নিয়মীয়া বাৰ্তা, ৯ ডিচেম্বৰঃ হোটেলত মৃত অৱস্থাত উদ্ধাৰ হ’ল এগৰাকী অভিনেত্রীৰ দেহ। আজি পুৱা চেন্নাইৰ এখন হোটেলত তামিল অভিনেত্রী ভি জে চিত্রাৰ মৃতদেহ উদ্ধাৰৰ ঘটনাই চাঞ্চল্যৰ সৃষ্টি কৰিছে। সংবাদ সংস্থা এএনআইৰ সূত্র অনুসৰি, আজি পুৱা হোটেল পৰিচাৰিকাই মৃত অৱস্থাত দেখি আৰক্ষীক খবৰ দিয়ে।
ঘটনাস্থলীত আৰক্ষী উপস্থিত হোৱাৰ পিছত মৃতদেহ মৰণোত্তৰ পৰীক্ষাৰ বাবে পঠিয়াই দিয়া হয়। আৰক্ষীয়ে এয়া আত্মহত্যা বুলি সন্দেহ প্ৰকাশ কৰিছে। জনপ্রিয় অভিনেত্রীগৰাকীয়ে কিয় এই পন্থা ল’লে তাক লৈ কোনো কথা জানিব পৰা হোৱা নাই। কোনো ছুইচাইড নোটো উদ্ধাৰ কৰিব পৰা যোৱা যায়।
জানিব পৰা মতে, শ্বুটিঙৰ কামত ব্যস্ত থকা অভিনেত্ৰীগৰাকীয়ে কালি নিশা দেৰিকৈ হোটেলত প্ৰৱেশ কৰিছিল যদিও পুৱা মৃত অৱস্থাত পোৱা যায়। হোটেলত স্বামী হেমন্তৰ লগতে আছিল অভিনেত্রীগৰাকী।
পাণ্ডিয়ান ষ্টোৰ্ছ নামৰ এক জনপ্রিয় শ্ব’ৰ জৰিয়তে বিখ্যাত হৈ পৰিছিল ভি জে চিত্ৰা। ২৮ বছৰীয়া অভিনেত্ৰীগৰাকীক হত্যা কৰাৰো সন্দেহ ব্যক্ত কৰিছে অনেক অনুৰাগীয়ে। আৰক্ষীয়ে প্ৰাথমিক তদন্তত বিশেষ সন্দেহজনক দিশ দেখিবলৈ পোৱা নাই যদিও মৰণোত্তৰ প্ৰতিবেদনৰ ভিত্তিত তদন্ত আগবাঢ়িব বুলি জানিব পৰা গৈছে।