ডিজিটেল ডেস্ক, ৩ জুলাই : উত্তৰ প্ৰদেশৰ কৌশাম্বী জিলাত এক ভয়ংকৰ পথ দুৰ্ঘটনা সংঘটিত হয়। নিয়ন্ত্ৰণ হেৰুৱাই এখন এলপিজি টেংকাৰে ৰাজপথৰ টোল প্লাজাৰ ডিভাইডাৰত খুন্দা মৰাৰ লগে লগে প্ৰচণ্ড বিস্ফোৰণ ঘটে। মুহূৰ্ততে টেংকাৰখন, টোল প্লাজা আৰু কাষৰীয়া বিস্তীৰ্ণ এলেকা জুইৰ কবলত পৰে। এই ঘটনাত ৫জন লোকৰ মৃত্যু হোৱাৰ লগতে কেইবাজনো আহত হয়। দুৰ্ঘটনাৰ এক ভিডিঅ’ শেহতীয়াকৈ সামাজিক মাধ্যমত ভাইৰেল হৈ পৰিছে।

ভয়ানক এই দুৰ্ঘটনাটো ২৬ জুনত সংঘটিত হৈছিল যদিও শেহতীয়াকৈ ঘটনাটোৰ চি চি টিভি ফুটেজ পোহৰলৈ আহিছে। ফুটেজত টেংকাৰখন তীব্ৰগতিত আহি ডিভাইডাৰত খুন্দা মৰাৰ পিছতেই ভয়ংকৰ অগ্নিকাণ্ড সংঘটিত হোৱা দৃশ্য ধৰা পৰিছে। ভাইৰেল হোৱা ২৪ ছেকেণ্ডৰ ভিডিঅ’টোত দেখা যায় যে এলপিজি টেংকাৰখন টোল প্লাজাৰ দিশে আগবাঢ়ি আহি একেবাৰে ওচৰ পাওঁতেই চালকে নিয়ন্ত্ৰণ হেৰুৱায়। তাৰ পিছতেই প্ৰচণ্ড সংঘৰ্ষৰ লগে লগে এক ভয়ংকৰ বিস্ফোৰণ ঘটে। বিস্ফোৰণৰ ফলত টেংকাৰৰ গেছ চাৰিওফালে বিয়পি পৰাত জুই বহু দূৰলৈকে বিয়পি যায়। জানিব পৰা মতে, টেংকাৰখন কানপুৰৰ পৰা প্ৰতাপগড়লৈ গৈ আছিল।

খবৰ পোৱাৰ লগে লগে পুলিচ আৰু অগ্নিনিৰ্বাপক বাহিনী ঘটনাস্থলীত উপস্থিত হয়। অগ্নিনিৰ্বাপক বাহিনীৰ কেইবাখনো বাহনে বহু চেষ্টা চলাই জুই নিয়ন্ত্ৰণলৈ আনে। এই দুৰ্ঘটনাত ৪০ বছৰীয়া টেংকাৰ চালক ধৰ্মেন্দ্ৰ ডুবে আৰু টোল প্লাজাৰ কৰ্মচাৰী অলোক সিঙৰ ঘটনাস্থলীতে মৃত্যু হয়। তেওঁলোক জুইত সম্পূৰ্ণৰূপে দগ্ধ হয়। ইয়াৰ উপৰি টোল প্লাজাৰ আন কেইবাজনো কৰ্মচাৰী গুৰুতৰভাৱে দগ্ধ হয়। সংকটজনক অৱস্থাত তেওঁলোকক চিকিৎসালয়ত ভৰ্তি কৰোৱা হৈছিল। চিকিৎসাধীন অৱস্থাত তেওঁলোকৰ মাজৰ আন তিনিজনৰো মৃত্যু হয়। দুৰ্ঘটনাত টোল প্লাজাৰ কাষত থকা ১৬খন মটৰচাইকেল আৰু দুখন গাড়ী সম্পূৰ্ণৰূপে জ্বলি ছাই হৈ যায়। ঘটনা সন্দৰ্ভত আৰক্ষীৰ তদন্ত অব্যাহত আছে।

The post ভয়ানক পথ দুৰ্ঘটনাত গেছভৰ্তি এলপিজি টেংকাৰ বিস্ফোৰণ, নিহত ৫ first appeared on নিয়মীয়া বাৰ্তা.

ডিজিটেল ডেস্ক, ৩ জুলাই : পাকিস্তানৰ দক্ষিণ-পশ্চিমাঞ্চলত শুকুৰবাৰে সংঘটিত এক ভয়াৱহ পথ দুৰ্ঘটনাত ৪০জন লোকৰ মৃত্যু হোৱাৰ লগতে আঠজন আহত হৈছে। তীব্ৰ বেগেৰে আৰু ক্ষমতাতকৈ অধিক যাত্ৰী কঢ়িয়াই নিয়া এখন বাছ নিয়ন্ত্ৰণ হেৰুৱাই গভীৰ খাৱৈত বাগৰি পৰে। শেহতীয়া বছৰসমূহৰ ভিতৰত এইটো পাকিস্তানৰ অন্যতম ভয়াৱহ পথ দুৰ্ঘটনা হিচাপে গণ্য কৰা হৈছে।

এই দুৰ্ঘটনা দানা ছৰ অঞ্চলত সংঘটিত হয়। এই অঞ্চলটো বেলুচিস্তান আৰু খাইবাৰ পাখতুনখোৱা প্ৰদেশৰ সীমান্তৰ ওচৰৰ এক দুৰ্গম এলেকা। বাছখনৰ তীব্ৰ বেগৰ বাবে চালকে নিয়ন্ত্ৰণ হেৰুওৱাৰ পিছত বাছখন পোনে পোনে গভীৰ খাৱৈত বাগৰি পৰে।

উল্লেখ্য যে আন এখন যান্ত্ৰিক বিজুতিৰ ফলত বেয়া হোৱা বাছৰ যাত্ৰীসকলে দুৰ্ঘটনাগ্ৰস্ত বাছখনত যাত্ৰা কৰিছিল। ফলত বাছখনত ক্ষমতাতকৈ অধিক যাত্ৰীয়ে যাত্ৰা কৰিছিল। প্ৰশাসনে বৰ্তমান নিহতসকলৰ পৰিচয় নিশ্চিত কৰাৰ কামত ব্যস্ত আছে।

পাকিস্তানৰ ৰাষ্ট্ৰপতি আছিফ আলী জৰ্দাৰীয়ে এই দুৰ্ঘটনাত গভীৰ শোক প্ৰকাশ কৰি নিহতসকলৰ পৰিয়ালবৰ্গলৈ সমবেদনা জ্ঞাপন কৰিছে। লগতে তেওঁ আহতসকলৰ দ্ৰুত আৰোগ্য কামনা কৰি সংশ্লিষ্ট কৰ্তৃপক্ষক তেওঁলোকক সৰ্বোত্তম চিকিৎসা সুবিধা প্ৰদান কৰিবলৈ নিৰ্দেশ দিছে।

The post পাকিস্তানত ভয়াৱহ দুৰ্ঘটনাত ৪০জন যাত্ৰীৰ মৃত্যু, আহত আঠজন first appeared on নিয়মীয়া বাৰ্তা.

ডিজিটেল ডেস্ক, ৩০ জুন : গ্রীষ্মপ্রবাহত উতলিছে সমগ্র ইউৰোপ৷ যোৱা এসপ্তাহ ধৰি চলা প্রচণ্ড গ্রীষ্মপ্রৱাহৰ ফলত ইউৰোপত এইপর্যন্ত ১,৩০০ৰো অধিক লোকৰ মৃত্যু ঘটিছে৷ তাৰ ভিতৰত কেৱল ফ্রান্সতেই মৃত্যু হৈছে প্রায় ১,০০০জনৰ৷

যোৱা ২১ জুনৰ পৰা ইউৰোপৰ বিভিন্ন দেশত সৃষ্টি হৈছে গ্রীষ্মপ্রবাহৰ পৰিস্থিতি৷ জার্মানী, ফ্রান্স, ডেনমার্ক, চেক প্রজাতন্ত্র, হাংগেৰী, পোলেণ্ড, শ্ল’ভাকিয়া, ছার্বিয়া, ক্র’ৱেছিয়া, ইটালী, অষ্ট্রিয়া আৰু পশ্চিম ইউক্রেইনসহ ইউৰোপৰ বিস্তীর্ণ অঞ্চল গ্রীষ্মপ্রবাহৰ কবলত৷ পাৰাস্তম্ভ কেতিয়াবা যদি ৩৫ ডিগ্রী, কেতিয়াবা ৪০ ডিগ্রী৷ কেতিয়াবা আকৌ তাতোকৈ অধিক৷ এনে অৱস্থাত দেওবাৰে বিশ্ব স্বাস্থ্য সংস্থাই জনাইছে যে ২১ জুনৰ পৰা এইপর্যন্ত গ্রীষ্মপ্রবাহৰ কাৰণে ইউৰোপত ১,৩০০জনৰো অধিক লোক মৃত্যুমুখত পৰিছে৷

যোৱা কিছুদিনত ইউৰোপৰ বিভিন্ন দেশৰ পৰা মৃত্যুৰ খবৰ আহিবলৈ আৰম্ভ কৰিছে৷ এনে অৱস্থাত স্বাস্থ্যসেৱাৰ ওপৰত অতিৰিক্ত হেঁচা পৰিব পাৰে বুলি ধাৰণা কৰা হৈছে৷ সেইবাবে এনে দেশসমূহক পৰিস্থিতি চম্ভালাৰ বিষয়ে আৰু অতিৰিক্ত হেঁচাৰ বিষয়ে সতর্ক কৰি দিছে বিশ্ব স্বাস্থ্য সংস্থাৰ মুৰব্বী টেড্রছ এডানম গেব্রিয়েছাছে৷ তেওঁ কয়– ‘ইউৰোপৰ ঘৰ–গৃহস্থালি, অফিচ আৰু শিক্ষা প্রতিষ্ঠানসমূহ এই ধৰণৰ তাপমাত্রাৰ (সহ্য কৰাৰ) বাবে সাজু হোৱা নাই৷’ এনে অৱস্থাত পৰিস্থিতি আৰু অধিক জটিল হ’ব পাৰে বুলি আশংকা প্রকাশ কৰে তেওঁ৷ উদ্ভুত পৰিস্থিতিত ইউৰোপৰ বিভিন্ন প্রান্তত সংগ্রহালয় আৰু বিদ্যালয়সমূহ ইতিপূর্বে বন্ধ কৰি দিয়া হৈছে৷

ফ্রান্সৰ স্বাস্থ্য মন্ত্রালয়ে দেওবাৰে জনাইছে যে তীব্র গ্রীষ্মপ্রবাহৰ ফলত দেশখনত এহাজাৰজনৰো অধিক লোক মৃত্যুমুখত পৰিছে৷ প্রাথমিক তথ্যৰ ভিত্তিত তেওঁ জনাইছে যে মৃতসকলৰ ভিতৰত বেছিভাগেই বয়সস্থ লোক৷ গ্রীষ্মপ্রবাহৰ পৰিস্থিতিয়ে আবাল বৃদ্ধ–বনিতা সকলো লোকৰ ওপৰতেই প্রভাৱ পেলাইছে৷ কিন্তু মৃতসকলৰ বেছিভাগৰেই বয়স ৬৫ বছৰ বা ততোধিক বুলি জনাইছে ফ্রান্সৰ স্বাস্থ্য কর্তৃপক্ষই৷ এনে পৰিস্থিতিৰ পৰা এতিয়াই নিস্তাৰ পোৱাৰ লক্ষণ দেখা নাই ইউৰোপবাসীয়ে৷

ফ্রান্সৰ স্বাস্থ্যমন্ত্রী ষ্টেফানি ৰিষ্টে জনায় যে আৰু ১০ দিন ধৰি চলিব পাৰে এনে গ্রীষ্মপ্রবাহ৷ দেওবাৰেও ইউৰোপৰ বিভিন্ন ঠাইত তাপমাত্রা ৪০ ডিগ্রীৰ ওপৰত আছিল৷ চেক প্রজাতন্ত্রৰ ৰাজধানী প্রাগৰ উত্তৰ দিশৰ ডকছানিত সেইদিনা তাপমাত্রা আছিল ৪১.১ ডিগ্রী চেলছিয়াছ৷ জার্মানীতো বহু ঠাইত তাপমাত্রা আছিল ৪০ ডিগ্রীৰ অধিক৷ তীব্র গৰম অনুভূত হৈছে চেক প্রজাতন্ত্র, হাংগেৰী আৰু পোলেণ্ডৰ বিস্তীর্ণ অঞ্চলতো৷ আনকি ৰাতিৰ ভাগতো তাপমাত্রা বিশেষ কমা নাই৷ শনিবাৰে ৰাতি জার্মানীৰ পূর্বাঞ্চলীয় চহৰ কুবছুটজৰ তাপমাত্রা ২৯.৪ ডিগ্রী চেলছিয়াছৰ তললৈ নানামিল৷ বার্লিনত ইতিমধ্যে প্রশাসনৰ তৰফৰ পৰা সাধাৰণ নাগৰিকে সকাহ লাভ কৰাৰ বাবে বিভিন্ন ঠাইত পানী ছটিওৱাৰ দিহা কৰিছে৷

The post প্রচণ্ড গ্রীষ্মপ্রবাহত উতলিছে ইউৰোপ, মৃতকৰ সংখ্যা ১,৩০০লৈ বৃদ্ধি first appeared on নিয়মীয়া বাৰ্তা.

ডিজিটেল ডেস্ক, ৩০ জুন : একেৰাহে চাৰি দিনৰ আক্রমণ–প্রত্যাক্রমণৰ পিছত অৱশেষত যুদ্ধ বন্ধ কৰিবলৈ সন্মত হৈছে ইৰান আৰু আমেৰিকাৰ বাহিনী৷ মার্কিন বিষয়াৰ উদ্ধৃতিৰে এই কথা জনাইছে দুয়ো দেশৰ সংবাদ মাধ্যমে৷

মঙলবাৰে কাটাৰত দুয়োখন দেশৰ প্রতিনিধিবর্গৰ মাজত পুনৰ আলোচনা অনুষ্ঠিত হ’ব৷ স্বাক্ষৰিত বুজাবুজি চুক্তিৰ চর্ত অনুসৰি হৰমুজ প্রণালীৰে আপাততঃ বাধাহীনভাৱে জাহাজ চলাচল কৰিব পাৰিব বুলি জনাইছে মার্কিন বিষয়াসকলে৷ যোৱা বৃহস্পতিবাৰে হৰমুজৰ ওচৰৰ ওমান উপকূলত ছিংগাপুৰৰ পতাকাবাহী এখন জাহাজ আক্রান্ত হয়৷ আমেৰিকাই দাবী কৰে যে ইৰানেই জাহাজখনত আক্রমণ চলাইছে৷ এই অভিযোগ অস্বীকাৰ কৰি ইৰানেও এই আক্রমণৰ দায় ওলোটাই মার্কিন বাহিনীৰ ওপৰত জাপি দিয়ে৷ আমেৰিকাই তাৰ প্রত্যুত্তৰত ইৰানৰ কেইবাটাও ঘাটিক লক্ষ্য কৰি বোমাবর্ষণ কৰে৷ তাৰ প্রত্যুত্তৰত পশ্চিম এছিয়াত মার্কিন ঘাটিসমূহলৈ লক্ষ্য কৰি আক্রমণ চলায় তেহৰানেও৷ কুৱেইট আৰু বাহৰেইনত তেওঁলোকে বোমাবর্ষণ কৰে৷ এই সংঘর্ষ চলে শনিবাৰপর্যন্ত৷

হৰমুজত পানামাৰ পতাকাবাহী এখন তেলৰ টেংকাৰতো আক্রমণ হয় এই সময়ছোৱাত৷ এই আক্রমণ–প্রত্যাক্রমণৰ মাজতে দুয়োপক্ষই যুদ্ধ ৰোধ কৰিবলৈ সন্মত হৈছে বুলি দাবী কৰে ৱাশ্বিংটনে৷ মার্কিন বিষয়াৰ ভাষাত– ‘বুজাবুজিৰ চুক্তি অনুসৰি প্রযুক্তিগত আলোচনা চলিছে৷ আপাততঃ দুয়োপক্ষই সংঘর্ষৰ পৰা আঁতৰি আহিব আৰু জাহাজসমূহে বিনা বাধাই যাতায়াত কৰিব পাৰিব৷’ আমেৰিকা–ইৰানৰ মাজত শান্তি স্থাপনৰ ক্ষেত্রত পাকিস্তানৰ সৈতে অন্যতম মধ্যস্থতাকাৰীৰ ভূমিকা লৈছে কাটাৰে৷ মঙলবাৰে তাতেই দুয়োখন দেশৰ প্রতিনিধিসকলে আলোচনাত বহিব৷ কাৰিকৰী স্তৰত যুদ্ধবিৰতি চুক্তিৰ বাস্তৱায়ন সম্পর্কত আলোচনা হ’ব৷ যুদ্ধবিৰতিৰ অন্যতম চর্ত হিচাপে ইজৰাইলৰ আগ্রাসন বন্ধৰ দাবী জনাইছিল ইৰানে৷ কিন্তু ইজৰাইলে তাক উলংঘা কৰা বিষয়টোেৱও এই আলোচনাত ঠাই পাব৷

The post অৱশেষত যুদ্ধ বন্ধ কৰিবলৈ সন্মত ইৰান-আমেৰিকা first appeared on নিয়মীয়া বাৰ্তা.

ডিজিটেল ডেস্ক, ২৯ জুন : আগ্রাসী ৰঙা চীনৰ আন এক ভয়ংকৰ ভাৰতবিৰোধী ষড়যন্ত্র উন্মোচিত হৈছে৷ মেকমোহন লাইনৰ সিপাৰতে দুষ্কার্য অব্যাহত নাৰাখি অৰুণাচল প্রদেশ সীমান্তত ভাৰতৰ ভূখণ্ডত বেদখল চলাইছে চীনৰ পিপল্ছ লিবাৰেচন আর্মী (পিএলএ)–এ৷ ইয়াৰ বিস্ফোৰক তথ্যসম্বলিত এখন পত্র যোৱা ২৬ জুনত উজনি সোৱণশিৰি জিলাৰ উপায়ুক্তক প্রদান কৰে অৰুণাচল প্রদেশৰ নাগৰিক সমাজৰ এটা সংগঠন নাহ ৱেলফেয়াৰ ছ’চাইটী (এন ডব্লিউ এছ)ৰ সভাপতি কেৰু চাডেৰে৷ য’ত চীনৰ আগ্রাসনৰ বিৰুদ্ধে কেন্দ্র–ৰাজ্য চৰকাৰৰ তাৎক্ষণিক হস্তক্ষেপৰ ক্ষেত্রত জিলা উপায়ুক্তক পদক্ষেপ গ্রহণ কৰিবলৈ দাবী জনোৱা হৈছে৷

পত্রখনত উল্লেখ কৰা অনুসৰি অৰুণাচল প্রদেশৰ টকছিং চার্কোলৰ অন্তর্গত সীমান্তৱর্তী কেতবোৰ নতুন আৰু গুৰুত্বপূর্ণ স্থান বেদখল কৰি চীনে অতি দ্রুতগতিৰে সম্প্রসাৰিত কৰিছে নিজৰ ভূখণ্ড৷ বেদখলকৃত এনে কেতবোৰ স্থানত ইতিমধ্যে ড্রেগন বাহিনীয়ে সামৰিক ঘাটি স্থাপন কৰাৰ লগতে পথ–দলঙো নির্মাণ কৰিছে৷ এই বিষয়টো উনুকিয়াই পত্রখনত অতি স্পষ্টভাৱে লিখা হৈছে যে আমাৰ পৈতৃক ভূমি য’ত আমি মাত্র কেইটামান বছৰ আগলৈকে অবাধে বিচৰণ কৰিছিলোঁ, চিকাৰ কৰিছিলোঁ আৰু বনজ সম্পদ সংগ্রহ কৰিছিলোঁ, সেই অঞ্চলসমূহ সম্প্রতি চীনৰ সৈন্য বাহিনী পিএলএৰ দখলত৷ বিশেষকৈ বিগত ১০–১৫ বছৰত সীমান্তৱর্তী এলেকাত পিএলএৰ কার্যকলাপ বৃদ্ধি হৈছে বুলি এনডব্লিউএছে উল্লেখ কৰে৷ এনে অৱস্থাত পিএলএৰ শেহতীয়া তৎপৰতাৰ লগে লগে ভাৰতে আৰু অধিক ভূখণ্ড হেৰুওৱাৰো সংগঠনটোৱে আশংকা ব্যক্ত কৰে পত্রখনত৷

এই প্রসংগতে ৫টা গুৰুত্বপূর্ণ স্থানৰ বিষয়ে বিশেষভাৱে উল্লেখ কৰা হৈছে৷ এইকেইটা হ’ল–টকছিং সদৰৰ সমীপৱর্তী আছাফিলাৰ অ’য়িং–চুজার্টাৰ পানিয়াৰ–মাৰানাফেৰ মাৰপান–পোট্রাং হ্রদ–টিনডিংটাঙ টিজি৷ এনডব্লিউএছে কৰা অভিযোগ অনুসৰি, ২০২০ চনৰ আগলৈকে উক্ত স্থানকেইটা ভাৰত ভূখণ্ডৰ অধীনতেই আছিল৷ কিন্তু এতিয়া পিএলএই দখল কৰি লোৱাৰ সমান্তৰালভাৱে তাত সামৰিক ঘাটি স্থাপন আৰু পথ-দলং নির্মাণ কৰিছে৷ তদুপৰি পৱিত্র তীর্থস্থান থকা চাৰি অঞ্চলৰ কেতবোৰ স্থানো বেদখল কৰিছে চীনে৷

আটাইতকৈ গুৰুত্বপূর্ণ কথাটো হ’ল চীনৰ ভূখণ্ড সম্প্রসাৰণ তথা বেদখলৰ পৰিণতিত সীমান্তৱর্তী অঞ্চলত বসবাস কৰা স্থানীয় জনগোষ্ঠীৰ জীৱন আৰু নিৰাপত্তালৈ ভাবুকি নামি আহিব পাৰে বুলি পত্রখনত আশংকা ব্যক্ত কৰা হয়৷ এনে অৱস্থাত নাগৰিক সংগঠনটোৱে চীনৰ কার্যকলাপ অব্যাহত থাকিলে স্থানীয় লোকসকলৰ জীৱিকা আৰু পৰম্পৰাগত যাতায়াতৰ ওপৰত বিৰূপ প্রভাৱ পৰিব বুলি সতর্ক কৰি দিয়ে৷

পত্রখনত লিখা হৈছে যে টকছিঙত পিএলএৰ কার্যকলাপৰ উদ্দেশ্য আৰু গতিবিধি অত্যন্ত ভাবুকিপূর্ণ আৰু গভীৰ চিন্তাৰ বিষয়৷ আমি তেওঁলোকৰ বাবে প্রতিদিনে ইঞ্চি ইঞ্চিকৈ ভূমি হেৰুৱাইছোঁ৷ স্থানীয় জনগোষ্ঠীসমূহে প্রজন্মৰ পিছত প্রজন্ম ধৰি অবাধে ব্যৱহাৰ কৰা পূর্বপুৰুষৰ চিকাৰথলী আৰু গো–চৰণীয়া পথাৰসমূহ এতিয়া পিএলএই দখল কৰিছে৷

লক্ষণীয়ভাৱে ভাৰতীয় সেনা বাহিনীৰ প্রতি এনডব্লিউএছে গভীৰ আস্থা ব্যক্ত কৰিছে যদিও পত্রখনত এক তাৎপর্যপূর্ণ বিষয় উল্লেখ কৰিছে৷ কোৱা হৈছে যে ভাৰতীয় সেনাৰ ওপৰত আমাৰ কোনো সন্দেহ নাই৷ আমাৰ সদায়ে তেওঁলোকৰ প্রতি বিশ্বাস আছে৷ তেওঁলোকে বহু বছৰ ধৰি আমাৰ ভূমিত পহৰা দি আছে৷ কিন্তু তেওঁলোকৰ এই পদক্ষেপ যথেষ্ট নহয়৷ সংগঠনটোৱে পত্রখনৰ সৈতে প্রমাণ হিচাপে কিছুসংখ্যক ফটো সংলগ্ণ কৰি দিছে৷ লগতে নিজ ভূমিৰ সুৰক্ষাৰ হকে টকছিং চার্কোলৰ জনসাধাৰণৰ হৈ তাৎক্ষণিকভাৱে চৰকাৰ–প্রশাসনক ব্যৱস্থা গ্রহণ কৰিবলৈ আহ্বান জনায়৷ এতিয়া সমগ্র বিষয়টোক অৰুণাচল প্রদেশ–কেন্দ্র চৰকাৰে কিদৰে গ্রহণ কৰে সেয়া লক্ষণীয় হ’ব৷

The post অৰুণাচল সীমান্তৰ ভাৰত ভূখণ্ডত বেদখল চীনৰ first appeared on নিয়মীয়া বাৰ্তা.

ডিজিটেল ডেস্ক, ২৮ জুন : বছৰটোৰ আৰম্ভণিতে জানিব পৰা গৈছিল যে দেশত প্রথম হাইড্র’জেন ইঞ্জিনচালিত ৰে’ল যাত্রীসেৱা আৰম্ভ কৰা হ’ব৷ এইবাৰ হাৰিয়ানাৰ ঝিন্দ–শোনিপট পথত সম্পন্ন হ’ল চূড়ান্ত হাইস্পীড ট্রায়েল৷

জানিব পৰা মতে, সর্বাধিক ১২০ কিঃমিঃ প্রতিঘণ্টাত গতি কৰিছে ৰে’লখনে৷ ইতিমধ্যে নেট বিশ্বত বিয়পি পৰিছে এই ৰে’লখনৰ ট্রায়েলৰ ভিডিঅ’৷ ট্রায়েলৰ সাফল্যক এক গুৰুত্বপূর্ণ পদক্ষেপ হিচাপে দেখা গৈছে৷ ধাৰণা কৰা হৈছে এইবাৰ সমগ্র দেশতে এই ৰে’লৰ যাত্রীসেৱা আৰম্ভ কৰাত আৰু কোনো সমস্যা নাই৷ এই ৰে’লেই বিশ্বৰ দীর্ঘতম আৰু আটাইতকৈ শক্তিশালী হাইড্র’জেনচালিত ব্রডগেজ ৰে’ল হ’বলৈ আগবাঢ়িছে৷ এইক্ষেত্রত ৰে’লখনৰ প্রথমটো পথ হ’ব ঝিন্দ–শোনিপট পথটোৱেই৷ বাস্তৱ কর্মপৰিৱেশত নতুন প্রযুক্তিটো পৰীক্ষা কৰাৰ বাবে উপযুক্ত হিচাপে বিবেচনা কৰিয়েই এই ৰে’লখন এইটো পথত চলোৱা হৈছে৷

জানিব পৰা মতে, হাইড্র’জেন ফুৱেল–চেল প্রযুক্তিয়ে হাইড্র’জেন আৰু অক্সিজেনৰ মাজত ৰাসায়নিক বিক্রিয়াৰ মাধ্যমেৰে বিদ্যুৎ উৎপাদন কৰে৷ ইয়াৰ ফলতে পোনপটীয়া নির্গমন হিচাপে কেৱল জলীয়া বাষ্প উৎপন্ন হয়৷ প্রচলিত ডিজেলচালিত ৰে’লৰ তুলনাত ই বহু বেছি পৰিচ্ছন্ন বিকল্প৷ লগতে শব্দ আৰু বায়ু প্রদূষণ হ্রাসৰ ক্ষেত্রতো ই সহায় কৰিব৷ ফলত সম্প্রতি হাইড্র’জেন ট্রেইনক লৈ বহু বেছি বৃদ্ধি পাইছে প্রত্যাশা৷ বিশ্বৰ পঞ্চমখন দেশ হিচাপে হাইড্র’জেন ট্রেইন চলোৱাৰ গৌৰৱ অর্জন কৰিব ভাৰতে৷

চেন্নাইৰ ইণ্টেগ্রেল কোচ ফেক্টৰীত এই ট্রেইনখন নির্মাণ কৰা হৈছে৷ তাতেই ট্রায়েল ৰানো সম্পন্ন কৰা হৈছে৷ এইবাৰ সম্পন্ন হ’ল স্পীড ট্রায়েল৷ এতিয়া মাথোঁ অপেক্ষা কেতিয়ালৈ সেই অত্যাধুনিক ট্রেইনখন সাধাৰণ জনতাৰ সেৱাৰ বাবে প্রৱর্তন কৰা হ’ব৷

বিশেষজ্ঞসকলৰ মতে, দেশত পর্যটন উদ্যোগক নতুন মাত্রা প্রদান কৰিব এই হাইড্র’জেন ট্রেইনে৷ ইতিপূর্বে এই দাবী কৰিছিল কেন্দ্রীয় ৰে’লমন্ত্রী অশ্বিনী বৈষ্ণৱেও৷ ৰাজ্যসভাত তেওঁ জনাইছিল যে ‘হাইড্র’জেন ফৰ হেৰিটেজ’ৰ উদ্যোগত সমগ্র দেশতে সকলো মিলি ৩৫খন হাইড্র’জেন ট্রেইন চলোৱা হ’ব৷ পাইলট প্রজেক্টত আপাততঃ হাৰিয়ানাৰ ঝিন্দৰ পৰা শোনিপট পর্যন্ত চলিব এই ট্রেইন৷ পিছলৈ বিভিন্ন পথত হাইড্র’জেন ট্রেইন চলোৱাৰ পৰিকল্পনা কৰিছে ভাৰতীয় ৰে’ল বিভাগে৷

The post এইবাৰ দেশত চলিব হাইড্র’জেন ট্রেইন, হাৰিয়ানাত সফল পৰীক্ষা first appeared on নিয়মীয়া বাৰ্তা.

ডিজিটেল ডেস্ক, ২৬ জুন : ভূঁইকঁপত বিধ্বস্ত হৈ পৰিছে ভেনিজুৱেলা৷ বিশেষজ্ঞসকলে প্রকাশ কৰা মতে লেটিন আমেৰিকাৰ ইতিহাসত এটা শতিকাৰ আটাইতকৈ শক্তিশালী ভূঁইকঁপ এইটো৷ কিন্তু ভূঁইকঁপৰ জোকাৰণি অহাৰ পূর্বেই গুগলে জনাই দিছিল এক সংকেত৷ বহুতেই কৰিছে এই দাবী৷ এক্স হেণ্ডেলত বহুতেই আকৌ গুগলৰ সেই ভূঁইকঁপৰ জাননীৰ ছবিও প’ষ্ট কৰে৷

প্রতিটো আধুনিক স্মার্ট ফোনতে এটা এক্সলেৰ’মিটাৰ থাকে৷ সাধাৰণতে এই চেন্সৰটিয়ে আপোনাৰ স্মার্ট ফোনক লেণ্ডস্কেপ ম’ডত ধৰাৰ সময়ত স্ক্রীনখনক স্বয়ংক্রিয়ভাৱে ঘূৰাই দিয়ে৷ কিন্তু ইয়াৰ আৰু এটা ব্যৱহাৰো আছে৷ ই কম্পন চিনাক্ত আৰু পৰিমাপ কৰিবলৈ সক্ষম৷ যেতিয়া কোনো শক্তিশালী কম্পন অনুভূত হয় তেতিয়া ই গুগলৰ ‘এণ্ড্রইড আর্থকোৱেক এলার্টছ ছিষ্টেম’লৈ এটা সংকেত পঠিয়ায়৷ তাৰ লগতে ভূঁইকঁপৰ আনুমানিক অৱস্থানো জনাই দিয়ে৷ ইয়াৰ পিছতেই গুগলে ভূঁইকঁপৰ জাননী ফোনলৈ প্রেৰণ কৰে৷

ভূঁইকঁপ কোনো এটা মাত্র কম্পন নহয়৷ ই ঢৌৰ নিচিনাকৈ সংঘটিত হয়৷ প্রাথমিক তৰংগ বা ‘পি তৰংগ’ দ্রুতগামী গতিবেগ প্রতিছেকেণ্ডত প্রায় ৬ কিঃমিঃ৷ ছেকেণ্ডাৰী তৰংগ বা ‘এছ তৰংগ’ অপেক্ষাকৃতভাৱে দুর্বল৷ প্রতি ছেকেণ্ডত ইয়াৰ গতিবেগ প্রায় ৩–৪ কিঃমিঃ৷ কিন্তু তাৎপর্যপূর্ণভাৱে এই এছ তৰংগই অধিক ক্ষতি কৰে৷ ইয়াৰ অর্থ হ’ল আমাৰ ফোনে ‘পি ৱেভ’ চিনাক্ত কৰিবলৈ সক্ষম৷ ইয়াৰ জৰিয়তে ই নির্ধাৰণ কৰিব পাৰে যে ভূঁইকঁপ আহিছে৷ তাৰ পিছত ক্ষিপ্রতাৰে সেই কথা গুগল ছার্ভাৰক সংকেতৰ জৰিয়তে জনাই দিয়ে৷ যিহেতু ফোনৰ পৰা যোৱা সংকেত পোহৰৰ গতিৰে পৰিবাহিত হয়, সেয়েহে গুগলে তাক চালিজাৰি চোৱাৰ যথেষ্ট সময় পায়৷ ফলত আগেভাগে ভূঁইকঁপৰ খবৰ জনাবলৈ সক্ষম হয়৷ সেইদৰে গুগলে গোটেই প্রক্রিয়াটো সম্পন্ন কৰে৷

The post ভূঁইকঁপৰ পূর্বে ভেনিজুৱেলাক সতর্ক কৰি দিছিল গুগলে first appeared on নিয়মীয়া বাৰ্তা.

ডিজিটেল ডেস্ক, ২১ জুন : হিজাব নিপিন্ধাৰ অপৰাধত এইবাৰ মধ্যযুগীয় শাস্তি প্রদান কৰা হ’ল ইৰানৰ এগৰাকী গায়িকাক৷

জানিব পৰা মতে, পাৰাস্তু আহমাদি নামৰ গায়িকাগৰাকীক ইতিপূর্বে গ্রেপ্তাৰ কৰা হৈছিল৷ এইবাৰ তেওঁক ৭৪বাৰ চাবুক মৰাৰ শাস্তি দিছে ইৰানৰ আদালতে৷ ২০২৪ চনত নিজৰ ইউটিউব চেনেলত এক অনলাইন কনছার্টত হিজাব নিপিন্ধাকৈ গান গাইছিল তেওঁ৷ তাতেই ক্ষুব্ধ ইৰানৰ মোল্লাতন্ত্র৷

তাৰ পিছতেই তেওঁক গ্রেপ্তাৰ কৰা হয়৷ কোম প্রদেশৰ আদালতে বিচাৰ কৰি তেওঁক এই অপৰাধত ৭৪বাৰ চাবুক মৰাৰ শাস্তি প্রদান কৰে৷

The post ইৰানত গায়িকাক ৭৪ চাবুকৰ শাস্তি… first appeared on নিয়মীয়া বাৰ্তা.

ডিজিটেল ডেস্ক, ২১ জুন : ৰাজ্যৰ আন্তঃৰাষ্ট্রীয় পর্যটন আৰু গ্রাম্য অর্থনীতিলৈ ইতিবাচক বার্তা কঢ়িয়াই ইউৰোপীয়ান ইউনিয়নে আনুষ্ঠানিকভাৱে প্রত্যাহাৰ কৰিলে দীর্ঘদিনীয়া ভ্রমণৰ নিষেধাজ্ঞা৷ অশান্ত অঞ্চল হিচাপে ইউৰোপীয়ান ইউনিয়নৰ দেশসমূহৰ নাগৰিকসকলক অসম ভ্রমণ নকৰিবলৈ পূর্বে জাৰি কৰি ৰখা নিষেধাজ্ঞা প্রত্যাহাৰে স্বাভাৱিকতে ৰাজ্যৰ পর্যটন অর্থনীতিলৈ নমাই আনিছে আশাৰ বতৰা৷ ৰাজ্যবাসীক শনিবাৰে এই সুখবৰ দিলে মুখ্যমন্ত্রী ড০ হিমন্ত বিশ্ব শর্মাই৷

শনিবাৰে ফেচবুক লাইভযোগে ৰাজ্যবাসীক এই সুখবৰ প্রদান কৰি মুখ্যমন্ত্রী ড০ শর্মাৰ মন্তব্য– ইউৰোপীয়ান ইউনিয়নৰ ২৭খন ৰাষ্ট্রৰ বাবে অসম ভ্রমণত নাথাকিব প্রতিবন্ধকতা৷ আমি আনুষ্ঠানিকভাৱে এখন প্রমাণ–পত্র লাভ কৰিলোঁ৷ উল্লেখ্য যে বিদ্রোহী সংগঠনৰ কার্যকলাপৰ বাবে অসম তথা উত্তৰ–পূবৰ ৰাজ্যসমূহ ভ্রমণৰ ক্ষেত্রত ইউৰোপীয়ান ইউনিয়নৰ ২৭খন ৰাষ্ট্র ক্রমে– অষ্ট্রিয়া, বেলজিয়াম, বুলগেৰিয়া, ক্র’ৱেচিয়া, ডেনমার্ক, চেক ৰিপাব্লিক, এষ্ট’নিয়া, ফিনলেণ্ড, ফ্রান্স, জার্মানী, গ্রীচ, হাংগেৰী, আয়াৰলেণ্ড, ইটালী, লাটভিয়া, লিথুনিয়া, মাল্টা, নেদাৰলেণ্ড, পোলেণ্ড, পর্তুগাল, ৰোমানিয়া, শ্ল’ভাকিয়া, শ্ল’ভেনিয়া, স্পেইন, ছুইডেন, ছাইপ্রাছ আৰু লাক্সেমবার্গৰ নাগৰিকসকলক অসম ভ্রমণৰ ক্ষেত্রত প্রতিবন্ধকতা জাৰি কৰা হৈছিল৷ এই দেশকেইখনৰ লগতে আমেৰিকা, কানাডা আৰু গ্রেট ব্রিটেইনৰ নাগৰিককো অসম ভ্রমণৰ ক্ষেত্রত জাৰি কৰা হৈছিল প্রতিবন্ধকতা৷ এনে প্রতিবন্ধকতাই অসমৰ পর্যটন উদ্যোগলৈ নমাই আনিছিল নিৰাশা৷

শনিবাৰে ফেচবুক লাইভযোগে এই প্রতিবন্ধকতা আঁতৰি যোৱাৰ কথা ঘোষণা কৰি মুখ্যমন্ত্রী ড০ হিমন্ত বিশ্ব শর্মাই কয়– ইউৰোপীয়ান ইউনিয়নৰ ৰাষ্ট্রদূত হার্ভে ডেলফিনে কিছুদিন পূর্বে গুৱাহাটীলৈ আহিছিল৷ হার্ভে ডেলফিনে অসম চৰকাৰৰ মুখ্য সচিবলৈ এক বার্তা প্রেৰণ কৰি ইউৰোপীয়ান ইউনিয়নে দীর্ঘদিন ধৰি তেওঁলোকৰ দেশৰ পর্যটকসকলক যি বাধা প্রদান কৰিছিল বা সতর্ক প্রদান কৰিছিল, সেই প্রতিবন্ধকতা প্রত্যাহাৰৰ কথা ঘোষণা কৰে৷ পূর্বে অসমলৈ অহাৰ ক্ষেত্রত বাধা প্রদান কৰি অসম এখন সন্ত্রাসজর্জৰ ৰাজ্য, তালৈ পর্যটকসকল নোযোৱা ভাল আৰু গ’লেও যথেষ্ট সতর্ক হৈ থকাৰ প্রয়োজন ৷ ইউৰোপীয়ান ইউনিয়নৰ ভাৰতস্থিত ৰাষ্ট্রদূতে মুখ্য সচিবক বার্তাযোগে উল্লেখ কৰে যে অসমৰ পৰিৱেশ আৰু পৰিস্থিতি পর্যালোচনা কৰাৰ পিছত ইউৰোপীয়ান ইউনিয়নে অসম ভ্রমণৰ ক্ষেত্রত তেওঁলোকৰ দেশৰ নাগৰিকসকলৰ ওপৰত থকা প্রতিবন্ধকতা আনুষ্ঠানিকভাৱে প্রত্যাহাৰ কৰিছে৷

এই সুখবৰ ৰাজ্যবাসীক অৱগত কৰি ফেচবুক লাইভযোগে মুখ্যমন্ত্রীয়ে পুনৰ কয়– ইয়াৰ অর্থ হ’ল ইউৰোপীয়ান ইউনিয়ন বুলি ক’লে আমি ২৭খন ৰাষ্ট্রৰ এটা গোটক বুজো৷ এতিয়াৰে পৰা এই ২৭খন ৰাষ্ট্রৰ নাগৰিকৰ ওপৰত যি সতর্কবাণী আছিল বা সীমাবদ্ধতা আছিল, তাক প্রত্যাহাৰ কৰা হৈছে৷ অৱশ্যে অশান্ত অঞ্চল আইন এতিয়া প্রযোজ্য হৈ থকা চৰাইদেউ, ডিব্রুগড় আৰু তিনিচুকীয়াৰ ক্ষেত্রত এই প্রতিবন্ধকতা এতিয়াও প্রত্যাহাৰ কৰা নাই৷ এডভাণ্টেজ আছাম–২.০ৰ সময়ত বিভিন্ন ৰাষ্ট্রৰ দূতাৱাসসমূহৰ সৈতে যোগাযোগ কৰি অৱগত কৰা হৈছিল যে অসম এতিয়া যথেষ্ট শান্ত, ৰাজ্যখনৰ পৰিৱেশ যথেষ্ট ভাল, গতিকে আপোনালোকৰ পর্যটকসকলক এতিয়া আমাৰ ৰাজ্যলৈ আহিবলৈ অনুমতি দিব পাৰে৷ সেই সময়তে অসমৰ অনুৰোধ ৰক্ষা কৰি অষ্ট্রেলিয়া আৰু জাপানে অসম ভ্রমণত তেওঁলোকৰ নাগৰিকৰ ওপৰত থকা প্রতিবন্ধকতা প্রত্যাহাৰ কৰিছিল৷ কিন্তু ইউৰোপীয়ান ইউনিয়নে এই প্রতিবন্ধকতা প্রত্যাহাৰ নকৰাৰ বাবে সমগ্র ইউৰোপৰ পর্যটকসকল অসমলৈ আহিব পৰা নাছিল৷ বহু প্রচেষ্টাৰ মূৰত অসমে আৰু এটা সফলতা লাভ কৰিলে৷ এতিয়া ইউৰোপীয়ান ইউনিয়নৰ অন্তর্গত ২৭খন ৰাষ্ট্রৰ নাগৰিকসকলে অসমলৈ পর্যটনৰ বাবে আহিব পাৰিব৷ ৰাজ্যখনৰ প্রাকৃতিক প্রাচুর্য উপভোগ কৰাৰ লগতে এই পর্যটকসকলে কাজিৰঙা, মানস, শিৱসাগৰ, যোৰহাট, কোকৰাঝাৰ, বৰাক উপত্যকাত সকলোতে তেওঁলোকে যাব পাৰিব৷ আমাৰ বাবে ই এক আনন্দৰ দিন৷ কাৰণ বিদেশী ৰাষ্ট্রই যেতিয়া এখন ৰাজ্যক অশান্তজর্জৰ বুলি কয়, সেই ৰাজ্যখনত বিনিয়োগ, পর্যটন সম্পূর্ণৰূপে বন্ধ হৈ পৰে৷ ক’ব নোৱাৰাকৈ ৰাজ্যখনে আর্থিক লোকচানৰ সন্মুখীন হয়৷ ইউৰোপীয়ান ইউনিয়নে এই প্রতিবন্ধকতা দূৰ কৰাৰ লগে লগে আনুষ্ঠানিকভাৱে আমি এখন প্রমাণ–পত্র লাভ কৰিলোঁ৷ ইয়াৰ দ্বাৰা প্রমাণ হ’ল যে অসম এতিয়া অশান্তজর্জৰ ৰাজ্য নহয় আৰু বিদেশী ৰাষ্ট্রৰ নাগৰিকসকল অসমলৈ আহিব পাৰে, থাকিব পাৰে৷ এই সিদ্ধান্তটোৰ ফলত আমি যথেষ্ট লাভৱান্বিত হ’ম৷ ফেচবুক লাইভৰ মূল উদ্দেশ্য এয়াই বুলি উল্লেখ কৰি মুখ্যমন্ত্রীয়ে কয়– এই সিদ্ধান্তৰ ফলত অসমলৈ পর্যটনৰ সোঁত ব’ব৷ পর্যটনৰ এনে সোঁতৰ বাবেই ৰাজ্যত বিদেশী পর্যটক বা দেশীয় পর্যটকক থাকিবলৈ বা আতিথ্য দিবলৈ বহু ব্যৱস্থা আমি গ্রহণ কৰিব লাগিব৷

The post ইউৰোপৰ ২৭ দেশৰ পর্যটকে ভ্রমণ কৰিব পাৰিব অসম first appeared on নিয়মীয়া বাৰ্তা.

ডিজিটেল ডেস্ক, ১৪ জুন : দীর্ঘদিনীয়া সামৰিক সংঘাতে জর্জৰিত কৰা পশ্চিম এছিয়ালৈ শান্তি ঘূৰি অহাৰ ইংগিতে ভাৰতীয় অর্থনীতিত ইতিবাচক প্রভাৱ পেলাইছে৷ আমেৰিকা আৰু ইৰানৰ মাজত চলি থকা যুদ্ধৰ অন্ত পৰাৰ ইংগিতেৰে মার্কিন ৰাষ্ট্রপতি ড’নাল্ড ট্রাম্পৰ বিশেষ ঘোষণাৰ পিছতে আন্তঃৰাষ্ট্রীয় বজাৰত খাৰুৱা তেলাৰ মূল্য ব্যাপকভাৱে হ্রাস পাইছে৷

বৃহস্পতিবাৰে অ’ভেল অফিচত সংবাদ মাধ্যমৰ সন্মুখত ট্রাম্পে দাবী কৰে যে তেহৰানৰ সৈতে যুদ্ধবিৰতিৰ চুক্তিৰ খচৰা চূড়ান্ত হৈ উঠিছে আৰু অহা এসপ্তাহমানৰ ভিতৰতে চূড়ান্ত চুক্তি স্বাক্ষৰিত হ’ব৷ এই চুক্তিমর্মে ইৰানে নিজৰ পাৰমাণৱিক কার্যসূচী সম্পূর্ণভাৱে বন্ধ কৰিব আৰু কৌশলগতভাৱে গুৰুত্বপূর্ণ হৰমুজ প্রণালী পুনৰ সকলোৰে বাবে মুকলি কৰি দিয়া হ’ব৷ মার্কিন ৰাষ্ট্রপতিগৰাকীৰ এই ঘোষণাৰ পিছতে বিশ্ব বজাৰত ব্রেণ্ট কুডৰ মূল্য প্রায় ৪ শতাংশ পর্যন্ত হ্রাস পাই প্রতি বেৰেলত ৮৫ ডলাৰৰ তললৈ নামি যায়৷ এই মূল্য বিগত দুমাহৰ ভিতৰত সর্বনিম্ন হিচাপে বিবেচিত হৈছে৷ বিশ্বৰ অন্যতম বৃহৎ তেল আমদানিকাৰক দেশ হোৱাৰ বাবে খাৰুৱা তেলৰ এই মূল্য হ্রাসে ভাৰতৰ বাবে এক আশাপ্রদ পৰিৱেশৰ সৃষ্টি কৰিছে৷

তেল ক্রয় কৰিবলৈ ভাৰতে খৰচ কৰিবলগীয়া ডলাৰৰ পৰিমাণ হ্রাস পোৱাৰ লগে লগে আন্তঃৰাষ্ট্রীয় বজাৰত আমেৰিকান ডলাৰৰ বিপৰীতে ভাৰতীয় মুদ্রাৰ মূল্যও উল্লেখযোগ্যভাৱে শক্তিশালী হৈ উঠিছে৷ ১২ জুনত প্রতি ডলাৰৰ বিপৰীতে ভাৰতীয় মুদ্রাৰ মূল্য হয়গৈ ৯৫.১০ টকা৷ ১১ জুনত এই মূল্য আছিল ৯৫.৭৬ টকা৷ টকাৰ এই মূল্যৰ উত্থানে দেশৰ সামগ্রিক আমদানি ব্যয় বহুখিনি হ্রাস কৰিব৷ যাৰ ফলত পেট্র’ল–ডিজেলৰ লগতে অন্যান্য জৰুৰী সামগ্রীৰ মূল্যও নিয়ন্ত্রণলৈ অহাৰ সম্ভাৱনা প্রকট হৈ উঠিছে৷ ই দেশৰ মুদ্রাস্ফীতি ৰোধ কৰাৰ লগতে অর্থনীতিৰ ওপৰত পৰা চাপ হ্রাস কৰাত বিশেষভাৱে সহায় কৰিব৷

ভাৰতীয় মুদ্রাৰ শক্তিশালী স্থিতি আৰু তেলৰ মূল্য হ্রাসৰ এই ইতিবাচক খবৰে দেশৰ শ্বেয়াৰ বজাৰতো এক অভূতপূর্ব জোৱাৰৰ সৃষ্টি কৰিছে৷ শুকুৰবাৰে গোলকীয় বজাৰৰ গতি অনুসৰি মুম্বাইৰ শ্বেয়াৰ বজাৰত ঐতিহাসিক উত্থান পৰিলক্ষিত হয়৷ ছেনছেক্স ২.৩০ শতাংশ বৃদ্ধিৰে ১,৬৯৫.৪০ পইণ্ট বৃদ্ধি পাই দিনান্তত ৭৫,৫২৭.৯৫ পইণ্ট হয়গৈ৷ একেদৰে নিফ্টিও ৪৬১.৩০ পইণ্ট বৃদ্ধি পাই দিনান্তত ২৩,৬৪৫.৩৫ হয়গৈ৷ আমেৰিকাৰ ৰাষ্ট্রপতিয়ে দাবী কৰিলেও তেহৰানে খচৰা চুক্তিক এক অনুমানমূলক বুলিহে অভিহিত কৰিছে৷ ৰাজনৈতিক বিশেষজ্ঞসকলৰ মতে, ইৰানৰ ওপৰত চাপ সৃষ্টি কৰিবলগীয়া ট্রাম্পে এই কৌশল অৱলম্বন কৰিছে৷ বিশ্লেষকসকলে আশংকা প্রকাশ কৰিছে যে যদিহে জুলাইৰ ভিতৰত হৰমুজ প্রণালীৰে তেল সৰবৰাহ স্বাভাৱিক নহয়, তেন্তে খাৰুৱা তেলৰ মূল্য প্রতি বেৰেলত পুনৰ ১২০ৰ পৰা ১৩০ ডলাৰলৈ বৃদ্ধি পোৱাৰ সম্ভাৱনা আছে৷

The post পশ্চিম এছিয়াত যুদ্ধৰ অৱসানৰ ইংগিত, আন্তঃৰাষ্ট্রীয় বজাৰত খাৰুৱা তেলৰ মূল্য হ্রাস first appeared on নিয়মীয়া বাৰ্তা.