নিয়মীয়া বাৰ্তা, ২২ জানুৱাৰীঃ প্রথম শ্রেণীৰ ক্রিকেটত অসমৰ হৈ সর্বাধিক উইকেট দখল কৰা বলাৰ হিচাপে পৰিগণিত হৈছে বৰপেটাৰ প্রতিভাৱান বেগী বলাৰ অৰূপ দাস৷
বর্ষাপাৰা ষ্টেডিয়ামত মহাৰাষ্ট্রৰ বিৰুদ্ধে খেলি থকা ৰঞ্জি ট্রফীৰ গ্রুপ চিৰ মেচখনৰ মঙলবাৰে তৃতীয় দিনা ২৮ বছৰীয়া বলাৰজনে প্রাক্তন অফ স্পীনাৰ অর্লেন কোঁৱৰক অতিক্রম কৰি এই অভিলেখৰ গৰাকী হয়৷
মহাৰাষ্ট্রৰ এ পালকাৰক এল বি ডব্লিউ আউট কৰি অৰূপে অসমৰ হৈ সর্বাধিক ২১৩ টা উইকেট দখলৰ কৃতিত্ব অর্জন কৰে৷ ৬০খন প্রথম শ্রেণীৰ মেচত তেওঁ এই মাইলষ্ট’নত উপনীত হয়৷ ইয়াৰ পূর্বে অর্লেনে ৬৯খন প্রথম শ্রেণীৰ মেচত ২১২টা উইকেট দখল কৰিবলৈ সক্ষম হৈছিল৷
উল্লেখ্য যে ২০১১ ৰ নৱেম্বৰত ঝাৰখণ্ডৰ বিৰুদ্ধে অৰূপ দাসে অসমৰ হৈ অভিষেক ঘটাইছিল৷