ডিজিটেল ডেস্ক, ৭ জুন : বহুপ্রতীক্ষিত কামাখ্যা কৰিড’ৰ নির্মাণ আৰু আগন্তুক অম্বুবাচী মহাযোগক লৈ নীলাচলৰ কামাখ্যা দেৱালয়ত কর্তৃপক্ষৰ সৈতে শনিবাৰে এক বিশেষ বৈঠকত মিলিত হয় মন্ত্রী জয়ন্ত মল্ল বৰুৱা৷ মন্ত্রীগৰাকীৰ পৌৰোহিত্যত অনুষ্ঠিত বৈঠকখনত বহুচর্চিত কামাখ্যা কৰিড’ৰৰ পৰিকল্পনাৰ অগ্রগতি তথা কৰিড’ৰটো নির্মাণৰ সময়ত প্রয়োজনীয় আন্তঃগাঁথনিকে ধৰি বিভিন্ন গুৰুত্বপূর্ণ বিষয়সমূহ আলোচনা কৰা হয়৷

বৈঠকৰ অন্তত মন্ত্রী জয়ন্ত মল্ল বৰুৱাই কয় যে মূলতঃ কামাখ্যা কৰিড’ৰ নির্মাণক লৈয়েই এই বৈঠক অনুষ্ঠিত হৈছে৷ এই পৰিকল্পনা আজিৰ নহয়, বহুদিন আগৰে পৰা আমি এই প্রকল্পক আগুৱাই নিছিলোঁ৷ কৰিড’ৰটো নির্মাণৰ আৰম্ভণিতে অঞ্চলটোৰ বিভিন্ন ব্যৱসায়িক প্রতিষ্ঠান তথা বাসভৱনক লৈ স্থানীয় লোকৰ বহু সমস্যা চলি আছিল৷ এই সমস্যাসমূহ সমাধানৰ বাবে আজি ৰাইজৰ সৈতে আলাপ–আলোচনা কৰিছোঁ৷

অহা ৮ জুনৰ পৰা ৰাইজৰ ওজৰ–আপত্তি সন্দর্ভত এক আলোচনা অনুষ্ঠিত কৰাৰ কথা ঘোষণা কৰি মন্ত্রী বৰুৱাই কয় যে এসপ্তাহৰ ভিতৰত সকলো সমস্যাৰ সম্পূর্ণ সমাধান হ’ব বুলি আমি আশা প্রকাশ কৰিছোঁ৷ বিভিন্ন সময়ত সৃষ্টি হোৱা কেতবোৰ সমস্যাৰ বাবে নির্মাণত বাধাৰ সন্মুখীন হোৱা কামাখ্যা কৰিড’ৰ আগন্তুক দুবছৰৰ ভিতৰত সম্পূর্ণ হ’ব বুলি সংবাদ মাধ্যমৰ আগত সদৰী কৰিছে মন্ত্রী বৰুৱাই৷

তেওঁ কয় যে কৰিড’ৰটো নির্মাণৰ বাবে সৃষ্টি হোৱা সমস্যাসমূহ আমি প্রায় সমাধানৰ দিশে লৈ আনিছোঁ৷ সকলো দিশ সূক্ষ্মভাৱে পৰীক্ষা–নিৰীক্ষা কৰাৰ পাছতে এই বৃহৎ প্রকল্পক চৰকাৰে আগুৱাই নিব৷ ইয়াৰ বাবেও সকলো প্রস্তুতি একপ্রকাৰ সম্পূর্ণ হোৱাৰ পথত বুলি উল্লেখ কৰি তেওঁ কয় যে কামাখ্যাধামলৈ অহা দর্শনার্থীয়ে যাতে কোনোধৰণৰ অসুবিধাত পৰিবলগীয়া নহয়, তেনেধৰণৰ ব্যৱস্থা গ্রহণ কৰিব বিচৰা বিষয়বোৰত ৰাইজে সন্মতি দিছে৷ ৰাইজৰ মতেই সকলোবোৰ কাম আমি আগুৱাই নিম৷

কথা প্রসংগত মন্ত্রী বৰুৱাই আগন্তুক ২২ জুনৰ পৰা কামাখ্যা দেৱালয়ত অনুষ্ঠিত হ’বলগীয়া অম্বুবাচী মহাযোগৰ প্রস্তুতি সন্দর্ভতো সংবাদ মাধ্যমক অৱগত কৰে৷ তেওঁ কয় যে আগন্তুক অম্বুবাচী মহাযোগ সুকলমে পৰিচালনা কৰিবলৈ সকলো ধৰণৰ প্রস্তুতি চৰকাৰে লৈছে৷ বিগত বর্ষসমূহত অম্বুবাচী মহাযোগৰ সময়ত ৰাজ্যত ভক্ত–দর্শনার্থীৰ সংখ্যা যথেষ্ট বৃদ্ধি পাইছে যদিও সাম্প্রতিক সময়ত ভক্ত–দর্শনার্থীৰ সংখ্যা বৃদ্ধিয়ে কিছু সমস্যাৰ সৃষ্টি কৰাৰ সম্ভাৱনা আছে বুলি তাৎপর্যপূর্ণ মন্তব্য আগবঢ়াইছে মন্ত্রী বৰুৱাই৷

তেওঁ কয় যে কামাখ্যা কৰিড’ৰ সম্পূর্ণ হৈ উঠাৰ পাছত ভক্তৰ সংখ্যা বৃদ্ধি পালেও কোনোধৰণৰ সমস্যাৰ সৃষ্টি নহয়৷ কিন্তু কৰিড’ৰটো সম্পূর্ণ হৈ নুঠালৈকে অসুবিধা কিছু হ’ব পাৰে৷ গতিকে এইবাৰ বার্ষিক পাৰম্পৰিক নিয়ম মতেহে অম্বুবাচী মহাযোগ পালন কৰা হ’ব বুলি তেওঁ লগতে কয়৷ অৱশ্যে ভক্ত–দর্শনার্থী অম্বুবাচী মহাযোগৰ সময়ত দেৱী কামাখ্যাৰ আশিস ল’বলৈ আনবাৰৰ দৰে এইবাৰো আহিব৷ তথাপি প্রয়োজনসাপেক্ষেহে চৰকাৰে ব্যৱস্থাসমূহ গ্রহণ কৰিব৷ কিন্তু বিগত বছৰবোৰৰ দৰে অম্বুবাচী মহাযোগৰ অন্তৰ সময়ত ভিভিআইপি পৰম্পৰা বর্জন কৰা নিয়ম এইবাৰো বাহাল থাকিব বুলি তেওঁ সদৰী কৰে৷

আনহাতে, বৈঠকৰ অন্তত কামাখ্যাধামৰ সৰুদলৈ হিমাদ্রী শর্মাই কয় যে অম্বুবাচীৰ বাবে পূর্বতে যিধৰণে প্রস্তুতি চলোৱা হৈছিল এইবাৰো একেধৰণেই হ’ব৷ আমি এমাহ পূর্বৰে পৰা এখন পৰিচালনা সমিতি অম্বুবাচীৰ বাবে গঠন কৰিছোঁ৷ মহাযোগৰ পৰিপ্রেক্ষিতত মন্দিৰ প্রাংগণত হ’বলগীয়া জনসমাগমৰ প্রতি লক্ষ্য ৰাখি সমিতিয়ে এইবাৰো কর্মচাৰীৰ সংখ্যা ১০০জনলৈ বৃদ্ধি কৰাৰ লগতে নিৰাপত্তাৰক্ষীৰ সংখ্যাও বঢ়াইছে৷ মন্দিৰলৈ অহা–যোৱা কৰা সকলো পথ ইতিমধ্যে জৰীপ কৰি মেৰামতি কৰা হৈছে৷ কিছু বাকী আছে যদিও চৰকাৰৰ সহযোগত অতি সোনকালে সম্পূর্ণ হ’ব বুলি আশা প্রকাশ কৰিছে সৰুদলৈ শর্মাই৷

উল্লেখ্য যে এই বৈঠকখনত কামাখ্যাধামৰ বৰদলৈ কবীন্দ্র প্রসাদ শর্মা, কামৰূপ (মহানগৰ) জিলাৰ জিলা আয়ুক্ত স্বপ্ণীল পালকে ধৰি জিলা প্রশাসন আৰু আৰক্ষী প্রশাসনৰ কেইবাগৰাকীও শীর্ষ বিষয়াই অংশগ্রহণ কৰে৷

The post অম্বুবাচী মহাযোগক লৈ নীলাচলত বিশেষ বৈঠক first appeared on নিয়মীয়া বাৰ্তা.

ডিজিটেল ডেস্ক, সোণাপুৰ, ৬ জুন : কামৰূপ মহানগৰ জিলাৰ ক্ষেত্ৰী থানাৰ অন্তৰ্গত গাঁও ডিমৰীয়াৰ পথাৰত যোৱা ৪ জুনৰ সন্ধিয়া উদ্ধাৰ হোৱা মৃত যুৱতীগৰাকীৰ হত্যাকাৰীক গ্ৰেপ্তাৰ কৰিলে ক্ষেত্ৰী আৰক্ষীয়ে । ইতিমধ্যে হত্যাকাৰীয়ে নিজেই ডেগাৰেৰে যুৱতীগৰাকীক হত্যা কৰা বুলি বিস্ফোৰক স্বীকাৰোক্তি দিছে।

ঘটনা সংঘটিত কৰাৰ পিছৰে পৰা ঘাতক প্ৰেমিক ২নং ঔজাৰী গাঁৱৰ বিপুল মল্লিকে মহানগৰীত আত্মগোপন কৰি আছিল। অৱশেষত ক্ষেত্ৰী আৰক্ষীৰ তীব্ৰ অভিযানত আটক কৰিবলৈ সক্ষম হয় ঘাতক প্ৰেমিক বিপুল মল্লিকক। উল্লেখ্য যে ১নং ঔজাৰী গাঁৱৰ যুৱতীগৰাকীক যুৱকজনে ফুচুলাই আনি হত্যা কৰাৰ অভিযোগ উত্থাপন কৰিছিল পৰিয়ালৰ লোকে। ঘটনা সন্দৰ্ভত ৪ জুনৰ সন্ধিয়া ৭ বজাত ঔজাৰি গাঁৱৰ গাঁওবুঢ়াই ডিমৰীয়াৰ পথাৰত এগৰাকী যুৱতীৰ মৃতদেহ প্ৰত্যক্ষ কৰি খবৰ দিছিল আৰক্ষীক। ঘটনা পোহৰলৈ অহাৰ পিছতে ক্ষেত্ৰী আৰক্ষীয়ে তৎপৰতাৰে গ্ৰেপ্তাৰ কৰিবলৈ সক্ষম হয় অভিযুক্তক।

জানিব পৰা অনুসৰি, যুৱতীগৰাকীৰ শৰীৰৰ ভিন্ন স্থানত ডেগাৰেৰে ১৭বাৰ আঘাত কৰিছিল ঘাতক প্ৰেমিকে। উল্লেখ্য যে পূৰ্বেও পকছো গোচৰত জে’ল হাজোতলৈ গৈছিল ঘাতক প্ৰেমিক বিপুল মল্লিক। পিছত চলিত বৰ্ষৰ ফেব্ৰুৱাৰী মাহত জে’লৰ পৰা মুকলি আকাশৰ তললৈ আহিছিল বিপুল মল্লিক।

সম্প্ৰতি আৰক্ষীয়ে ধৃত হত্যাকাৰীটোক গ্ৰেপ্তাৰ কৰি সোধা-পোছা অব্যাহত ৰাখিছে ।

The post ডিমৰীয়াৰ পথাৰত উদ্ধাৰ হোৱা মৃত যুৱতীৰ হত্যাকাৰীক গ্ৰেপ্তাৰ first appeared on নিয়মীয়া বাৰ্তা.

ডিজিটেল ডেস্ক, ৫ জুন : অৱশেষত সকলো জল্পনা-কল্পনাৰ অন্ত পেলাই সম্প্ৰসাৰিত হ’ল অসম মন্ত্ৰীসভা। শেহতীয়াকৈ অনুষ্ঠিত বিধানসভা নিৰ্বাচনত ৰাজ্যত ঐতিহাসিক বিজয় সাব্যস্ত কৰাৰ পিছত আজি মুখ্যমন্ত্ৰী ড০ হিমন্ত বিশ্ব শৰ্মা নেতৃত্বাধীন এন ডি এ চৰকাৰে নিজৰ মন্ত্ৰীসভাৰ প্ৰথমটো সম্প্ৰসাৰণ ঘটায়।

গুৱাহাটীৰ জ্যোতি-বিষ্ণু আন্তৰ্জাতিক কলা মন্দিৰত আজি দিনৰ ১২.৪৫ বজাত অনুষ্ঠিত এক গাম্ভীৰ্যপূৰ্ণ অনুষ্ঠানত ৰাজ্যপাল লক্ষ্মণ প্ৰসাদ আচাৰ্যই নতুনকৈ অন্তৰ্ভুক্ত ১২গৰাকী বিধায়কক মন্ত্ৰী হিচাপে পদ আৰু গোপনীয়তাৰ শপতবাক্য পাঠ কৰায় ।

আজি শপত লোৱা অসম মন্ত্ৰীসভাৰ ১২গৰাকী মন্ত্ৰী হৈছে- ডাঃ ৰণোজ পেগু, পীয়ূষ হাজৰিকা, বিমল বৰা, অশ্বিনী ৰায় সৰকাৰ, বিশ্বজিৎ দৈমাৰী, কৃষ্ণেন্দু পাল, অশোক সিংহল, জয়ন্ত মল্ল বৰুৱা, নীলিমা দেৱী, কৌশিক ৰায়, সুশান্ত বৰগোহাঁই আৰু কেশৱ মহন্ত ৷ উল্লেখ্য যে আজি শপত লোৱা মন্ত্ৰীসকলৰ ভিতৰত ৪গৰাকীয়ে প্ৰথমবাৰৰ বাবে লাভ কৰিছে মন্ত্ৰিত্ব।

আজি মন্ত্ৰীসভা সম্প্ৰসাৰণৰ পিছতে সন্ধিয়া ৬ বজাত অনুষ্ঠিত হ’ব এখন অতি গুৰুত্বপূৰ্ণ কেবিনেট বৈঠক। মুখ্যমন্ত্ৰী ড০ হিমন্ত বিশ্ব শৰ্মাৰ অধ্যক্ষতাত অনুষ্ঠিত হ’বলগীয়া এই বৈঠকত নতুনকৈ শপত লোৱা মন্ত্ৰীসহ ৰাজ্য চৰকাৰৰ আটাইকেইগৰাকী মন্ত্ৰীয়ে অংশগ্ৰহণ কৰিব।

ৰাজ্যৰ নতুন মন্ত্ৰীসভা গঠনৰ পিছত এইখনেই হ’ব প্ৰথমখন কেবিনেট বৈঠক। সেয়েহে বৈঠকখনক লৈ ৰাজনৈতিক মহলৰ লগতে সাধাৰণ জনতাৰ মাজতো ব্যাপক আগ্ৰহৰ সৃষ্টি হৈছে। উল্লেখ্য যে মুখ্যমন্ত্ৰী ড০ হিমন্ত বিশ্ব শৰ্মা নেতৃত্বাধীন নতুন মন্ত্ৰীসভাৰ প্ৰথমখন কেবিনেট বৈঠকতে ৰাজ্যবাসীৰ স্বাৰ্থজড়িত বহুকেইটা গুৰুত্বপূৰ্ণ ঘোষণা আহিব পাৰে বুলি ধাৰণা কৰা হৈছে।

The post মন্ত্ৰীসভা সম্প্ৰসাৰণৰ পিছতে মুখ্যমন্ত্ৰীৰ কেবিনেট বৈঠক first appeared on নিয়মীয়া বাৰ্তা.

ডিজিটেল ডেস্ক, ৫ জুন : মহানগৰীৰ জালুকবাৰীত পুৱতি নিশা এক ভয়ংকৰ অগ্নিকাণ্ড সংঘটিত হয়। বৃহস্পতিবাৰে নিশা জালুকবাৰীৰ জয়মতী নগৰত এই বিধ্বংসী অগ্নিকাণ্ডৰ ঘটনা সংঘটিত হয় ৷ এই ঘটনাই সমগ্ৰ অঞ্চলটোত তীব্ৰ চাঞ্চল্যৰ সৃষ্টি কৰে । জালুকবাৰীৰ জয়মতী নগৰৰ এটা ভাৰাঘৰত সূত্ৰপাত হোৱা এই জুইত আবদ্ধ হৈ একেটা পৰিয়ালৰে এটি শিশুসহ মুঠ চাৰিজন সদস্য জীৱন্তে অগ্নিদগ্ধ হৈ কৰুণ মৃত্যুক সাবটি লয় ।

এই অগ্নিকাণ্ডত জ্বলি ভস্মীভূত হয় তেওঁলোকৰ বাসগৃহটোও ৷ লগতে আন এটা বাসগৃহও এই অগ্নিকাণ্ডত জাহ যায় ৷ মৃত লোককেইজনক কুদ্দুছ আলী (৬৫), কাজলী (৪০), ছফিকুল (৩০) আৰু শ্বাহিদ আলী (১২) বুলি চিনাক্ত কৰা হৈছে । জানিব পৰা মতে, দুৰ্ভগীয়া পৰিয়ালটোৰ স্থায়ী ঘৰ গোৱালপাৰা জিলাৰ কৃষ্ণাইত । দীৰ্ঘদিন ধৰি তেওঁলোকে জয়মতী নগৰৰ এক আৱাসিক চৌহদত ভাৰাত আছিল ।

স্থানীয় বাসিন্দাৰ মতে, পুৱতি নিশা সকলো টোপনিত থকা অৱস্থাত হঠাতে জুইৰ সূত্ৰপাত ঘটে । কাঠ আৰু টিনৰ চালিৰ ঘৰ হোৱা বাবে জুই কম সময়ৰ ভিতৰতে সমগ্ৰ এলেকাটোত বিয়পি পৰে। বহু বাসিন্দাই সাৰ পাই ধোঁৱা আৰু জুইৰ শিখা প্ৰত্যক্ষ কৰে যদিও জুয়ে ইতিমধ্যে দুটা ঘৰ সম্পূৰ্ণৰূপে গ্ৰাস কৰে । ঘটনাটো সংঘটিত হোৱাৰ পাছতে স্থানীয় লোকে অগ্নিনিৰ্বাপক বাহিনী আৰু স্থানীয় আৰক্ষীক খবৰ দিয়ে ।

ঘটনাৰ খবৰ পোৱাৰ পিছতে অগ্নিনিৰ্বাপক বাহিনী, স্থানীয় আৰক্ষী আৰু উদ্ধাৰকাৰী দল ঘটনাস্থলীত উপস্থিত হয়। অগ্নিনিৰ্বাপক আৰু জৰুৰীকালীন সেৱা, এছ ডি আৰ এফ আৰু এন ডি আৰ এফ কৰ্মীসকলে যুটীয়াভাৱে কেইবাঘণ্টাজোৰা চেষ্টাৰ অন্তত জুই নিৰ্বাপণ কৰে । জুই সম্পূৰ্ণ নিয়ন্ত্ৰণলৈ অনাৰ পিছতহে ঘৰৰ ভিতৰৰ পৰা কৰুণভাৱে মৃত্যুবৰণ কৰা চাৰিওগৰাকী ভুক্তভোগীৰ মৃতদেহ উদ্ধাৰ কৰা হয় ।

অগ্নিকাণ্ডৰ প্ৰকৃত কাৰণ বৰ্তমানলৈকে জানিব পৰা হোৱা নাই যদিও শ্বৰ্ট চাৰ্কিটৰ বাবেই এই অগ্নিকাণ্ড সংঘটিত হোৱাৰ সন্দেহ কৰা হৈছে।

The post জালুকবাৰীত ভয়ংকৰ অগ্নিকাণ্ডত একেটা পৰিয়ালৰ ৪জনৰ কৰুণ মৃত্যু first appeared on নিয়মীয়া বাৰ্তা.

ডিজিটেল ডেস্ক, ৪ জুন : প্রতীক্ষাৰ অন্ত পেলাই কাইলৈ (৫ জুন) সম্প্রসাৰণ ঘটিব মুখ্যমন্ত্রী ড০ হিমন্ত বিশ্ব শর্মাৰ মন্ত্রীসভাৰ৷ কেন্দ্রীয় নেতৃত্বৰ পৰা মন্ত্রিত্বৰ তালিকা চূড়ান্ত কৰি ইতিমধ্যে গুৱাহাটীত উপস্থিত হোৱা মুখ্যমন্ত্রী ড০ শর্মাই অৱশ্যে এতিয়াও প্রকাশ কৰা নাই সম্ভাব্য মন্ত্রীসকলৰ নাম৷

শুকুৰবাৰে দুপৰীয়া ১২.৪৫ বজাত খানাপাৰাৰ জ্যোতি–বিষ্ণু আন্তর্জাতিক কলাকেন্দ্রত হ’বলগীয়া শপতগ্রহণক লৈ উৎকণ্ঠাৰে সকলোৱে বাট চাই থকাৰ সময়তে মন্ত্রীসভাৰ এই সম্প্রসাৰণৰ বাবে প্রস্তুতি তুংগত তুলিছে ৰাজ্য প্রশাসনে৷ মুখ্যমন্ত্রী ড০ হিমন্ত বিশ্ব শর্মাৰ সম্প্রসাৰিত হ’ব লগা মন্ত্রীসভাত কোনে এন্ট্ৰী মাৰিব তাক লৈ জল্পনা–কল্পনা চলি থকাৰ মাজতে শপতগ্রহণ অনুষ্ঠানৰ বাবে বিশিষ্ট অতিথিলৈ নিমন্ত্রণী–পত্র প্রেৰণ কৰাৰ লগতে দিল্লীৰ অতিথিৰ তালিকাও ৰাজ্য প্রশাসনে সাজু কৰি তুলিছে৷ ইতিমধ্যে শপতগ্রহণ অনুষ্ঠানত সকলো দিশ তদাৰক কৰাৰ কাৰণে ৮গৰাকী এচিএছ বিষয়াক বিশেষ দায়িত্ব অর্পণ কৰা হৈছে৷

উল্লেখ্য যে সম্প্রসাৰিত হ’ব লগা মন্ত্রীসভাত কোনে কোনে স্থান পাব তাক লৈ এতিয়াও অব্যাহত আছে জল্পনা–কল্পনা৷ মুখ্যমন্ত্রীৰ চাৰিদিনীয়া দিল্লী যাত্রাত চূড়ান্ত হোৱা মন্ত্রীৰ তালিকা আজি সন্ধিয়া মুখ্যমন্ত্রী ড০ শর্মাই ঘোষণা কৰাৰ সম্ভাৱনা আছে৷ উল্লেখ্য যে যোৱা ১২ মে’ত মুখ্যমন্ত্রী ড০ হিমন্ত বিশ্ব শর্মাৰ সৈতে মন্ত্রী হিচাপে শপত লৈছিল ৰামেশ্বৰ তেলী, অতুল বৰা, চৰণ বড়ো আৰু অজন্তা নেওগে৷

নতুনকৈ সম্প্রসাৰিত হ’ব লগা তালিকাত কোনে কোনে স্থান পাব, তাক লৈ ইতিমধ্যে অব্যাহত আছে চর্চা৷ ইয়াৰ মাজতে মুখ্যমন্ত্রী ড০ শর্মাৰ মন্ত্রীসভাত পূর্বৰ মন্ত্রী ডাঃ ৰণোজ পেগুৱে স্থান লাভ কৰাটো নিশ্চিত হৈছে৷ একেদৰে উজনি অসমৰ পৰা মন্ত্রীসভাত স্থান পাব পাৰে বিমল বড়া, সুশান্ত বৰগোহাঁয়ে আৰু বলীন চেতিয়াৰ নাম অন্তর্ভুক্ত হোৱাৰ সম্ভাৱনা আছে৷ উত্তৰ অসমৰ পৰা ৰণোজ পেগুৰ লগতে নাম অন্তর্ভুক্ত হ’ব পাৰে পল্লৱলোচন দাস, ভূপেন বৰাৰ৷ আনহাতে, মধ্য অসমৰ পৰা প্রতিনিধিত্ব কৰাৰ সুযোগ পাব পীয়ূষ হাজৰিকাই৷ ইফালে, নামনি অসমৰ পৰা মন্ত্রীসভাত স্থান লাভ কৰাটো নিশ্চিত জয়ন্ত মল্ল বৰুৱাই৷ তালিকাত গোলকগঞ্জৰ বিধায়ক অশ্বিনী ৰায় সৰকাৰৰো নাম অন্তর্ভুক্ত হোৱাৰ সম্ভাৱনা আছে৷ ইফালে, পুনৰ বৰাকক প্রতিনিধিত্ব কৰাৰ সম্ভাৱনা আছে কৌশিক ৰায় আৰু কৃষ্ণেন্দু পালৰ৷

অৱশ্যে এনে সম্ভাৱনীয়তাৰ পাছতো মুখ্যমন্ত্রী ড০ শর্মাই তেওঁৰ মন্ত্রীসভাখনত সকলো জাতি–জনগোষ্ঠীক কিদৰে প্রতিনিধিত্ব দিয়ে সেয়া লক্ষণীয় হ’ব৷ মন্ত্রীসভাত সকলো জনগোষ্ঠীয়ে প্রতিনিধিত্ব লাভ কৰাৰ সম্ভাৱনাৰ কথা পূর্বে মুখ্যমন্ত্রীয়ে ঘোষণা কৰিছিল৷ একে সময়তে নির্বাচনৰ পূর্বে কংগ্রেছ এৰি বিজেপিলৈ অহা ভূপেন বৰা আৰু প্রদ্যুৎ বৰদলৈক এই মন্ত্রীসভাত অন্তর্ভুক্ত কৰাব নে নাই, সেয়া লক্ষণীয় হ’ব৷ সমান্তৰালভাৱে নতুন মুখ তথা যুৱপ্রজন্মৰ প্রতিনিধিকো মন্ত্রীসভাত স্থান দিয়াৰ সম্ভাৱনা যথেষ্ট৷ এনে অৱস্থাত শুকুৰবাৰে হ’ব লগা মন্ত্রীসভাৰ সম্প্রসাৰণক লৈ উৎকণ্ঠা এতিয়াও অব্যাহত আছে৷

The post কাইলৈ মুখ্যমন্ত্রী ড০ শর্মাৰ মন্ত্রীসভাৰ সম্প্ৰসাৰণ, সম্ভাব্য তালিকাত কোন কোন ? first appeared on নিয়মীয়া বাৰ্তা.

ডিজিটেল ডেস্ক, ৩০ মে’ : ৰাজ্যত আসন্ন জনগণনা সুচাৰুৰূপে সম্পন্ন কৰিবলৈ সকলোধৰণৰ প্রাৰম্ভিক প্রস্তুতি সম্পন্ন কৰিছে লোকপিয়ল সঞ্চালকালয়ে৷ ক’ভিড মহামাৰীৰ পৰিপ্রেক্ষিতত ৫ বছৰ পলমকৈ অহা ২ আগষ্টৰ পৰা আৰম্ভ হ’বলগীয়া লোকপিয়লত নিয়োজিত প্রায় ৮৫ হাজাৰ কর্মচাৰীলৈ ইতিমধ্যে বিশেষ নির্দেশনা জাৰি কৰা হৈছে৷ পার্ছনেল বিভাগৰ তৰফৰ পৰা শেহতীয়াকৈ জাৰি কৰা ইচিএফ ৭৬৮৭৫৯/১৫ নম্বৰৰ এক নির্দেশনাযোগে অহা বর্ষৰ ৩১ মার্চপর্যন্ত বদলিত বাধা–নিষেধ আৰোপ কৰিছে লোকপিয়লৰ দায়িত্ব দিয়া এই প্রায় ৮৫ হাজাৰ কর্মচাৰীৰ৷

প্রধানতঃ কেন্দ্রীয় গৃহ মন্ত্রালয়ৰ জৰুৰী পত্রৰ পিছতে সাধাৰণ প্রশাসন বিভাগৰ সচিব আৰু সকলো জিলা আয়ুক্তলৈ কর্মচাৰী বিভাগে উক্ত নির্দেশনা প্রেৰণ কৰে৷ নির্দেশনাটোৰ লগত কেন্দ্রীয় গৃহ মন্ত্রালয়ৰ পত্রখনো সংলগ্ণ কৰি দিয়া হৈছে৷ পত্রখনত উল্লেখ কৰা মতে, দেশৰ অন্যান্য ৰাজ্যসমূহৰ লগতে অসমতো লোকপিয়ল আইন–১৯৪৮ আৰু লোকপিয়ল অধিনিয়ম–১৯৯০ৰ অধীনত জনগণনা প্রক্রিয়া সম্পন্ন হ’ব৷ নির্ধাৰিত সূচী অনুসৰি ২ আগষ্টৰ পৰা ১৬ আগষ্টপর্যন্ত প্রতিটো পৰিয়ালৰ বিপৰীতে স্বগণনাৰ এক বিশেষ সময়সীমা স্থিৰ কৰা হৈছে৷ এই প্রক্রিয়াত আৰম্ভণিৰ দিনাই অর্থাৎ ২ আগষ্টতে মুকলি কৰি দিয়া হ’ব এটা ম’বাইল প’র্টেল৷ য’ত জনসাধাৰণে নিজেই লগ–ইন কৰি পৰিয়ালৰ সদস্য সংখ্যা, শিক্ষা, জীৱিকা, ঘৰৰ পৰিৱেশ–পৰিস্থিতি আদিৰ তথ্য দাখিল কৰিব পাৰিব৷ ইয়াৰ ১৫ দিন পাছত অর্থাৎ ১৭ আগষ্টৰ পৰা গণনাকাৰী বিষয়াসকলে জনসাধাৰণৰ ঘৰে ঘৰে গৈ দাখিল কৰা তথ্য সন্দর্ভত জৰীপ চলাব৷ ১৫ ছেপ্টেম্বৰলৈকে তথ্য পৰীক্ষাৰ কাৰণে ইতিমধ্যে প্রায় ৮৩,৫৩৫জন কর্মচাৰী নিযুক্তি দিয়া হৈছে৷ তদুপৰি ১,১০৯ ফিল্ড ট্রেইনাৰ আৰু ৫৯জন মাষ্টাৰ ট্রেইনাৰকো দায়িত্ব অর্পণ কৰিছে লোকপিয়ল সঞ্চালকালয়ে৷

ইতিমধ্যে বৃহস্পতিবাৰৰ পৰা গণনাকাৰী কর্মচাৰীসকলৰ প্রশিক্ষণ আৰম্ভ হৈছে৷ গুৰুত্বপূর্ণ কথাটো হ’ল যে লোকপিয়লৰ সম্পূর্ণ প্রক্রিয়াটো এইবাৰ ডিজিটেল পদ্ধতিৰে সম্পন্ন কৰা হ’ব৷ প্রথম পর্যায়ত হ’বলগীয়া গৃহ তালিকা প্রণয়নত থাকিব ৩৩টা প্রশ্ণ৷ ইতিমধ্যে কেন্দ্রীয় চৰকাৰৰ তৰফৰ পৰা এই প্রশ্ণসমূহ প্রস্তুত কৰা হৈছে৷ য’ত অন্তর্ভুক্ত হৈছে ম’বাইল ফোন, লেপটপ, ইণ্টাৰনেটৰ পৰা চাইকেল–বাইক সম্পর্কীয় বিষয়সমূহো৷ মূলতঃ কিধৰণৰ খাদ্যশস্য পৰিয়ালসমূহৰ ঘৰত ব্যৱহূত হয় সেই বিষয়েও গণনাকাৰী কর্মচাৰীসকলে তথ্য সংগ্রহ কৰিব৷ অকল সেয়াই নহয়, ইন্ধনৰ পৰা পানীৰ পর্যাপ্ত সুবিধা, ঘৰৰ নম্বৰ–অৱস্থা–মজিয়া মাটিৰ নে কংক্রিটৰ আদিও এই প্রশ্ণৰ তালিকাত অন্তর্ভুক্ত হৈছে৷ কোনখন ঘৰত কিমানজন লোকে বাস কৰে তেওঁলোক বিবাহিত নে অবিবাহিত সেয়াও গণনাত নিয়োজিত কর্মচৰীসকলে জৰীপকালত জানিব বিচাৰিব৷ তদুপৰি পৰিয়ালটোৰ মুৰব্বীজনৰ পৰা সংগ্রহ কৰিব তেওঁৰ ম’বাইল নম্বৰ৷ অৱশ্যে ম’বাইল নম্বৰ লোকপিয়ল সংক্রান্তীয় কামৰ বাবে লোৱা হ’ব বুলি কোৱা হৈছে৷

মন কৰিবলগীয়া যে এইবাৰৰ লোকপিয়লত জনসাধাৰণৰ বাসগৃহসমূহৰো জিঅ’ টেগিং কৰাৰ লগতে প্রতিটো ঘৰৰ পৰিচয়সূচক নম্বৰ প্রদান কৰা হ’ব৷ প্রথম পর্যায়ৰ এই প্রক্রিয়াটো সম্পন্ন হোৱাৰ পিছতে আগন্তুক ২০২৭ চনৰ ফেব্রুৱাৰী মাহত আৰম্ভ হ’ব দ্বিতীয় পর্যায়৷ তেতিয়া জনসাধাৰণৰ আর্থ–সামাজিক অৱস্থা তথা সংস্কৃতিসহ বিভিন্ন তথ্য সংগ্রহ কৰা হ’ব৷ এইবাৰ লোকপিয়লৰ উপৰি সামাজিক অৱস্থা আৰু জাতিগত গণনাসহ গৃহ পিয়লো অন্তর্ভুক্ত কৰা হৈছে৷ জাতিগত পিয়লৰ বাবে সম্প্রতি চলি আছে মডেলিটী প্রস্তুতৰ কাম৷ এই পর্যায়ত ৰাজ্যবাসীৰ বয়স, লিংগ, বৃত্তি, স্বাক্ষৰতা আৰু জাতিগত সবিশেষসহ ব্যক্তিগত তথ্যসমূহো আহৰণ কৰা হ’ব৷

প্রসংগক্রমে উল্লেখ কৰিব পাৰি যে ২০১১ চনৰ পাছত ২০২১ চনতে দেশত লোকপিয়ল হ’ব লাগিছিল৷ কিন্তু ক’ভিড মহামাৰীৰ পৰিপ্রেক্ষিতত সেয়া সম্ভৱপৰ নহ’ল৷ ইতিমধ্যে দেশৰ একাংশ ৰাজ্যত যোৱা এপ্রিল মাহতে লোকপিয়লৰ প্রথম পর্যায়ৰ কাম সম্পন্ন হৈছে৷ কিন্তু বিধানসভা নির্বাচনৰ কাৰণে অসমত ইয়াৰ সময়সূচী পিছুৱাই দিয়া হৈছিল৷ লোকপিয়ল সঠিকভাৱে সম্পন্ন কৰিবলৈ সংশ্লিষ্ট কর্তৃপক্ষই ৰীয়েল টাইম অর্থাৎ তাৎক্ষণিকভাৱে পর্যবেক্ষণৰ সুবিধার্থে ব্যাপক পৰিসৰত প্রযুক্তিগত পৰিকাঠামো গঢ়ি তুলিছে৷ তাৰ অংশস্বৰূপেই কেন্দ্রীয় গৃহ মন্ত্রালয়ৰ পত্রৰ আধাৰত লোকপিয়লত নিয়োজিত কর্মচাৰীসকলৰ বদলিত উক্ত নিষেধাজ্ঞা জাৰি কৰিছে বুলি দিছপুৰৰ এক শীর্ষ সূত্রত প্রকাশ৷

The post ৩১ মার্চলৈ ৮৫ হাজাৰ কর্মচাৰীৰ বদলিত বাধা, লোকপিয়লক লৈ ৰাজ্য চৰকাৰৰ গুৰুত্বপূর্ণ নির্দেশনা first appeared on নিয়মীয়া বাৰ্তা.

ডিজিটেল ডেস্ক, ২৯ মে’ : গুৱাহাটী উচ্চ ন্যায়ালয়ে আজি (২৯ মে’) জুবিন গাৰ্গ মৃত্যুকাণ্ডৰ গোচৰত জড়িত থকা শ্যামকানু মহন্তই দাখিল কৰা জামিন আবেদন নাকচ কৰে। শ্যামকানু মহন্তৰ অধিবক্তাসকলে দাখিল কৰা জামিন আবেদনৰ শুনানি ২২ মে’ত গ্ৰহণ কৰা একক বিচাৰপীঠে আজিৰ বাবে ৰায় সংৰক্ষণ কৰি ৰাখিছিল।

২০২৫ চনৰ ১৯ ছেপ্টেম্বৰত ছিংগাপুৰত জনপ্ৰিয় শিল্পীগৰাকীৰ কৰুণ মৃত্যুৰ ঘটনাত বিশেষ ফাষ্টট্ৰেক আদালতে পূৰ্বে তেওঁৰ জামিন আবেদন নাকচ কৰাৰ পিছত মহন্তই উচ্চ ন্যায়ালয়ৰ কাষ চাপিছিল। শুকুৰবাৰে ন্যায়াধীশ মিতালী ঠাকুৰীয়াৰ একক বিচাৰপীঠে এই জামিন আবেদনখনো নাকচ কৰে।

The post জুবিন গাৰ্গ হত্যাকাণ্ড গোচৰ : শ্যামকানু মহন্তৰ জামিন আবেদন নাকচ গুৱাহাটী উচ্চ ন্যায়ালয়ৰ first appeared on নিয়মীয়া বাৰ্তা.

ডিজিটেল ডেস্ক, ১২ মে’ : সদ্যসমাপ্ত বিধানসভা নিৰ্বাচনত অভিলেখ জনাদেশৰ পিছত দ্বিতীয়টো কাৰ্যকালৰ বাবে মুখ্যমন্ত্ৰী হিচাপে শপত গ্ৰহণ কৰিবলৈ সাজু হৈছে ড° হিমন্ত বিশ্ব শৰ্মা। মঙলবাৰে শপতগ্ৰহণৰ আৰম্ভণিতে মুখ্যমন্ত্ৰীগৰাকীয়ে শক্তিপীঠ মা কামাখ্যা ধাম আৰু মহাপুৰুষ শ্ৰীমন্ত শংকৰদেৱৰ চৰণত সেৱা জনাই আশীৰ্বাদ গ্ৰহণ কৰে ড০ শৰ্মাই ।

ছ’চিয়েল মিডিয়া প্লেটফৰ্ম এক্সত এটা পোষ্টত লিখিছে- ‘‘মা কামাখ্যা আৰু মহাপুৰুষ শ্ৰীমন্ত শংকৰদেৱৰ আশীৰ্বাদে প্ৰতিগৰাকী অসমবাসীৰ জীৱন আলোকিত কৰক আৰু শান্তি, প্ৰগতি, সমৃদ্ধিৰ নতুন বাট মুকলি কৰক। তেওঁলোকৰ আশীৰ্বাদেৰে অসমে অনাগত দিনত উন্নয়নৰ নতুন শিখৰ স্পৰ্শ কৰক ।’

ড০ হিমন্ত বিশ্ব শৰ্মা চৰকাৰৰ শপতগ্ৰহণৰ প্ৰতি লক্ষ্য ৰাখি গুৱাহাটী মহানগৰীৰ খানাপাৰাৰ পশু চিকিৎসা মহাবিদ্যালয় খেলপথাৰৰ বাকৰিত বিশাল আয়োজন কৰা হৈছে৷ এই অনুষ্ঠানত দেশৰ প্ৰধানমন্ত্ৰী নৰেন্দ্ৰ মোদী, কেন্দ্ৰীয় গৃহমন্ত্ৰী অমিত শ্বাহ, প্ৰতিৰক্ষা মন্ত্ৰী ৰাজনাথ সিং আৰু কেইবাখনো ৰাজ্যৰ মুখ্যমন্ত্ৰী উপস্থিত থাকিব বুলি জানিব পৰা গৈছে ।

The post মা কামাখ্যাৰ আশীৰ্বাদ লৈ শপতগ্ৰহণৰ বাবে সাজু ড০ হিমন্ত বিশ্ব শৰ্মা first appeared on নিয়মীয়া বাৰ্তা.

ডিজিটেল ডেস্ক, ১২ মে’ : ২৬ বছৰীয়া দীঘলীয়া ৰাজনৈতিক পৰিক্রমাক আগুৱাই নি আজি দ্বিতীয়বাৰৰ বাবে অসমৰ মুখ্যমন্ত্রী হিচাপে শপত ল’ব ড০ হিমন্ত বিশ্ব শর্মাই৷ ২০০১ চনত জালুকবাৰী সমষ্টিৰ পৰা বিধায়ক নির্বাচিত হৈ ৰাজনৈতিক জীৱনৰ পাতনি মেলা ড০ শর্মাই একেৰাহে দ্বিতীয়বাৰৰ বাবে অকংগ্রেছী চৰকাৰৰ মুখ্যমন্ত্রী পদত আজি অধিষ্ঠিত হ’ব৷ কার্যতঃ আজিপ শপতগ্রহণৰ বাবে সমগ্র দেশৰ দৃষ্টি নিবদ্ধ হৈছে অসমৰ ওপৰত৷ কার্যতঃ দেশৰ দ্বিতীয় ৰাজধানীত পৰিণত কৰি গুৱাহাটীত ৰাজনীতিৰ মহাতাৰকাৰ পৰা ঔদ্যোগপতিৰ সমাহাৰ ঘটিছে। প্রধানমন্ত্রী নৰেন্দ্র মোদী, গৃহমন্ত্রী অমিত শ্বাহ, প্রতিৰক্ষা মন্ত্রী ৰাজনাথ সিং, বিত্তমন্ত্রী নির্মলা সীতাৰমণ, জে পি নাড্ডা, শিৱৰাজ সিং চৌহানকে আদি কৰি কেন্দ্রীয় মন্ত্রীসভাৰ কেইবাগৰাকীও জ্যেষ্ঠ মন্ত্রীৰ লগতে শপতগ্রহণ অনুষ্ঠানৰ অতিথিৰূপে গুৱাহাটীত উপস্থিত হৈছে দেশৰ ২২গৰাকী মুখ্যমন্ত্রী, উপ–মুখ্যমন্ত্রী৷

উল্লেখ্য যে খানাপাৰাৰ পশু চিকিৎসা মহাবিদ্যালয় খেলপথাৰত আজি পুৱা ১১.৪০ বজাত ৰাজ্যপাল লক্ষ্মণ প্রসাদ আচার্যই ড০ শর্মাক মুখ্যমন্ত্রীৰূপে শপত বাক্য পাঠ কৰোৱাব৷ ইয়াৰ লগে লগে অসমৰ বাবে সৃষ্টি হ’ব এক ঐতিহাসিক দিন৷ দ্বিতীয়বাৰৰ বাবে মুখ্যমন্ত্রী হিচাপে অধিষ্ঠিত হ’ব লগা ড০ হিমন্ত বিশ্ব শর্মাৰ এই শপতগ্রহণ অনুষ্ঠানৰ সাক্ষী হ’ব সমগ্র দেশ৷ সদ্যসমাপ্ত নির্বাচনত বিৰোধীক বিধ্বস্ত কৰি ১০২খন আসনেৰে এনডিএৰ বিজয়ধ্বজা উৰুৱাবলৈ সক্ষম হোৱা ড০ শর্মাৰ এই বিজয়ৰ লগে লগে নিশ্চিত কৰিছিল দ্বিতীয়বাৰৰ বাবে মুখ্যমন্ত্রী হোৱাটো৷

মন কৰিবলগীয়া যে আজি ১১.৪০ বজাৰ সময় হ’ব ৰাজ্যবাসীৰ বাবে, ড০ হিমন্ত বিশ্ব শর্মাৰ বাবে মাহেন্দ্র ক্ষণ৷ শপতগ্রহণ অনুষ্ঠানৰ বাবে বাস্তু বিধি অনুসৰি খানাপাৰা খেলপথাৰত নির্মাণ কৰা হৈছে বিশেষ মঞ্চ৷ সমান্তৰালভাৱে শপতগ্রহণৰ বাবে নির্ধাৰণ কৰা হৈছে শুভ সময়৷ ১১.৪০ বজাৰ এই শুভ সময়তে শপত ল’ব ড০ শর্মাই৷

উল্লেখ্য যে চলিত বর্ষৰ ১২ মে’, মঙলবাৰৰ দিনটোৰ পুৱা ১১.৪০ বজাৰ পৰা ১২.৪৫ বজাৰ এই সময়ছোৱা হ’ল শুভ সময় তথা অভিজিৎ মুহূর্তৰ সৈতে মিলি যোৱা সময়৷ যিকোনো নতুন আৰু গুৰুত্বপূর্ণ কাম কৰাৰ বাবে ইয়াক দিনটোৰ আটাইতকৈ শুভ আৰু শক্তিশালী সময় বুলি গণ্য কৰা হৈছে৷ কৃষ্ণ পক্ষৰ দশমী তিথিৰ এই দিনটো আটাইতকৈ শুভ বুলি ইতিমধ্যে জ্যোতিষশাস্ত্রই কৰা বর্ণনা অনুসৰিয়েই আজি ১১.৪০ বজাত শপতবাক্য ল’ব মুখ্যমন্ত্রী ড০ শর্মাই৷

মন কৰিবলগীয়া যে দ্বিতীয়বাৰৰ বাবে মুখ্যমন্ত্রীৰূপে অধিষ্ঠিত হ’ব লগা ড০ শর্মাৰ শপতগ্রহণ অনুষ্ঠানৰ বাবে মা কামাখ্যা দেৱালয়, বটদ্রৱা থান আৰু ৰংঘৰৰ আর্হিত সজোৱা হৈছে বিশাল মঞ্চ৷ এই মঞ্চত প্রতিফলিত হ’ব অসমৰ সাতামপুৰুষীয়া কৃষ্টি–সংস্কৃতি তথা আধ্যাত্মিকতা৷ এই শুভক্ষণত মুখ্যমন্ত্রীক আশীর্বাদ দিবলৈ উপস্থিত থাকিব ৰাজ্যৰ একাধিক সত্রাধিকাৰ–গুৰুসকল৷ সমান্তৰালভাৱে অনুষ্ঠানৰ সাক্ষী হৈ ৰ’ব নিমন্ত্রিত তিনি কুৰিতকৈও অধিক বিশিষ্ট ব্যক্তি–মুখ্যমন্ত্রী, উপ–মুখ্যমন্ত্রী আৰু দলৰ জ্যেষ্ঠ নেতাসকল৷

আনহাতে, তৃতীয়বাৰৰ বাবে অসমত এনডিএ চৰকাৰ গঠনৰ এই শুভক্ষণত অংশ ল’বলৈ সোমবাৰে নিশা ১০.৩০ বজাত গুৱাহাটীত উপস্থিত হয় প্রধানমন্ত্রী নৰেন্দ্র মোদী৷ প্রধানমন্ত্রী মোদীৰ আগমনৰ পূর্বে গুৱাহাটীত উপস্থিত হয় গৃহমন্ত্রী অমিত শ্বাহ, প্রতিৰক্ষা মন্ত্রী ৰাজনাথ সিং, বিত্তমন্ত্রী নির্মলা সীতাৰমণ, কেন্দ্রীয় মন্ত্রী সর্বানন্দ সোণোৱাল, শিৱৰাজ সিং চৌহানকে ধৰি কেইবাজনো কেন্দ্রীয় মন্ত্রী৷

The post দেশক সাক্ষী কৰি আজি শপত ল’ব ড০ হিমন্ত বিশ্ব শর্মাই first appeared on নিয়মীয়া বাৰ্তা.

ডিজিটেল ডেস্ক, ১১ মে’ : সদ্যসমাপ্ত বিধানসভা নিৰ্বাচনত অভিলেখ জনাদেশৰ পিছত অসমৰ মুখ্যমন্ত্ৰী হিচাপে দ্বিতীয়বাৰৰ বাবে কাইলৈ (১২ মে’) গুৱাহাটীত শপত গ্ৰহণ কৰিব ড০ হিমন্ত বিশ্ব শৰ্মাই।

বৃহৎ আয়োজনেৰে এই শপতগ্ৰহণ অনুষ্ঠান কাইলৈ পুৱা ১১:৪০ বজাৰ পৰা আৰম্ভ হ’ব। অনুষ্ঠানত বহু ভিভিআইপি, ভিআইপি আৰু শীৰ্ষ উদ্যোগপতিয়ে অংশগ্ৰহণ কৰিব।

ৰাজ্যপাল লক্ষ্মণ প্ৰসাদ আচার্যই ড০ শৰ্মা আৰু তেওঁৰ মন্ত্ৰীসভাৰ সদস্যসকলক পদ আৰু গোপনীয়তাৰ শপতবাক্য পাঠ কৰাব। যদিও মুখ্যমন্ত্ৰী ড০ শৰ্মাৰ সৈতে কিমানজন মন্ত্ৰীয়ে শপত ল’ব, সেয়া এতিয়াও স্পষ্ট হোৱা নাই।

প্ৰধানমন্ত্ৰী নৰেন্দ্ৰ মোদী, কেন্দ্ৰীয় গৃহমন্ত্ৰী অমিত শ্বাহ আৰু প্ৰতিৰক্ষা মন্ত্ৰী ৰাজনাথ সিঙে ড০ শৰ্মা আৰু তেওঁৰ মন্ত্ৰীসভাৰ শপতগ্ৰহণ অনুষ্ঠানত উপস্থিত থাকিব। লগতে কেইবাজনো কেন্দ্ৰীয় মন্ত্ৰী, বিজেপিৰ ৰাষ্ট্ৰীয় সভাপতি নীতিন নবীন আৰু এনডিএশাসিত ২১খন ৰাজ্যৰ মুখ্যমন্ত্ৰীও উপস্থিত থকাৰ সম্ভাৱনা আছে।

অতিথিৰ তালিকাত শীৰ্ষ উদ্যোগপতি গৌতম আদানিৰ পুত্ৰ জিত আদানি আৰু সজ্জন জিন্দালৰ নামো অন্তৰ্ভুক্ত আছে। আনহাতে, ৰিলায়েন্স ইণ্ডাষ্ট্ৰিজৰ অধ্যক্ষ মুকেশ আম্বানী আৰু টাটা ট্ৰাষ্টৰ অধ্যক্ষই অহা সপ্তাহত গুৱাহাটী ভ্ৰমণ কৰাৰ সম্ভাৱনা আছে বুলি জানিব পৰা গৈছে।

শীৰ্ষ অতিথিসকলৰ উপৰি বহু বিশিষ্ট বৈষ্ণৱ পণ্ডিত আৰু এক লাখতকৈ অধিক লোকৰ সমাগম হোৱাৰ সম্ভাৱনা আছে এই অনুষ্ঠানত।

অনুষ্ঠানৰ মূল থীম হ’ব অসমৰ সমৃদ্ধ ঐতিহ্যৰ প্ৰতি সন্মান জনোৱা। মূল মঞ্চ মা কামাখ্যা মন্দিৰ, বটদ্ৰৱা থান আৰু ঐতিহাসিক ৰংঘৰৰ স্থাপত্যশৈলীৰ আধাৰত সুন্দৰভাৱে নিৰ্মাণ কৰা হৈছে, যিয়ে ৰাজ্যখনৰ আধ্যাত্মিক আৰু ঐতিহ্যবাহী সংস্কৃতিক প্ৰতিফলিত কৰিছে।

ইফালে, শপতগ্ৰহণ অনুষ্ঠানক লৈ গুৱাহাটীত কটকটীয়া নিৰাপত্তা ব্যৱস্থা গ্ৰহণ কৰা হৈছে। প্ৰধানমন্ত্ৰী মোদী আজি নিশা ১০:২৫ বজাত গুৱাহাটী বিমানবন্দৰত উপস্থিত হোৱাৰ কথা। আনহাতে, প্ৰতিৰক্ষা মন্ত্ৰী ৰাজনাথ সিং আজি সন্ধিয়া ৫ বজাত গুৱাহাটীত উপস্থিত হ’ব বুলি আশা কৰা হৈছে।

আমন্ত্ৰিত অতিথিসকলক লৈ ৩০খনতকৈ অধিক চাৰ্টাৰ্ড বিমান গুৱাহাটীত অৱতৰণ কৰাৰ সম্ভাৱনা আছে, যাৰ জৰিয়তে দেশৰ বিভিন্ন প্ৰান্তৰ নেতা আৰু বিশিষ্ট ব্যক্তিসকল উপস্থিত হ’ব।

The post ভব্য আয়োজনেৰে কাইলৈ ড০ হিমন্ত বিশ্ব শৰ্মাৰ শপতগ্ৰহণ, অতিথিৰ তালিকাত কোন কোন ? first appeared on নিয়মীয়া বাৰ্তা.