নিয়মীয়া বাৰ্তা ৩১ ডিচেম্বৰঃ টীম ইণ্ডিয়াৰ বিস্ফোৰক অ’পেনাৰ ৰোহিত শর্মাৰ বাবে ২০১৯ বর্ষটো অনন্য সাফল্যৰ বর্ষ হিচাপে স্মৰণীয় হৈ ৰ’ব৷ দুর্দান্ত বেটিঙেৰে এই বছৰটোত তেওঁ এদিনীয়া ক্রিকেটত সর্বাধিক ৰানৰ গৰাকী হিচাপে পৰিগণিত হৈছে৷ এইক্ষেত্রত তেওঁ টীম ইণ্ডিয়াৰ অধিনায়ক বিৰাট কোহলিৰ পৰা তীব্র প্রত্যাহ্বান লাভ কৰিছিল যদিও শেষ মুহূর্তত ৰোহিতে সর্বাধিক এদিনীয়া ৰানেৰে ২০১৯ বর্ষ সামৰিবলৈ সক্ষম হয়৷ এই বর্ষটোত তেওঁ মুঠ ২৮খন এদিনীয়াত গড় ৫৭কৈ মুঠ ১৪৯০ ৰান সংগ্রহ কৰে৷ ইয়াৰ ভিতৰত আছে সাতটা শতক আৰু ৬টা অর্ধশতকীয় ইনিংছ৷ চলিত বছৰটোত ৰোহিতে অষ্ট্রেলিয়া, দক্ষিণ আফ্রিকা, পাকিস্তান, ইংলেণ্ড, বাংলাদেশ, শ্রীলংকা আৰু ৱেষ্ট ইণ্ডিজৰ বিৰুদ্ধে শতক অর্জন কৰে৷ এই সময়ছোৱাত তেওঁ ১৪৬টা বাউণ্ডেৰী আৰু ৩৬টা ছিক্সাৰ কোবাবলৈ সক্ষম হয়৷ উল্লেখ্য যে ২০১৭ আৰু ১৮ বর্ষত অধিনায়ক কোহলিৰ পিছতে ৰোহিতে এদিনীয়াত দ্বিতীয় সর্বাধিক ৰান সংগ্রহ কৰিছিল৷ এইবাৰ কোহলিয়ে মুঠ ২৬খন এদিনীয়াত গড় ৫৯কৈ মুঠ ১৩৭৭ ৰান সংগ্রহ কৰে৷ ইয়াৰ ভিতৰত আছে পাঁচটা শতক আৰু সাতটা অর্ধশতক৷ ভাৰতীয় ক্রিকেটৰ ৰান মেচিন হিচাপে পৰিচিত তাৰকা বেটছমেনগৰাকীয়ে অষ্ট্রেলিয়াৰ বিৰুদ্ধে তিনিটা আৰু ৱেষ্ট ইণ্ডিজৰ বিৰুদ্ধে দুটা শতক অর্জন কৰে৷ এই তালিকাৰ তৃতীয় স্থানত আছে ৱেষ্ট ইণ্ডিজৰ উদীয়মান বেটছমেন ছাই হ’প৷ তেওঁ ২৮খন এদিনীয়াত গড় ৬১কৈ মুঠ ১৩৪৫ ৰান সংগ্রহ কৰিবলৈ সক্ষম হৈছে৷ ২০১৯ বর্ষটোত সর্বাধিক এদিনীয়া ৰান সংগ্রহ কৰা আন দুগৰাকী বেটছমেন হ’ল অষ্ট্রেলিয়াৰ আৰন ফিনছ আৰু পাকিস্তানৰ বাবৰ আজম৷ ফিনছে ২৩খন এদিনীয়াত গড় ৫১কৈ ১১৪১ ৰান সংগ্রহ কৰে৷ ইয়াৰ ভিতৰত আছে চাৰিটা শতক আৰু ৬টা অর্ধশতক৷ ইফালে, বাবৰ আজমে ২০খন এদিনীয়াত গড় ৬০কৈ ১০৯১ ৰান সংগ্রহ কৰিবলৈ সক্ষম হয়৷