নিয়মীয়া বার্তা, ১১ নৱেম্বৰঃ ক’ৰোনা মহামাৰীৰ মাজতো আইপিএলৰ উৎসাহ কোনোগুণে কমা নাই। দীঘলীয়া প্রতীক্ষাৰ অন্তত আৰম্ভণি হোৱা ত্রয়োদশ সংস্কৰণৰ আইপিএলৰ অৱশেষত মঙলবাৰে সামৰণি পৰিল৷ মহামাৰী ক’ৰোনা ভাইৰাছে সৃষ্টি কৰা জটিল পৰিস্থিতিৰ বাবে ভাৰতৰ সলনি ইউনাইটেড আৰব এমিৰেটছত অনুষ্ঠিত হৈছিল এইবাৰৰ আইপিএল।
ইয়াৰ মাজতে এটা প্ৰশ্নই সকলো ক্ৰীড়াপ্ৰেমীৰে মনত আশ্ৰয় লৈছে যে অহা বছৰ আইপিএল ভাৰততে অনুষ্ঠিত হ’বনে?
বিচিচিআইৰ সভাপতি সৌৰভ গাংগুলী অৱশ্যে আশাবাদী যে ২০২১ চনৰ আইপিএল এপ্রিল-মে মাহত ভাৰততেই অনুষ্ঠিত হ’ব। এক সাক্ষাৎকাৰত তেওঁ কয়, ” আশা কৰা গৈছে যে অহাবছৰ আইপিএলৰ পূৰ্বেই ক’ৰোনা ভাইৰাছৰ ভেকচিন বজাৰলৈ আহিব। যাৰ বাবে ভাৰততেই টুর্নামেন্ট আয়োজন কৰিব পৰা যাব।”