নগাঁও লোকসভা সমষ্টিৰ সম্ভাব্য উপ-নিৰ্বাচনক লৈ তাৎপৰ্যপূৰ্ণ মন্তব্য কৰিছে ৰাইজৰ দলৰ সভাপতি তথা বিধায়ক অখিল গগৈয়ে। তেওঁ স্পষ্টকৈ কয় যে, এই মুহূৰ্তত নগাঁও লোকসভাৰ উপ-নিৰ্বাচনত কংগ্ৰেছক সহায় কৰাৰ কোনো ইচ্ছা ৰাইজৰ দলৰ নাই।

অখিল গগৈৰ মতে, “নগাঁও লোকসভাত কংগ্ৰেছক জিকাই একো লাভ নাই। জয়ী হোৱাৰ পিছত দুদিনমান কংগ্ৰেছত থাকি আকৌ বিজেপিলৈ গুচি যাব। জয়ী কৰাই দিলেও একো বিশেষ লাভ নহয়।”

তেওঁ লগতে কয় যে দিল্লীত গৈ জনসাধাৰণৰ স্বাৰ্থত দৃঢ়ভাৱে কথা ক’ব পৰা নেতৃত্বৰ অভাৱ আছে। “প্ৰদ্যুৎ বৰদলৈ আৰু ৰকিবুল হুছেইনে দিল্লীত গৈ কি কৰিলে, সেয়া ৰাইজে দেখিছে,” বুলিও মন্তব্য কৰে অখিল গগৈয়ে।

তেওঁ জানিবলৈ দিয়ে যে নগাঁও লোকসভা সমষ্টিক লৈ ৰাইজৰ দলৰ চূড়ান্ত সিদ্ধান্ত কাইলৈ অনুষ্ঠিত হ’বলগীয়া ৰাজ্যিক কাৰ্যনিৰ্বাহক সভাত গ্ৰহণ কৰা হ’ব। দলৰ এটা অংশই অৱশ্যে সমষ্টিটোত ৰাইজৰ দলে নিজাকৈ প্ৰাৰ্থী প্ৰদান কৰাৰ পোষকতা কৰিছে বুলিও তেওঁ উল্লেখ কৰে।

ইয়াৰ সমান্তৰালভাৱে অখিল গগৈয়ে অসমৰ সকলো আঞ্চলিক ৰাজনৈতিক শক্তিক একত্ৰিত হোৱাৰ আহ্বান জনায়। তেওঁৰ মতে, “অসমত আঞ্চলিক শক্তিসমূহ ভাগ-ভাগ হৈ থাকিলে লাভ নাই। এতিয়া সকলো আঞ্চলিক দল একেখন মঞ্চত আহি একত্ৰিত হ’ব লাগে।”

তেওঁ এই সম্ভাৱ্য মঞ্চত অসম গণ পৰিষদ (অগপ), BPF-কে ধৰি সকলো আঞ্চলিক দলক যোগদান কৰাৰ আহ্বান জনায়। লগতে অসম জাতীয় পৰিষদৰ সভাপতি লুৰিণজ্যোতি গগৈকো কেইবাবাৰ আহ্বান জনোৱা হৈছে যদিও এতিয়ালৈকে কোনো সঁহাৰি পোৱা হোৱা নাই বুলি তেওঁ কয়।

অখিল গগৈয়ে আৰু কয়, “প্ৰয়োজন হ’লে মই নিজেই নিৰ্বাচন নেখেলোঁ। লুৰিণজ্যোতি গগৈক সভাপতিৰ দায়িত্ব দিওঁ, মই কেৱল এজন সাধাৰণ সদস্য হিচাপেই থাকিম। কিন্তু অসমৰ আঞ্চলিক শক্তিৰ ঐক্য এতিয়া সময়ৰ দাবী।”

ডিজিটেল ডেস্ক, ৩ জুলাই

The post নগাঁও লোকসভাৰ উপ-নিৰ্বাচনক লৈ অখিলৰ বিস্ফোৰণ, সংকটত কংগ্ৰেছ first appeared on নিয়মীয়া বাৰ্তা.

বিশেষ বাৰ্তা, লখিমপুৰ, ৩ জুলাই : আজি ৰাজ্যজুৰি ছবিগৃহত মুক্তি লাভ কৰে অসমীয়া কথাছবি ‘ককাদেউতা নাতি আৰু হাতী-২’। লখিমপুৰত মুক্তিৰ প্ৰথম দিনটোতে ছবিগৃহত দৰ্শকে ভিৰ কৰে। তিনিটা ছবিগৃহত তিনিটাকৈ দৰ্শনীৰে চলা ছবিখন উপভোগ কৰি দৰ্শকে ক’লে- ছবিখন চাই মজা লাগিল।

উল্লেখ্য যে আজি মুক্তি লাভ কৰা ‘ককাদেউতা নাতি আৰু হাতী-২’ ছবিখনে আজি প্ৰথম দিনটোতে ছবিগৃহলৈ দৰ্শকক আনিবলৈ সক্ষম হয়। লখিমপুৰৰ গল্ডত ২, ৫ আৰু ৮ বজাত, বিশ্ব টকীজত ১১.১৫, ৫.১৫ আৰু ৮.১৫ বজাত আৰু নক্ষত্র চিনেমাত ১১.১৫, ৫.১৫ আৰু ৭.৫০ বজাত তিনিটাকৈ দৰ্শনীৰে ছবিখন চলিছে। আটাইকেইটা ছবিগৃহতে আজি দৰ্শকৰ সঁহাৰি আছিল সন্তোষজনক।

উল্লেখ্য যে আজি মুক্তি লাভ কৰা ‘ককাদেউতা নাতি আৰু হাতী-২’ ছবিখনে ন-পুৰণি সকলো দৰ্শককে আকৰ্ষণ কৰিছে। ছবিখন চাই পৰম সন্তোষেৰে ওলাই অহা নৱপ্ৰজন্মৰ একাংশই অনুভৱ প্ৰকাশ কৰি কয়- সকলোৰে অভিনয় ভাল লাগিছে। গীতকেইটাও সুন্দৰ হৈছে। মজা লাগিল চাই।

এজন জ্যেষ্ঠ দৰ্শকে কয়- বহুত ধুনীয়া চিনেমা এইখন। কাহিনীও সুন্দৰ। বিগিনিঙৰ পৰা এণ্ডিঙলৈ পুৰা এন্টাৰটেইনমেন্ট। সকলোকে ছবিখন চাবলৈ অনুৰোধ জনালোঁ।

প্ৰথমটো দিনতে দৰ্শকৰ এনে সঁহাৰি আৰু সন্তুষ্টিয়ে পৰৱৰ্তী সময়তো যে ছবিগৃহলৈ দৰ্শকৰ সোঁত বৈ থাকিব, তাৰেই সম্ভাৱনা প্ৰকট কৰিছে।

The post লখিমপুৰত ‘ককাদেউতা নাতি আৰু হাতী-২’ৰ মুক্তিৰ দিনাই দৰ্শকৰ লক্ষণীয় সঁহাৰি first appeared on নিয়মীয়া বাৰ্তা.

ডিজিটেল ডেস্ক, ৩ জুলাই: তামুলপুৰৰ ঝাৰগাঁৱত শুকুৰবাৰে পুৱাৰ ভাগত সংঘটিত এক শোকাৱহ ঘটনাই সমগ্ৰ অঞ্চলটোত শোকৰ ছাঁ পেলাইছে। কৃষিভূমিত ভূঁই ৰুই থকা অৱস্থাত বজ্ৰপাতত এগৰাকী ৰোৱনীৰ মৃত্যু হয়।

নিহত মহিলাগৰাকী বৰলকুছি গাঁৱৰ মিনতি ব্ৰহ্ম (৪৮) বুলি চিনাক্ত কৰা হৈছে। জানিব পৰা মতে, পুৱাৰ ভাগত নিজৰ ঘৰৰ পৰা নাতিদূৰৈত থকা কৃষিভূমিত আন কেইবাগৰাকী মহিলাৰ সৈতে ভূঁই ৰুই থকাৰ সময়তে হঠাতে বজ্ৰপাত হয়।

এই ঘটনাত মিনতি ব্ৰহ্মই ঘটনাস্থলীতে প্ৰাণ হেৰুৱায়। আনহাতে, তেওঁৰ সৈতে থকা আন কেইবাগৰাকী ৰোৱনীৰ কথমপি প্ৰাণৰক্ষা পৰে যদিও তেওঁলোক আতংকিত হৈ পৰে। ঘটনাটোৱে সমগ্ৰ অঞ্চলটোত শোকাকুল পৰিৱেশৰ সৃষ্টি কৰিছে।

The post তামুলপুৰত শোকাৱহ ঘটনা, পথাৰত ভূঁই ৰুই থাকোঁতে ৰোৱনীৰ প্ৰাণহানি first appeared on নিয়মীয়া বাৰ্তা.

​অসম চৰকাৰে ঘোষণা কৰা গ্ৰন্থবৰ্ষ-২০২৫ৰ সৈতে সংগতি ৰাখি অসম প্ৰকাশন পৰিষদৰ উদ্যোগত লেখক তথা বৌদ্ধিক ক্ষেত্ৰৰ সৈতে জড়িত ব্যক্তিসকলক সামৰি আয়োজন কৰা অভিলাষী প্ৰকল্প ‘গ্ৰন্থবৰ্ষ-২০২৫ ফেল’শ্বিপ’ প্ৰাপকসকলৰ নাম ঘোষণা কৰিছে। বিশিষ্ট লেখক, অভিধান প্ৰণেতা, অসম প্ৰকাশন পৰিষদৰ উপাধ্যক্ষ সুমন্ত চলিহাৰ অধ্যক্ষতাত গঠিত দহজনীয়া সমিতিয়ে দীৰ্ঘদিনীয়া বাছনি প্ৰক্ৰিয়াৰ জৰিয়তে ফেল’শ্বিপ প্ৰাপকসকলৰ নাম ঘোষণা কৰিছে। অসম প্ৰকাশন পৰিষদে অসমীয়া, বাংলা আৰু বড়ো ভাষাৰ লগতে অসমৰ জনগোষ্ঠীয় ভাষাৰ গ্ৰন্থকাৰসকলৰ বাবে মুঠ বাইশটা বিষয় ধাৰ্য কৰি লেখকসকলৰ পৰা আহ্বান কৰা পাণ্ডুলিপিসমূহৰ পৰা বিচাৰকসকলে এই তালিকা নিৰ্বাচিত কৰে।

​বিভিন্ন বিষয়ৰ ফেল’শ্বিপৰ বাবে ৫১২গৰাকী লেখকৰ পৰা মুঠ ৫৪৭টা পাণ্ডুলিপিৰ পৰা ৪৯গৰাকী লেখকৰ পাণ্ডুলিপি নিৰ্বাচন কৰে। ভাষা অনুযায়ী ​ফেল’শ্বিপ প্ৰাপকসকলৰ নাম আৰু পাণ্ডুলিপিৰ শিৰোনাম যথাক্ৰমে-

​অসমীয়া ভাষা:
​প্ৰকল্প ৰঞ্জন ভাগৱতী : কথা কোৱা ঘোঁৰা ​তুতুল মানৱ: মনৰ জগত, ​নাং অজন্তা বুঢ়াগোহাঞি: অসমৰ সাতোটা টাই জনগোষ্ঠী, ​নৱজ্যোতি পাঠক : সভা : অবিভক্ত কামৰূপৰ অনন্য সামাজিক ঐতিহ্য, ​ৰংমন ৰংদৈ (ৰমেশ বৰুৱা): তোমালোক নিৰোগী হোৱা, ​শাংকব কৌশিক বৰুৱা : ‘ৰিবেল চন অব্‌ কংগ্ৰেছ’ : হৰেশ্বৰ গোস্বামী, ​বিদ্যুৎ বৰুৱা : বাঙ্ময় প্ৰাচীৰ, ​বিনয় মোহন শইকীয়া : বৈষ্ণৱ, শৈৱ আৰু গৌণ ধৰ্মমতসমূহ (অনুবাদ), ​ববিতা ফুকন : কাজিৰঙাৰ দুৰন্ত প্ৰেমিক ডাঃ ৰবীন বেনাৰ্জী, ​সত্যব্ৰত বৰা: মহাকাশৰ সীমনা বিচাৰি, ​অপৰাজিতা পূজাৰী: দেৱীমাতৃকা কামাখ্যা (অনুবাদ), ​শশীধৰ দেউৰী: দেউৰী জাতিৰ সংস্কৃতি, ​নকুল কুৰ্মী: ভাৰতৰ স্বাধীনতা আন্দোলনত চাহ জনগোষ্ঠীৰ অৱদান, ​ড॰ ৰুমী নাথ: ডালু জনগোষ্ঠী, ​অতুল মজুমদাৰ: বিবৰ্তিত নাট্য ইতিহাসৰ আলোকত অসমৰ ভ্ৰাম্যমাণ থিয়েটাৰ, ​সঞ্জীৱ সভাপণ্ডিত: ভূমিৰ পৰা ভূমালৈ, ​চয়নিকা দত্ত: সাহিত্য আৰু প্ৰযুক্তি, ​প্ৰীতিৰেখা ভূঞা: স্বপ্নবাসৱদত্তা (অনুবাদ) , ​ড॰ ভূপেন্দ্ৰ ৰায়চৌধুৰী: ভাৰতীয় সংস্কৃতিৰ দিগদৰ্শন, ​নীলিমা গোস্বামী শৰ্মা: আনন্দৰাম ঢেকিয়াল ফুকন, ​ৰাজীৱ শৰ্মা: অসমীয়া ব্ৰাহ্মণৰ ইতিবৃত্ত, ​ৰমানন্দন বৰা: হিন্দু ধৰ্মৰ প্ৰতীক : আধুনিক বিচাৰ,​ জিন্তু গীতাৰ্থ: ডিমাছা লোকগাথা, সমাজ, সংস্কৃতি, ​পুলিন কলিতা: আমবাৰীৰ ঐতিহ্য, ​ড॰ গজেন্দ্ৰ অধিকাৰী: শিলালিপি আৰু তাম্ৰফলিত পুৰণি কামৰূপ, ​দীপক কুমাৰ কলিতা: ভাৰতৰত্ন সত্যজিৎ ৰায়, ​নিভা শইকীয়া: প্ৰাচ্যবিদ্যাৰ্ণৱ কৃষ্ণকান্ত সন্দিকৈ, ​ড॰ মৃদুস্মিতা ফুকন: সমকালীন অসমৰ প্ৰেক্ষাপটত লোকবন্ধু ডাঃ ভুৱনেশ্বৰ বৰুৱা, ​যতীন মৰাণ: মৰাণ জনগোষ্ঠীৰ সমাজ আৰু সংস্কৃতি, ​ড॰ অনুশ্ৰী শৰ্মা বৰুৱা: বেলটৰ মাজৰ প্ৰেম (অনুবাদ), ​হৰিবন্ধু বিশ্বাস: নমঃ শূদ্ৰ সম্প্ৰদায়ৰ লোকসংস্কৃতি, ​গীতিমালিকা নেওগ: জননেতা বিষ্ণুৰাম মেধি, ​সুবোধমল্ল বৰুৱা: অসমৰ ফুটবল, ​ব্ৰজেন্দ্ৰ দেৱ মোহন শৰ্মা: অসমৰ পখিলা, ​ড॰ নৱ কুমাৰ চমুৱা: ইকক্ৰিটিছিজম, ​বন্দিতা গোস্বামী শৰ্মা: বেজবৰুৱাৰ জোনাকী আৰু জোৰাসাঁকোকালীন জীৱন, ​মোহন লাগাচু: মানৱ জাতিৰ পিতৃ আবুতানি, ​ড॰ যাদৱ চন্দ্ৰ কলিতা: ভাৰতীয় ঐতিহ্যত পাৰিপাশ্বিৰ্ক মূল্যবোধৰ চেতনা, ​ইপ্সিতা কন্দলি শৰ্মা: নাৰী সৱলীকৰণ।

​বাংলা ভাষা
​দেবযানী চৌধুৰী: বৰাক উপত্যকাৰ ঐতিহ্যেৰ ইতিকথা, ​সুদেষ্ণা চন্দ: ফেলে আসা দিনগুলি (মূল অসমিয়া– নলিনীবালা দেবী), ​শিশিৰ সেনগুপ্ত: স্বাধীনতা সংগ্ৰামে অসমেৰ বীৰ-বীৰাঙ্গনা, ​শাশ্বতী ঘোষ দস্তিদাৰ: দন্দুয়া দ্ৰোহ (মূল অসমিয়া– ৰজনীকান্ত বৰদলৈ), ​নিবেদিতা চক্ৰৱৰ্তী: ৰাজমোহন নাথেৰ ৰঙ্গৰসেৰ গল্প (মূল– পীতাম্বৰ ৰাজমেধি), ​নিকিতা সাহা: পুৰনো কামৰূপেৰ ধৰ্মেৰ ধাৰা (মূল অসমিয়া– ড॰ বাণীকান্ত কাকতি), ​শ্যামাশ্যাম কৃষ্ণপূজাৰি চট্টোপাধ্যায়: চমস্কীয় ব্যাকৰণঃ তত্ত্ব ও বিশ্লেষণ

বড়ো ভাষা
​ৰিপেন বড়ো: বনফুল(অনুবাদ), ​সুশান্ত নাৰলা মুছাহাৰী: বাথৌ ধৰ্ম আৰু খেৰাই উৎসৱ, ​পদুলাল ৰামচিয়াৰী: AIৰে মহাসাগৰ পৰিভ্ৰমণ।

উল্লেখ্য যে ‘গ্ৰন্থবৰ্ষ ২০২৫ ফেল’শ্বিপ’ লাভ কৰা লেখকসকলে ৫০ হাজাৰ টকাৰ লগতে একোখন প্ৰমাণ পত্ৰ লাভ কৰিব। ​এই ফেল’শ্বিপৰ নিৰ্বাচনৰ বাবে ​সুমন্ত চলিহাক অধ্যক্ষ আৰু অনুৰাধা শৰ্মা পূজাৰী, ​ড॰ সত্যকাম বৰঠাকুৰ, ​ড॰ ছাইদুল ইছলাম, ​ড॰ অদিতি বেজবৰুৱা, ​কামেশ্বৰ বড়ো, ​ড॰ প্ৰশান্ত চক্ৰৱৰ্তী, ​ড॰ বিভা ভড়ালী, ​ড॰ লিপিকা তালুকদাৰ আৰু ​অচ্যুৎ কুমাৰ পাটোৱাৰীক সদস্য হিচাপে লৈ নিৰ্বাচক সমিতিখন গঠন কৰা হৈছিল।

ডিজিটেল ডেস্ক, ৩ জুলাই

The post অসম প্ৰকাশন পৰিষদৰ ‘গ্ৰন্থবৰ্ষ ২০২৫ ফেল’শ্বিপ’ ঘোষণা first appeared on নিয়মীয়া বাৰ্তা.

ৰাজা ৰঘুবংশী হত্যা গোচৰৰ মুখ্য অভিযুক্ত সোনম ৰঘুবংশীক দিয়া জামিনৰ ওপৰত তৎক্ষণাত স্থগিতাদেশ জাৰি কৰিবলৈ অস্বীকাৰ কৰিছে ভাৰতৰ উচ্চতম ন্যায়ালয়ে। গোচৰটোৰ পৰৱৰ্তী শুনানি ১০ জুলাইত অনুষ্ঠিত হ’ব।

মেঘালয় চৰকাৰে মেঘালয় উচ্চ ন্যায়ালয়ৰ সেই ৰায়ক উচ্চতম ন্যায়ালয়ত প্ৰত্যাহ্বান জনাইছিল, য’ত সোনম ৰঘুবংশীক প্ৰদান কৰা জামিন বাহাল ৰখা হৈছিল। উল্লেখ্য, ২০২৫ চনৰ মে’ মাহত স্বামী ৰাজা ৰঘুবংশীৰ হানীমুনৰ সময়ত সংঘটিত হত্যাকাণ্ডৰ মুখ্য অভিযুক্ত সোনম।

শুনানিৰ সময়ত ছলিচিটৰ জেনেৰেল তুষাৰ মেহতাই আদালতত কয় যে সোনমে নিজৰ লগত থকা আন তিনিজন সহযোগীৰ সৈতে মিলি ৰাজা ৰঘুবংশীৰ ওপৰত আক্ৰমণ চলাই হত্যা কৰিছিল আৰু পিছত মৃতদেহ গভীৰ খাদত পেলাই দিয়ে। ঘটনাৰ পিছত তেওঁ পলায়ন কৰিছিল আৰু পিছত উত্তৰ প্ৰদেশৰ পৰা গ্ৰেপ্তাৰ কৰা হৈছিল।

আৰোপপত্ৰৰ উল্লেখ কৰি তুষাৰ মেহতাই কয় যে নিম্ন আদালত আৰু বিচাৰ আদালতে সোনমৰ বিৰুদ্ধে প্ৰথম দৃষ্টিতেই (prima facie) শক্তিশালী প্ৰমাণ পোৱাৰ লগতে তেওঁৰ জামিন আবেদন তিনিবাৰ নাকচ কৰিছিল। লগতে তেওঁ পলায়ন কৰিব পাৰে, সাক্ষীক প্ৰভাৱিত বা ভাবুকি দিব পাৰে আৰু প্ৰমাণ নষ্ট কৰাৰ আশংকাও ব্যক্ত কৰিছিল।

তেওঁ আদালতত এইটোও যুক্তি দাঙি ধৰে যে গ্ৰেপ্তাৰৰ সময়ত অভিযুক্তক গ্ৰেপ্তাৰৰ সকলো কাৰণ সম্পূৰ্ণভাৱে অৱগত নকৰাৰ অভিযোগ আৰু এটা আইনী ধাৰাৰ নম্বৰ টাইপ কৰাত হোৱা সামান্য ভুলৰ ভিত্তিত জামিন প্ৰদান কৰা হৈছিল। এনে ক্ষুদ্ৰ কাৰিকৰী ভুলৰ বাবে জামিন দিয়াটো উচিত নহয় বুলিও তেওঁ মত প্ৰকাশ কৰে।

কিন্তু উচ্চতম ন্যায়ালয়ে মন্তব্য কৰে যে উক্ত কাৰিকৰী ভুলটো অতি গুৰুত্বপূৰ্ণ নহয়। আদালতে প্ৰথমে উচ্চ ন্যায়ালয়ৰ আদেশৰ ওপৰত স্থগিতাদেশ দিয়াৰ কথা বিবেচনা কৰিছিল যদিও পিছত জানিব পাৰে যে সোনেম ইতিমধ্যে কাৰাগাৰৰ পৰা মুক্তি পাই জামিনৰ চৰ্ত অনুসৰি শ্বিলঙতে অৱস্থান কৰি আছে। সেই পৰিস্থিতিত তেওঁক পুনৰ কাৰাগাৰলৈ প্ৰেৰণ কৰাটো আইনৰ নীতিৰ সৈতে সংগতি নাখায় বুলি মন্তব্য কৰি আদালতে তৎক্ষণাত জামিন স্থগিত কৰিবলৈ অস্বীকাৰ কৰে।

অৱশ্যে, উচ্চতম ন্যায়ালয়ে মেঘালয় উচ্চ ন্যায়ালয়ৰ জামিন বহাল ৰখা ৰায়ৰ কিছুমান দিশত আপত্তি থকাৰ কথাও উল্লেখ কৰে। ন্যায়াধীশ এম. এম. সুন্দৰেশে কয় যে উচ্চ ন্যায়ালয়ৰ সিদ্ধান্ত সম্পৰ্কে আদালতৰ কিছুমান গুৰুত্বপূৰ্ণ প্ৰশ্ন আছে, যিবোৰৰ ওপৰত পৰৱৰ্তী শুনানিত আলোচনা হ’ব।

উল্লেখ্য যে ২৯ জুনত মেঘালয় উচ্চ ন্যায়ালয়ে শ্বিলঙৰ আদালতে প্ৰদান কৰা জামিনৰ আদেশ বাহাল ৰাখি ৰাজ্য চৰকাৰৰ আবেদন খাৰিজ কৰিছিল। সেই আদেশত গ্ৰেপ্তাৰৰ প্ৰক্ৰিয়াত গুৰুতৰ আইনী ত্ৰুটি থকাৰ বাবে ছোনাম ৰঘুবংশীক জামিন দিয়া হৈছিল।

ডিজিটেল ডেস্ক, ৩ জুলাই

The post সোনমলৈ সকাহ : জামিনত স্থগিতাদেশ নিদিলে ছুপ্ৰিম ক’ৰ্টে first appeared on নিয়মীয়া বাৰ্তা.

ডিজিটেল ডেস্ক, ৩ জুলাই : কলিয়াবৰ কামাখ্যা গাঁৱত বনৰীয়া হাতীৰ আক্ৰমণত এজন চাহ বাগিচাৰ শ্ৰমিকৰ মৃত্যু হয়। কামাখ্যা গাঁও-শিলঘাট সংযোগী গড়কাপ্টানী পথত এই ঘটনা সংঘটিত হয়। বনৰীয়া হাতীৰ আক্ৰমণত নিহত হোৱা লোকজনৰ নাম বিষ্ণু গৌড় ।

ক্ষুদ্ৰ চাহ বাগিচাত কৰ্মৰত লোকজনে সন্ধিয়া দোকানৰ পৰা সামগ্ৰী লৈ গৈ থকা অৱস্থাতে হাতীৰ মুখামুখি হোৱাত এই ঘটনা সংঘটিত হয় । সন্দেহ কৰা মতে, সন্ধিয়াই ঘটনাটো সংঘটিত হোৱাৰ পিছত পুৱাহে স্থানীয় লোকে লোকজনৰ মৃতদেহ প্ৰত্যক্ষ কৰে।

The post কলিয়াবৰত বনৰীয়া হাতীৰ আক্ৰমণত এজনৰ মৃত্যু first appeared on নিয়মীয়া বাৰ্তা.

বৰপেটাৰ বৃহত্তৰ আলোপতি, বাঘমাৰাচৰ আদি আঞ্চলত চোৰাং কাঠৰ ৰমৰমীয়া ব্যৱসায় চলাৰ অভিযোগ উত্থাপন হৈ আহিছে | শেহতীয়াকৈ বনমন্ত্ৰীৰ কাঢ়া নিৰ্দেশৰ পাছতেই গা লৰিল বন বিভাগৰ|

চেঙা সমষ্টিৰ অন্তৰ্গত বৃহত্তৰ চৰাঞ্চলত বৃহস্পতিবাৰে বন বিভাগৰ এক অতৰ্কিত অভিযান চলে। গোৱালপাৰা আৰু বৰপেটা জিলা বন বিভাগৰ যুটীয়া অভিযানত দীৰ্ঘদিনৰে পৰা বাঘমাৰাচৰ, আলোপতিচৰ আৰু কালাইৰদিয়াত অবৈধভাৱে চলি থকা ১০টাকৈ কাঠ মিল উৎখাত কৰাৰ লগতে জব্দ কৰা হয় কেইবালক্ষ টকাৰ চোৰাং কাঠ |

বৰপেটাৰোড বনাঞ্চলিক বিষয়া কাৰ্যালয়ৰ বন বিষয়া ধৰ্মেন্দ্ৰ দাসৰ নেতৃত্বত বন বিভাগৰ এটি বৃহৎ দলে চলায় এই অভিযান |

নিয়মীয়া বাৰ্তা, নগৰবেৰা, ৩ জুলাই :

The post বৰপেটাত বন বিভাগৰ বৃহৎ অভিযান, ১০টাকৈ কাঠ মিল উচ্ছেদ first appeared on নিয়মীয়া বাৰ্তা.

ডিজিটেল ডেস্ক, ৩ জুলাই : অচিৰেই পূব ভাৰতৰ ব্যৱসায়িক কেন্দ্রৰূপে চিনাক্ত হ’ব অসম৷ দিল্লীত অনুষ্ঠিত ভাৰত–জাপান সন্মিলনে অসম তথা উত্তৰ–পূবলৈ সম্ভাৱনাৰ দুৱাৰ মুকলি কৰাৰ সময়তে অসমত অতি সোনকালে নির্মাণ হ’ব ৬টাকৈ বিমানবন্দৰ৷ ইতিমধ্যে নির্মাণৰ কাম চলি থকা এই বিমানবন্দৰসমূহক লৈ বৃহস্পতিবাৰে কেন্দ্রীয় অসামৰিক বিমান পৰিবহণ মন্ত্রী কিঞ্জাৰাপু ৰামমোহন নাইডুক সাক্ষাৎ কৰে মুখ্যমন্ত্রী ড০ হিমন্ত বিশ্ব শর্মাই৷

এই সাক্ষাৎকালতে অসমক পূব ভাৰতৰ এক গুৰুত্বপূর্ণ বিমান আৰু বাণিজ্য কেন্দ্র হিচাপে গঢ়ি তোলাৰ লক্ষ্যৰে শিলচৰ, মানস, উমৰাংছ’, মাজুলী, ডিফু আৰু চৰাইদেউৰ প্রস্তাৱিত ৬টা গ্রীনফিল্ড বিমানবন্দৰ আৰু হাফলঙত হেলিপ’ৰ্ট স্থাপনৰ অগ্রগতিক লৈ আলোচনা হয়৷

মুখ্যমন্ত্রী ড০ শর্মাই প্রকাশ কৰা অনুসৰি শিলচৰৰ প্রস্তাৱিত গ্রীনফিল্ড বিমানবন্দৰৰ প্রাৰম্ভিক কাম ইতিমধ্যে অসম চৰকাৰে সম্পূর্ণ কৰি উলিয়াইছে৷ এই প্রকল্পটোৰ অনুমোদন প্রক্রিয়া খৰতকীয়া কৰিবলৈ বৃহস্পতিবাৰে কেন্দ্রীয় অসামৰিক মন্ত্রীগৰাকীক অনুৰোধ জনায়৷ মুখ্যমন্ত্রীৰ এই সাক্ষাৎকালতে কেন্দ্রীয় মন্ত্রীগৰাকীয়ে প্রস্তাৱিত বিমানবন্দৰসমূহৰ প্রাক্ সম্ভাৱনীয়তা অধ্যয়ন কৰি কাম খৰতকীয়া কৰিবলৈ সন্মতি প্রকাশ কৰে৷ এই বৈঠকত পশ্চিম অসমৰ গুৰুত্বপূর্ণ ৰূপসী বিমানবন্দৰৰ চলি থকা সম্প্রসাৰণৰ আঁচনিৰো পর্যালোচনা হয়৷

মুখ্যমন্ত্রীয়ে প্রকাশ কৰা মতে, এই প্রকল্পসমূহে কেৱল যোগাযোগ ব্যৱস্থা উন্নত কৰাই নহয়, অর্থনৈতিক সুযোগ সৃষ্টি, পর্যটনৰ বিকাশ আৰু দীর্ঘকালীন উন্নয়নত বিশেষভাৱে অৰিহণা যোগাব৷ এই বৈঠকত অসামৰিক বিমান পৰিবহণ মন্ত্রালয়ৰ সচিব সমীৰ কুমাৰ সিন্হা, মুখ্যমন্ত্রীৰ অতিৰিক্ত মুখ্য সচিব কে কে দ্বিবেদী, অসম ভৱনৰ আৱাসিক আয়ুক্ত কবিতা পদ্মনাভন আৰু সংশ্লিষ্ট মন্ত্রালয়ৰ জ্যেষ্ঠ বিষয়াসকল উপস্থিত থাকে৷

সামাজিক মাধ্যমযোগে মুখ্যমন্ত্রীয়ে এই সাক্ষাতৰ কথা উল্লেখ কৰি প্রকাশ কৰিছে যে কেন্দ্রীয় অসামৰিক মন্ত্রীৰ সৈতে আজি এক ফলপ্রসূ বৈঠকত মিলিত হৈ অসমৰ বিমান যোগাযোগ আৰু ল’জিষ্টিক খণ্ডৰ ভৱিষ্যৎ পৰিকল্পনা সন্দর্ভত বিস্তৃত আলোচনা কৰা হ’ল৷

The post সুখবৰ… অসমত নির্মাণ হ’ব ৬টাকৈ গ্রীনফিল্ড বিমানবন্দৰ first appeared on নিয়মীয়া বাৰ্তা.

এক মধুৰ নষ্টালজিয়া উভতি আহিছে৷ সময়ে গৰকা এটা কাহিনী উভতি আহিছে৷ বুকুত সামৰি লৈ আহিছে আশীৰ দশকৰ ককাদেউতা নাতি আৰু বৃকোদৰৰ এটা জীপাল অনুভৱ৷ নতুনত্বৰ সঞ্জীৱনী পৰশেৰে উজ্জীৱিত কৰিবলৈ আহিছে ককাদেউতা নাতি আৰু হাতী ২৷

১৯৮৩ চনৰ ছুপাৰহিট অসমীয়া চিনেমা আছিল ককাদেউতা নাতি আৰু হাতী৷ অসমীয়া চিনেমাৰ স্বর্ণিল যুগৰ এখন কালজয়ী চিনেমা আছিল ককাদেউতা নাতি আৰু হাতী৷ পটভূমি তেতিয়াৰ অসমীয়া চহা অভিজাত গ্রাম্য জীৱনৰ পৰা নগৰীয়া পৰিৱেশলৈ পৰিৱেষ্টিত আছিল৷

দুকুৰি বছৰৰো অধিক সময় পাৰ হৈ গল৷ সময় কেতিয়াও থমকি নৰয়৷ গতিশীল সময়ৰ লগত খাপ খুৱাই ৪৩ বছৰৰ পিছত নতুন ৰূপত উভতি আহিছে ককাদেউতা নাতি আৰু হাতী ২৷ পুৰণি কাহিনীৰ ভেটিত নতুনত্বৰ সুবাস আৰু লগতে চিৰসেউজ গীতৰ সুৰ আৰু আৱেগ লৈ আহিছে নতুন চিনেমাখনে৷ তেতিয়াৰ বৃকোদৰৰ স্মৃতিক নিটোল ৰূপত তুলি ধৰা হৈছে নতুন চিনেমাখনত৷

কাহিনীয়ে সামৰি লৈছে দুকুৰি বছৰীয়া সময়ৰ সোঁতক৷ আশীৰ দশকৰ চিনেমাখনত অসমীয়া গ্রাম্য জীৱনক যিদৰে প্রতিফলিত কৰা হৈছিল সেই একেই আৱেগেৰে নতুন অসমীয়া গ্রাম্য জীৱনক তুলি ধৰা হৈছে শিপা নেহেৰুৱাকৈ৷

পৰিৱর্তিত সমাজ ব্যৱস্থাৰ লগত খাপ খুৱাই নতুন চিনেমাখনৰ কাহিনী সম্প্রসাৰিত হৈছে আমেৰিকালৈ৷ পুৰণি ছবিখনৰ কাহিনী যত থমকি ৰৈছিল ঠিক সেই স্থানৰ পৰাই যেন গতি লৈছে আন এটা কাহিনী৷

বর্তমানৰ আধুনিক পৰিৱেশত কাহিনী আগবাঢ়িছে নিজৰ ঐতিহ্য আৰু শিপাক খামুচি ধৰি৷ কিদৰে সময়ৰ সৈতে খাপ খুৱাই অতীতক পাহৰি নোযোৱাকৈ ভৱিষ্যতৰ জীৱনাদর্শক সুন্দৰ ব্যৱস্থাপনাৰে আগবঢ়াই নিয়াৰ সু–কৌশলী প্রচেষ্টা কৰা হৈছে৷

অত্যাধুনিক কাৰিকৰী ব্যৱস্থা আৰু চিন্তাধাৰাৰে এটা নিটোল কাহিনী আগবঢ়াই লৈ যোৱা হৈছে৷ মুহূর্তে মুহূর্তে ছাচপেন্স৷ কৌতূহলৰ মাজে মাজে হাঁহি–কান্দোন, ৰোমাঞ্চ আৰু সংঘাত৷ আশীৰ দশকৰ চিনেমাখনত যিধৰণে ককাদেউতা আৰু নাতিৰ মাজৰ প্রজন্মৰ আৱেগক প্রতিফলিত কৰা হৈছিল, সেই আৱেগক কোনো ধৰণৰ আঘাত নিদিয়াকৈ নিটোল ৰূপত উপস্থাপন কৰা হৈছে ককাদেউতা নাতি আৰু হাতী ২ত৷

ককা, দেউতা, নাতি আৰু হাতী সকলোৰে এটা সুকীয়া সুকীয়া কাহিনী আছে আৰু এই কাহিনী জোঁট নলগোৱাকৈ বান্ধ খাহছে সম্পর্ক আৰু আৱেগৰ এডাল এনাজৰীৰে৷

ককাদেউতা নাতি আৰু হাতী চিনেমাৰ চিৰসেউজ গীতবোৰ আজিও কাণত বাজে৷ চিনেমাখনৰ জনপ্রিয় গীত এক দুই তিনি চাৰিত হাতীৰ পিঠিত উঠা কণমানি অভিনেতাজনক মনত আছেনে অসমীয়া চিনেমাৰ অন্যতম জনপ্রিয় এই গীতটিত শিশু শিল্পীৰ চৰিত্রত অভিনয় কৰিছিল মুখ্যমন্ত্রী ড০ হিমন্ত বিশ্ব শর্মাই৷

ককাদেউতা নাতি আৰু হাতী ২ত কোনো ধৰণৰ সালসলনি নকৰাকৈ উপস্থাপন কৰা হৈছে চিৰসেউজ এক দুই তিনি চাৰি গীতটো৷ সুদীর্ঘ ৪৩ বছৰৰ পিছত নতুন কাৰিকৰী প্রযুক্তিৰে মুখ্যমন্ত্রী ড০ হিমন্ত বিশ্ব শর্মাৰ শিশু চৰিত্রক একেই ৰূপত উপস্থাপন কৰা হব চিনেমাখনত৷

অত্যাধুনিক কাৰিকৰী প্রযুক্তিৰে সমৃদ্ধ হায়দৰাবাদৰ জনপ্রিয় PRASAD FILM LABত ভিজুৱেলী নতুন ৰূপ দিয়া হৈছে এক দুই তিনি চাৰি গীতটিক৷ ইতিমধ্যে পুৰণা গীতটিৰ ব্লেক এণ্ড হোৱাহট প্রিণ্ট ধূসৰ হৈ পৰিছিল৷

কিন্তু আধুনিক কাৰিকৰী প্রযুক্তিৰে ৰঙীন ৰূপত ককাদেউতা নাতি আৰু হাতী ২ত দেখা যাব চিৰসেউজ গীতটোক৷ আশীৰ দশকৰ চিনেমাখনৰ আন এটা জনপ্রিয় গীত আছিল কলিৰ কৃষ্ণ৷ সুদীর্ঘ ৪টা দশকৰ পিছত এই গীতটোত পুনৰ নতুনকৈ কণ্ঠদান কৰিছে অসমীয়া চিনেমাৰ মহীৰূহ কণ্ঠশিল্পী দ্বীপেন বৰুৱাই৷

ৰমেন বৰুৱাৰ সংগীত পৰিচালনাৰে জনপ্রিয় হোৱা গীতটোৰ নতুনকৈ পুনৰ ব্যৱস্থাপনা কৰিছে তৰালি শর্মাই৷ গীতটোত দ্বীপেন বৰুৱাৰ লগত কণ্ঠদান কৰিছে তৰালি শর্মাই৷ এই দুটা গীতৰ লগতে ককাদেউতা নাতি আৰু হাতী ২ৰ আন তিনিটা শ্রুতিমধুৰ গীতেও মুক্তিলাভ কৰিছে৷

প্রাণৰ শিল্পী জুবিন গার্গৰ সংগীত পৰিচালনা আৰু কণ্ঠ জীৱন্ত হৈ উঠিছে ককাদেউতা নাতি আৰু হাতী ২ত৷ জুবিন গার্গৰ কণ্ঠত ৰুণজুন নূপুৰে বাজে শীর্ষক গীতটি চিত্রায়ণ কৰা হৈছে নতুন চিনেমাখনত৷

ৰাইজলৈ মাজলৈ আগবঢ়াই দিয়াৰ পিছতে সাংঘাতিক জনপ্রিয়তা লাভ কৰিছে হাচনাহানা, সপোনৰ বাটে বাটে আৰু জীৱনৰ জোনাক শীর্ষক আন তিনিটা গীতেও৷ হাচনাহানা গীতটিত নতুন ৰূপত দেখা গৈছে অসমীয়া চিনেমা আৰু ভ্রাম্যমাণ জগতৰ ছুপাৰহিট অভিনেত্রী প্রস্তুতি পৰাশৰক৷

আনহাতে জীৱনৰ জোনাক শীর্ষক গীতটি দৃশ্যায়ন কৰা হৈছে লাডাখৰ মনোৰম প্রাকৃতিক পৰিৱেশত৷ চিনেমাখনৰ শ্বুটিং সম্পন্ন কৰা হৈছে লাডাখ, মুম্বাই, গুৱাহাটী, যোৰহাট, কলিয়াবৰৰ বিভিন্ন লোকেচনত৷

৫টা প্রজন্মৰ ছুপাৰষ্টাৰ তাৰকাহ নিখুঁত অভিনয়েৰে নতুন প্রাণ দিছে ককাদেউতা নাতি আৰু হাতী ২ক৷ আশীৰ দশকৰ ছবিখনত নাতিৰ চৰিত্রত অভিনয় কৰা প্রাঞ্জল শইকীয়া উভতি আহিছে ককাদেউতাৰ চৰিত্রত৷

নাতিৰ চৰিত্রত দেখা যাব জনপ্রিয় অভিনেতা উৎপল দাসক৷ ককাৰ চৰিত্র ৰূপায়ণ কৰা প্রাঞ্জল শইকীয়াৰ পুত্রৰ চৰিত্রত দেখা যাব অসমীয়া চিনেমাৰ ছুপাৰষ্টাৰ যতীন বৰাক৷ বিশেষ চৰিত্রত শক্তিশালী অভিনেতা তপন দাস আৰু বলীউড, হলীউডত অসমৰ নাম জিলিকাই তোলা স্বনামধন্য অভিনেতা আদিল হুছেইন৷ নায়িকাৰ চৰিত্রত দেখা যাব প্রীতি কংকনাক৷

১৯৮৩ত মুক্তি লাভ কৰা ককাদেউতা নাতি আৰু হাতীৰ এটা শিশু চৰিত্রত স্বামী ড০ হিমন্ত বিশ্ব শর্মাই কৰা অভিনয়ৰ নষ্টালজিয়া সামৰি ককাদেউতা নাতি আৰু হাতী ২ৰ প্রযোজনা আৰু পৰিকল্পনা ৰিণিকি ভূঞা শর্মাৰ৷

যশস্বী পৰিচালক বিশ্বজিত বৰাই নিখুঁত পৰিচালনাৰে দর্শকৰ বাবে আগবঢ়াই দিছে চিনেমাখন৷ চিত্রনাট্য ভাস্কৰ হাজৰিকাৰ৷ কার্যবাহী প্রযোজক চৈয়দ জাৰিৰ হুছেইন৷ চিনেমেটোগ্রাফী প্রদীপ দৈমাৰীৰ৷

বলীউডৰ বহু চিনেমাৰ সৈতে জড়িত যশস্বী সম্পাদক শ্বেতা ভেংকটে সম্পাদনা কৰিছে ককাদেউতা নাতি আৰু হাতী ২৷ গীতৰ নৃত্য পৰিচালনা দক্ষিণৰ চিনেমা জগতৰ জনপ্রিয় নৃত্য পৰিচালক শ্বৰীফৰ৷ কৰিঅগ্রাফাৰ পংকজ ইংতিৰ৷

অত্যাধুনিক প্রযুক্তিৰে এক্সন ছিকুৱেন্সসমূহক চিনেমাখনত তুলি ধৰিছে ফাইট মাষ্টাৰ ৰাজেশ কান্নানে৷ চিনেমাখনৰ সংগীত ব্যৱস্থাপনা অৰূপজ্যোতি বৰুৱা, জয় বৰুৱা, প্রণয় দত্ত, তৰালি শর্মাৰ৷

গীতিকাৰ ৰাজদ্বীপ, ইবচন লাল বৰুৱা আৰু দেৱজিত কলিতা৷ কণ্ঠশিল্পী দ্বীপেন বৰুৱা, তৰালি শর্মা, জয় বৰুৱা, প্রবীণ বৰা, অৰূপজ্যোতি বৰুৱা আৰু নাহিদ আফ্রিন৷ ছাউণ্ড ডিজাইন আৰু মিক্সিং অমৃত প্রীতম(MPSC), দেৱজিত চাংমাই, ৰাজকুমাৰ ৰাহুল দিহিঙীয়া, প্রাঞ্জল প্রতিম শর্মা আৰু হৃদিত দত্তৰ৷

বেকগ্রাউণ্ড স্কৰ অজয় সিঙৰ৷ সাজসজ্জা ডিজাইনাৰ অজান আকাশ বৰুৱা আৰু সহায়ক মৃন্ময় বৰা৷ ষ্টাইলিষ্ট আন্না কৌশিক আৰু সহায়ক কৃষাংগী ভৰালীৰ৷

হাঁহি–কান্দোন, ছাচপেন্স–ৰোমাঞ্চ আৰু সংঘাতেৰে ভৰপূৰ সম্পূর্ণ পাৰিবাৰিক চিনেমা ককাদেউতা নাতি আৰু হাতী ২৷

কাইলৈৰ পৰা ৰাজ্যৰ আটাইকেউটা চিনেমা হলতে মুক্তি পাব ককাদেউতা নাতি আৰু হাতী ২। ইতিমধ্য ছবিখনক ৰাজ্যৰ চিনেপ্ৰেমীৰ মাজত ব্যাপক উছাহ দেখিবলৈ পোৱা গৈছে।

আজি অসমৰ ৭৫টা ছবিগৃহত একেলগে মুক্তিলাভ কৰিব ককাদেউতা নাতি আৰু হাতী–২৷ ছবিখনক লৈ ইতিমধ্যে দর্শকৰ মাজত ব্যাপক উৎসাহৰ সৃষ্টি হৈছে৷ বহু পৰিয়ালে একেলগে ছবিখন উপভোগ কৰাৰ পৰিকল্পনা কৰিছে৷ নষ্টালজিয়া, পৰিয়াল, ঐতিহ্য, সংগীত আৰু আধুনিকতাৰ অনন্য সমন্বয়েৰে ছবিখনে অসমীয়া চিনেমাৰ নতুন যুগৰ এক উল্লেখযোগ্য মাইলৰ খুঁটি হৈ পৰিব বুলি আশা প্রকাশ কৰিছে ছবিপ্রেমী আৰু চলচ্চিত্র মহলে৷

ডিজিটেল ডেস্ক, ৩ জুলাই

The post ছবিগৃহত মুক্তিলাভ ককাদেউতা নাতি আৰু হাতী ২ৰ first appeared on নিয়মীয়া বাৰ্তা.

নলবাৰীৰ গংগাপুৰত সংঘটিত নৃশংস আক্ৰমণৰ বলি হোৱা মৃদুমুদ্ৰা ডেকাৰ অৱশেষত মৃত্যু হৈছে। দীৰ্ঘদিন ধৰি চিকিৎসাধীন হৈ থকা মৃদুমুদ্ৰাই গুৱাহাটী চিকিৎসা মহাবিদ্যালয় আৰু হাস্পতাল (GMCH)-ত শেষ নিশ্বাস ত্যাগ কৰে।

GMCH কৰ্তৃপক্ষই জনোৱা অনুসৰি, আজি পুৱা প্ৰায় ৭:৩০ বজাত মৃদুমুদ্ৰা ডেকাৰ মৃত্যু হয়।

উল্লেখ্য যে, ৩১ মে’ত নলবাৰীৰ গংগাপুৰত সংঘটিত এক চাঞ্চল্যকৰ আক্ৰমণত ৰোজ আলীয়ে মৃদুমুদ্ৰা ডেকাক প্ৰাণঘাতী আক্ৰমণ চলাইছিল। এই ঘটনাত মাধুৰ্য্য বৰ্মনৰ (মৃদুমুদ্ৰা সম্পৰ্কীয় ককায়েক) ঘটনাস্থলীতে নিহত হৈছিল আৰু মৃদুমুদ্ৰা গুৰুতৰভাৱে আহত হৈছিল।

ঘটনাৰ পিছত আৰক্ষীৰ অভিযানত অভিযুক্ত ৰোজ আলী আৰক্ষীৰ গুলীত নিহত হৈছিল।

মৃদুমুদ্ৰা ডেকাৰ মৃত্যুৰ খবৰে সমগ্ৰ নলবাৰী জিলাত শোকৰ ছাঁ পেলাইছে। এই ঘটনাক লৈ অঞ্চলজুৰি গভীৰ শোকৰ পৰিৱেশ বিৰাজ কৰিছে।

ডিজিটেল ডেস্ক, ৩ জুলাই

The post নলবাৰীত ঘাতক ৰোজৰ আক্ৰমণৰ বলি মৃদুমুদ্ৰাৰ শেষ নিশ্বাস ত্যাগ first appeared on নিয়মীয়া বাৰ্তা.