নিয়মীয়া বার্তা, ১৬ মার্চঃ ড্রাগছ মাফিয়াৰ আক্রমণৰ লক্ষ্য হৈ পৰিছে আৰক্ষী ৷ সোমবাৰে সন্ধিয়া প্রায় ৭.৩০বজাত নগাঁও চহৰৰ পার্শ্চৱর্তী ম’হখুলিত ড্রাগছবিৰোধী অভিযান চলোৱা আৰক্ষীক আক্রমণ চলায় ড্রাগছ মাফিয়াই ৷ ড্রাগছ মাফিয়াৰ আক্রমণত লক্ষ্যজ্যোতি বৰা নামৰ এজন পুলিচ কনিষ্টবল আহত হয় ৷ আনকি ড্রাগছ মাফিয়াৰ দলে অভিযানকাৰী আৰক্ষী দলটোৰ নেতৃত্ব বহন কৰা সহকাৰী উপ–পৰিদর্শক বিপ্লৱ কোঁৱৰৰ পিষ্টলটোও কাঢ়ি নিয়ে ৷ আৰক্ষী সূত্র মতে, এক গোপন সূত্রৰ খবৰৰ ভিত্তিত সোমবাৰে সন্ধিয়া ম’হখুলিৰ এম আই এণ্টাৰপ্রাইজ নামৰ এক প্রতিষ্ঠানত ৰূপহী আৰক্ষী থানাৰ আৰক্ষীৰ এটা দলে অভিযান চলাইছিল ৷ আৰক্ষীয়ে প্রতিষ্ঠানটোত ড্রাগছৰ সন্ধানত এই অভিযান চলাইছিল ৷ কিন্তু ইয়াতে ক্ষুণ্ণ হৈ পৰে প্রতিষ্ঠানটোৰ স্বত্বাধিকাৰজন ৷ আভিযানকাৰী আৰক্ষীৰ দলটোব্যৱসায়িক প্রতিষ্ঠানটোত প্রৱেশ কৰাৰ লগে লগেই স্বত্বাধিকাৰ ইমতাজ আলীয়ে ফোন কৰি একাংশ সতীর্থক মাতি আনে ৷ পিছত তেওঁলোকে প্রতিষ্ঠানটোৰ চাটাৰখন বন্ধ কৰি লৈ অভিযানকাৰী আৰক্ষীৰ দলটোৰ ওপৰত জঁপিয়াই পৰে৷ আক্রমণকাৰী দলটোৱে পুলিচৰ দলটোক আবদ্ধ কৰি ‘ডকাইত, ডকাইত’বুলি চিঞৰি তেওঁলোকক আক্রমণ কৰিবলৈ সকলোকে প্রৰোচিত কৰে ৷ তেনে সময়তে আক্রমণকাৰী দলটোৱে আৰক্ষী বিষয়া বিপ্লৱ কোঁৱৰৰ পিষ্টলটো কাঢ়ি লৈ পলায়ণ কৰে ৷ আনহাতে দলটোৰ আক্রমণত কনিষ্টবল লক্ষ্যজ্যোতি বৰা আহত হয়৷ এই ঘটনাৰ খবৰ পোৱাৰ পিছত নগাঁও আৰক্ষীৰ উচ্চপদস্থ আৰক্ষী বিষয়া গৈ ঘটনাস্থলীত উপস্থিত হৈ পৰিস্থিতিৰ বুজ লয়৷ আৰক্ষীয়ে ড্রাগছ মাফিয়াৰ দলটোৰ সন্ধানত অভিযান আৰম্ভ কৰিছে ৷ ইপিনে, ঘটনাস্থলীত চি আৰ পি মোতায়েন কৰা হৈছে ৷ আনহাতে আৰক্ষীয়ে অভিযান চলাই ঘটনা সন্দর্ভত ইমতিয়াজ আলীৰ ভতিজা আমিৰ হামজাক আটক কৰে ৷