্টাৰ ফাইনেল মেচতো ব্যৰ্থ হ’ল মৰক্কো। এমবাপে আৰু ডেম্বেলেৰ যুটীয়া আঘাতে ফ্ৰান্সৰ বাবে ছেমিফাইনেলৰ স্থান নিশ্চিত কৰিলে।

বিশ্বকাপৰ মৰক্কোৰ বিৰুদ্ধে অনুষ্ঠিত কোৱাৰ্টাৰ ফাইনেল খেলখনত আৰম্ভণিৰ পৰাই আক্ৰমণ তীব্ৰতৰ কৰে ফ্ৰান্সে। কিলিয়ান এমবাপে, উছমান ডেম্বেলে, মাইকেল অলিচে আৰু দেজিৰে দুয়েৰ নেতৃত্বত এটাৰ পিছত এটা আক্ৰমণ গঢ়ি তোলে। কিন্তু প্ৰতিবাৰেই মৰক্কোৰ ৰক্ষণভাগে সেই আক্ৰমণ ব্যৰ্থ কৰে।

দ্বিতীয়াৰ্ধত একেবাৰে সলনি ৰূপত দেখা যায় ফ্ৰান্সক। বিৰতিৰ পিছত যেন জয়ৰ সংকল্প লৈয়ে খেলপথাৰত নামিছিল ফ্ৰান্স। আৰম্ভণিৰ পৰাই আক্ৰমণৰ গতি আৰু তীব্ৰতা বহুগুণে বৃদ্ধি কৰে। ৬০ মিনিটত তিনিজন মৰক্কো ডিফেণ্ডাৰৰ মাজেৰে বক্সৰ বাহিৰৰ পৰা লোৱা এটা শ্বটত গ’ল কৰি দলক আগুৱাই নিয়ে এমবাপেই। চলিত বিশ্বকাপত এয়া তেওঁৰ অষ্টমটো গ’ল। বিশ্বকাপৰ ইতিহাসত মুঠ ২০বাৰ স্ক’ৰশ্বীটত নাম অন্তৰ্ভুক্ত কৰিলে তেওঁ। ইয়াৰ পিছত ৬৬ মিনিটত পুনৰ আক্ৰমণ কৰে ফ্ৰান্সে। মাইকেল অলিচেৰ নিখুঁত পাছৰ দ্বাৰা ব্যৱধান দুগুণ কৰে উছমান ডেম্বেলেয়ে। চলিত বিশ্বকাপত এয়া তেওঁৰ পঞ্চম গ’ল।

ইয়াৰ পিছত মৰক্কোৱে আক্ৰমণৰ জৰিয়তে কিছু সুযোগ সৃষ্টি কৰিলেও সফল হ’ব নোৱাৰিলে। শেষ মুহূৰ্তত আশৰাফ হাকিমী, আজেদিন উনাহী আৰু এল আইনাউইহঁতৰ সকলো চেষ্টা ব্যৰ্থ হয়। অৱশ্যে এটা কথা মানিবই লাগিব— বোনো নাথাকিলে ফ্ৰান্সে আৰু বহু ডাঙৰ ব্যৱধানত জয়লাভ কৰিলেহেঁতেন।

The post ৰোমাঞ্চকৰ মেচত মৰক্কোক পৰাস্ত কৰি বিশ্বকাপৰ ছেমি ফাইনেলত ফ্ৰান্স first appeared on নিয়মীয়া বাৰ্তা.

২০২৬ ফিফা বিশ্বকাপৰ কোৱাৰ্টাৰ ফাইনেল পৰ্যায়ৰ আৰম্ভণিতে অনুষ্ঠিত হ’ব এক হাইভ’ল্টেজ মেচ। দুবাৰৰ বিশ্ব চেম্পিয়ন ফ্ৰান্সৰ সন্মুখত থাকিব আফ্ৰিকাৰ চেম্পিয়ন মৰক্কো।

উত্তৰ আমেৰিকাত অনুষ্ঠিত এই বিশ্বকাপত ফ্ৰান্সে এতিয়ালৈকে দৰ্শনীয় প্ৰদৰ্শন আগবঢ়াইছে। পাঁচখন মেচৰ পাঁচখনতেই জয়লাভ কৰি দলটোৱে ১৪টা গ’ল কৰাৰ বিপৰীতে মাত্ৰ ২টা গ’লহে হজম কৰিছে। গোল্ডেন বুটৰ দৌৰত শীৰ্ষস্থানত থকা কিলিয়ান এমবাপেৰ নেতৃত্বত অ’ছমান ডেম্বেলে, মাইকেল অলিছে আৰু ব্ৰেডলী বাৰ্কোলাক লৈ গঠিত ফ্ৰান্সৰ আক্ৰমণভাগ প্ৰতিযোগিতাখনৰ অন্যতম শক্তিশালী।

অৱশ্যে তৃতীয়বাৰৰ বাবে বিশ্বকাপ জয়ৰ সপোন পূৰণৰ পথ সহজ নহ’ব। কোৱাৰ্টাৰ ফাইনেলত তেওঁলোকৰ সন্মুখত থাকিব ব্ৰাহিম ডিয়াজ আৰু ইছমাইল ছাইবাৰীৰ নেতৃত্বাধীন মৰক্কো।

নকআউট পৰ্যায়ত নেদাৰলেণ্ডছক পৰাস্ত কৰি আত্মবিশ্বাসেৰে উজ্জীৱিত হোৱা এটলাছ লায়ন্স খ্যাত মৰক্কোৱে এইবাৰ আন এখন ইউৰোপীয় শক্তিকো বিদায় দিবলৈ সাজু। ইতিহাসত প্ৰথমবাৰৰ বাবে একেৰাহে দ্বিতীয়বাৰ বিশ্বকাপৰ ছেমিফাইনেলত প্ৰৱেশ কৰাৰ লক্ষ্য দলটোৰ।

গ্ৰুপ ‘আই’ত নৰৱে, ছেনেগাল আৰু ইৰাকক পৰাস্ত কৰি পূৰ্ণ ৯ পইণ্টেৰে শীৰ্ষস্থান দখল কৰিছিল ফ্ৰান্সে। ইয়াৰ পিছত ৰাউণ্ড অৱ ৩২ত ছুইডেনক ৩-০ গ’লত আৰু ৰাউণ্ড অৱ-16ত পাৰাগুৱেক ১-০ গ’লত পৰাস্ত কৰি কোৱাৰ্টাৰ ফাইনেলত উপনীত হয়।

আনহাতে, গ্ৰুপ ‘চি’ত স্কটলেণ্ড আৰু হাইটিক পৰাস্ত কৰাৰ লগতে ব্ৰাজিলৰ বিৰুদ্ধে ড্ৰ কৰি ৭ পইণ্টেৰে দ্বিতীয় স্থান লাভ কৰিছিল মৰক্কোৱে। নকআউটত নেদাৰলেণ্ডছৰ বিৰুদ্ধে পেনাল্টী শ্বুটআউটত ৩-২ ব্যৱধানত জয়লাভ কৰাৰ পিছত ৰাউণ্ড অৱ-16ত কানাডাক ৩-০ গ’লত পৰাস্ত কৰে।

২০২২ চনৰ বিশ্বকাপত স্পেইন আৰু পৰ্তুগালক পৰাস্ত কৰি প্ৰথম আফ্ৰিকান আৰু আৰব দেশ হিচাপে ছেমিফাইনেলত প্ৰৱেশ কৰি ইতিহাস সৃষ্টি কৰিছিল মৰক্কোৱে। তাৰ পিছৰে পৰা দলটোৱে ধাৰাবাহিকভাৱে বিশ্ব ফুটবলত নিজৰ শক্তি প্ৰমাণ কৰিছে।

২০২৫ চনৰ আফ্ৰিকা কাপ অৱ নেচনছ (AFCON)ৰ চেম্পিয়ন হোৱা মৰক্কোৱে ৩৪খন মেচত অপৰাজেয় ধাৰা অব্যাহত ৰাখিছে। ফিফা ৰেংকিঙত ষষ্ঠ স্থানত থকা দলটোৱে এতিয়া কেৱল অঘটন ঘটাবলৈ নহয়, প্ৰথমবাৰৰ বাবে বিশ্বকাপ জিকাৰ লক্ষ্যৰে খেলপথাৰত নামিব।

এই বিশ্বকাপত ব্ৰাহিম ডিয়াজে চাৰিটা এছিষ্ট কৰাৰ বিপৰীতে ইছমাইল ছাইবাৰীয়ে তিনিটা গ’ল কৰি দলটোৰ অন্যতম নায়ক হিচাপে পৰিগণিত হৈছে। ছুফিয়ান ৰাহিমি আৰু আজ্জেদিন ঔনাহীয়ে দুটাকৈ গ’ল কৰিছে।

কিন্তু হামষ্ট্ৰিং আঘাতৰ বাবে ইছমাইল ছাইবাৰী কোৱাৰ্টাৰ ফাইনেলত খেলিব নোৱাৰিব। শেষ মেচত আঘাতপ্ৰাপ্ত হোৱা ২৫ বছৰীয়া এই ফুটবলাৰৰ অনুপস্থিতি মৰক্কোৰ বাবে ডাঙৰ আঘাত হিচাপে বিবেচিত হৈছে।

অন্যহাতে, পাঁচখন মেচত ৭টা গ’ল কৰি কিলিয়ান এমবাপেই গোল্ডেন বুটৰ দৌৰত শীৰ্ষস্থান অক্ষুণ্ণ ৰাখিছে। একে সময়তে বিশ্বকাপত একাধিকবাৰ গোল্ডেন বুট জিকা প্ৰথম খেলুৱৈ হোৱাৰ দিশেও আগবাঢ়িছে তেওঁ।

ৰাউণ্ড অৱ-16ত পাৰাগুৱেৰ বিৰুদ্ধে কঠিন মেচ খেলিলেও দলটোৱে নিজৰ দৃঢ় মানসিকতা আৰু প্ৰতিভাৰ পৰিচয় দি জয় সাব্যস্ত কৰিছিল। সেয়েহে বিশ্বকাপ জয়ৰ অন্যতম প্ৰবল দাবীদাৰ হিচাপেই কোৱাৰ্টাৰ ফাইনেলত নামিব ফ্ৰান্স।

ডিজিটেল ডেস্ক, ৯ জুলাই

The post ফিফা বিশ্বকাপ : আজি নিশা কোৱাৰ্টাৰ ফাইনেলত সমুখসমৰত ফ্ৰান্স-মৰক্কো first appeared on নিয়মীয়া বাৰ্তা.

ভাৰত আৰু ইংলেণ্ডৰ মাজত অনুষ্ঠিত পাঁচখন মেচৰ টি-২০ শৃংখলাৰ চতুৰ্থখন মেচ আজি ইংলেণ্ডৰ ব্ৰিষ্টলস্থিত কাউণ্টী গ্ৰাউণ্ডত অনুষ্ঠিত হ’ব। শৃংখলাত ২-০ ব্যৱধানত পিছপৰি থকা ভাৰতীয় দলৰ বাবে এই মেচখন অতি গুৰুত্বপূৰ্ণ। শৃংখলাত আশা জীয়াই ৰাখিবলৈ আজিৰ মেচত জয় অব্যাহত ৰাখিবই লাগিব টীম ইণ্ডিয়াই।

ভাৰতীয় সময় অনুসৰি নিশা ১০ বজাত মেচ আৰম্ভ হ’ব। ইয়াৰ পূৰ্বে নিশা ৯:৩০ বজাত দুয়োটা দলৰ অধিনায়কে টছৰ বাবে খেলপথাৰত নামিব।

এই গুৰুত্বপূৰ্ণ মেচখন ব্ৰিষ্টলৰ কাউণ্টি গ্ৰাউণ্ডত অনুষ্ঠিত হ’ব। শৃংখলাৰ ভাগ্য নিৰ্ধাৰণ কৰিব পৰা এই মেচত দুয়োটা দলে জয়ৰ লক্ষ্যৰে খেলপথাৰত নামিব।

ভাৰতীয় দৰ্শকে ডিডি স্প’ৰ্টছত বিনামূলীয়াকৈ মেচখন উপভোগ কৰিব পাৰিব। অৱশ্যে এই সুবিধা কেৱল ডিডি ফ্ৰী ডিছ আৰু টেৰেষ্ট্ৰিয়েল নেটৱৰ্ক ব্যৱহাৰকাৰীসকলৰ বাবেহে উপলব্ধ। আনহাতে, টেলিভিছনত ষ্টাৰ স্প’ৰ্টছ নেটৱৰ্কত মেচখনৰ প্ৰত্যক্ষ সম্প্ৰচাৰ দেখা যাব।

ম’বাইল আৰু অন্যান্য ডিজিটেল প্লেটফৰ্মত ডিজনী প্লাছ হটষ্টাৰ আৰু ছ’নী লিভত মেচখন লাইভ ষ্ট্ৰীমিং কৰিব পাৰিব।

এই মেচত জয়লাভ কৰিলে ইংলেণ্ডে শৃংখলাটো নিজৰ দখললৈ নিব বিচাৰিব। আনহাতে, ভাৰতৰ বাবে এই মেচখন শৃংখলাত প্ৰত্যাৱৰ্তনৰ শেষ সুযোগ। সেয়েহে ব্ৰিষ্টলৰ এই হাইভ’ল্টেজ মেচখনক লৈ ক্ৰিকেটপ্ৰেমীৰ মাজত ব্যাপক উৎকণ্ঠা বিৰাজ কৰিছে।

ডিজিটেল ডেস্ক, ৯ জুলাই

The post শৃংখলা বচোৱাৰ লক্ষ্য ভাৰতৰ, আজি ভাৰত-ইংলেণ্ডৰ চতুৰ্থ টি-২০ first appeared on নিয়মীয়া বাৰ্তা.